Ulangan 25
25
1-2At Musa en asogo mo’gulentesirik e, mesik disogo mo’gulentesi,
“His aphwami Israel a’ge enebe ’biren, at mesik en wene at mesik ebam pasuam, at en at ebam pasulat, asogo togulat e, ap wene enebam pogulat, no’gorlogulat, togwi a’ge ene’bek lolukmu en, is en ’belingholuk, at mesik wiak tu erlak, oluk wene ebam no’gorliselat, at mesik nak e, demat wiak tegeimu, oluk wene ebam poluk, is en e,
Horogole sogup ’bou in, oluk ’go’bu at wiak tu a’ge hegitsogoat ene’gik wenakho woru o. 3#2Kor. 11:24Asogo ’go’bu woru a’geat de, aphwami at a’ge ye’gelakma enil pam e’gerli wusogo ’go’bu ene’gik a’bik hwerli 40 pam en logon emin woru mia o.
4 #
1Kor. 9:9; 1Tim. 5:18 Wam sapi oyuk en gandum agap e’gen waiyogoluk lul wusogo poluk e, e’gen logon at nouwano oluk emde herle ’betesogo woru mia o. We, at logon nouwagoluk ukpogu lomubat o,” oluk mo’gulentesi.
Ap mesik are warago holuk tu wene
5 #
Mat. 22:24; Mrk. 12:19; Luk. 20:28 At Musa en, asogo mo’gulentesirik, mesik disogo mo’gulentesi,
“Ap mesik are emin mesikmu oruakma, are ano ebalema ap mu a’ge po erlakma en ebe warago holuk, ugwe sugwe ano, is ap logon at emin edip mesigat a’ge puk, we, mu a’ge en de, wo re, modok mia o. We, ap warom a’ge are anoat wo yo. 6Asogo wik-wok e, at omlogo naduk dorua a’ge ano, at are warema a’ge ano en dogo’gwe a’ge a’gul onuk aphwami Israel a’geat welemagoluk,
Ap warom a’ge ano en deregei a’ge, oluk opogulom o. 7#Rut 4:7,8Asogo a’geat de, ap are ano en, hwe are en sugwe pesi a’ge ano wo ebit holuk e, hwe ai ap ’gain o kota eba a’ge ene’bek lorik e, disogo mo’gulonto yo,
An nogun ano are en e, an nebe woknoboluk, at are ebalema mesik dorumu at en dogo’gwe a’ge a’gul onuk aphwami Israel a’ge welemagoluk, an woknobua’ge ebit en uknebesimu wegi o, 8oluk oso holuk, is ap ’gaindek o kota a’ge ebano en e, ap waraga a’ge are ano worlholuk e, esa’go woru o. Esa’go asogo worua a’geat de,
Erlak o. Wo nebit o, oluk ningsogoat oso holuk, 9hwe at are ugwe sugwe ano ogun ot e’bek horoksogo loluk, ap ’gaindek o kota a’ge ebano enilemat ap ano oyuk sum sandal ’buktak a’ge no’gorlholuk e, orogole pam was topuktak pasulat e, disogo mo’gulum o,
Ap onuelak enebalema doru enebit en ukpogwi holuk e, disogo tagonobogulom o, oluk, mo’gulonto. 10Asogo olukmu en aphwami Israel a’ge en ap ai eiyagai enemin enebaget ogulat e,
Ap oyuk sum sandal ’buktak a’ge no’gorlogo hwikhesi a’ge ebe yuat o,” oluk ogu lemak o,” oluk mo’gulentesi.
Di wene yu wene ebabut lo’bok tugulom o,” oluk, mo’gulentesi wene
11Mo’gulentesirik, mesik mo’gulentasulat.
“Ap enebe ’biren en yeik pogumu, ap are ano ugwe wagalat, ogun ano eli wasulat, e’gik en ap are ano ouwarli lis hasu holuk, 12hwe ai edeap po erlakma enat e’gik ’balogo hwikhogu lomup o.”
13-16 #
Ima. 19:35,36 Di ap, yu ap en di a’ge yu a’ge e’gin walhogulat, mi-miarak onobogwi ano re, at henaik Allah en ebirap enebasumu re, at henaik Allah en hono’gwiang wokhentasumu ebano welat, henebe sebal otluk waraga lorogup en e, e’gin walhegeik helep lok a’ge emin, wei a’ge emin, honosum mu yagatluk no’gulat, ye, yagasogo walhegeik sogoluak lok a’ge emin, wei a’ge emin, e’birek honowi pam welat tu mia o. A’geat de, e’gin lai lasumu eriano ’gela’geat, walhegeik wogontogulat, ye, sogoluak mesik ano pam yagarak poluk walhegeik wogontogulat, tugu lomup o, oluk mo’gulentesi.
Aphwami Amalek a’ge enebe erlagapsogo enebegesa wene
17-18 #
Kel. 17:8-14; 1Sam. 15:2-9 Mo’gulentesirik, mesik mo’gulentasulat,
“His o Mesir en liplau wegeptik, ebela pam wagalat, henebe henanni erlagap henebasulat, honuak erleap henebasulat, asogo takhenebasukhwe wagalat, is aphwami Amalek a’ge en Allah onogorlok ho erlakma en libagalat, henari onuak erlak agama heneberlik wagaimu warenebigisa ano henede eberak wolomup o. 19At henaik Allah en his eiye otluk wolorogup ene henemining a’ge ’gela’ge hono’gwiang wokhentasumu ebano henede we, yogun lielak weleripok oluk, heneselei a’ge hono’borlma welagai a’ge heneragam o’gwe wali’gogo oruak a’ge ebano sebelogo poluk eba welat, ap Amalek a’ge ebano ononuk un wolom no oluk, o ’gwiang pam yema ena’guluak erlagapsogo onobo a’ge ano memerak poluk ukpo mia o,” oluk, mo’gulentesi.
Currently Selected:
Ulangan 25: Wul
Highlight
Copy
Compare
Share
Want to have your highlights saved across all your devices? Sign up or sign in
