Ulangan 5
5
Allah iak lo pam le’gelak pesi a’ge ano togolik ’beli’gogo mo’gulentesi wene
(Keluaran 20:1-17)
1Musa en aphwami Israel a’ge ’berlegat worlentasuam odoktu agaiam, mo’gulentasulat, “His nue nari Israel a’ge yu logwe! wene le’gelak a’ge emin, tugulom a’ge wene emin, o yogodak henesa’goma pasu a’ge yu, his en e, opsogoat mo’gulhorlogulat henedemu opsogo wik-wok til lagalat, togu lorogup en mo’gulhentasu legimu re, his henesa’go opsogoat hologu lemis o. 2At nenaik Allah odom Horeb pam en wene a’bosu Arat ’belakpoluk pulogo mo’gulnentesi ani o. 3At Allah en wene a’bosu ’balogo polik pesi ano re, nene’balak emin en wene pulogo po erlak o. A’geat de, nis yogodak nenelaluk welege ya neneminat pulogo pesi o. 4Odouk magale e’gerlakma at nenaik Allah, dom pam en e, henemin honorogole mesik mu welat wene ’balegei ani o. 5His ene odouk magale din oso a’ge ano honogorlok en dom pam ligom erlak oruakma agauwa ai erlige at Allah iak oso a’ge ano his mo’gulhontouwak oluk at nenaik Allah iak oso a’ge ano his mo’gulhonto a’ge paget, at nenaik Allah abel likho, welago, ye, his abel opma welat, asogo tugukhwe, an ’burl ebayat edik welegi ani o. Asogo oruakhwe, mo’gulnesi a’ge ano togolik ’beli’gogo mo’gulhentigis a’ge ano pobuk ’baksogo mo’gulhentaik ai o.
6O Mesir eba en eneragam a’ge tagonoboluk oruakma wokhonoboluk lebegi a’ge henaik, Allah anat o.
7An oruakhweat de nebalema dogwi asua mesik edikpoluk erliktugulom mia o.
8 #
Ima. 26:1; Ula. 4:15-18; 27:15 His en di a’ge yu a’ge ’bogorl pam erabu welago a’ge emin, ’gwiangma yema welago a’ge emin, ’gwiang ogola ik laut ye’gelak a’ge lekho welago a’ge emin, ogut walhegeik ebe heli’gogo poluk. 9#Kel. 34:6,7; Bil. 14:18; Ula. 7:9,10Erliktogulat, eneragam sakhun la’gogulat, honogorlogap onobogulat, tugulom mia o. An henaik Allah an nemategat oruakhwe, nebalema dogwi asua edikpoluk, erliktogwi, holuk e, an henaik Allah en e, nebit o, oluk, nolot herap pasu legimu re, di ap yu ap en onolot het nebam pogulat nolot herap nobogulat, wiak togwi ano re, is enebe emin, enemalik enemin ene’balak emin, is pam en weiyelak a’ge emin, an en e’gin enebam pasulik a’geat de, 10is di aphwami yu aphwami, enebe ’berlegat an nebe enede en disogo tip, asogo tip, oluk, mo’gulentasu legi a’ge ano opsogo hwelak poluk togwi holuk nak e, ene’balak weiyelak a’ge emin, ’berlegat, nede hwedik tagenebasu leik o, oluk, egi o, oluk mo’gulhentegis a’ge anoat, de togolik mo’gulhentasu legi ai o.
11 #
Ima. 19:12
At henaik ’gain Allah onuk weat ogup o. Ap mesik en at Allah onuk weat il noso holuk e, at ’gain onuk logo a’ge Allah en ap ai modogat wiagap pouwa o.
12 #
Kel. 16:23-30; 31:12-14 At henaik Allah en nogo 6 takpoluk, loruk o’gwe re, an nebaget poligatma re, eberogu lomup o, oluk mo’gulhentesi a’ge ano hegitsogoat togu lomup o. 13#Kel. 23:12; 31:15; 34:21; 35:2; Ima. 23:3Agauwa I en ’bekhit 6 pam ai re, his heniabuk tugulat, di a’ge yu a’ge mesik tu a’ge holuk tugulat, tugulom obat a’geat de, 14Loruk o’gwe en e, at henaik Allah ebaget polik poluk ene pagathwerlesimu re, heneragam a’ge hwami ap henemin hegitsogoat set hwalogo welerip ene oluk his henemin, heneiyagai hwami ap enemin, honuam lembu keledai emin, honuam pema mu a’ge emin, ap ’bok mesik hene’bek wagai holuk emin, ’berlegat set hwalogo weat wolomup o. 15His o page enat o Mesir eba welat, eneragam a’ge takhonoboluk oruakma re, at henaik Allah e’gik anni ano pam takhenebasulat, e’gik dum ’bil hasu holuk takhenebasulat, til-til wokhonoboluk liplau waga a’ge ano henede eberogulat, at henaik Allah en agauwa 6 a’ge pam welagarik agauwa tabit a’ge pam set hwalogo wolom oluk mo’gulhentesi a’ge ano hegitsogo togu lomup o.
16 #
Ula. 27:16; Mat. 15:4; 19:19; Mrk. 7:10; 10:19; Luk. 18:20; Efe. 6:2-3 At Henaik Allah en hono’gwiang wokhentesimu eba welat, di wene yu wene henebam ago erlak ’hwe henebe op se’bal modok otluk waragaleripogoluk at Henaik Allah en mo’gulhentesi a’ge hegitsogoat henia henaik eniak hologo welat, eniak opsogoat hologu lomup o.
17 #
Kej. 9:6; Ima. 24:17; Mat. 5:21; 19:18; Mrk. 10:19; Luk. 18:20; Rom. 13:9; Yak. 2:11 Ap worogup.
18 #
Ima. 20:10; Mat. 5:27; 19:18; Mrk. 10:19; Luk. 18:20; Rom. 13:9; Yak. 2:11 Hwami yogunat tenentagup o.
19 #
Ima. 19:11; Mat. 19:18; Mrk. 10:19; Luk. 18:20; Rom. 13:9 Di a’ge yu a’ge yogorlia wagup o.
20 #
Kel. 23:1; Mat. 19:18; Mrk. 10:19; Luk. 18:20 His henare mesik tago a’ge ano henil opsogo ho erlakhweat de, ap uak lol enebiso a’ge iak esei a’ge emin lo’bokhegeik mo’gulonto mia o.
21 #
Rom. 7:7; 13:9 Ap mesik ugwe de a, owi werik de a iabuk yogo de a, eragam a’ge hwami ap a, uam lembu keledai a, a’ge di a’ge yu a’ge ’berlegat henede en nagai-nagai opogulom mia o.
22 #
Ibr. 12:18,19 Ye, a’geat de, his welegep a’ge ’berlegat dom edipmu oruakhwe, odouk magale lo’buk eselat, o hena a’gurlok ’gela’ge hobu ’gela’ge ningtak ligagalat, o hik eselat, tago a’ge e’gerlakma at nenaik Allah iak loksogoat. Disogo tip, asogo tip, oluk wene mo’gulhentesi a’ge hweligep ano re aiat o. Mu a’ge mesik emin welago erlak o. Wene ai arat mo’gulhentasu lagarik, helep ’biren eriano pam pelal ’balogo an woknesi ani o.
Israel onogorlok hegesa a’ge pobuk ’baksogo mo’gulentesi wene
23Pobuk dom ano pam en odouk magale lobuk osokhwe, o hiktak a’ge e’gerlakma en iak oso a’ge hwelak poluk, ap hena’gul onuk lo’bok eiye welagai a’ge ebano emin, ap honuelak wene hwalogwi a’ge ebano emin, is ’berlegat an neragam wegesarik. 24Mo’gulnegisa, nogulat, at nenaik Allah modok lok a’ge onuk logo oruak holuk e, eige! oluk ogwi a’ge ano nenil demat hogulat, odouk magale lobuk oso a’ge e’gerlakma en iak a’ge ano nenesa’go hologulat, tigema re, agauwa yogodak ya pam at Allah aphwami enemin en wene ’balogwi holuk e, aphwami warom erlakma en enelaluk wolom a’geat nenil entige o. 25Asogo a’geat de, o yogodak ya pam odouk magale lok a’ge modok lobuk hasu ya pam pela’gogo obok taknonobo a’ge oruakhweat de, no pagerat, at nenaik Allah iak oso a’ge ano nenesa’go hologukhwe, at de yat nak agoma re, nis waromulat hege o. 26At elaluk welago a’ge Allah ano odouk magale lobuk oso a’ge e’gerlakma en iak oso a’ge ano nis nenesa’go hologwi a’geat de, warom erlakma en nenebe nenelaluk welege yu ’gela’ge, ap waragai a’ge mesik sa en asogo hwelak poluk, warom erlakma en oruak epegep? 27Erlagatma re, hat Musa nak nenaik Allah iak oso a’ge ’berlegat hwelise loroguntik mo’gulhoso a’ge ebano nis mo’gulnentasu ani, nis hologulat, ebe demat togulat, tulmu re, hat hemategat, at e’bek lasu lomup o, oluk, an mo’gulnigep ani o.
28Mo’gulnigep a’ge ano, at nenaik Allah esa’go arat hwelegeitik, an mo’gulneselat, is aphwami wene hat mo’gulhogwi ai, an pageat arat hwelegismu re, is wene egesa a’ge ai ’berlegat obat o. 29Is enebe emin, eneiyagai emin, di wene yu wene enebam ago erlakma en enebe modok obat welemagoluk onogorlok niogulat, disogo tip, asogo tip, wene werak a’ge ’berlegat opsogo tenak welat togulom a’ge logwe! eige, oluk epasu legi o.
30-31Asogoatma re, o an en wogentaikmu eba isat eiye otluk wolomma eba welat, disogo tip, asogo tip, wene werak a’ge emin, wene le’gelak a’ge emin, tugulom a’ge wene emin, til laga lemagoluk, mo’gulentasulom a’ge wokheik en e, is aphwami onowi sabo lo’gwe lo’bok togolik louwak oluk mo’gulentai laguntik, pobuk togolik worogun ani o, oluk, mo’gulnosoam e, mo’gulhentigis ani o.
32Asogoatma re, at henaik Allah en e, wene le’gelogo mo’gulhentesi a’ge ai motluk lagalat, honolukhwe eden hono’borl eden tu erlakma enat, wene ai ’berlegat opsogo nak togu lomup o. 33O his eiye otluk wolomma eba welat, di wene yu wene mesik henebam om erlakma enat henebe henelaluk logon emin woloroguptik sebal modogat otluk enat waraga leripogoluk, at mesik eminsogoat woloroguptik, henaik Allah en wene le’gelogo mo’gulhentesi a’ge ai ’berlegat motluk laga lomup o,” oluk, mo’gulentesi.
Currently Selected:
Ulangan 5: Wul
Highlight
Copy
Compare
Share
Want to have your highlights saved across all your devices? Sign up or sign in
