Ulangan 1
1
Wene ebe owan mo’gulonto erlak welat naduk-naduk pelal wesi wene
1’Wene ’belak yu ’berlegat e, at Musa en aphwami Israel a’ge enemin o leimu aphwami erlakma o Yordan do’go eba welat mo’gulentesi a’ge wogo oruak. Ye, o do’go ai re, ik Yordan abel mo porlu ago hegit o kota Paran likholuk, ye, o kota Tofel emin, Laban emin, Hazerot emin, Di-Zahab emin, ’belap holuk, ’burl kota Suf horoksogo ebayat o. 2O dom Sinai eba en e, o Kades-Barnea eba womogoluk, ebela o Edom o’gwe wagalat e, agauwa 11 pam nogoluk wagai o.
3Is aphwami Israel a’ge o Mesir en liplau wegesarikmu en tahun 40 pam, dugwi is ene’gik wenarogulat 11 wenarogwi a’ge pam, tanggal 1 pam, at Musa en Nenaik ’gain Onuk Logo a’ge en wene,
“Disogo tip, asogo tip,” oluk aphwami Israel a’ge mo’gulontuagoluk mo’gulesi a’ge ano ’berlegat mo’gulentesi. 4#Bil. 21:21-35Asogo mo’gulentesi ai re, at Musa en ap ’gain onuk Sihon, is aphwami ena’gul onuk Amori a’ge onue ’gain welat o kota onuk Hesybon welaga a’ge ai emin, ap ’gain onuk Og, o Basan do’go aphwami kota Asytarot a’ge emin, Edrei a’ge emin, onue ’gain onuk logo a’ge tenentarok welaga a’ge emin, e’biregat mabenap enebegeitik en mo’gulentesi. 5Musa en wene asogo mo’gulentesi ai re, ik Yordan abel o mo porlu ago hegit, aphwami Moab a’ge onowi hegit eba welat, wene Nenaik ’gain Onuk Logo a’ge en,
“Disogo tip, asogo tip,” oluk enesa’go weriselat, mo’gulentasulat tegei a’ge ano edip pam en ’beli’gogo mo’gulentaigoluk tegei. 6Asogo eselat disogo mo’gulentesi,
“Nis dom Sinai edipmu oruakma Nenaik ’gain Onuk Logo a’ge Allah en disogo mo’gulnentesi epegi,
His o dom edipmu yema agauwa a’bigat welegep. 7Holuk e, yogodak his honowi sum owi a’ge moluksogo woluk e, aphwami ena’gul onuk Amori a’ge onowi dom pam eba emin, o eba eragam o’gwe da ya ’berlegat, o Yordan do’go emin, dom petne emin, sogweik o’gwe emin, o ik o’but hegit emin, ik laut ’Burl a’ge ye’gelak esa’go ’gwe emin, lu o. Laguptik e, o Kanaan emin, o dom Libanon petne en ’bekhit ik lok Efrat hwerli lu o. 8An henaik ’gain Nonuk Logo a’ge en, hene’balak Abraham emin, Ishak emin, Yakub emin, mo’gulentasulat,
O eba ’berlegat his emin, his en dagonobogup a’ge emin, wokhentaik o, oluk wene arat weragenebegimu o. Holuk e, o eba sebeli ’gwilu o, oluk mo’gulnentesi epegi,” oluk mo’gulentesi.
Musa en ap wene opsogo hwalogulemagoluk edik enebesi wene
9-10Mo’gulentesirik, mesik emin mo’gulentasulat, “Agauwa ai erlige an en his mo’gulhentasulat, at ’gain onuk logo a’ge henaik Allah ene hwesagal ’bogorl pam welago ano ’gela’ge, yogodak his henebe a’bigat wiyalogo henebesimu welegepma re, his honowene a’bosu ’baliselom ai re, e’gin, a’bikmu re, an nomu en tagalom mia o, oluk mo’gulhentegis ani o.
11At hene’balak enaik Allah en e, wene a’bosu ’balogo mo’gulhentesi ano hegitsogo o yogodak henebe logon eminat dagetil lagup-lagup ap ene’gik wenaru miayat takpasulat, at ede aganhan henebam pasulat, taga lemak o. 12Asogo togulom obat a’geat de, his en e’gin henebam agalat, di wene yu wene henebam agalat, wene ’bal ’bal ’bugulat, asogo togwi holuk e, an nomu en e, e’gin ai no’gosogo lek hasulom? 13Miayat ai en e, his ene ap hena’gul onuk lo’bok di wene yu wene ’berlek enaluk, enede oruak a’ge, at iak hologwi a’ge holuk nak pulogo woknogwi holuk e, ’gwelakhentarok welat, honowene a’bosu ’balogu lemagoluk edikpaik ai o.
14Asogo mo’gulhentasuam, his en o’go an mo’gulnogulat, wene mo’gulnentigen ai, obatma re tuok o, oluk, mo’gulnorogupmu, 15an en his honuelak honowene a’bosu ’balogulom a’ge hena’gul onuk lo’bok enede oruak a’ge at iak holu a’ge holuk, wogenebegeirik enebe 1.000 oruak holuk eiyesogo welemagoluk, mesik edikpasulat, enebe 100 oruak holuk eiyesogo welemagoluk mesik edikpasulat, enebe 50 oruak holuk, eiyesogo welemagoluk mesik edikpasulat, enebe 10 oruak holuk eiyesogo welemagoluk mesik edikpasulat, takpil lagarik, hena’gul onuk lo’bok honowene a’bosu ’balogu lemagoluk e, enemin edik enebegi ani o.
16-17Asogo edik enebesirik agauwa o ai erligeat honuelak wene enebam pogulat, no’gorlogulat, togwi a’ge ebano mo’gulontogulat, his en honue henari Israel a’ge is-is nak wiak togwi holuk a, is ap ’bok a’ge hene’gerlakma welagai a’ge ebano en his Israel a’ge henemin wiak logon togwi holuk de a, onowene a’bosu ’balogulat, yu re, onuk oruak, ye, yu onuk erlak oluk, onorogole he’berl hegeik onowene a’bosu ’balogulom ai re, mia o. A’geat de, aphwami onowene a’bosu ’balogwi ai re, Allah eiye atma re, is ap enebe pam honogorlok ho erlakma en is eniak ogwi a’ge nak henesa’go hwelak poluk togu lema a’ge hegitsogoat onowene a’bosu ’balogu lomup o. A’geat de, wene e’gin ’gela’ge takhenebasu holuk e, an en is eniak hwelak poluk, onowene a’bosu ’balik en e, enebe wogonoboluk neragam onobou waga lomup o, oluk, mo’gulentegis. 18Asogo mo’gulentesirik, o ai erlige di wene yu wene his en tugulom a’ge ’berlegat modok leik-louksogo mo’gulhentegis ani o,” oluk, mo’gulentesi.
Ap o enil ’gogolil legesa a’ge ebano pobuk-togolik mo’gulentesi wene
19Asogo mo’gulentesirik, pobuk emin mo’gulentasulat e, “At nenaik Allah en wene mo’gulentesi a’ge ano hegitsogoat, nis o dom Horeb pam en ’gebela o lei lok paregei a’ge oruakhwe o dom pam ap Amori a’ge welagaimu eba en ’bekhit o Kades-Barnea at wegesa ano henaluk ani o. 20Asogo wegerik, an en his mo’gulhentasulat, At nenaik Allah en ap Amori a’ge ono’gwiang dom pam emikmu nis woknontoma ebano arat wegerikmu re, 21At hene’balak enaik Allah en mo’gulhentesi ano hegitsogo, At nenaik Allah en nono’gwiang pageat woknentesi hegi, oluk, eiyetak pagathorloluk, weleripok oluk lagupmu re, honogorlok hogulat, henede perik parik tugulat, tu ai re, mia o.
22Asogo mo’gulhentasuam e, his henebe ’berlegat en an neragam ne’bek wegeptik mo’gulnogulat e, o nis, ’gwi lotluk wolomma eba emin, ’gebela loma emin, o kota nis loma eba emin, no’gorak oruakma nenil hul? oluk, enil ’gogol hai loluk mo’gulnentaumak oluk ap enebe naduk perak onobouwok o, oluk, mo’gulnigep ani o.
23Asogo mo’gulnentigep a’ge ano an en modok op at epegirik his hena’gul onuk 12 welagai a’ge ebano, hena’gul onuk lo’bok mesik hegeik poligenebasuam e, 24eba en is ’gebela o dom o’gwe oruakhwe ukpoluk o Eskol dogoma eba wegesarik o yema enil ’gogoligisa o. 25Asogo enil ’gogoligisarik, e e’gen o yema a’ge daganluk woknesi lagalat, At nenaik Allah en ’gwiang woknentasu ano re, modok obat hege o, oluk, mo’gulnesi legesa.
26 #
Ula. 9:23; Ibr. 3:16 Asogo mo’gulnesi legesa a’geat de, at henaik Allah en e, tu a’ge le’gelogo wene mo’gulhentesi a’ge ano ukpoluk o yema wom a’ge nenebit epegep ani o. 27Nenebit epegeptik e, his honowi saboma ebano en henede en nebit nabit ogulat, at Allah yu nis ebirap nonoboluk, is ap Amori a’ge en nenebe erlagapsogo nonobouwak oluk, o Mesir en woknonoboluk liplau wagarik, is ene’gikmu nonobou wagama 28hege o, oluk, is nenarilak ebano en wene nonogola sebik-sebeksogo ’beterak pogulat e, erlak o. O eba ap nis gela’ge erlak enebe modok enebagase, lik lok a’ge nak welat onuak yat a’ge nak oruak o kota eba helep pak modok ’bogorl emin dipholuk ’gela’ge werik poluk welat, ye, is ap enak ogo re eba eneminat welat, togukhwe a’ge entige o, oluk, mo’gulnentigisa.
29Asogo mu’gulnentigisema, an en his mo’gulhentasulat, is enebe paget henede erlak agalat, honogorlok hogulat, tu ai re, mia o. 30His o Mesir ebano en henil domok hogukhwe, at Allah en his henebaget tagokhwe henil hegep ano ’gela’ge, at henaik Allah at naduk emarik henebaget weim tua o. 31#Per. 13:18Ye, ap mesik omlogo ukpo erlakma en yarukho woluk noso ai ’gela’ge at henaik Allah en his o lei o’gwe ’gebela pam wokhonoboluk wagalat, henebe lok maat henagap delogo yarluk honoboluk o yemaat honobou waga ano his henalugat o. 32-33#Ibr. 3:19Wokhonoboluk wagalat, his henebaget at naduk otluk, honowi sabo woru a’ge ano mo’gulhentasulat, ’gebela wom a’ge henalugwap pasulat, tuak oluk, o erlige holuk, hena ogola otluk, wokhonoboluk wagalat, hubago holuk, odouk magale ’gela’ge otluk, wokhonoboluk wagalat, til-til degelogoat wokhonoboluk wagokhweat de, his en henaik Allah ano demat oluk henede at ebam he’berik po erlakma enat welegep ani o,” oluk, mo’gulentesi.
Israel e’gin enebam pesi a’ge ano togolik mo’gulentesi wene
34 #
Ibr. 3:18
Asogo mo’gulentesirik mesik emin mo’gulentasulat, his en nebit-nabit ogu legep ai pam, at nenaik Allah esa’go hwelegeirik olot het en ho’buk ’baliselat,
35His ap o yogodak wiak a’ge nak dogo a’ge yu, o ’gwiang esei opma wokhentaik o, oluk, “hene’balak enemin wene ologun daksogo ho’buk ’balogo mo’gulentegismu ebano, his mesigat nak en ogo re, henil hagup modok erlak o. 36At Yefune omlogo Kaleb omuat il hai louwa o. An henaik Allah, nede epasu a’ge nak at opsogo ede demat modok daksogoat mouk noboluk lasumu re, at oyuk pil lasumu ebano nak at emin, eiyagai emin, is enematek nak wogentaik egei ani o.
37Edip his henebabut pam at ’gain onuk logo a’ge henaik ogo re Allah ano en olot het nebam pasulat, hat, o eba hoyuk pei lagun erlak o, oluk, mo’gulnesi a’geat de, 38At lethasu a’ge Nun omlogo Yosua ano en nak e, aphwami Israel o eba eiye takpoluk welemagoluk, wogonoboluk ’gwilouwama re, hede ha’buksogo wolomup o.” 39His heneiyagai His henemalik wei-wei a’ge wiak op ai eneperlakma re, nenemin selei a’ge en hogul delogo wogonoboluk louwa o neneselei a’ge en hogul a’ge delhwerlil louwa ani o, oluk, egep a’ge ano, is nak o eba wogentasuam eiyerak pagathorloluk, welemagoluk, ’gwi louwa o egep a’ge ano is en nak o eba wotluk eiye emarik wolomok oluk ’gwilouwa o. 40Ye, his nak e, hokhom-hokhom ’gebela o lei akhit ik Laut Merah lagaimu ebayat lit o.
41Oluk mo’gulhentasuam his en an mo’gulnogulat, nis at Allah wiagap pege a’geat de, asogo takhweat at nenaik Allah en e, wene mo’gulnentesi a’ge ano hegitsogo weim til louwok o, oluk, egeptik o dom petne eba weim ti lo ai lok erlak o, opogulat henematek lo’bok henesegen honua’gun leik-louktak poluk louwok oluk tugukhwe, 42At Allah en an mo’gulneselat, An is ene’gerlakma wolom erlakma en ugenebaikmu re, is eneselei a’ge en e, liplau wagalat, sebelogo onobouwama re, is weim ebil louwano oluk e, no lagup, oluk mo’gulontomup o.
43Mo’gulnesimuat mo’gulhentegis a’geat de, henesa’go holu erlakma at Allah en tu oluk mo’gulhentesi a’ge ano henebit opogulat, henede en seramsogo dom petne, eba weim til wagaimu re, 44is aphwami Amori a’ge o dom petne eba welagai a’ge ebano en e ’gin ia ’gela’ge ho’gorlakma e’girl henebil liplau wagalat, Sebelak enebaik o, o Seir en e, mukhonoboluk o Horma hwerliat henebei legesa ani o. 45Asogo henebei legesema, pobuk togolik honowi pam legeptik at Allah il pam di lo’gu yu lo’gu marigep a’geat de, at Allah en his lo’gu marogu legep a’ge ano pobirak poluk esa’go holu erlakma en epe mosogoat welaga.
46“His o Kadesh eba aregen a’ge mo egeptik oruakhwe modok aregena aga ani o,” oluk, mo’gulentesi.
Currently Selected:
Ulangan 1: Wul
Highlight
Copy
Compare
Share
Want to have your highlights saved across all your devices? Sign up or sign in
