Ulangan 23
23
Aphwami Allah eiyagai a’ge odoktogumu yogunat ’gwilo mia o, oluk mo’gulentesi wene
1Mo’gulentesirik, mesik mo’gulentasulat,
“Ap mesik ouwarli? suptak a’ge a, ouwarli wogo a’ge a, oruak holuk, at ’gain onuk logo a’ge Allah eiyagai odoktugumu enemin odoktogulom mia o. 2Ap we a’ge dogo holuk, at emin, eiyagai dogo a’ge en ’bekhit e’balak dagetil louwarik 10 hwerli emin, ’berlegat at Allah eiyagai odoktugumu eba enemin odoktogulom ai re mia nak o.
3-5 #
Neh. 13:1,2 #
Bil. 22:1-6
#
Bil. 23:7–24:9
His o Mesir en is aphwami Amon a’ge emin, Moab a’ge emin, is welagai o’gwe ebela ’gwe ai wagaimu re, So’boru emin, ik emin, wokhentil libom obat a’geat de, ap Petor owi Aram Mesopotamia a’ge onuk Beor? omlogo Bileam en mu’gat wusogo enebam pouwagoluk, o’go wok egisema, til waga a’geat de, at henaik Allah en his edeap henebesirik, at Bileam en mu’gwat wusogo henebam pesi a’ge ano esa’go holu erlakma en agamsogo ede aganhan henebam pasumu re, is ap Amon a’ge a? Moab a’ge a, is enebe emin, eneiyagai dogo a’ge en ’bekhit ene’balak dak et til lagaimu en 10 hwerli lai lasu a’ge ebano emin, ’berlegat his at Allah eiyagai odoktogumu, is henemin odokto ’gugulom mia o, 6His henelaluk welat, henemin la’bul otluk, wene opsogoat ’balogulat, enede aganhan emak oluk obapsogo onobogulat, tak erlakhwe welat hoso’boru no a’ge hwerliat lai louwak o.
7Ye, aphwami Edom a’ge ai his henarilak atma re, is ono’gwiang pam his ap ’bok a’ge ’gela’ge welegepma re, is ogo re no onogorlok o, oluk henebirap onobogulat, ye, aphwami Mesir a’ge ai tu mia o. 8Eneiyagai dogo a’ge emin, ene’balak eneiyagai emin, his Allah eiyagai odoktogumu eba henemin odoktogulom erlak a’ge at de, is ene’balak eneiyagai enemalik holuk nak e, henemin odoktogulom op at o,” oluk, mo’gulentesi.
“Soduk a’ge mesik henebam egelu mia o,” oluk, mo’gulentesi wene
9Mo’gulentesirik, mesik mo’gulentasulat, “His henselei a’ge henemin weim obogulat, e’ben a’ge mesik henebam egelu ai mia o. 10Ap mesik hene’gerlakma en wiak a’ge ebam dak oso ano pam ebe wiaksogo ebe wiak ago holuk e, honowirabo edipmu en parema libaga loroguptik, welat, 11O hopmu et til lasukhwe ik o omu ebe ’gume wathwerlasu lomtik, o mo il arat obuk ilasu holuk e, honowirabo ogola ebano ’gwi lagalom obat o.
12His henemie worogulomma honowi sum owi werik a’ge odipmu de parema ’gwiang mesik pulogo pomup o. 13Asogo pulogo pogu loroguptik, ’gwiang palogo poluk henemie werik pogu loroguptik sebelak pogulat togu lemagoluk, di a’ge yu a’ge togwi oruakma wa’gun hua mesik emin pulogo pogu lomup o. 14At henaik Allah en eiyetak henebasulat, heneselei a’ge sebelogo poluk henanniaphenebasulat, Amolit deleng tuagoluk honowi sabo werik ho’gorlak o’gwe nosoma re, neselat, e’ben oruak a’ge ebano a’ge mesik il hasulat holuk e, agamsogo ukhonobouwa no,” oluk, heneragam modok di degel takpoluk welemak,” oluk, mo’gulentesi.
Di wene yu wene tugulom a’ge paget mo’gulentesi wene
15Mo’gulentesirik, mesik mo’gulentasulat. “Ap mesik eneragam a’geat welago a’geat de, agap delogo hweiye his hene’bek wago holuk e, at aik edip eiye a’ge wogesilo ai mia o. 16A’geat de, henemin welemagoluk o mesik at wolomma agaimu ’gela’ge eiye ago holuk e, ebayat welemak o. Ye, ebayat oruakma his en heneragam a’ge ’gela’ge takpoluk wolom ai nage mia o.
17 #
Ima. 19:29
Asua owi werikmu en hwami ap tenontogwi ogwi ai a’ge his logomalik hwelani Israel a’ge asogo tu ai re, mia o. 18At henaik Allah ai re, hwe ap we yogunat togwi a’ge enebe emin, tenontogulat o’go pogwi a’ge emin, e’biregat ebit modok epasumu re, hwe a, ap a, we yogunat tenontogulat, o’go uang pogwi ai pam, Allah disogo wogeik o, oluk ho’buk ’balogo poluk at henaik Allah owirabo werikmu ebaget po’gogulom ai modok mia o.
19 #
Kel. 22:25; Ima. 25:36,37; Ula. 15:7-11 Ye, hono uang a, honoso’boru a, hena’ge-a’ge no’gwe a’ge no ’gela’ge de henare wogorogup a’ge ano o’go wokhentasu holuk e, mesik emin ebam louksogoat waknoum o, oluk, mo’guloum ai nage mia o. 20O his ’gwilaguptik, eiye oroguptik wolorogupmu eba di a’ge yu a’ge tugulom a’ge at henaik Allah en opsogo nak takpasu lemagoluk, henarilak Israel a’ge ai hena’ge-a’ge wogontogu lorogup a’ge ebano o’go mesik emin ebam lo’boksogo woknemin o,” oluk mo’guloum ai mia o. Asogo a’geat de, ap ’bok a’ge hena’ge-a’ge wogontogu lorogup a’ge holuk nak e, o’go mesik emin ebam lo’boksogo woknoum o, oluk, mo’guloum obat o.
21 #
Bil. 30:1-16; Mat. 5:33 Hena’ge-a’ge at henaik Allah wogoum wene ho’buk ’balogo pogu loroguptik perlenesogoat wogoum erlakma en de, pobuk en wogeik a’ge oluk, opogulat da pil ya pil tugu legep a’ge ai, wogogwi erlak holuk e, at henaik Allah en wene arat ho’buk ’balogo pagup a’ge ano an woknogwi erlakma re, wiagat tigep o, oluk, mo’gulhonto atma re wene ho’buk ’balogo pegep a’ge ano perlenesogoat wogogu lomup o. 22A’geat de, an en disogo wogeik o, oluk ho’buk ’balogo pelep erlak holuk nak e, ai re, wiak erlagat a’geat de, 23an disogo tik o, oluk, henede eberak poluk heniak pam ho’buk ’balogoat henaik Allah mo’gulorogup holuk nak e, heniak pam modok arat ogupmu re, perlenesogoat wogogu lomup o.
24O Agauwa mesik pam henare mesik agan e anggur yogoma lagalat, anggur e’gen no a’ge takhenebasu holuk e, e’gen ’balogo honogumsogo nil-nil lo elirat a’geat de, e’gen ’balogo honosum ogola yagasogo horloluk lo nak e, modok mia o. 25Ye, agauwa mesik pam henare mesik e’gandum yogoma lagalat, gandum e’gen hene’gik pam e’gen wok-wok nil lo obat a’geat de, ’garok pam edip ’balogo lagabil lo nak e, mia o,” oluk, mo’gulentesi.
Currently Selected:
Ulangan 23: Wul
Highlight
Copy
Compare
Share
Want to have your highlights saved across all your devices? Sign up or sign in
