Ulangan 21
21
Ap werak a’ge hwiarogulat holuk tugulom wene
1Mo’gulentesirik, mesik mo’gulentasulat,
“At henaik Allah en hono’gwiang eiye emak oluk, wokhentasumu ebano welat, aphwami eneperlakhwe ap mesik yabukmu werak a’ge oruakma hwiak hwiarogwi holuk e, 2Is ap honuelak emin, ap wene hwal hontogwi a’ge emin, is en ap werak a’ge oruakma ebano en o kota-kota horok o’gwe en wi-waling hwerli ’ga hwerli hul, oluk walhouwak o. 3Walhogu lemarik, is ap onuelak o kota-kota ap werak horoksogo welagai a’ge ebano en sapi holou dogum ai pam yabuk togulat, e e’gin a’ge, odogun pam, ’boutak poluk woluk no’gulat, tu erlakma en oruak hwia oluk, 4woluk ik deng oso erlakma en lasu nak oruakma dogoma, yabuk wogulat, di a’ge yu a’ge owi yorogulat, togwi erlakma ebano pei laga lemarik, sapi dogum a’ge ano o’dogun pam a’ge ano ’goboksogo pouwak o. 5Ye, is ap Allah eiye a’ge ena’gul onuk Lewi a’ge ano re, at henaik Allah ebe eiye welat ebaget togulat, at Allah onuk pam onogola enagai enebam pogulat, wene mesik ago holuk hwalogulat, ap wat-wat ’bogwi a’ge holuk e, onowene ’balogulat, tugu lemagoluk, edik enebesimu re, sapi, werak oruakma eriano oruakhwe, 6Is ap onuelak o kota-kota ap werak horoksogo welagai a’ge ebano en Sapi o’dogun pam oruak a’ge ano ene’gik en ik pam hosogo pogulat, 7Nis nene’gik pam en ap yu emep hosogo lebikpogulat, ye, ebe worogwi holuk nenil hogulat, tu erlagat o.
8Tu erlagatma re, nenaik Allah o. Ap we a’ge werak a’ge yu paget emep is hat heiyagai Israel a’ge enebam wolom no oluk heiyagai Israel a’ge enagap delogo wogonoboluk wegen a’ge yu, enemin la’bolik welemak asua, wam werak a’ge yu wemin o, oluk, eniak loksogo asogo mo’gulogwi holuk, ap werak emep ano aphwami Israel a’ge enebam welema modok erlagat ani o. 9Ye, ai togwi holuk e, at Allah il oruakhwe wene oruak a’ge ano hegitsogoat togupmu re, ap mu a’ge de, werak emep ano nis nenebam welema erlak o, oluk, mep e’gen sasogo lebikpogwi ai ’gela’ge togu lomup o,” oluk, mo’gulentesi.
Hwami ene’gik abusak hogul wogo poluk tugulom wene
10Mo’gulentesirik, mesik mo’gulentasulat.
“Henselei a’ge henemin obogumu re, at henaik Allah en hene’gikmu wokhentasu holuk aphwami enebe hogul wogonoboluk tenentarok welat, 11Hene’gerlakma en ap mesik en hwe dogum op a’ge mesik modok op ebelak a’ge oruakhwe il hasu lemarik, an nuge aiat hwerlaik epasulat holuk e, hwerlasu lemagat o. 12Asogo hwerlasu lemarik, horloluk owi pam lasu holuk, hwe ano en at asu ’balogo hwikhasulat e’gik ogop ’balogo hwikhasulat, 13Hogul wo erlakhweat de, osum ’buktak welago a’ge ano no’gorlogo polukmu a’ge ’bukhwerlasulat, asogo taga lemarik ia aik enebaget nge tagalat o pam oruakhwe, dogwi mesigat nak enamiso holuk, ap ano en nugeat hwerlaik o, oluk, hwerlasulomtik, e’birek nogou e obat o, 14ye, e’biregat welemarik at de, ebit ago holuk e, hwe ai ebit epasukhweat de, e’birek nogogulom ebelerakma re, ap ai en eragam a’ge ’gela’ge takpasulat ebe paget o’go hwerlasulat, asogo tu mia o. A’geat de, hwe ano ede en, an eba lele epasu a’ge hegitsogo louwak oluk ukpouwak o,” oluk, mo’gulentesi,
Ap naduk dogo a’ge holuk e, aik emining a’ge wogoum wene
15Mo’gulentesirik, mesik mo’gulentasulat,
“Ap mesik ugwami enebe ’biren wogenebiso a’ge ano re, mesik ede hwedik takpasulat, ye, mesik ebirap pasulat, tago oruakma, hwami ano e’birek en enemalik ap nak enaik ano ebalema omlogo a’geat de, naduk a’ge ai re, hwe ebit epasu a’ge ano en emalik arat doruama re, 16enaik ano en, emining a’ge wogentasulat, owene mo’gulonto ano re, uge ebit epasu a’ge emalik ano naduk dogo a’ge demat oruakhweat de, ukpoluk, uge ede hwedik a’ge emalik ano owene mo’guloum mia o. 17Naduk dogo a’ge holuk nak enemining a’ge horlogumu re, hwe ebirap tago a’ge emalik naduk dogo atma re, emining a’ge loksogo at wogeselat, owene emin mo’gulemak o. Naduk dogo a’ge holuk e, aik ebalema lik louksogo nak tagobogumu re, aik emining a’ge emin, owene emin, at emategat, hwerlasu lemak o,” oluk, mo’gulentesi.
Ap logomalik mesik ebabut wiak holuk tu wene
18Mo’gulentesirik, mesik mo’gulentasulat,
“Ap mesik omlogo logomaligatma re, ia aik en mo’gulogwi a’ge tu ebit epasulat, esa’go worogwi a’geat de, eniak opsogo hweliso erlakma en a’guluak helep ’gela’ge takpoluk oruak holuk e, 19ia aik en malik ai, woluk is onowi kota ebela ’gu agaimu ap onuelak wene ’bele’gogwi a’ge welagaimu eria pei louwak o. 20Asogo pei louwarik, is ap onuelak wene ’balogwi a’ge ebano mo’gulentasulat, nis nenemalik Nonomlogo yu neniak ogwi a’ge ano, opsogo holu erlakma en sagalogo ukpoluk a’guluak helep ’gela’ge takpoluk ede en agai epasu a’ge paget nak yogun-yogunat til lasulat, ik enede ’balago a’ge ebano a’ge nasulat, tago yo. 21Mo’gulontogwi holuk, is ap at owi kota emin welagai a’ge ebano ’berlegat en malik ano waremak oluk, helep pam sogupsogo wusogo pouwak o. Ap wiak asogo togwi holuk e, hene’gerlakma en ’gegilogo a’guluak erlagapsogo pogwi a’ge ano, is aphwami Israel ’berlegat enesa’go holuarik, onogorlok a’bik houwa ani o,” oluk, mo’gulentesi.
Disogo tip, asogo tip, oluk, mo’gulentesi wene
22-23 #
Gal. 3:13
Mo’gulentesirik, mesik mo’gulentasulat. Ap mesik wusogo ebe e pam pogwi holuk e, Allah en hweim enebasumu re, ap mesik wiak tiso holuk, waremagoluk, woruat o, oluk, ebe worogu lemarik, ebe werak e pam wusogo pogwi holuk at Allah en henemining a’ge ’gela’ge ’gwiang wokhentasu a’ge ano pam wiagap po no oluk, at ebe werak a’ge ano e pam wusogo oruakhwe o hup om mia o. A’geat de, wusogo poluk o ai erligeat ebe werak a’ge ano ’gwiang ’balogo Selak pomup o,” oluk, mo’gulentesi.
Currently Selected:
Ulangan 21: Wul
Highlight
Copy
Compare
Share
Want to have your highlights saved across all your devices? Sign up or sign in
