Ulangan 22
22
“Let-let tugulom o,” oluk, mo’gulentesi wene
1 #
Kel. 23:4,5 Mo’gulentesirik, mesik mo’gulentasulat,
“O agauwa mesik pam henare mesik uam sapi de a, domba a, nal agoam henil arat hwiaroguptik at de, heneperlak a’ge ’gela’ge nis ho erlak o, oluk u ai re, mia o. A’geat de, domba nal ago a’ge ano woluk henare uam domba eiye a’ge anoat wogesilo yo. 2Ye, henare uam domba eiye a’ge ai re, owi yatmaat oruak holuk de a, at e, ebe heneperlak holuk a, uam ano wokho honowi pam ’gwelebak poluk oruakma ap ai heratil wago holuk wogogu lomupat o. 3Henare mesik uam keledai emin, o’bogoyum emin, a’ge di a’ge yu a’ge ’berlegat a’ge nal agoam hwiaroguptik at de, heneperlak a’ge ’gela’ge, nenil ho erlak o, oluk, u ai re, mia o. A’geat de, ap uam a, a’ge a’ge a, il hasulat holuk, asogo tu egesa a’ge ai ’gela’geat tugu lomup o.
4Agauwa mesik pam henare mesik uam keledai a, sapi de a, ebela pam ’bou tuarik oruakma henil haguptik holuk, At omuat o, oluk, ukpo ai mia o. A’geat de, henare uam eiye a’ge en edikpasumu re, lethogulomat o,” oluk, mo’gulentesi!
“Di a’ge yu a’ge tugulom a’ge paget o,” oluk, mo’gulentesi wene
5Mo’gulesirik, mesik mo’gulentasulat, “Ap onosum a’geat de, hwami en we, yogunat ’buktogulat, ye, hwami onosum a’geat de, ap en yogun ’buktogulat, togwi holuk e, at henaik Allah en ebit epasumu re, asogo togulom mia o.
6O agauwa mesik pam ebela pam lagalat, tue mesik e pam a,? ’gwiangma a, owi werik poluk e’gen poluk sebelak welago a,? emalik dogo poluk sebelak poluk, welago a, henil asogo hogu loroguptik, tue ia emalik emin, ’berlegat wogonobu mia o. 7Di wene yu wene henebam om erlakma en sebal modogat otluk en wareripogoluk, tue ia ai ukpoluk emalik nak wogulom obat o.
8His o ’get a’ge worogulat holuk e, henemalik ’bule ’bogwi ano pam emep honowi ano pam wiagapsogo po no oluk, o yatsogo werik a’ge ano pam ebelogo werik poluk leget wokho pogu lomup o.
9 #
Ima. 19:19
E, anggur owi yabuk werik hweat de, owi mu a’ge e’gen emin, saplisogo mesikmu yorogwi holuk e, e’gen ’balogulat, eminat e’gen opsogo ’balogulom pukmu re, e’birek la’bolik yorogulom mia o.
10Ye, keledai sapi e’birek la’bolik poluk yabuk tuagoluk mesikmu po mia o.
11Herle esimu a’ge tuelak a’ge pam domba asu herle tuelak a’ge la’bulogo sum mesik nak a’ge egesogulom mia o.
12 #
Bil. 15:37-41
Honosum yat a’ge herle tuelak 4 a’ge pam il henak poluk ’borlu wibe’gen ’balhegeik ik horlogulom mia o,” oluk, mo’gulentesi.
Hwami horlogulat togulom a’ge paget mo’gulentesi wene
13Mo’gulentesirik, mesik mo’gulentasulat, “Ap mesik en hwele dogum op a’ge wogo poluk, e’birek nogogu lemarik, ebirap poluk, 14Hwele ano mi-miarak poluk, onuk wiagap pasulat, hwe yu hwerlesi erlige ap mesik e’birek nogogisa a’ge oruakhwe neperlak welat, wegirik ene’birek nogulat, ap e’birek nogosi a’ge ’gela’ge ebabut hegirikmu re, nemin wolom nebit o.
15Asogo osoam hwele ia aik e’birek en e, hwele ano owan dogum pam welat, ap emin nogou erlak oluk enaksogo ap onuelak o kota ebela ’gwi lagaimu welagai a’ge ebano en enil enak a’ge houwak oluk eneragam pei louwarik, 16Hwele aik ano en mo’gulentasulat, nagalogo yu ap mesik horlouwagoluk wogegismu hwerlesi a’geat de, ebirap poluk 17nagalogo mi-miarak pasulat, hwe yu ap mu a’ge emin mesikmu egesema at de, wegi hwia egei a’geat de, dogum welagarik, ap emin nogoselat, togwi a’ge ano ap ai ’e’birek nogo eselat, emep libaga a’ge osum kain pam egelik yu henil hemit o, oluk mo’gulontouwak o.
18Mo’gulentasu holuk e, is ap onuelak ebano en e, ap ano wai louwarik ’go’bu pam wusogo poluk, 19Hwele dogum Israel a’ge onuk wiagapsogo pasu ano o’go uang emas perak e’gin mesigat nak pam walhegeik ia aik wogontoluk, ap ano u’geatma re, horlouwak o. Asogo horlouwarik, ukpo erlakma en, e’biregat oruakma en warom hwerliat lalu wak o.
20A’geat de, hwe ano dogum welat, ap emin mesikmu la’baligisema re, emep libom erlak demat, egeimu oluk enak ago holuk nak e, 21aphwami Israel a’ge ene’gerli houwak oluk, aik owi pam welat, ’babi danian ’gela’ge welagama re, hwele ai waremak oluk is o kota at oruakma welagai a’ge ebano enebe ’berlegenat helep pam wusogo pogu lemak o, wiak asogo togwi holuk, hene’gerlakma en a’guluak erlagapsogo pogu lomup o.
22Ye, ap mesik en hwe ogun oruak a’ge mesik e’birek nogosoma hwiak onobogup tik holuk e, ap e’birek nogogwi a’ge ano emin, hwe ai emin, e’birek waremak oluk wusogo onobogu lomup o, wiak asogo togwi holuk e, his Israel a’ge hene’gerlakma en ena’guluak erlagapsogo pogu lomup o.
23Agauwa mesik pam hwele mesik dogum a’ge ap mesik wayogoluk iak tago oruakma ap mu a’ge mesik en, o kota eba e’birek la’bologu lemarik, nogogwi holuk e, 24hwele ai o kota at a’geat de, iak nga u erlakma en ap ai e’birek nogo eselat, ye, ap ai ap mu a’ge uge a’ge de, oruak oluk ogola opo erlakma en hwele ano wiagapsogo pasulat tago en e, hwe ap e’biregat waremak oluk o kota ’goduk ’gwi lagaimu eba wogonoboluk liplai lotluk helep pam damuksogo arat wusogo onobomup o, wiak asogo togwi holuk e, hene’gerlakma en ena’guluak erlagapsogo onobogu lomup o.
25A’geat de, ap mesik en hwele dogum a’ge en ogun iak tago welaga a’ge emin hwediktak poluk en, hwele ano en, nebit-nabit osokhweat de, ap ano ennak litluk e’birek nogoso holuk nak e, ap ano emategat waremak oluk wusogo pomup o. 26-27Ye, hwe ai nak e, wiak togwi holuk waronobu a’ge ano ’gela’ge mesik tu erlakma re, ebe woru erlakma en ukpomup o. Hwele ogun wogo a’ge ano re, eperlagat iabuk o’gwe denagoma ap mesik en tenak poluk iak nga osokhweat ebe ten hasumu, ap mesik en agap delhailo, erlak holuk e, ap mesik wongat oruakma ogun edip ogun en modok-modok tenak poluk waremagoluk, wusogo pasu ’gela’geat tegeimu re, hwele ebe ai woru erlakma en ukpomup o.
28 #
Kel. 22:16,17 Ye, ap mesik en hwele dogum a’ge ap wogo erlak a’ge oruakma, ap mesik emin hwediktak poluk, en hwele en ebit epasukhweat de, ap ano en nak litluk libotluk e’birek nogogumu hwiak onobogulat holuk e, 29hwele ano wiagap at pasumu re, ukpo mia o. A’geat de, hwele ai o uang emas perak e’gin mesik ’burl pam walhegeik hwele ano aik wogotluk, u’geat horloluk emin oruakhwe, hoso’boru nasulom a’ge hwerliat emak o.
30 #
Ima. 18:8; 20:11; Ula. 27:20 Ap mesik at aik u’geat de, wasulat, aik il salogo pasulat, tu mia o,” oluk, mo’gulentesi.
Currently Selected:
Ulangan 22: Wul
Highlight
Copy
Compare
Share
Want to have your highlights saved across all your devices? Sign up or sign in
