Ulangan 24
24
Hwami wogonobogulat, lologo ugonobogulat, togulom wene
1 #
Mat. 5:31; 19:7; Mrk. 10:4 At Musa en asogo mo’gulentesirik e, wene mesik disogo mo’gulentesi,
“Ap mesik en, hwe dogum a’ge mesik wogo welat, at hwe ai wiak ene’gerli om a’ge mesik tegeimu oluk, aluk emarik, ’bit ile’gen et holuk, at ap ai en e,
Hebe arat ukhebegi o, oluk surat ’balogo e’gikmu wogotluk, owi pam en mukho perakpoma, 2hwe ai ap mesik mu a’ge wouwa o. 3Asogo a’geat de, ap pobuk a’ge ai en agauwa wei nak, hwe ai wogo wolomtik, ebit il e’gen yetholuk e, at en e,
Hebe arat ukhebegi o, oluk surat wokho e’gikmu poluk en, ebe mukho lebikpasu holuk de a, ap pobuk a’ge ai ebe waraga holuk de a, 4hwe ai ap naduk a’ge ai en pobuk wo mia o. We,
Hwe yu wiagapsogo pesimu an wo miayat aga o, oluk opo yo. A’ge re, at en asogo epasu erlakma en, hwe ai ebe pobuk wouwa holuk, Nenaik ’gain Onuk Logo a’ge Allah onuk wiagapsogo pouwa o. A’ge re, his en o Nenaik ’gain Onuk Logo a’ge en wokhentesimu eba en henebabut modok wiak asogo mesik togulom e, modok erlak o,” oluk mo’gulentesi.
Di paget yu paget togu lomogoluk holuk e, wene ’belak ano pam louktak welat togulom o, oluk mo’gulentesi wene
5At Musa en wene asogo mo’gulentesirik, mesik disogo mo’gulentesi,
“Ap mesik ugwe ’gerat wasu holuk, his en e,
Tentara emin o, oluk ’gwelak poma weim ebi lasulat, yabuk is en a’ge akhen taga lemagoluk mo’guleselat, tu re, modok mia o. We, at en e, tahun mesik nak welat ugwe ogola opsogo olema naduk taga lemagoluk ukpo yo.
6His en hena’ge di a’ge yu a’ge logon we, lodu paget aphwami logon tenak welemagoluk wogontouwa a’ge wokhontuagoluk edip sioksogo ’gela’ge is aphwami ai helep gandum e’gen sagalogwi a’ge ai wo modok mia o. Helep likho a’ge ogo wo miayat o. His asogo wagup holuk, ap ai eiyagai enemin helep ai pam gandum sagalogo no’gulat enebe enelaluk wolom a’ge wouwa ai re, wiak o.
7 #
Kel. 21:16
Ye, his aphwami Israel a’ge logon en aphwami his hena’gul onuk a’ge logon enebe enebei louwarik e, eragam a’ge ’gela’ge tagenebasu holuk de a, at e, aphwami logon enebam o’go ’balogo wasu holuk de a, ap ai ebe modogat werip o. Asogo togup holuk, pobuk ai ’gela’ge wiak togu lema modok erlak o.
8 #
Ima. 13:1–14:54
Ye, his logon ou hwena’go ’gela’ge onogorlok a’ge henagap pam ago holuk, is ap Allah eiye Lewi a’ge en,
Disogo tip, asogo tip, oluk mo’gulhontuagoluk mo’gulentegis a’ge is en mo’gulhontogwiam modok hegitsogoat togu lomup o. 9#Bil. 12:10Nis o Mesir en liplau wegerik wagaimu Nenaik ’gain Onuk Logo a’ge Allah en ou ai a’ge hwe Miryam ebam pesi ano henede eberak wolomup o.
10 #
Kel. 22:26,27 Ye, his en, hena’ge di a’ge yu a’ge logon aphwami logon we lodu tenak welemagoluk wogentigep a’ge wokhontuagoluk, is onowi pam ’gwi laguptik,
Hat en an a’ge woknorogun holuk an en hat en na’ge togolik wokheik, oluk wene erlaksogo onosum a’ge ano wa ’gwilo modok mia o. 11We, henebe odipmu yetharok oruakma at u’gwarek osum eiye a’ge en u’gwarek enat wokhentil liplau wom nak e, elirat o. 12Asogo a’geat de, ap ai ebe a’ge modok erlak enerlagaik holuk e, at osum ai wene erlaksogo oluk tenak poluk hup-erlige tenak wolom modok erlak o. 13We, at osum ai ’buktak poluk nogo ese lemagoluk, o huba’go holuk togolik wogosolom o. Asogo wogogulom holuk, at en hau wathenebisoam e, Nenaik ’gain Onuk Logo a’ge Allah en, his henebaget ebam liok ese lema ani o.
14 #
Ima. 19:13
Ye, aphwami ena’gul onuk his Israel a’ge emin, ap ’bok his honowi pam o kota momu welagai a’ge emin, ena’ge erlak enerlagaik en wiaksogo welagai a’ge ene’gik o’go uang wogontuagoluk yabuk togwi a’ge ai, ene’gik o’go wogonto erlakma en lalonobogu lorogup o. 15We, agauwa mesik mo u erlakma en, o ebe lo’bok, is ene’gik o’go wogontogwiam di a’ge yu a’ge horlo a’ge oruak en yabuk wokho henebegesa a’ge ai, o mo il ’goboksogo ’gwi lo erlak oruakhweat ene’gik o’go wogontogu lomup o. Asogo a’geat de, is en is ene’gik o’go wogonto erlak holuk, his en is ene’gik o’go wogontuagoluk e, Nenaik ’gain Onuk Logo a’ge ’gonu mo’gulogwiam e, Allah en,
His wiak tigep o, oluk wene henebam pouwa ani o.
16 #
2Raj. 14:6; 2Taw. 25:4; Yeh. 18:20 Ye, enemalik eneiyagai en wiak tua ano pam enielak enaiklak enebam wene poluk enebe modok waronobu mia o. Ye, enielak enaiklak wiak tua ano pam enemalik eneiyagai enebam wene poluk enebe modok waronobu miayat o. We, is enebe lo’bok wiak tua holuk onu’gwarek ene’gik ologun pam enebeat waronobu o.
17 #
Kel. 23:9; Ima. 19:33,34; Ula. 27:19 Ye, di a’ge yu a’ge ap ’bok ena’ge emin, malik se’bin a’ge ena’ge emin, his en sebelhogulat, ye, hwami sugwe a’ge onosum wene erlagapsogo oluk horlogulat, tu modok mia o. 18His henebe aphwami Mesir a’ge en eneragam a’ge ’gela’ge tenhentarok welegesa ano henede eberit o. Asogo oruakma, at Nenaik ’gain Onuk Logo a’ge Allah en wokhonoboluk liplau waga ai o. Asogo oruakma delhenebegei ai en, his en wene ’belak a’ge pam louktak poluk til lagalom a’ge henesa’go wusogo wene hwalogo pegi ai o.
19 #
Ima. 19:9,10; 23:22 Ye, his di a’ge yu a’ge yorogup a’ge ebe daganogo woluk woroguptik e, gandum e’gen herle hetsogo ukpagup a’ge ai, pobuk wai lo modok erlak o. We, Nenaik ’gain Onuk Logo a’ge Allah en his di a’ge yu a’ge togukhwe obap pou wagoluk, gandum e’gen daganak a’ge ai aphwami ’bok a’ge emin, malik se’bin a’ge emin, hwami sugwe a’ge emin, horluagoluk ukpomup o. 20-21Ye, e zaitun e’gen emin, anggur e’gen emin, daganogo woluk wagalat ado ukpoluk wema a’ge ai, is aphwami ’bok a’ge emin, malik se’bin a’ge emin, hwami sugwe a’ge emin, horluagoluk e, his pobuk wai lagup no yo. 22His henebe aphwami Mesir a’ge en eneragam a’ge ’gela’ge tenhentarok welegesa ano henede eberip o. Asogo welegep ai en his en wene ’belak a’ge pam louktak modok togulom a’ge wene hwalogo pegi ai o,” oluk mo’gulentesi.
Currently Selected:
Ulangan 24: Wul
Highlight
Copy
Compare
Share
Want to have your highlights saved across all your devices? Sign up or sign in
