Daniel 7
7
Daniel abi ’gela’ge pam yethasu laga a’ge mo’gulentesi wene
7:1–12:13
Singa ’gela’ge emin, ’baik ’gela’ge onuk beruang a’ge emin, ebe ugan a’ge telakma agoam Daniel abi ’gela’ge pam hesi wene
1-2An Daniel, ap Belsyazar aphwami Babel a’ge onue ’gain agarik, tahun naduk tenentarok welaga eria hegit, o hup agauwa mesik pam an ebale nogosoma en nabi ’gela’ge pam yethegirik e, nabi ’gela’ge yethegi a’ge ai pelal ’balogo pegi a’ge ebe re, yu:
Sogwei o erabu akhit en, orogobu akhit en, etleba akhit en, yema akhit en, annisogo punhau wagalat, ik laut lok ye’gelak a’ge modok o’borlogouk hasuam erliak-’gwerliak a’bik hesi. 3#Wah. 13:1; 17:8Asogo tagoam e, singa ’gela’ge emin, ’baik ’gela’ge onuk beruang emin, ebe ugan en modok lok-lok a’ge ebe hun-hun a’ge ik olomu en liplau wagoma yethegi. 4#Wah. 13:2Naduk liplau waga re, ebe singa ’gela’ge a’geat de, agapsaburl e, tue pedi-pedi agapsaburl ’gela’ge a’ge yethegi o. Asogo yethegirik nil pusogo yetharok oruakma agapsaburl pinogo hwikholuk e, ’gwiangma en ha’boksogo aphwami edik welagai ai ’gela’ge oyuk pam edikpoluk e, ebabut, aphwami enebabut ’gela’ge wogosoma yethegi o.
5Naduk asogo liplau wagarikmu en, e’berlik e, ’baik num ’gela’ge lok a’ge onuk beruang ai liplau wagoma yethegi. Asogo liplau wagarik e, enabel uak henagan a’ge iak en sarluksogo woluk oyuk pam inagoma yethegi. Asogo inagama, at mesik en iak disogo mo’gulosoma nesa’go hwelegis,
“Ap se’gerlak hogola en hagai hegen a’ge hegitsogo loksogo men o,” oluk mo’gulosoma nesa’go hwelegis.
6Asogo hwelegistik, nil ebam modok puttak oruakma re, is singa ’gela’ge emin, ’baik ’gela’ge emin, enebe ’biren asogo liplau wegesarikmu en mesik 'baik ’gela’ge lok a’ge onuk harimau ’gela’ge a’ge liplau waga a’ge re, o’borluak pam e, agapsaburl ugan pam tue agapsaburl ’gela’ge tak a’ge re, a’guluak uganat welaga. Ye, at di a’ge yu a’ge e’gik pam welemagoluk wogosoma hegi.
7 #
Wah. 12:3; 13:1 Asogo hegirik, nil ebam puttak modok oruakma re, is singa ’gela’ge emin, 'baik harimau ’gela’ge lok a’ge emin, enebe henagan en asogo liplau wegesarikmu en, mesik liplau wagoma yethegi o. At ai anni modok a’bik a’ge re, onogorlogap pogwiam enarogun lasu a’ge hegi o. At iak e, lok-lok a’ge re, ’besieme’gen a’ge nak harowiak daintak welaga. Holuk e, at nasu a’ge wusogo nasulat, ado wiagapsogo oyuk en sagalogo ukpasulat, tagoma yethegi. Is singa emin, ’baik emin, 'baik ’gela’ge lok a’ge emin, naduk selakma egesa a’ge ai muat a’ge re, at ai muat. At iak a’gul pam e, 10 en daintak oruakma yethegi. 8#Wah. 13:5,6Asogo yethegirik, nil iak a’gul pam a’ge ebano pobisogo yetharok oruakma re, erianoat iak 10 ai oruakhweat de, ogola en iak akhen libagokhwe yethegiat. Iak ai ebe weiyat a’geat de, mesik naduk libaga a’ge ai henagan a’ge iak wei a’ge ai wolom erlakma en henakho lasumu yethegi. Iak wei a’ge ai il e, aphwami enil ’gela’ge oruak a’ge re, emde pam en iak a’bik erlikhwerlasumu yethegi o.
At Daniel abi ’gela’ge pam at elaluk modok welago a’ge yethesi wene
9 #
Wah. 1:14; 20:4 Asogo yethegirik nil yetharok modok oruakma, e ap ’gain a’ge hweriogo welagai a’ge kursi logon pasumu yethegi. Asogo pesimu, ap elaluk modok welago a’ge ai e enalo’gwe hweriogo welagai a’ge mesik pam huragama hegi. Ap ai osum emin, asu emin, orogole op ’gut modok ’bogorl a’gurlok ’gela’ge. Ye, e alo’gwe hweriogo welaga a’ge ai, oyuk ’gwiangso oyuk ’gela’ge hele’gik a’ge re, odouk magale lobuk-lobuk osoma hegi o. 10#Wah. 5:11; 20:12Ye, alo’gwe hweriogo welaga a’ge ai pam en ik odouk a’ge eraluk hwalogo lasumu yethegi. Ye, aphwami enebe di deng ’go’bok yu deng ’gobok modok a’bik a’ge at ebaget togu legesa. Aphwami enebe ene’gik wenaru modok mia jutaan a’ge at orogolema edik oruakma yerentegis. Asogo welat, aphwami enemdema wokho wene enebam pasulat, no’gorliselat, tigoluk tuesi’ga ’berlegat hebelisoma nil yethegi.
11Asogo nil yetharok oruakma, at mesik iak wei a’ge a’gul pam daintak a’ge ano u’gwarek en iak modok a’bik erlikhwerlasulat, logo pagathwerlasulat, tisoma nesa’go hwelegis o. Wam iak a’gul pam daintak a’ge ano arat werak poluk e, ebe waragoam e, odoukmu hwikhegesema odouk en nasumu yethegi o. 12Asogo a’geat de, is singa ’gela’ge ano emin, ’baik num ’gela’ge ano emin, 'baik ’gela’ge lok a’ge ano emin, ebano nak e, di a’ge yu a’ge ene’gik pam welaga a’ge ai delogo wik-wok e,
Henebe nak e, hwerli ai hwerli henelaluk wolomup o, oluk ugenebasumu hegi o.
13 #
Mat. 24:30; 26:64; Mrk. 13:26; 14:62; Luk. 21:27; Wah. 1:7,13; 14:14 O hup ai erlige nabi ’gela’ge pam asogo yethegirik, nil yetharok modok oruakma, ap omlogo abat dagaga a’ge o hena ’bogorl pam wale’gik a’ge ano ogola oruakhwe, at Elaluk Modok Welago A’ge ano e’bek hegit lasuam e, is logon en e’bek horoksogo woluk lagaimu yethegi o. 14#Wah. 11:15Asogo woluk lagaimu, at ebe erliktogu lemagoluk, ’gain edikpesirik, aphwami ’berlegat at e’gik pam welemagoluk wogosoma yethegi o. Asogo wogesimu, aphwami ’berlegat ena’gul onuk lo’bok, enagap lo’bok, eniak lo’bok, at eragam welat at ebaget togukhwe yerentegis o. At en anni pam tenentarok modok oruakma, is logon en mabenap pouwa modok erlak a’ge yethegi o.
Daniel en abi ’gela’ge pam yethesi a’ge ai paget hin wesimu, at mesik en, “Disogo om a’ge paget hegen o,” oluk ’beli’gogo mo’gulesi wene
15An nabi ’gela’ge pam yethegi a’ge ai paget nogorlok agama, nede perik welat mennei yat horok eberiso modok welegi o. 16Asogo welat, is logon edik welegesa a’ge ebano mesik en wene ai paget ’berlegat ebe ’beli’gogo mo’gulnemagoluk e’bek horoksogo legirik mo’gulegis. Asogo mo’gulegismu, at en e,
“Disogo ema a’ge paget hegen,” oluk mo’gulneselat e, 17disogo egei,
“Singa ’gela’ge emin, ’baik num ’gela’ge emin, 'baik ’gela’ge emin, mesik a’ge ai emin, ebe ugan pam modok lok a’ge yethegen ai ebe re, pobuk o ’gwiangma yema ap onuelak ’gain enebe ugan a’ge selakma emarik tenentarok welema a’ge paget hegen o. 18#Wah. 22:5Asogo a’geat de, aphwami Allah ’gain lok logo welat anni a’bik a’ge pam at eiyagai nak e, aphwami logon ene’gik pam onobouwama, tenentarok welat, pobuk erlak om erlakma en tenentarok modok welema o,” oluk mo’gulnesi.
19Asogo mo’gulnesi a’geat de, ebe henagan logon liplau wegesarikmu en, at mesik mu a’ge ebe modok onogorlogap tiso a’ge re, e’gik ogop tembaga a’ge ai pam emin, iak ’besieme’gen a’ge ai pam emin, wiagap enebiselat, at nasu a’ge wusogo nil lasulat, ado wiagapsogo oyuk en sagalogo ’bo pasulat, taga laga a’ge ai paget e,
Ebe ’gesogo ema a’ge paget yethegi hwe, naluk elep e, oluk yethegi. 20Ye, iak a’gul pam ebe 10 en daintak welaga ai emin, ye, iak asogo daintak oruakma, iak mesik wei a’ge pobuk libagokhwe, iak naduk ai a’ge henagan en iak wei a’ge ai ogoiyesogo henokho laga ai o. Iak wei a’ge ai il emin, emde emin oruak a’ge re, iak modok a’bik u’gwarek en erlikhwerlasu laga ai o. Iak daintak pema akhit ai weisogo mia ’gela’ge a’ge re, mesik wei a’ge ai nak e, modok onogorlok a’ge ’gela’ge ai paget en e,
Ebe ’gesogo ema a’ge paget yethegi hwe? Naluk elep e, oluk epegiat o.
21 #
Wah. 13:7
Asogo epegirik, nil ebam pusogo oruakma re, at iak weiyat a’ge ano en aphwami Allah u’gwarek eiyagai enemin weim obogulat, mabenap enebasu laga. 22#Wah. 20:4Asogo mabenap onoboluk oruakma, at Elaluk Modok Welago A’ge ano wagarik e, aphwami Allah ’gain lok logo welat anni a’bik a’ge pam at eiyagai ebano oruak o’gwe agarik,
Wene is enebam erlak, oluk sebelogo enebesimu, is en aphwami tenentarok welema a’ge arat lau wagama yethegi.
23“Ai naluk ele e,” oluk asogo epasuam, at ano en disogo mo’gulnesi,
“Singa ’gela’ge emin, ’baik num ’gela’ge emin, 'baik harimau ’gela’ge a’ge emin, ebe henagan telakma agarikmu en mesik telakma aga ai ebe re, ap ’gain enebe henagan a’ge hun domogat o ’gwiangma yema telakma egesarikmu en mesik telakma ema a’ge paget hegen o. Aphwami en so’boru haumsogo no’gwi ’gela’ge, ap ’gain ai en, aphwami o ’gwiangma di owi yu owi welagai a’ge, warenebil lasulat e, ado oyuk en sagalonobua a’ge paget hegen o. 24#Wah. 17:12Ye, iak ebe 10 en daintak yethegen ai ebe re, ap ’gain 10 enat ’gain otluk aphwami tenentarok wolomma eba tenentarok welema a’ge paget hegen o.
Asogo tenentarok oruakma, ap ’gain mesik telakma ema o. At ai, is ap ’gain naduk a’ge eria ’gela’ge erlak, mu a’ge at telakma otluk ap ’gain enebe 10 ai a’ge enebe henagan logon mabenap onobua o. 25#Wah. 12:14; 13:5,6At ai en eselat e,
Allah ’gain lok logo welat anni a’bik a’ge ebe modok nebit, oluk Allah u’gwarek eiyagai di obotut yu obotut tagenebasu lema o. Asogo welat, Allah eiyagai at Allah iak hologo hegitsogo togwi a’ge ai emin, seni Allah paget sorogwi a’ge ai emin, mu ebelesogoat takpaigoluk walhouwa o. Asogo walhasulat, enebe e’gik tenentarok mo il henagan en e, dugwi 6 emin welema o. 26Asogo tenentarok oruakhwe ’bo’gorl pam a’ge wene ’beli’gogumu wene arat deksogo oluk en e, at ai en e’gik pam tenentarok welema a’ge ai delogo wik-wok e, ebe dagalogo modok erlagap pouwa o. 27#Wah. 20:4; 22:5Asogo takpoluk e, o ’gwiangma di owi yu owi ’berlegat onuelak ’gain en ene’gik pam tenentarok welagai ai emin, enanni oruak a’ge welagai ai emin, ’berlegat Allah ’gain lok logo welat anni a’bik a’ge eiyagai a’ge ene’gik pam pouwa ani o. Asogo takpouwama, is en tenentarok modok-modok oruakma, ap ’gwiangma a’ge ononuk oruak a’ge ’gela’ge welagai a’ge ai ’berlegat enebe is eneragam welat is enebaget togulat eniak hologo welema o,” oluk mo’gulnesi. 28Asogo yethegimu,
“Ebe disogo ema a’ge paget hegenma o,” oluk mo’gulnesi a’ge pelal wokho pegi a’ge ebe re, egi aiat o. A’ge re, at ai en asogo mo’gulnesimu, nogorlok egirik norogole erlak aga a’geat de, wene ai ’berlegat, aphwami logon mo’gulonto erlakma en mo egi.
Currently Selected:
Daniel 7: Wul
Highlight
Copy
Compare
Share
Want to have your highlights saved across all your devices? Sign up or sign in
