Ulangan 2
2
’Gebela o lei o’gwe wegesa a’ge ano togolik mo’gulentesi wene
1 #
Bil. 21:4
Mo’gulentesirik, mesik emin mo’gulentasulat: pobuk at nenaik ’gain onuk logo a’ge Allah en an mo’gulnesi a’ge hegitsogo hokhom-hokhom ik laut merah lagai akhit ebano o leimu legerik, o Seir dom-dom petne eba wale’gil denagalat o momuat lai laga.
2Wale’gil lagaihwe, at nenaik Allah en, an mo’gulneselat. 3His o page enat dom petne eba wale’gil denaga legeptikmu re, yogodak o il o’borl akhit eba hegit lo op atma re. 4#Kej. 36:8Hat en is aphwami eba mo’gulentasulat, we, horok weisogo wolotluk ’gela’ge en de, henarilak Esau e’balak o Seir oruak akhit ebane, he’bit hai lagupmu re, his henebe paget is onogorlok houwano oluk, henede hweriogo poluk lagup ani olu o. 5An en o Seir dom petne eba is ena’gul onuk Esau a’ge eiye welemagoluk, wogentegismu re, ono ’gwiang eba weisogo logon woknontouwak opoluk honoyuk logon sobut hai lagup holuk e, wokhontouwa erlakma re, is henemin weim tu no oluk, onolot het uak oluk, il ’balonto mia o. 6His honso’boru emin, henegeik emin, nouwok oluk, his honouang pamat o’go ’balogo danil lu o.
7His ’berlegat di, ebele-yu ebele til lagai-hwe, at henaik Allah ede aganhan henebam pasulat, ’gebela o lei lok duelak pesi ’gwe yu wagaihwe, degel henebiselat til wagokhwe Tahun 40 tegei o. Asogo tagokhwe, at henaik Allah henemin welat, his honogola henagai opogwi a’ge ebano hegit-hagatsogo nagat takhenebil waga ani o.
8Asogo toluk, nis en nis nenarilak Esau e’balak o Seir oruak a’ge ebano nono’borl akhit onoboluk ’gebela o Araba do’go erang duelak pesimu o Elat emin Ezion-Geber emin, lagaimu ’gebela ai pam en ’bekhit o Moab leimu ebayat wege o.
9 #
Kej. 19:37
Ebaat wegerikmu en, at Allah en, an mo’gulneselat, o onuk at eba is ap lot e’balak wigalak a’ge en eiye welemagoluk, an en wogentegismu re, Nis mesik eiye wolom a’ge woknontouwa oluk, henede en nebam eberak poluk is ap Moab a’ge yu onolot herap onobogulat, henemin weim tuogoluk an ne’bek wagalat, tu mia o, oluk, mo’gulnesi ani o.
10O onuk At ano re, o page enat is aphwami Emim a’ge eba welegesarikmu re, is aphwami Emim a’ge ebano re, enanni a’bik enebe enebagase lok nak enebe wiak en ap o Enak a’ge a’ge re, onuak e’ga hegit nak a’ge welegesa o. 11Aphwami en e, ap Emim a’ge ai, ap Enak a’ge ’gela’ge aphwami Refaim a’geat oluk enede opogu legesa a’geat de, is ap Moab a’ge en nak e, is ap ai, emim a’geat o, oluk ogu legesa o. 12Ye, naduk ene ap Hori a’ge ai, o Seir welegesa a’geat de, at nenaik Allah en, is Israel a’ge ono’gwiang eiyetak pagathorloluk welemagoluk, tagenebesi ano ’gela’ge is Esau e’balak wigalak a’ge en Hori o Seir welegesa a’ge ebano enebe erlagapsogo enebegesarik, enebalema isat eiyetak pagathwerlegesarik welegesa.
13“Asogo mo’gulnesirik, at Nenaik ’gain Onuk Logo a’ge Allah en pobuk mesik emin mo’gulneselat, O yogodak ya pamat hena’ge-a’ge horloluk ik Zered ’balogo ’bok libemis o, oluk, mo’gulnesimu, nis ik Zered at ’balogo liplau wege o.
14 #
Bil. 14:28-35
Nis ’gebela Kadesh-Barnea en e, o mesik ’gwil-mesik-’gwil dagwil-ya’gwil denaga legerik, ik Zered, ’balogo liplau wege hwerli aga ai re, tahun 38 at aga. Asogo agokhwe, at en wene ologun arat daksogo ho’buk ’balogo mo’gulnentesi ano ’gela’ge, is ap weim togwi a’ge enesegen oruak a’ge emin, hegitsogo dakho o Mesir en liplau wegesa ano ’berlegat aphwami Israel a’ge ene’gerlakma en waretil legesa. 15Is ano re, owan ’gwilo erlakhwe, aphwami Israel a’ge ene’gerlakma en ena’guluak perleneat erlak aga lemagoluk, at nenaik Allah en tagenebil lasu laga
16Ye, is ap weim togwi a’ge enesegen oruak a’ge ebano re, enebe ’berlegat waretil lagai en e, 17at Nenaik Onuk Logo a’ge Allah en an mo’gulneselat. 18His o yogodak ya pamat o Moab ’gebela o at e’bek til-til da’goluk laguptik, 19#Kej. 19:38Aphwami ena’gul onuk Amon a’ge lagaimu ebano laguptik, ono’gwiang ebano re, is ap Lot e’balak weiyelak a’ge en eiye otluk welemagoluk wogentigismu re, nis logon eiye wolom a’ge woknontouwa hwia oluk pogulat onolot herap onobogulat, henemin weim tu a’ge paget, ene’bek lagalat, tu mia o,” oluk, mo’gulnesi ani o.
20O ai ogo re, naduk enat ap Efraim a’ge oruak ene o ai, aphwami Refaim a’geat, oluk opogu legesa a’geat de, is Amon a’ge ene o ai aphwami Zamzumim a’ge o, oluk, ogu legesa. 21-22Is aphwami eba welagai a’ge ebano re, enanni a’bigat enebe ogo onuak yat nak welat enebe wiak nak welat, aphwami o Enak a’ge ’gela’ge welagai a’geat de, at nenaik Allah en is aphwami Hori a’ge ono’gwiang aphwami ena’gul onuk Esau a’ge o Seir welagai a’ge ebano wogentaik oluk enebe erlagapsogo enebasuam enebalema is ap Seir a’ge eiyerak pagathwerlegesarik yogodak hwerli o eba welagai ano ’gela’ge at nenaik Allah en aphwami ena’gul onuk Tamutumim a’ge erlagapsogo pasuam enebalema Aphwami Amon a’ge eiyetak pagathwerlegesarik yogodak ogo welagaiat o. 23Ye, is ap Awi a’ge ik lok ye’gelak laut esa’goma en ’bekhit toluk o Gaza hwerli onowi welagai o’gwe ebano en ’bekhit o’borl olukhwe e, is ap Kaftor a’ge o Kaftor en wegesarik is Awi a’ge ’berlegat erlagapsogo poluk is enebalema eba ap Kaftor a’ge ebanoat eiyerak onoboluk pagathorloluk welegesa.
24Ano mo’gulnesirik, mesik mo’gulneselat, “An en aphwami Amori a’ge ononuk logo a’ge Sihon o Hesybon eiye welago a’ge ebe emin, o’gwiang emin, hisat wokhentesi ani oluk, henaluk emin o. O pageat wokhentesimu re, his ik Arnon akhit ’balogo liboroguptik o eba eiye otluk wolorogup en e, henemin weim til libemit o. 25Is aphwami di owi yu owi welagai a’ge ’berlegat his tugwi a’ge honobok hologu lemarik enede lebe eselat, onuak lup’bo pogulat, his henebe onogorlok modok agalat, his yethontoluk enagap yuk etil lagalat, tuagoluk tak paik, ani o,” oluk, mo’gulnentesi ani o.
Ap Hesybon onue onuk logo a’ge Sihon sebelogo pegesa a’ge ano togolik mo’gulentesi wene
(Bilangan 21:21-30)
26Mo’gulentesirik, pobuk emin mesik mo’gulentasulat, “An en is ap o lei Kedemot en ap o Hesybon onue onuk logo a’ge Sihon oruakma lialogo wene lan woru a’ge mo’gulesi louwak o, oluk, ap perak enebasuam e, legesarik disogo mo’gulegisa. 27-29Nis ’gebela hat welegen o’gwe ai wagalat, nonolukhwe legeik-’belak yat ho erlakma en ’gebela lok o’gwe nak ’bekhit at toluk at Allah nenaik Allah en o nis wolomma woknontoma nentesimu ebano ik Yordan ’bil’bal liplai louwok oluk wagaimu, ebano e, wagalat, nenegeik nonso’boru no holuk e, nis nono uang emas perak a’ge pamat henebam o’go ’balogo nulmu re, is ap Esau e’balak o Seir welagai a’ge emin, is aphwami Moab a’ge o At welago ai mu a’ge emin, ’gebela ’go yu wom obat o, oluk mo’gulnentigisa a’ge ano hegitsogo, hat asogoat mo’gulnontomup o.
30Asogo egesema, at ap onuk logo a’ge Sihon o Hesybon tenentarok welago a’ge ano en, His ’gebela ’go yu wom mia o, oluk mo’gulnentesi ani o. Ai mo’gulnentesi a’ge edip ai, at henaik Allah ano en at sebelogo poluk o’gwiang ano his hene’gikmu paik oluk ede ’buksogo pesirik o’gwiang ano wogentesimu yogodak ogo tenagat welagai ai o.
31Pobuk togolik at nenaik Allah ano en an mo’gulneselat, At ap onuk logo a’ge Sihon ano, ebe emin, o’gwiang emin, pageat nene’gikmu wokho pesimu hegi, oluk, o’gwiang his eiyetak pagathwerlaguptik wolorogup en sebelhwerlil laga lemis o, oluk, mo’gulnesi o.
32Ai mo’gulnesimu, at Sihon osi enesegen oruak a’ge emin ’berlegat o Yahas horok eba loluk nenemin weim obuok oluk togumu, 33At nenaik Allah en ap Sihon nene’gikmu woknentesimu, nis en at emin, eiyagai emin, ap eiyagai enesegen oruak a’ge emin, ’berlegat sebelenebil wege ani o. 34O agauwa ai erligeat di kota yu kota at eiye welagoma ebano sebelogo pogulat, onowi kota lo’bok welagai o’gwe lo’bok hwami ap emin, eneiyagai emin, enelaluk mesik ugonobo erlakma en ’berleksogoat wat onobogulat, tige a’geat de. 35O kota-kota ’berlegat sebelil lege a’ge ebano ena’ge di a’ge yu a’ge emin, onuam emin, ’berlegat onohogul wege ani o. 36O Aroer ik Arnon esa’goma oruakhwerli en ’bekhit o kota mesik dogo ’burl eba en ’bekhit o kota Gilead hwerli kota-kota ’berlegat helep leget annisogo werik hwe at nenaik Allah en woknentesimu re, sebelak pege ani o. 37Asogo sebelak pege a’geat de, ap ena’gul onuk Amon a’ge ono’gwiang ik Yabok esa’goma emin, o kota-kota dom petne eba emin, at nenaik Allah en nis mo’gulnentesi a’ge hegitsogo mesik nak ogo mesik sebel horlo erlakma en ’berlegat ebesik ukpege ani o, oluk,” mo’gulentesi.
Currently Selected:
Ulangan 2: Wul
Highlight
Copy
Compare
Share
Want to have your highlights saved across all your devices? Sign up or sign in
