Ulangan 19
19
O, enagap delogo wolomma polik po yo, oluk mo’gulentesi wene
1 #
Yos. 20:1-9
Mo’gulentesirik, mesik mo’gulentasulat,
“At henaik Allah en his hono’gwiang wokhontouwama eba di aphwami yu aphwami, louwarik welema a’ge ai, ena’guluak erlagapsogo enebasu holuk e, his en is ono’gwiang eba modogat eiyerak pahat horloluk woloroguptik, is onowi dogo o kota-kota eba emin, onowi werik emin, enemin eba welat, 2-3ap mesik en ap mesik woru pukmuat de, weriso lomtik, hweiye toluk o eba ’gwi lasu lemagoluk at henaik Allah en henemining a’ge ’gela’ge, hono’gwiang wokhontouwama ebano ebale henagan pulogo pagupmu ebano, ’gwiang ebale henagan pulogo pogwiam ebano enematek-enematek nak o’burl o’gwe kota-kota ’berlegat ebano modok-modogat kota mesik aphwami enagap delhorlogu lemagoluk, pulogo pogulat, ye, ’gwi lagalom a’ge ’goduk ebelogo pogulat, togu lomup o.
4Pulogo pogwiam e, o agauwa mesik pam ap mesik en e, are pam olot het pasulat, tago erlakma re, modogat sogou sogo wusogo pasu lotluk, agap delak welemagoluk, o ebayat ’gwi lagalom o. 5Walhegeik tugulom ano yuat o, o agauwa mesik pam ap mesik are mesik emin oluk, e e’gelema lebagalomtik, are ano en e, ’besie e’gikmu wik-wok e morisoma ’besie ebe le’geksogo lasulat, e’gat pam are ano ebe pam daintak pasuam arat warago holuk e, ap moriso a’ge ano agap delak welemagoluk o pulogo poma o kota mesik eba ’gwi lagalom ai obat o.
6Asogo ’gwi lagalom ai obat a’geat de, ap ai olot het en are werik oluk ogola opo erlakhweat de, werisoam e, obat oluk ukpo a’geat de, enagap delhorlogumu ebela o yatma re, owan ’bogolil lagaihwe ap warago a’ge ano arilak onolot het en enare werak a’ge ano a’gulmu woruogoluk, motluk laga lemarik tenak poluk waremak oluk wusogo pou wagaimu no oluk, 7O enagap delak welagaimu ebale henaganat, pulogo pagup oluk, wene le’gelogo arat mo’gulhentegis ai o.
8-9O yogodak an en disogo tip, asogo tip, oluk wene le’gelogo mo’gulhentasu legi a’ge yu, his en opsogoat til lagalat, at henaik Allah henede hwedik takpogulat, at en tugulom a’ge epasu a’ge ano loruk hupmu motluk lagalat, togwi holuk, at henaik Allah en hono’gwiang emde lasogo wokhentaik o, oluk, hene’balak wene ologun daksogo ho’buk ’balogo mo’gulentegis ano ’gela’ge, ono’gwiang wogentaik oluk mo’gulentegis ano lok modok ’berlegat wokhentasu holuk e, o enagap delogumu ebale henagan pulogo po egesa ai, ebale henagan eminat pulogo pomup o. 10O enagap delak welagaimu henagan mesik emin henemining a’ge pulogo po ano re, at henaik Allah en e, his henemening a’ge ’gela’ge hono’gwiang wokhentaik ai pam en, ap mesik wiak tu erlakhweat de, ebe worogwi holuk e, emep libago a’ge ano his hene’gik pam wolom ’gela’ge o, oluk, o ai pulogo pomup o, oluk mo’gulhentegis ai o.
11Asogo togulom a’geat de, ap mesik en are mesik ebit en werik oluk ede epasu lomtik ’gagalak oruakma re, ap ano wagoam ebenagaikmu, ap ano tenak poluk waremak oluk wusogo Pasu lomtik, hweiye o kota pulogo pogumu ebano mesikmu ’gwi lasu holuk nak e, 12Is ap onuelak wene hwalogwi a’ge at owi pam welagai a’ge ebano en ap werak poluk lasu a’ge ano wai louwak oluk, enagap delogumu ebano en woluk wagai holuk e, ap weriso a’ge ano a’gulmu wusogo pouwagoluk ap warago a’ge ano ue ari wogontouwak o. 13Wogontogwi holuk e, enedeap obo erlakma enat wusogo pouwak o. His di wene yu wene henebam om erlakma en op nak weleripok oluk, ap mesik en ap mu a’ge mesik wiak tiso erlakhweat de, weat werisoam emep lebago ano his hene’gik pam wolom no oluk, ap asogo a’ge holuk e, his Israel a’ge hene’gerlakma en lisogo a’guluak erlagapsogo pogu lomup o,” oluk, mo’gulentesi.
’Gwiang hwerli ’belak oruakhweat de, dagansogo pei lo mia o, oluk mo’gulentesi wene
14 #
Ula. 27:17
Pobuk mesik mo’gulentesirik, mesik mo’gulentasulat, At henaik Allah en his eiye otluk weleripogoluk, henemining a’ge ’gela’ge dogoma a’ge en ’gwiang wokhontoma ebano henaiklak en naduk ’gwiang hwerli ’balogo pagathwerlegesema ebano oruakhweat de, ap henare mesik en ’gwiang hwerli oruak a’ge ano di dagansogo eming-eming pei lagalom mia o, oluk mo’gulentesi.
Aphwami logon wiak togwi holuk enebe ’biren enil entigisa a’ge en ogwi holuk demat opo yo, oluk mo’gulentesi wene
15 #
Bil. 35:30; Ula. 17:6; Mat. 18:16; Yoh. 8:17; 2Kor. 13:1; 1Tim. 5:19; Ibr. 10:28 At Musa en asogo mo’gulentesirik, wene mesik disogo mo’gulentesi,
“Aphwami logon wiak togwiam at ap mesik nak en,
Demat nil hegi o, oluk oso holuk e, at ai wene ebam po modok miayat o. We, enebe ’biren en de a, ap mesik emin en de a,
Demat nenil hege o, oluk ogwi holuk,
Demat, oluk elirat opo yo.
16Ye, is aphwami logon en eniak eseiyat is logon wene enebam pouwa holuk e, 17is wene ago ’gwe enemin, enebam pegesa o’gwe emin, at ap Allah eiye a’ge emin, ap wene enebam pogulat, no’gorlogulat, togwi a’ge ai emin en wene enebam pogulat no’gorlogulat tuagoluk, enebe o Nenaik ’gain Onuk Logo a’ge en se’ban ogu lemagoluk polik pouema eba Allah paget yabuk togumu ene’bek lagalom o. 18Ene’bek asogo lagaiam e, is ap wene edip ’bele’gik poluk, wene enebam pogulat, no’gorlogulat, togwi a’ge ai en wene ai opsogo ’bele’gik poluk en, ap ai arilak ena’gul onuk Israel mesigat a’ge wene enebam erlakmaat eniak eseiat ononuk wiagapsogo pogwi holuk, 19ap ai iak eseiat ap mesik ai wene ebam pasu hegitsogoat o’go wene ebam pogu lomup o. His asogo pogu lorogup holuk, wiak ai ’gela’ge logon togu lorogup modok erlak ani o. 20Wene asogo enebam pouwa ano pam, aphwami ’berlegat wene ai enesa’go hwelak poluk, onogorlok emarik e, wiak ai ’gela’ge mesik togu lema modok erlak o. 21#Kel. 21:23-25; Ima. 24:19,20; Mat. 5:38Aphwami wiak ai ’gela’ge togwiam, henedeap onobo erlakma en, wene enebam pogu lomup o. Wene enebam pogulom ai re, ebe disogo. Enebe waronobogwi holuk, enebeat waronobu o. Enil hwelelogwi holuk, enilat hwelelu o. Eniak moluktogwi holuk e, eniagat moluktu o. Ene’gik ’balogwi holuk, ene’gigat ’balu o. Ye, onoyuk ’balu holuk e, onoyugat ’balu o,” oluk mo’gulentesi.
Currently Selected:
Ulangan 19: Wul
Highlight
Copy
Compare
Share
Want to have your highlights saved across all your devices? Sign up or sign in
