Ulangan 13
13
1-3At Musa en asogo mo’gulentesirik e, mesik disogo mo’gulentesi,
“Ap mesik Allah iak mo’gulentasu a’ge en a, at e, abi pam mo’gulentasu a’ge en a,
Tu puk a’ge elalinat a’ge takhenebaik oluk, his en dogwi asua heneperlak a’ge eragam a’ge oroguptik e, erliktuagoluk, opogulat mo’gulhontouwa a’ge ai, ebe demat ema a’geat de, his en wene ai demat egei oluk pobirak poluk togup o. Is asogo tua ai re, Nenaik ’gain Onuk Logo a’ge Allah en e,
An neiyagai enede pam en an nebe enede hwedik oruak a, at e, eniak pam nak en ogwi a, oluk henebabut ’baligoluk e, is ai yo’go enebasuam asogo mo’gulhontouwa ai o. 4-5Is aphwami enebabut modok wiak asogo togwi a’ge ai en e, disogo togwi o. Nenaik ’gain Onuk Logo a’ge his o aphwami Mesir a’ge en eneragam a’ge ’gela’ge tenhentarok oruakma re, wokhonoboluk liplau waga a’ge ano his en,
Nenebit o, oluk ’goboksogo ukpoluk libemagoluk lalhonobogwi ai en e, is enebabut modok wiak asogo togwi a’ge ai erlak emagoluk enebe modok warenebip o. Asogo a’geat de, his Nenaik ’gain Onuk Logo a’ge Allah emin hwedik welat, at e’berlik laga lomup o. Lagalat e, at honogorloksogo, at en,
Disogo togu lomup, asogo togu lomup, oluk nenesa’go weregei wene ai, ’berlegat hwelak poluk hegitsogo modok til lagalat, at erliktogu lomup o.
6-7Asogo oruakma, henari honorokhwilak en de a, heneiyagai ap en de a, hwelani en de a, honugwami henede a’ge en de a, aphwami logon enemin hwedik a’ge en de a, honogola ’gagalogo, aphwami onowi horoksogo welagai a’ge emin, walegat welagai a’ge emin, ondogwi enasua erliktogwi a’ge ai, his heneperlagat o. Ye, nene’balak eneperlagat a’geat, his en mesik erliktuagoluk honogola ’gagalogwi holuk e, 8eniak hologup no yo. Ye, is en honogola ’gagalogukhwe henepe mosogo wolom miayat o. Ye, is ai enebe henedesogo welat, tenentarok wolom ogo modok mia o. 9-10Is en honogola asogo ’gagalogu lema a’ge ai, helep en modok ’be’giat warenebip o. Waronobogulat e, hat en helep pam naduk werisoma, aphwami ’berlegat en modok woruat o. Is aphwami ai en Nenaik ’gain Onuk Logo a’ge Allah aphwami Mesir a’ge en eneragam a’ge ’gela’ge tenhentarok oruakma wokhonoboluk liplau waga a’ge ano ukpoluk libemagoluk ming-minghonobua ai en e, enebe ugonobo erlakma en warenebip o. 11Asogo waronobumu re, aphwami Israel a’ge ’berlegat enesa’go holholuk e, onogorlok emarik, is logon en modok wiak ai ’gela’ge togu lema erlak o,” oluk mo’gulentesi.
12Ye, at henaik Allah en his honowi kota mesik wokhentasuam eba oruakma. 13Is ap wiak a’ge hene’gerlakma en inaga lemarik, is ado pema mo’gulontogulat, Allah ebalema asua heneperlak a’ge nenemin erlak ti louwok o, oluk mo’gulontogulat, is aphwami ai perleng onoboluk lalenebil laga o, oluk ogwi a’ge ano henesa’go hologulat holuk, 14His en e, wene o’go hin wok han wok mo’gulontogulat, wene ai ebabut opsogo pobirak pogwi, asogo togu loroguptik wiak Allah ebit epasu a’ge ai, hene’gerlakma eba demat ago a’ge enak ago holuk, 15’bouwa’gun pam aphwami o kota eba welagai a’ge ebano ’berlegat wusogo onobogulat, onuam wusogo pogulat, di a’ge yu a’ge harlok-herlaksogo ’bo pogulat, asogo tugulat, o ebano modok wollo’gen dagalogo pogu lorogup ani o. 16Asogo takpogu loroguptik, di a’ge yu a’ge onohogul wagup a’ge ebano ’berlegat onowi selimu ’burl eba odoksogo poluk, at Allah ebaget wusogo ’berlegat odouk narlogwi ai ’gela’ge, onowi werik emin, ena’ge onohogul wogo ebano emin, ’berlegat ’gain Onuk logo a’ge at henaik Allah ede yamuk uak oluk odouk narlip o. Ye, o ebano ebalema werik erlakma di a’ge yu a’ge moluk-melaktak a’ge wiagarak a’ge nak modok-modok orluktak nak welemak o.
17-18At henaik Allah en e, wene disogo tip, asogo tip, oluk egei a’ge an yogodak mo’gulhentasu legi a’ge yu, henesa’go opsogo hwelak poluk hene’gik, ’betesogo tenakho welat, opsogo nak til lagaihwe il hontoluk, at henaik Allah olot het odouk magale ’gela’ge libago a’ge ai erlak aga lemarik, hene’balak emin, wene modok daksogo ’balogo mo’gulentesi a’ge ano ’gela’geat his edeaphonoboluk ukhenebasulat, ede hwedik takhenebasulat, henebe a’bik modok takhenebasulat, tuama re, di a’ge yu a’ge wiak a’ge holuk e, odouk narluogoluk, degelogo pogwi a’ge ebano hene’gikmu oruakma hwiak honobua no, oluk, mesigat nak ogo wo modok mia o, oluk, mo’gulentesi.
Currently Selected:
Ulangan 13: Wul
Highlight
Copy
Compare
Share
Want to have your highlights saved across all your devices? Sign up or sign in
