Daniel 8
8
Abi pam domba kambing emin il hesi wene
1At Belsyazar ano aphwami onue ’gain agarik tahun ’biren ago a’ge ano pam wene hwalogo mo’gulentasukhwe, an Daniel en nabi hegi o. Asogo hegirik, pobuk tahun ’biren takpoluk, tahun mesik henaganak a’ge ano pam en ap ’gain Belsyazar en wene mo’gulentasukhwe an Daniel en nabi mesik hegiat o. 2Asogo hasulat, nebe o Elam ap ’gain ano owi lok op a’ge werikmu ebano oruakma kota Susan ik Ulai esa’goma edik oruakhwe hegi o. 3Asogo edik welat, ni laga lekho yethegi’gale, domba ierak a’ge mesik iak ’biren yat a’ge nakma re, ik Ulai esa’go’ma edik oruakhwe hegi o. Iak ’biren eriano mesik modok yarat a’geat de, pobuk yatsogoat ligagoma hegi o. 4Asogo hegirikmu en domba ierak a’ge ano re, olukhwe o mo obuk ilasu hegit eba edenogo poluk a’gul ’golodok hasulat, pobuk nin o erabu akhit olukhwe edenogo poluk a’gul ’golodok hasulat, takpoluk, o sogweik akhit olukhwe edenogo poluk a’gul ’golodok hasulat, til lasukhwe nak til-til at en tiso ai pam is logon en werak poluk mo ogulat, at sebelogo pogwi a’ge ebano enagap delogo pogulat, tu mia at hegi o. At anni modok a’bik atma re, tu epasu a’ge ano nak til lasulat e, ede en logo pil lasumu hegi o.
5Ai a’ge tagokhwe hegi a’ge ano paget, an nede ebetil lasumu, kambing ierak a’ge mesik iak mesigat nak mesik modok op a’ge en il pema-pema oruakhwe ’burl eba en iak daintegei a’ge ano re, o mo obuk ilasu hegit akhit eba en oyuk ’gwiang pam po erlak o ’gwiang yu ’berlegat ’belap hil-hil wagoma hegi o. 6At kambing ai, domba ierak a’ge iak ’biren a’ge ik esa’goma edik oruakhwe hegi a’ge ano oruakma wagarik, at olot-het modok miasogo tagalat, e’birek soborak lagaimu hegi o. 7Olot het modok a’bik en pungtak domba ierak a’ge ano e’birek yik ’buk ogulat, domba ierak a’ge iak ’biren a’ge ano modok harloksogo pesimu, domba ano iak dektak poluk wolom mia en, kambing ano re, anni a’bikmu re, at ebe ’gwiangma bo poluk oyuk en sebit-sebit lasukhwe re, anni a’bikmu no oluk e, ap mesik en delu a’ge mia agoma hegi o.
8Asogo takpasu hegirikmu en, at kambing ierak a’ge ano, modok anni agalat, at iak a’gum ’gwia hil yatsogo ligagalat, tagoam e, iak modok op lok a’ge ano harlok osoma hegi o. Iak harloktak a’ge ano ebalema iak 4 modok mubelesogo dain tagoma hegirik, ’bogorl-burl ede’burl ya yasobu erei akhit en orogou akhit en sogwei erabu orogobu en etleba yema en wetil wago a’ge ano, wetil wago hegit eba en iak 4 a’ge eriano hun hunat onolukhwe hwalogo poluk oruakhwe libagoma hegi o.
9Ye, iak 4 eriano mesik ebam en iak wei a’ge mesik dain tegeitik ebe lok etil ligagalat, olukhwe o sogweik akhit pei lasulat, o mo yegelogo orlu ago hegit eba edenogo pasulat, ’gwiang modok op welago hegitsogo eba olukhwe edenogo pasulat, tagokhwe hegi o. 10#Wah. 12:4Iak ai, modok lok etil lasukhwe is ’bogorl pam enesegen oruak a’ge welagaimu ligotluk, is hwesagal ’gela’ge is ’bogorl pam welagai a’ge ado pema ebano re, ’gwiangma hwikenta ’bu otluk, oyuk en sobut-sebat entasumu hegi o. 11Is ’bogorl pam enanni a’bik welagai a’ge onue ’gain ano, An ’gela’geat o, oluk, loruk hupmu, at onue ebaget wusogo wogogwi a’ge ano, pobuk mesik emin wogoum mia o, oluk, mo’gulentasulat, at ebe erliktogumu ebale ano moluksogo pasulat, tagokhwe nil hegi o. 12Aphwami en Allah en oso a’ge mesik emin eberlik motluk lo nenebit o, oluk, loruk hupmu ebaget wusogo wogogwi a’ge ano ukpogulat, Allah iak ai demat a’ge erlak o, oluk, we, apseri a’ge sogo ukpogulat, tigisema re, iak ano en til lasu a’ge ’berlegat demat nak agokhwe hegi o.
13Pobuk at omu degelak a’ge mesik ano en wene osoam e, at omu degelak a’ge mesik ano en o’go mo’guleselat, loruk hupmu eba’get wusogo wogogwi a’ge ano erlak agalat, Allah mesik emin motluk lagalom nenebit o, oluk, ena’guluak erlagapsogo pogulat, ye, at erliktogumu omu degelak welago a’ge ano wiagapsogo pogulat at ’bogorl pam welago a’ge osilak enesegen oruak a’ge sebelogo onoboluk onoyuk en besil ontogulat, togukhwe habi pam hegen a’ge ano togukhwe agauwa meren ema epegen o, oluk nabi pam mo’gulnosoma hegi o.
14Nabi pam mo’gulnosoma hegirikmu en at en o’go an mo’gulneselat, loruk hupmu hubet en ’bekhit wenatil-wenatil hupmu hwerliat lai lasulat, agauwa la’bolik ai re, 2.300 ema o. Asogo emarik, at erliktugumu omu degelak a’ge ano naduk op welaga ’gela’geat ema o, oluk, mo’gulnosoma hegi o.
Abi’gela’ge pam hesi a’ge edip disogo yo, oluk, mo’gulesi wene
15An Daniel ano en nabi ’gela’ge pam hasu legi a’ge yu no’gasogo hegi, oluk, nede ebetil lasumu, wolom erlakma enat ap ’gela’ge nologotma inlau wagoma hegi o. 16#Luk. 1:19,26Inlau wagarik oruakhwe, at mesik ik Ulai ede ’burlmu en iak loksogoat eselat e, Gabriel o. At ap ai, abi ’gela’ge pam hesi a’ge ano edip ’baksogo mo’gulemin o, oluk, osoma nesa’go hwelegis o. 17Asogo hwelegistik, an eriano edik oruakma neragam horoksogo wago en, youk egirik nogorlok en nil sum-sum sogo sakhun egirik ’bourak oruakma at en e, an mo’gulneselat. Aphwami en dogo a’ge yu o. “Habi ’gela’ge pam hegen ano re, pobuk o ologun pam tua a’geat hegenma re, opsogoat pobirak pomup o,” oluk, mo’gulnosoma hegi. 18At owan mo’gulnosokhwe, nil sum-sumsogo ’gwiangma ’bourak oruakma, at en an nebe tenak nebesirik ediknebesi. 19Ediknebesirik, an mo’gulneselat, Habi hegen ano re, o ologun pam tua erlige tu a’ge anoat hegenma re, pobuk Allah olot het en tua a’ge ano mo’gulheik o.
20 Domba ierak a’ge iak ’biren hegen ano re, ap Media emin, Persia emin, onuelak ’gain inom a’ge ano a’ge pagerat hegenma o. 21Kambing ierak a’ge asu wiak a’ge ’gela’ge hegen ano re, ap o Yunani a’ge onue ’gain anoatma re, iak mesik lok a’ge at ile’gen pema-pema oruakhwe daintegei mu hegen ano re, ap Yunani a’ge ’gain naduk a’ge anoat paget hegen o. 22Ye, iak mesik dek egerik, ebalema iak 4 en libagoma hegen ano re, eragam enebasumu ebano aphwami eneragam onoboluk wolomma 4 enagat ema a’geat de, at eragam enebasumu anni lebe u erlakma en ha’buksogo welaga ’gela’ge, asogo welema erlak o.
23Aphwami eneragam onobogumu 4 eriano re, erlagapsogo onobo erlige horok lau wagokhwe, is Allah motluk lo a’ge modok nenebit o, oluk, ogwi a’ge ene’gerlakma ap wiak togwi a’ge enebabut ’gorlo a’ge modok inagaiam e, ap ’gain mesik olot het en iak esei pam aphwami lalenebiso a’ge edibat inema o. 24Inago holuk e, at anni a’bigat ema a’geat de, at ematek anni pam taga lema erlak o. At mesik en, anniap pouwa ai pam aphwami enemi etil lasu a’ge takpil lasulat, at en tu epasu a’ge ano dagan u erlakma en pobirak poluk nak hegitsogo til lasulat, is ap enanni welagai a’ge emin, Allah eiyagai modok degelak a’ge emin ena’guluak erlagapsogo enebasulat, tua o. 25At iak esei oso a’ge edibatma re, iak a’bosu deptak oso ano pam at oso a’ge ano dagan oso erlakma en demat hegitsogo nak agalat, an elit oluk logo pil lasulat, nis nenede o’borlogouk erlak op welege opogukhwe re, aphwami a’bigat erlagapsogo enebil lasulat, at ogorlok opo erlakma en is ap ’gain-’gain en Onue ’gain Onuk Logo a’ge ano sebelogo po epasulat, tua a’geat de, at nak e, aphwami ene’gik en woru erlakhweat de, at onue enat werak welema ani o. 26Habi ’gela’ge hasulat, loruk hupmu hubet en wenak-wenak hupmu lailo a’ge hegen ano re, demat tu a’ge mo’gulhosoma hegen a’geat de, o pobuk ologun pam tu a’ge mo’gulhosokhwe hegenma re, wene ai hedemu sebelak poluk wolomup o, oluk, mo’gulnosoma hegi.
27Asogo hegirik wene mo’gulnesi ai pam an Daniel nebe modok nanni erlagapsogo nebasuam ou obotut en ’gela’ge ’boutak oruakhwe agauwa meren ’gela’ge aga. Asogo agoam e, inotluk at ap ’gain en tu a’ge mo’gulnoso a’ge anoat tagalat, nabi’gela’ge hegi a’ge ai, enak a’ge pobitu erlak ai, No’gosogo hegi? Oluk, nede ebetil nak modok lasu legi o.
Currently Selected:
Daniel 8: Wul
Highlight
Copy
Compare
Share
Want to have your highlights saved across all your devices? Sign up or sign in
