Ulangan 20
20
Weim obogulat mukho lebigonobogulat, tugulom wene
1Mo’gulentesirik, mesik mo’gulentasulat,
“O agauwa mesik pam heneselei a’ge henemin weim togwi holuk e, at henaik Allah o Mesir en wokhonoboluk waga a’ge ano enat lethontouwama re, is onuam kuda ene kereta emin, ap enesegen oruak a’ge his ’gela’ge erlak is enebe logolak modok a’bigat emin, enebe henil yerontogu loroguptik enebe ebano honogorlok hagup no yo. 2Henemin weim obuok oluk, tugukhwe, ap Allah eiye a’ge mesik naduk lai louwarik, wene mo’gulhentasulat, 3-4His nue nari Israel a’ge yu logwe! henesa’go welemis o. Heneselei a’ge mabenap onoboluk, henanni emak oluk, at henaik Allah modok henemin lasulat, lethontouwama re, henemin weim obogulat, henede erlagap henebasulat, honogorlok hogulat, honuak lup-lup ogulat, is enebe honogorloksogo welat, tu modok mia o,” oluk, mo’gulhontouwak o.
5Mo’gulhentasu holuk, is enesegen eiye a’ge onuelak ebano en onosi weim togwi a’ge ebano wene disogo mo’gulontouwak o. Ap mesik owi ’get ut hwerlasu a’ge ano, owan nogo u erlak oruakma, ap ano selei a’ge en worogwi holuk owi ai, ap mu a’ge mesik en eiye om no oluk, owi pam loma re, obat o, oluk, mo’guleselat, 6Ap mesik en, e anggur owi yeriso a’geat de, e’gen owan ’bal horlo erlakhweat de, ap ebe eselei a’ge weim en worogwi holuk, ap mu a’ge en e’gen ’balogo nasulom no oluk, owi pam lo obat o, oluk mo’guleselat, 7Ye, ap mesik en nugwe hwerlaik o, oluk iak tago a’geat de, ebe owan horlo erlakma enat ebe worogwi holuk e, ap mu a’ge mesik en uge ano horlouwano, oluk owi pam ’bok loma re obat o, oluk mo’guleselat, tuak o.
8Asogo taga lemarik ap segen eiye a’ge onue ai e e, osi weim togwi a’ge mesik emin mo’gulentasulat, Ap sa en ogorlok hasulat, ede erlik eselat, tago oruak holuk arilak enede ogo asogoat tua oluk mo’gulonto no oluk, owi pam louwak, oluk mo’gulemak o. 9Ap segen eiye a’ge onuelak ebano en onosi weim obogwi a’ge ebano wene arat mo’gulontogu lemarik weim obu a’ge onosilak lo’bok enemin hwalogo pogu lemak o.
10Hwalogo pogwi holuk, his wolomma eba henemin weim tuagoluk onowi kota-kota o’gwe oruakma, e’bek loluk is mo’gulontogulat, his nenemin la’boluok oluk wege o, oluk mo’gulontogwi holuk, 11Is aphwami kota eba en nenemin la’bolul obat o, oluk, onowi pak ’goduk husogo’gwelap honobogwi holuk heneragam a’ge welemagoluk, ugonobomup o. Asogo ugonobogu loroguptik, heniak annisogo mo’gulontogukhwe, henebaget yabuk togu lemak o. 12A’geat de, nenemin la’bolu nenebit o, oluk, hene’bek wagai holuk nak e, waronobuogoluk onowi pam at ’gwi lu o, 13at en ene’bek ’gogupmu at henaik Allah en heneselei a’ge ai hene’gikmu pasuam e, his en wa’gun pam ap nak ’berleksogo wusogo onobomup o. 14Wusogo onobogulat, hwami emin, malik emin, onuam emin, ena’ge di a’ge yu a’ge o kota eba oruak a’ge ’berlegat emin, onohogul a’ge hene’gik abusak horloluk ’bogolip o. Heneselei a’ge ai ena’ge hene’gik abusak hogul wagup a’ge ai re, at henaik Allah enat wokhontouwama re, hisat eiyetak pagathorlogu lomup o.
15Aphwami onowi kota-kota walekma welagai a’ge ai, asogo takpagup a’geat de, is wolomma eba di aphwami yu aphwami onowi kota-kota welagai a’ge ebano nak e,
16at henaik Allah en o his wolomma eba di aphwami yu aphwami onowi kota-kota eba henemining a’ge ’gela’ge dogoma a’ge en eiye welemagoluk wokhentaikmu re, enelaluk lagai a’ge mesigat nak holuk ogo re, enelaluk ukpo modok mia o. 17A’geat de, at henaik Allah en mo’gulhentesi ano hegitsogoat, aphwami Het a’ge, Amon a’ge Kanaan a’ge, Feris a’ge Hewi a’ge Yebus a’ge enebe ’berlegat enebe erlagapsogo onobomup o.
18Allah erliktogwi a’ge ebalema onodogwi enasua erliktugulat, enemelmel wiak modok togwi a’ge ano, his mo’gulhontogwi holuk his en at henaik Allah wiagapsogo po no oluk,
19O kota momu sebelhwerlagup en e, onowi pam eba ’goguptik henemin weim til lagaihwe, aregen a’ge ebil lagaihwe, e egen herle e’gen eba, e’gen egesiso holuk, hisat no’gu lorogup nu re, aphwami waronobu aphwami ’gela’ge, e ai mukho po op epegep? erlagatma re, mukho pogulat, ’besie pam e’gik deksogo belabil wagalat, tugulom mia o. 20A’geat de, e e’gen no’gwi erlak a’ge mu a’ge his henaluk holuk nak e, o ano owan sebelogo po erlakma en weim til lagalat, mesik tu a’ge ago holuk mukho pogulom e obat o,” oluk, mo’gulentesi.
Currently Selected:
Ulangan 20: Wul
Highlight
Copy
Compare
Share
Want to have your highlights saved across all your devices? Sign up or sign in
