Ulangan 16
16
Seni onuk ena’gul waganebok eming ontoluk laga a’ge paget seni onuk Paskah sorogulom wene
1 #
Kel. 12:1-20; Ima. 23:5-8; Bil. 28:16-25 Mo’gulentesirik, mesik mo’gulentasulat.
“Dugwi onuk Abib pelelegeimu o huba’go at henaik Allah o Mesir en wokhonoboluk liplau wagama re, dugwi Abib ai, pelliso holuk, at henaik Allah eseni onuk ena’gul waganebok eming ontoluk laga a’ge onuk Paskah ano, honogola henagaisogoat sorogulom a’ge henede eberagat wolomup o. 2Seni ai sorogulat, his en e, kambing domba emin, lembu sapi emin, werak poluk at henaik Allah en o yema en nak nonuk elaluk logo modok welemak o,” oluk, o pulogo pagathwerlesimu eba en henaik Allah ebaget, seni eming nontoluk laga oluk onuk Paskah ai, sorogu lomup o. 3Seni ai sorogulat, di a’ge yu a’ge periso a’ge onuk ragi ano emin poluk, werakho no’gulom mia o, his e’gin-pe’gin henebam oruakhwe, o Mesir en perleneat liplau wegep a’ge ebano his warom erlakma en henebe henelaluk welat, eberak weleripogoluk, seni eming ontoluk laga a’ge paget seni onuk Paskah ai sorogulat, oroti periso a’ge ragi ano roti emin pogwi erlak a’ge werakho nil lagaihwe, agauwa 1 en 7 at lai louwak o. 4O agauwa 1 en 7 lail lasu hwerli ai erlige his honowi lo’gwe ’berlegat roti periso a’ge ragi tenakho welat, ye, agauwa 1 a’ge pam hupmu ’gwe domba ’belak a’ge tenakho oruakhwe, o tono hubet hwerli lai lo mia o.
5At henaik Allah en o wokhonto a’ge at en pulogo po erlak o momu en seni ena’gul waganebok eming ontoluk laga a’ge paget enede ebesogo onuk Paskah soru a’ge paget domba wusogo eba pogulom mia o. 6A’geat de, his o Mesir en o hupmuat liplau wegepma re, o hupmu’gwe o mo il obuk ilasukhwe at henaik Allah en e, o yema ennak nonuk elaluk welemak o, oluk, pulogo pagathwerlasumu pasumu ebano en nak seni ena’gul waganebok eming ontoluk laga a’ge paget enede ebesogo onuk Paskah soruogoluk, honuam wusogo pogu lorogup ani o.
7Wusogo onoboluk, at henaik Allah en e, o polik pagathwerlesimu ebano en sakho noluk tono huberat togolik-lagaksogo honowi saboma ebanoat lagup ani o. 8Ebano laguptik, o agauwa, 1 pam en ’bekhit 6 pam e, roti periso a’ge ragi emin po erlakma en, worogo a’ge no’gu loroguptik agauwa mesik 7 a’ge pam his yabuk togwi erlakma en odoktak poluk henaik Allah erlik tugu lorogup ani o,” oluk mo’gulentesi.
E’gen ’balogulat, seni sorogulom wene
9 #
Ima. 23:15-21; Bil. 28:26-31 Mo’gulentesirik, mesik mo’gulentasulat,
“Ne’gen naduk ikhasu a’ge ’baluok oluk, ’bisok gandum uak pam pogwi ai hwerli en wenakho se’ban 7 a’ge takpoluk, 10At henaik Allah ebaget seni onuk e’gen naduk ’belak a’ge ebano paget pelal ’belak ’baluak oluk pelal ebelak a’ge ebano honogola henagaisogo sorogulat, henaik Allah en ede aganhan henebam pasulat, hena’ge-a’ge wokhentasu a’ge ebano hegitsogoat henede en woluk at ebaget weat pou waga lomup o. 11Asogo pou waga loroguptik his emin, heneiyagai logomalik hwelani emin, heneragam a’ge hwami ap emin, ap Lewi a’ge honowi kota henemin welema a’ge ebano emin, ap ’bok a’ge emin, malik mongnu a’ge emin, hwami tugwe henemin wolorogup a’ge ebano emin, ’berlegat at henaik Allah en o yema en nak nonuk elaluk modok welemak o, oluk, pulogo pagathwerlasumu at il pam eba en honogola henagaisogo welat seni sorogu lomup o. 12His o pageat o Mesir en aphwami eneragam a’ge welegep ano eberak welat, tugulom a’ge le’gelogo mo’gulhentasu a’ge yu modok opsogoat tugu lomup o,” oluk, mo’gulentesi.
Orabo sum owi weregisa a’ge enede eberak welat seni sorogulom wene
13 #
Ima. 23:33-36,39-43; Bil. 29:12-38 Mo’gulentesirik, mesik mo’gulentasulat,
“Gandum e’gen ’balogo arat odoksogo agap e’gen wokho Pogumu ebano pogulat, anggur e’gen ’belak a’ge odoksogo sagalogumu ebano pogulat, asogo togu loroguptik honogola henagai en agauwa 1 en ’bekhit 7 a’ge pam seni onuk osabo werik a’ge ano ebesogo seni sorogulomup o. 14Asogo sorogulat, his emin, henemalik logomalik-hwelani emin, heneragam a’ge hwami ap emin, ap Lewi a’ge emin, ap ’bok a’ge emin, malik mongnu a’ge emin, hwami tugwe a’ge emin, honowi kota henemin wolorogup a’ge ebano emin, ’berlegat honogola henagaisogoat, seni ai sorogu lomup o. 15His ene di a’ge, yu a’ge, no’gwe a’ge mesik tugulat, e’gen ’balogo pogulat, asogo tugukhwe, henaik Allah en, ede aganhan henebam pasu, ano pam, henede aganhan muat takhenebasu hagupmu re, o at Allah en pulogo pou wama eba en e, at henaik Allah erliktugulat, honogola henagaisogoat seni ai serogukhwe, agauwa 7 pamat lai louwak o.
16His Israel a’ge hene’gerlakma ap nak ’berlegat Tahun mesik takpoluk agauwa henaganak a’ge mesik pam seni roti periso erlakhwe sorogwi a’ge mesik emin, mesik e’gen ’belak a’ge odoktogwi ai erlige sorogwi a’ge emin, mesik e, owirabo werigisa a’ge ebesogo sorogwi a’ge emin, at henaik Allah polik pasu a’ge il pam wemak o, ye, asogo wagalat, ene’gikmu erlak a’ge weat wagalom mia o. 17A’geat de, at Allah ede aganhan enebam pasulat, ena’ge wogentasu ’gela’geat hegitsogo enematek lo’bok ena’ge mesik Allah ebaget pou waga lemak o,” oluk, mo’gulentesi.
Tak a’ge hegitsogo nagat-nagat wene enebam pogulat, no’gorlogulat togulom wene
18Mo’gulentesirik, mesik mo’gulentasulat,
“At henaik Allah en o wokhentesimu eba honowi kota hun-hunat welat, aphwami onowene a’bosu opsogo ’balogu lemagoluk, ap wene enebam no’gorlak a’ge emin, ena’gul onuk enematek lo’bok wene le’gelogo mo’gulontogwi, a’ge onuelak ’gaindek emin, edigonobomup o. 19#Kel. 23:6-8; Ima. 19:15Edigenebagupmu aphwami onuak lolonobogulat, wiak togwi a’ge ebano o’go disogo po yo, oluk, wene werak oruakhweat de, po mia, oluk, mo’gulemagoluk, uang hisakho wogogwi a’ge ebano re, ap onowene opsogo ’balu a’ge oruakhweat de, enil hepnik a’ge ’gela’ge takpogulat, ye, nonowene opsogoat ’balua hwia oluk, enede opoluk lagai a’ge ebano uo a’ge ’gela’ge tagonobogulat, wiak tu erlakhweat de, egep o, oluk, is ap op a’ge ebano ene’gerli werak onobogulat, asogo togumu re, uang wokhontogwi holuk wogulat, wiak togwi a’ge o’go ’gela’geat tagonobo a’ge oruakhweat de, wiak-wiak owene ’balogulat, ap enepema yethegeik onuak lolonobogulat, tugu lorogup ani o. 20A’geat de, his owan henelaluk welat, at henaik Allah en hono’gwiang wokhentasu a’ge ano eiye otluk wolorogup en e, wene leik-louksogo modok opsogo nak onuak lolonobogu lomup o,” oluk mo’gulentesi.
“Allah ebalema mu a’ge mesik edikpoluk erliktu mia o,” oluk mo’gulentesi wene
21-22 #
Kel. 34:13
#
Ima. 26:1
Mo’gulentesirik, mesik mo’gulentasulat, “At henaik Allah ebaget wusogo wogogumu eragam lolu’gwe ebano onodo’gwi enasua ogut heli’gogo e’birek saplisogo edikpogulat, honodogwi henasua ye e’gen a’ge e’birek saplisogo, pogwi holuk e, at henaik Allah ebit modok epasumu re, asogo tu mia o,” oluk, mo’gulentesi.
Currently Selected:
Ulangan 16: Wul
Highlight
Copy
Compare
Share
Want to have your highlights saved across all your devices? Sign up or sign in
