Ulangan 17
17
1Mo’gulenteserik, mesik mo’gulentasulat,
“Ye, lembu a, domba de a, edip ’belak a? ebe wiak a’ge de a, at henaik Allah en nebit e, oluk, ebit henebasu ai en e, his en asogo takholuk e, henaik Allah ebaget pogulom mia o.
2At henaik Allah en hono’gwiang wokhentaikmu o kota mesik hene’gerlakma eba en ap mesik en a? hwe mesik en a, wene Allah en ologun ’balogo arat mo’gulhentesi a’ge ano sagalogo ukpoluk at henaik Allah il oruakhwe, wiak nak togulat, 3#Kel. 22:20Allah ebalema asua ogut heli’gogo edikpoluk eragam ’gonu oluk, erliktil lagai holuk a? dugwi emin, mo emin, hwesagal ’bogorl pam oruak a’ge emin, erliktago holuk a, an tu mia o, osokhweat de, ai a’ge ’berlegat togwi a’ge ebano, 4aphwami en mo’gulhentau wagai holuk de a, his honomu en holholuk de a, edip opsogo heratogu lomup o. Edip opsogo hwiogo poluk, ap wiak tago a’ge ai, aphwami Israel ene’gerlakma en demat tegei, oluk ’bakoso holuk e, 5ap a, hwe de a, wiak nak tago a’ge ai, o kota honowi ’goduk ’gu agaimu eria en e’gik lisogo woluk liplai laguptik, waremak oluk, helep pam ede harloksogo wusogo pomup o. 6#Bil. 35:30; Ula. 19:15; Mat. 18:16; 2Kor. 13:1; 1Tim. 5:19; Ibr. 10:28Ap ’biren a,? henagan emde a, demat tegeimu nenil hege o, ogwi holuk nak e, wusogo pogulom obat a’geat de, ap mesik en nak oso holuk nak e, waremak oluk wusogo pogulom mia o. 7#1Kor. 5:13Ye, wusogo po holuk nak e, ap il opsogo hesi a’ge ano en waremak oluk, is naduk worogwi holuk, pobuk is aphwami ’berlegat ene’gik ’berlek en helep pam wusogo pouwak o. Ap wiak asogo togwi holuk e, hene’gerlakma en lisogo a’guluak erlagapsogo pogu lomup o,” oluk, mo’gulentesi.
Wene e’gin holuk e, ap wene enebam pogulat no’gorlogulat, togwi a’ge ene’bek lagalom wene
8Mo’gulentesirik, mesik mo’gulentasulat; Ap ’biren en at werak at werak togwi holuk ap mesik e’birek en hat o’go pemen, hat o’go pemen ogwi holuk, ap e’birek enemep nam-nam ’bogwi holuk, wene ai a’ge his welagaimu en wene enebam pogulat, no’gorlogulat, tu mia holuk, at henaik Allah en o polik pesimu ebano enebei laga lomup o. 9Enebei loluk, ap Allah eiye Lewi a’ge emin, ap wene enebam pogulat, no’gorlogulat, togwi a’ge o ai erlige eba wene onuak loliselat welago a’ge ano emin, is en wene a’bosu ’balogo mo’gulhontouwak oluk, is mo’gulontomup o. 10Asogo mo’gulontogwi holuk, o At Allah en pulogo pasumu eba en wene uak lol enebise lemarik, disogoat tip o, oluk, mo’gulhontogwi a’ge ano pobirak poluk hegitsogoat togu lomup o.
11A’geat de, disogoat tugulom o, oluk wene mo’gulhontogwi a’ge ano motluk lagalat, honolukhwe legeik eden, ’belak eden ho modok mia o, ye, ap wene enebam pogulat, no’gorlogulat, togwi a’ge en, disogoat tugu lemis o, oluk, wene hwalogo mo’gulhontogwi holuk, is en egesa a’ge ai, hegitsogoat til laga lomup o. 12Ap mesik at henaik Allah, eiye welat, at ebaget tago a’ge ano en oso a’ge de, ap wene enebam pasulat, no’gorliselat tago a’ge ano en wene oso a’ge ano mia, opoluk ede en logo poluk, wene tak a’ge ano sagalogo pasu holuk e, ap ai ebe waremak oluk wusogo pogu lomup o. Ap wiak asogo togwi holuk Israel a’ge ene’gerlakma en lisogo a’guluak erlagapsogo pogu lomup o. 13Asogo togu lorogup a’ge ebano aphwami enebe ’berlegat enesa’go hologu lemarik, onogorlok en wene mesik mia opoluk sagalogo pogu lema erlagat ani o,” oluk, mo’gulentesi.
Ap mesik ’gain edikpogwi holuk, tagalom wene
14 #
1Sam. 8:5
Mogul entesirik, mesik mo’gulentasulat, “At henaik Allah en hono’gwiang wokhontouwama ebano ’gwilaguptik, eba eiye otluk welat, his en di aphwami yu aphwami o’borl-o’borl ’gwelagentarok welagai ai ’gela’ge, ’gwelaknentarok welemagoluk, nonue ’gain onuk logo a’ge mesik edikpouwok o, oluk, ogulat holuk e, 15at henaik Allah en ap ’gain welemagoluk edigonobogwi a’ge holuk nak ’gwelakhentarok welemagoluk edigonobogu lomup o, ye, edigonobogulat, ap ’bok a’ge holuk e, his Israel a’ge erlakma re, edigonobo mia o. A’geat de, his hena’gul onuk Israel a’ge holuk nak edigonobogu lomup o. 16#1Raj. 10:28; 2Taw. 1:16; 9:28Ap ai, edikpogwi holuk e, at en kuda a’bigat eiyetak pagathwerlasulat, ye, at Allah en agauwa mesik pam his o Mesir yema pobuk togolik wom mia o, oluk mo’gulhentesimu at de, at en his mo’gulhentasulat, o Mesir ebano kuda o’go ’Bali lit o, oluk, mo’gulhentasulat, tagalom mia o. 17#1Raj. 11:1-8; 10:14-22,27; 2Taw. 1:15; 9:27Ugami enebam enede gagalil lasumu no oluk e, hwami a’bigat wogenebiselat, ye, e’gik aling oruak a’ge welemagoluk, emas emin, perak emin, a’bigat odokhwerlasulat, tu modok mia o.
18-20Ap ai, aphwami tenentarok edik welat, tagalom a’ge ai paget e, tagalom a’ge wene werak a’ge yu emin, wene le’gelogo an en wene mo’gulhentasu legi a’ge yu emin, o’borlma poluk olukhwe erabu akhit, ogobu akhit eden peden hasulat, arilak mi-miarak onoboluk ede logo pasumu no oluk, tugulom a’ge wene pelal wogo a’ge ano ap Allah eiye a’ge en tenakho welagai a’ge ebano hegitsogo tuesi’ga perleng ebano pam odo ’bal hwerlasu, lemarik, at aik Allah onogorlok hogwi a’ge aluk agalat, at emin, eiyagai dagonobu a’ge emin, aphwami Israel a’ge ’gwelagentarok wolotluk enat huragalat, tuagoluk, buku ’belak a’ge ai eragam poluk ebe warom erlakma en elaluk welat, hwedik hwadik opsogoat mo’gulhwerlasu welemak o,” oluk, mo’gulentesi.
Currently Selected:
Ulangan 17: Wul
Highlight
Copy
Compare
Share
Want to have your highlights saved across all your devices? Sign up or sign in
