Efesus 3
3
Wene Allah ogola hisogo welaga a’ge Paulus en aphwami o’borl o’gwe a’ge mo’gulontouwagoluk yo’go pesi wene
1Ai en e, an Paulus his aphwami o’borl o’gwe a’ge Kristus Yesus en delhonobuagoluk, at ebaget ne’gik herle wusogo nebegesema welegi o. 2Aphwami en e,
“Allah ebabut op ano en, is aphwami o Efesus a’ge op emagoluk, at Paulus yo’go pesimu op wene mo’gulentil denago yo,” oluk ogwiam henesa’go arat hweligep epegi o. 3Wene at Allah ogola hisogo welaga a’ge ai, an ’baksogo mo’gulnesi, oluk, pelal horoksogoat wokho mo’gulhentegis ai o. 4#Kol. 1:26,27His en wene ai onuk mo’gulogulat e,
“Wene Kristus ebaget hisogo welaga a’ge ai, at Paulus aluk agarik oruak o,” oluk, enagat pobi togup ai. 5Pageat e, wene ai aphwami logon ’baksogo mo’gulonto erlakma, eneperlagat welegesema re, yogodak Allah Arogun en, is ap Allah eiyagai Yesus en yo’go onoboluk peragenebesi a’ge ebano emin, Allah iak mo’gulontogwi a’ge ebano emin, ’baksogo mo’gulentesimu enaluk aga ai, wene ebe re, disogo. 6Op wene ai pam, is aphwami o’borl o’gwe a’ge emin, Yahudi a’ge emin, enemin hegitsogoat eiye agalat, Kristus ebe mesigat a’ge nenemin hegitsogo hwedik taknenebasulat, tegeimu welege o. Wene pageat Allah en,
“Disogo takhenebaik o,” oluk, obok mo’gulnentesi a’ge ano pam,
“Aphwami o’borl o’gwe a’ge Kristus Yesus emin hwedik oruakma, op wene ai pam nenemin hegitsogo taknonobouwa o,” oluk, nenaluk aga ai o. 7An aphwami eneragam a’ge ’gela’ge welat, wene ai so’burentasu lemagoluk, Allah ebabut op en annisogo taknenebasu hegitsogoat yo’go nebesi ai o. 8Allah eiyagai a’ge ’berlegat ononuk oruakhweat de, an nonuk erlak, mia a’ge, at Allah ebabut op en, op wene ’beli’gogo u mia a’ge, Kristus en wogentasu a’ge ano aphwami o’borl o’gwe a’ge mo’gulentil nese lemagoluk yo’go noboluk niabuk aiat, woknesimu welegi o. 9-10At Allah di a’ge yu a’ge ’berlegat walhesi a’ge ano en epasulat e,
Ebe disogo ema, oluk, wene ogola hisogo welaga a’ge, aphwami ’berlegat selakma ’baksogo mo’gulentil nese lemagoluk yo’go nebesi ai o. Ye, is malaikat ’bogorl petne yo’go no’gwi a’ge ebano onuelak ’gain a’ge emin, eniak hologo welagai a’ge emin, nis Allah eiyagai en e,
“At Allah di paget yu paget ede modok ’gagalak o,” oluk e, mo’gulentasukhwe yogodak ya enaluk emagoluk, page enat wene ai Allah ogola hisogo modok welaga o. 11Edip pam en, at Allah en asogo taknenebaigoluk ede epesi a’ge ano, at nonue ’gain Onuk Logo a’ge Kristus Yesus en tuagoluk perakpou wagama, ebe tegei ai o. 12Nis nenede at ebam he’berik poluk, at emin hwedik welat, nonogorlok erlaksogo nenede ha’buksogo Allah e’bek ’gwilo ai o. 13Ai en e, an yogodak ya his henebaget wiagapnobogwi ai en henede ’buk om erlakma en wolorogup holuk, obaphonobua ai en e, henesa’go wusogo mo’gulhentegis ai o.
At Paulus en Allah yo’go pasulat,
ebe erliktagalat, egei wene
14Ai enat, an Nenaik ilem nodogorlu pam hweriogo welat yo’go pasu legi o. 15Is ’bogorl pam welagai a’ge emin, nis ’gwiangma yema welege a’ge emin, nenaiklak lo’bok mo’gulontogulat,
“Naik,” oluk ogu lege ai, nenaik edip Allah a’ge ebam elitsogo ogu lege ai o. 16At Allah di a’ge yu a’ge ilmu ’bullak oluk u ’gela’ge, erliktogwi modok welagai ano en, Arogun pam henannisogo henede hurleaphonobuagoluk yo’go pasu legi o. 17Henede at Kristus ebam he’berik poma, at ebe honogola owi wusogo oruakma re, di a’ge yu a’ge owi yorogwiam eme’en ’belabiselat, o wa’gi ningsogo dalogulat, togwi ’gela’ge, henebabut e, aphwami logon enebe enedesogo welagai ai a’ge pam heneme’en yogo poluk ningsogo wolorogup oluk, Allah yo’go pasu legiat o. 18-19Aphwami en o woruogoluk, hwerli yat o’gwe ai pam, horok o’gwe ai pam, dum uak lagabul ai pam, dit uak ’belabul ai pam, oluk walhogwi a’geat de, nenebe Kristus en edesogo welago ai a’ge,
“Hwerli ai pam o,” oluk walho re, mia. Logat o. Walho mia a’geat de, Allah eiyagai logon ’berlegat enemin hegitsogo pobi togup en, Allah en henede hurleap pasuam, at ebe ebesik honogola modok ’garoksogo ’beterak welemagoluk yo’go pasu legiat o.
20At Allah at erliktogu lomok o. At ebe nonogola welat annisogo taknenebasu ai re, modok logatma re, nis en nenede eberogulat, ’gonu mo’gulogulat, togu lege a’ge hegitsogo tu erlakma en, at e, di-dagan a’ge loksogo tiso ai o. 21Nis Allah eiyagai odoktak a’ge ’berlegat Kristus Yesus emin hwedik welat enebe logon pobuk a’ge ’get dagetil lagaihwe, Allah demat erliktogwi modok wolomok, oluk,
“Amin,” egi ai o.
Currently Selected:
Efesus 3: Wul
Highlight
Copy
Compare
Share
Want to have your highlights saved across all your devices? Sign up or sign in
