Ulangan 3
3
Ap onuk logo a’ge Og sebelogo pegesa a’ge ano togolik mo’gulentesi wene
1Mo’gulentesirik, pobuk eminat mo’gulentasulat, “Pobuk nis ano togulogo ’gebela o Basan akhit lagaihwe aphwami Basan onue ’gain Og ano osi enesegen oruak a’ge ’berlegat enemin o Edrei hegit eba nis nenemin weim obuogoluk, liplau wegesa. 2Liplau wegesema, at nenaik Allah en an mo’gulneselat Ap Og ebe emin, at osi weim togwi a’ge enebe emin, o’gwiang emin, ’berlegat wokho hat he’gikmu pegirik wokhegismu re, aphwami Amori a’ge onue ’gain Sihon o Hesybon senentarok oruakhwe, tagenebegen ano hegitsogoat, tak pagunmu re, at ebe ai hogorlok hagun o.
3Mo’gulnesirik, at nenaik Allah en Ap o Basan onue onuk logo a’ge Og ano emin, at osi weim togwi a’ge enebe ’berlegat emin, nene’gik pam pasuam mesik nak ogo ukpo erlakma en ’berleksogoat warenebige o.
4-6Asogo waronobogulat, o agauwa ai erligeat ap ’gain Sihon eiye welagoma Hesybon di kota yu kota eba ap emin, hwami emin, malik emin, ’berlegat nis en warenebige ano ’gela’geat o Basan ap Og eiye welagoma o kota 60 enebe a’bigat onowi helep pam siatle yatsogo pak werik a’ge emin, pak werik a’ge ’goduk ’besi uak a’ge pam no’gorlik-po’gorlik lo’boksogo hele’gik a’ge emin, ye, o kota ’berlegat onowi helep pam werik erlak a’ge ebano emin, logon ukpo erlakma en o Argob dogo-erang pasegeimu eba-di kota yu kota ’berlegat moluk-melaksogo pil legerik, o ano nisat sebelhwerlege ani o. 7Asogoat takpil lege a’geat de, onuam emin, o kota kota ena’ge di a’ge yu a’ge oruak a’ge ebano emin, ’berlegat, onohogul wokho nis enat hwerlege ani o.
8Asogo tigerik, o agauwa ai erligeat, ap Amori a’ge ’gain enebe, ’biren eria, ene’gikmu a’ge ono’gwiang nis delhwerlege ano re, ik Yordan esa’go etle akhit mo il liplau wago hegit ik Arnon horoksogo legesarik dom Hermon hwerliat hwerlege o. 9Dom Hermon ai, aphwami Sidon a’ge en Dom Siryon ogulat, ye, is aphwami Amori a’ge en dom Senir ogulat, togwi a’ge o.
10O Basan eba ap ’gain Og eiye welagoma o do’go erang duelak pesimu eba logo oruak a’ge ano emin, o Gilead ’berlegat emin, horoktak poluk en legesa-legesa o Basan pam eba o Salkha emin, Edrei emin, eba hwerliat hwerlege ani o.
11Ye, o Basan eba ap onuk logo a’ge Og ai is aphwami Refaim a’ge erlak agaihwe, at omuat welaga. At ap ano re, nogoso a’ge ’besi uak a’ge pam hele’gik a’ge ano esa’go-esa’go yat akhit, meter 4 pam ye, ologun-ologun no’gorlik hebilogo, meter 2 pamat, welagama re, aphwami Amon a’ge welagaimu, onowi kota Raba eba o Yogodak ogo oruagat o,” oluk mo’gulentesi.
Ik Yordan mo il orlu ago hegit eba ono’gwiang wogentesi a’ge pobuk ’beli’gogo mo’gulentesi wene
12Mo’gulentesirik, mesik emin mo’gulentasulat, Agauwa o ai erligeat, ono’gwiang ai, nis hwerlegerik, o eba welat, an en is ena’gul onuk Ruben a’ge emin, Gad a’ge emin, ebano re, ik Arnon esa’goma o Aroer horokho o o’borl akhit o’gwe dom petne o Gilead ’gwiang ado kota-kota oruak a’ge ebano eminat, wogentasulat, 13Ye, ap a’gul onuk Manasye ado me’gerik ebano re, o Gilead ’gwiang ado is wogonto erlakma en oruak a’ge ebano emin, ap Og eiye welagoma o Basan, o Argob dogo enaregei mu eba aphwami en Refaim a’ge ono’gwiang o, oluk, ogu legesema ebano ’berlegat emin, wogentasulat, tigis o.
14Manasye omlogo Yair ano o Argob dogo enaregei mu ebano hwerlasulat, ’bekhit aphwami Gesur a’ge emin Maakha a’ge emin ono’gwiang ai hwerli ’berlegat hwerlesirik, at onuk tuelak a’ge hegitsogoat o Basan ano re, onuk Hawot-Yair at tualogo pesimu re, yogodak ogo onuk ai a’geat ogwi oruak o.
15“Ye, at Makhir ano o Gilead wogeselat. 16Ap Ruben emin, ap Gad emin, eriano re, o Gilead Abel Yema akhit en dungtak poluk ’bekhit legesa-legesa ik Arnon ’burl eba akhit takpil-pil, o ologun akhit edipmu emin, ik Yabok o’borlma ap Amon ono’gwiang hwerli pam eba emin, 17Ye, o Araba do’goma erang duelak pesimu, ik Yordan esa’goma abel likho Kineret ye’gelakma en legesa-legesa o Araba erang la’buktak pesimu ologun e, ’bekhit hwerli dom Pisga e’biang ’belakma mo il liplau wago hegitsogo eba ik ye’gelakma mayu egeik oruakma hwerli eminat wogentasulat, tegis o.
18-20 #
Yos. 1:12-15
Asogo arat wogentegistik, o ai erlige is ebano mo’gulentasulat, At henaik Allah en hono’gwiang yu pam eiyetak pagathorloluk welemagoluk arat wokhentesi a’geat de, honugwami emin, heneiyagai emin, honuam a’bigat modok hegi a’ge ebano emin, ’berlegat an en o kota kota yu pam wokhentegis a’ge ebano yema oruakhwe, his ap walhegeik weim henanni wiak a’ge ’berlegat weim ebipogoluk, henesegen leik-louksogo horloluk, his naduk otluk, ik Yordan etle pam liplai lit o. Liplai laguptik at henaik Allah en e, henarilak ono’gwiang ik Yordan etle akhit wogentasumu ebano welat, his henede we, obat wolorogup ene takhenebesimu, is ’gela’ge tagenebasu holuk, an en e, hono’gwiang wokhentesi ano pam honomu-honomuat eiye otluk hwerlagup en e, liplau manup o oluk, mo’gulentigis ani o,” oluk mo’gulentesi.
Musa o Kanaan ’gwilo mia, oluk mo’gulesi wene
21Asogo mo’gulentesirik, at Musa en, aphwami Israel a’ge mo’gulentasulat; o ai erlige an Musa en wene le’gelogo Yosua mo’guleselat, at haik Allah en ap ononuk oruak a’ge enebe ’biren tagenebasukhwe hil ebe enat entigen ani o. Tagokhwe, hil entigen a’ge hegitsogoat at Allah en hat loma ’eba ap onuelak ononuk logo a’ge eneragam onobogwi a’ge ebano ogo re, asogoat tagenebaik ani o. 22Ye, hat hebaget haik at Allah en hemin selei a’ge ebano emin, weim togunmu re, is enebe hogorlok hagun o, oluk, mo’gulegis.
23 #
Bil. 27:12-14; Ula. 32:48-52 Asogo mo’gulegistik, o agauwa ai erlige an en nerlagaiksogo ’gela’geat welat naik, ’gain onuk logo a’ge at Allah disogo mo’guleselat. 24Hat hotok modok welegen a’ge naik Allah o. Hat modok lok logo he’gik anni a’bik modok welegen a’ge ano O yogodak ya pam nagat, an heragam a’ge en nil hiaik en e, onuk niasu legen ’gela’ge ou mu’gat? ’bogorl pam welagai a’ge emin, ’gwiang pam welagai a’ge emin, ebano en elalin hat tu puk a’ge taga legen ano ’gela’ge is asogo a’ge mesik welagai no? erlagat ani o. 25Ye, an ik etle akhit liplai laiktik ’gwiang modok op ik Yordan etle akhit dom-dom petne ’gwiang op a’ge eba emin dom Libanon emin, nil yethai laik en io, oluk, mo’gulnemin o.
26Mo’gulegis a’geat de, at Allah olot het en Mo’gulegis a’ge ano holu nebit o, oluk, Mo’gulneselat, nesa’go wene e’gen a’ge ai arat pobuk mesik emin an mo’gulnoum nebit o. 27Hat en ik Yordan esa’go etle akhit liplailo miama re, erabu akhit orogobu, akhit en esa’go-esa’go hil nak opsogo ’gogol hai lak o. 28Mo’gulnesirik, at Yosua tu a’ge mo’gulneselat, at Yosua en ’gwiang hat hil hagun a’ge ai is aphwami Israel a’ge en dogoma a’ge en eiye welemagoluk naduk otluk wogonoboluk ik etle akhit liplai laikmu re, enede hweriogo o’borlogouk erlaksogo welemagoluk, hede hweriogo poluk wolomup o, oluk, mo’gulnesi. 29Asogo mo’gulnesimu, nis o Bet-Peor dogoma ebayat welege ani o, oluk, mo’gulentesi.
Currently Selected:
Ulangan 3: Wul
Highlight
Copy
Compare
Share
Want to have your highlights saved across all your devices? Sign up or sign in
