Ulangan 14
14
“Pong worogulat enede wathorlogulom mia o,” oluk, mo’gulentesi wene
1-2 #
Ima. 19:28; 21:5 #
Kel. 19:5,6; Ula. 4:20; 7:6; 26:18; Tit. 2:14; 1Pet. 2:9 Mo’gulentesirik, mesik mo’gulentasulat. “Is di aphwami yu aphwami o ’gwiang pam yema welagai a’ge enebe ’berlegat ene’gerlakma en his at eiyagai ede hwedik a’ge wolorogup en e, welemagoluk nenaik weleripogoluk, Allah en polikhenebesirik, his at ebaget degelogo henaik Allah eiyagai atma re, aphwami waragai holuk, henagap pam, ’bisok ’gagalogo hena’gul pam henasu ’balogulat, tu modok mia o,” oluk, mo’gulentesi.
Di a’ge yu a’ge logon we yogunat no’gulat, logon no mia, oluk mo’gulentesi wene
3Mo’gulentesirik, mesik mo’gulentasulat, “His di a’ge yu a’ge no puk a’ge no’gulom mia o. 4Ye, his di a’ge yu a’ge we yogunat no’gulom ano re yu at o: lembu, domba, kambing, 5Rusa lok a’ge, rusa wei a’ge, at ’gela’ge, kijang kambing maro, sapi maro, domba maro, aiat no’gulom o. 6Di a’ge yu a’ge onoyuk demat ’bekhit ’gagalak a’ge en e’gela dokhuksogo sebeliso a’ge ebano pobuk pisoksogo lekhasu holuk e, yogunat no’gulom obat o.
7Ai a’ge no’gulom obat a’geat de, e’gela oyuk en o’gulogo belebak poluk pobuk pisoksogo orlu ago a’ge de a, onoyuk demat ’gagalak a’ge de a, ebano nak e, a, onoyuk ’bekhit ’gagalak a? ano nak e, no’gulom mia o. Unta emin, ’baik Kelinci emin, ’baik pelanduk emin, ai e’gela o’gulogo belebak poluk, pobuk pisoksogo orlu agai a’geat de, onoyuk demat ’bekhit ’gagalak erlak holuk, no’gulom mia oluk, egeimu re, no’gulom mia o. 8Ye, wam ebano re, onoyuk ’bekhit ’gagalak at a’geat de, e’gela o’gulogo belebak poluk, pisoksogo lagabak holuk, his no mia o, oluk, egeimu re, einnyo no’gulat, werak pogwi erlak a’ge holuk ’bal horlo’gulat, tu mia o.
9Ik olomu a’ge his yogunat no’gulom ano re, di hiane yu hiane esing erik a’ge hwasogo hwikhogwi ano a’ge emin, o’borluak ebinpin ik il hialil noso a’ge ano a’ge emin, no’gulom op at a’ge at de, 10Ik olomu a’ge agap pam esing erik a’ge lo’boktak erlakma en agap erabul ye’berlangtak holuk de a, o’borluak pam a’ge ebinpin en ik il hialil noso erlak holuk de a, ai re, no’gulom mia o, oluk egeimu re, no’gulom mia o.
11Di tue, yu tue ai, asua erlak ’berlegat we no’gulom obat a’geat de. 12Tue no mia ano re, tue dungeni emin, pen emin, motluk emin, pen asu bo mia emin sing a’ge emin, 13sing emin, ’gut emin dape’gek legenak a’ge ’berlegat emin, 14tue sibeni a’gulonuk a’ge ’berlek emin, 15tue kerra’lu emin, hemania emin, sukbabi emin, orluk tue muk a’ge nasu a’ge ai a’ge ’berlegat emin, 16sukbabi emin, e garelil noso a’ge ai emin, sukbabi ’gut a’ge emin, 17tue pen emin, dawe emin, sogouwa emin, 18tue meyo emin, ’gwedik a’gulonuk ai a’ge emin, motluk ’gela’ge ebano a’ge emin, ’berlegat his no’gulom mia o.
19Di a’ge yu a’ge enagapsaburl oruak a’geat de, onoyuk pam no’gwi a’ge ’berlegat ai, no’gulom mia o, oluk egeimu re, no’gulom mia, a’geat de, 20Di a’ge yu a’ge enagapsaburl oruak a’ge no’gulom mia oluk elip erlak holuk nak e, ai ’berlegat his no’gulom obat o.
21 #
Kel. 23:19; 34:26 His ai, at henaik Allah at eiyagai modok polik atma re, di a’ge yu a’ge waragoam hwiak horlogulat, holuk his en no’gulom mia a’geat de, ap ’bok a’ge honowi kota mesikmu oruak a’ge ebano en nouwagoluk wogontogwi a, ap ’bok a’ge holuk o’go balhorlogulat a, tugulom holuk e, op at o.
Kambing domba ia wusogo soru holuk e, enia agamu a’bosu pam soru mia o,” oluk, mo’gulentesi.
Ena’ge di a’ge yu a’ge lo pam oruak holuk mesik ’gegilogo Allah ebaget pogulom wene
22 #
Ima. 27:30-33; Bil. 18:21 Mo’gulentesirik, mesik mo’gulentasulat,
“His di tahun yu tahun pam heniabukmu di a’ge yu a’ge owi yogo pogulomtik, e’gen ’balogo poluk, 10 oruak holuk, mesik-mesik ’gegilogo poluk nebaget pogulomup o. 23Asogo poguloroguptik, at henaik Allah modok-modok honogorloksogo welat hau worogulom a’ge ano mo’gulhwerlagup en e, gandum emin, Anggur a’bosu ’gerat ne’gak a’ge emin, e zaitun a’bosu emin, honuam lembu sapi, kambing, domba, naduk dogo a’ge emin, 10 oruak holuk e, mesik dedilogo pogulom a’ge ai, at henaik Allah en an welegimu yema en nak nonuk logo pogu lemak o, oluk pulogo pagupmu ebano at il pam eba en no’gulomup o.
24Ye, at Allah ene an welegimu yema en nak nonuk logo, pogu lemak o, oluk, polik pasumu ebano ebale walegatma re, ye, at henaik Allah en ede aganhan henebam pasulat, hena’ge a’bik wokhentasuam 10 pam oruak holuk e, mesik dedilogo pogwi a’ge ebano wik-wok ebela walegatma lo a’ge mia holuk e, 25Hena’ge dedilogo pogwi a’ge ano uang perak a’ge nak o’go ’balogu loroguptik, uang ai nak herle hetsogo wik-wok at henaik Allah en o pulogo pasumu eba laga loroguptik, 26Uang ai a’ge pam lembu sapi a, kambing domba a, anggur a’bosu a, ik a’bosu anni a’ge a, his henede en henagai hogwi a’ge holuk ano e’berlik nak o’go ’balogu loroguptik, his emin, henari henemin welagai a’ge ai emin ’berlegat at ’gain Onuk Logo a’ge henaik Allah il pam eria enat henede aganhan pam no’gulomup o.
27Ye, is ap Lewi a’ge his henemin wolomma eba dogoma a’ge en eiye omtik womma ’gwiang ’belak mesik his eiye orogup ano ’gela’ge, is eiye ema erlakma re, is we, ano wi a’ge ukpo mia o. Ageat de, opsogoat henil en wogonobogu lomup o.
28-29Is ap Lewi a’ge en dogoma a’ge en eiye wolomma ’gwiang ’belak a’ge eiye ema erlak a’ge ebano emin, aphwami ’bok a’ge emin, malik se’bin emin, hwami tugwe a’ge emin, o his henemin welagai a’ge ai, so’boru onogumsogo no’gulemagoluk hwerlau waga lemagoluk, tahun ’biren arat takpoluk mesik tak a’ge e’biang ’balisokhwe nak e’gen ’belak a’ge 10 pam oruak holuk e, mesik dedelik at ebaget, pogu loroguptik, wik-wok honowi kota ma eba pou waga lomup o. Asogo togwi holuk e, at henaik Allah en e, ede aganhan henebam pasukhwe, his hene’gik pam yabuk togwi ano op nak etil laga lorogup ani o,” oluk, mo’gulentesi,
Currently Selected:
Ulangan 14: Wul
Highlight
Copy
Compare
Share
Want to have your highlights saved across all your devices? Sign up or sign in
