Ulangan 15
15
’belaga’ge enebam a’ge erlagapsogo ukpogulom wene
(Imamat 25:1-7)
1Mo’gulentesirik, mesik mo’gulentasulat,
“Tahun 6 takpoluk mesik ’gogolil lasukhwe eriano pam ’belaga’ge ano erlagapsogo pogulom atma re, 2Erlagapsogo pogulom ano re, disogoat o. His Israel a’ge mesik en are mesik ’age ’belaga’ge ebam oruak holuk, at Allah en ’belaga’ge erlagapsogo pogulom erlige yuat o, oluk, egeimu re, honue henari de a? henare mesik de a, an ne’belaga’ge hebam oruak a’ge ano o’go woknemin, oluk, mo’guloum mia o. 3Ap ’bok a’ge holuk e, na’ge owi yaknemin, oluk mo’guloum obat a’geat de, his a’ge henare mesik hene’belaga’ge ebam oruak holuk e, weat hwerlegen o,” oluk e’belak memesogo ukpogu lorogup no yo.
4-5At henaik Allah en wene mo’gulhentasu a’ge ebano ’berlegat hwelak poluk til lagalat, ye, an en e, o yogodak ya pam wene disogo tip, asogo tip, oluk, mo’gulhentasu legi a’ge yu, ’berlegat opsogo motluk lagalat, tugwi holuk, at henaik Allah en e, dogoma a’ge modok-modok wolomma hono’gwiang wokhentasumu ebano oruakhwe, at henaik Allah en ede aganhan modok henebam pasumu re, ap ene’gik erlak a’ge mesik hene’gerlakma welema erlagat o. 6At henaik Allah en wene hwalogo mo’gulhentesi a’ge hegitsogo ede aganhan henebam pasumu re, lodu paget woknentemit o, oluk, di aphwami yu aphwami logon ’gonu mo’gulentagup erlak o. A’geat de, is di aphwami yu aphwami en ’gonu mo’gulhentau wagai holuk en nak e, wogontogu lomup o. His en e, di aphwami yu aphwami ’gwelagentarok welat, wene le’gelogo at mo’gulontogu lorogup a’geat de, is en his ’gwelakhentarok welat wene le’gelogo mo’gulhontogu lema erlak ani o.
7 #
Ima. 25:35
At henaik Allah en hono’gwiang wokhentesimu honowi kota ebano henarilak ene’gerlakma eba ap mesik e’gik erlak a’ge oruak holuk, henede wiak welat, orlumamit tu mia o. 8A’geat de, hena’ge-a’ge we lodu disogo mesik woknemis o, oluk mo’gulhontogwi holuk e, is erlak enat mo’gulhontogwimu re, hegit hegirat henede pam enat lebeksogo wogontogu lomup o. 9His henede wiak a’ge eberogulat, tahun weat hwerlemit, oluk u a’ge tahun 7 ano arat horok lau wagama yema re, oluk, wogonto a’ge henebit welarat de, woknentemit u a’ge ebano wogonto erlakma en ukpul oluk epagup no yo, is en his mesik togup a’ge ano paget at henaik Allah mo’gulogwi holuk e, his wiak togukhwe enil hontogu mu no oluk, pobirak pogulomat o.
10Henebit opogulat wogontogulom mia o. A’geat de, henede ’bekhitsogo welat, wogontogwi holuk e, his di yabuk, yu yabuk tugulat, di a’ge yu a’ge tu opoluk tugulat, tugukhwe at henaik Allah en ede aganhan henebam pasu lema o. 11#Mat. 26:11; Mrk. 14:7; Yoh. 12:8O his wolomma eba ap ene’gik erlak a’ge, ai a’ge erlak ema erlak modok-modok ebayat welemama re, is ap henari ene’gik erlak welat, nis yu a’ge erlakma re, letnentemit o, oluk mo’gulhontogwi holuk, henede opsogoat lerontogu lomup o, oluk, tugulom wene le’gelogo mo’gulhentasu aiat o,” oluk, mo’gulentesi.
Eneragam a’ge enagap delogo onobogulom wene
12 #
Ima. 25:39-46
Mo’gulentesirik, mesik mo’gulentasulat,
“His Ibrani a’ge mesik en e,” his a’ge hwami mesik a? Ap mesik a, ap mesik ming-ming a’ge o’go ’balu wagalat holuk, owi pam yabuk tagokhwe, tahun 6 arat takpoluk, tahun 7 a’ge pam agap delogo poluk ukpogulom at o. 13Ye, enagap delogo onobogwi ai erli’ge at e’gikmu erlak a’ge weat ukpo mia o. 14A’geat de, at henaik Allah ogola agai en e, obab henebasu laga ano ’gela’ge, is ap heneragam a’ge enagap delogo telakma tak onobogwi ai enede sebelogo pogwi a’ge ai, honuam kambing domba emin, gandum e’gen egesikmu welago a’ge ebano emin, anggur agap e’gen wogumu welagoma oruak a’ge ebano emin, modok ebam louksogoat wogontogu lomup o. 15His naduk o Mesir en aphwami eneragam a’ge takhonoboluk oruakma, at henaik Allah en e, his henebe henagap delogo honoboluk wokhonoboluk liplau waga ano henede eberak welemis o. Edip ai pam o yogodak an en wene yu le’gelogoat mo’gulhentasu legi ai o.
16Ye, ap heneragam a’ge mesik ebe op welat, ap o’go ’balua a’ge ano emin, ugwe emalik emin, edeabonoboluk en, his ukhonoboluk libom nebit o, oluk oso holuk e, 17ap ano eragam a’geat modok-modok welat, warom hwerliat lai louwak oluk, e ’gabelik a’ge mesik wasu lemarik, owi ’goduk pam eriano en eragam a’ge ano esa’go ele posogo pouwak o. Ye, hwami eneragam a’ge welema a’ge holuk e, asogo nak tak, onobogu lemak o.
18His heneragam a’ge enagap delogo onobogulom ano re, aphwami en o’go horlouwok oluk, yabuk tagonobogwi holuk e, heneragam a’ge enebaget yabuk togwi holuk, wogontogu legep ai ’gela’ge, agauwa ’birenam wogonto ’gela’ge atma re, heneragam a’ge enagap delogo onobo ai paget henede wathorlo mia o. Tahun 6 a’ge pam his henebaget yabuk Togukhwe, o’go weiyat horlogu legesema re, henede opsogoat enede obabonobogulat, togwi holuk, his en di a’ge yu a’ge til lagaihwe Allah en ede aganhan henebam pasu lema ani o,” oluk, mo’gulentesi.
Honuam naduk-naduk dak ago holuk tugulom wene
19 #
Kel. 13:12
Mo’gulentesirik, Mesik mo’gulentasulat,
“Honuam sapi emalik, naduk dagago holuk, yabuk togulom a’ge paget, polik pogulat, domba emalik naduk dagago holuk, o’go ’balogo pogulat, tu mia o. A’geat de, honuam lembu sapi emin, kambing domba emin, ene’gerlakma a’ge, holou dogum a’ge ene emalik naduk ierak a’ge deriso holuk e, henaik Allah ebaget pulogo pogu lomup o. 20Asogo pogu loroguptik, di tahun yu tahun pam henaik Allah ebaget pogumu ebano il pam eria enat his emin, heneiyagai emin, pogwi a’ge ebano wusogo poluk, seni sakho no’gu lomup o. 21Ye, Honuam ebetne yebil welat aik ’belak, awe wiak, il wiak, ebe wiak ai a’ge ’berlegat, wusogo henaik Allah ebaget po mia o. 22Ye, wiak henebam e’gerlik erlak a’ge emin, henebam e’gerlik a’ge emin, ’berlegat honowi pam lo’bok welat, rusa de a, at ’gela’ge kijang a, we yogunat no’gu legep ai ’gela’ge pogwi a’ge ebano ’gela’ge holuk wusogo we, yogunat no’gu lomup o. 23#Kej. 9:4; Ima. 7:26,27; 17:10-14; 19:26; Ula. 12:16,23Asogo no’gularat de, emep nak e, modogat no’gulom mia o. A’geat de, ik ’gela’ge ’gwiangma herlilogo hwikhogu lomup o,” oluk, mo’gulentesi.
Currently Selected:
Ulangan 15: Wul
Highlight
Copy
Compare
Share
Want to have your highlights saved across all your devices? Sign up or sign in
