Daniel 5
5
’Gain Nebukadnezar omlogo Belsyazar en seni seregei wene
1Asogo egeitik welegesarikmu en, at Belsyazar ’gain agarik pobuk agauwa mesik erlige seni loksogo soruogoluk, ap ’gaindek a’ge enebe 1.000 en yo’go enebesimu wegesema enemin welat, ik anggur a’bosu a’ge no’gu legesa. 2Asogo no’gulat, at Belsyazar en ige’be emas a’ge emin, perak a’ge emin, at aik Nebukadnezar en nenaik Allah owi werikmu Yerusalem oruakma en wesi a’ge ebano wouwagoluk is logon mo’gulentesi. Asogo mo’gulentesi ai re, at ’gain Belsyazar osilak ’gaindek emin, ugwami edip hwami emin, ugwami eragam a’ge emin, enemin en ige’be ebano pam na’gogo nouwogoluk egei. 3Asogo mo’gulentesimu, ige’be ebano at e’bek woluk wegesema, at ’gain Allah ebe emin, osi ’gaindek emin, ugwami edip hwami ebano emin, ugwami eragam a’ge emin, enebe ’berlegat ik anggur a’bosu ige’be ebano pam na’gogo ne’gesa. 4Asogo no’gulat, dogwi asua emas a’ge emin, perak a’ge emin, tembaga a’ge emin, e a’ge emin, helep a’ge emin, hele’gegisa a’ge ebano erliktigisayat.
5Asogo erliktogwi oruakma erianoat, at mesik e’gik nak, at ’gain owi hebat pam esaga ’bak-’bage yogo pesimu telakma eriano pelal logon ’balisokhwe, at ’gain ano il hesirik e’gik o’borl pam nak yetharok modok welaga. 6Asogo hesirik e, ogorlok en orogole erlak agarik uak lup ’bo pasulat, uak anni erlak agalat, tegei. 7Asogo lagarik, iak loksogo disogo egei,
“Ap asuagun di a’ge yu a’ge elalin togwi a’ge emin, di wene yu wene owene enaluk a’ge emin, hwesagal owene enaluk a’ge emin, worlentemit o,” oluk egeimu wegesema re, is ap o Babel enede ’gagalak di wene yu wene enaluk a’ge ai, disogo mo’gulentesi,
“Sa en pelal onuk ’belak a’ge ai onuk tualiselat, ebe disogo ema a’ge paget pelal ’belak oruak, oluk elit mo’gulneselat, mo’gulnema holuk, an en at hau wusogo sum orogole wip e’gen ’belak ’gela’ge ap ’gain a’ge en ’buktogwi a’ge ’buktak ebasulat, ’besieme’gen emas a’ge o’gorlopma wantak pasulat, tik o. Asogo wantak pasulat, aphwami an en tenentarok welegimu yema, nononuk oruak a’ge welat logo a’ge re, nomor 1 an, ye, nomor 2, an ne’gik ’bekhit akhit a’ge ne’birek oruakma re, pobuk nomor 3 at ai edikpaik o,” oluk mo’gulentesi. 8Asogo mo’gulentesimu, ap enede modok ’gagalak a’ge at ’gain e’bek wegesa a’ge ebano logon en pelal ’belak a’ge ai onuk tualugulat, ebe disogo ema a’ge paget pelal ’belak oruak, oluk mo’guloum modok miayat aga. 9Asogo mo’guloum mia agama, at ’gain Belsyazar modok ebenagaikmu ogorlok agalat, orogole erlak agalat, tegei. Asogo tegeimu, is ap at osi ’gaindek ebano enarogun modok erlak aga.
10Asogo enarogun modok erlak agarik, at ’gain ebe emin, osilak ’gaindek emin, eniak loksogo asogo ogwiam e, at hwe ap ’gain ia iak holholuk seni sorogumu ’gwegeitik e, disogo egei,
“’Gain nomlogo yo. Hebe helaluk modok wolomup o. Hogorlok otluk horogole erlak om erlakma en hede yamuksogo wolomup o. 11Hat en heragam a’ge tenentarok welegenma yema, ap mesik aphwami logon en e,
Nenaik ebe yuat o, oluk erligobogwi a’ge arogun ogola modok ’beterak a’ge mesik oruak o. Ap ai, hat haik en tenentarok welaga eriano pam a’guluak modok hwerik a’ge, di wene yu wene pobitu ede modok ’gagalak welat, aphwami en e,
Nenaik ebe yuat o, oluk erligobogwi a’ge en enede ’gagalogo mo’gulontogwi ’gela’ge oso a’ge oruak o. Asogo oso ai pam, hat haik en at ai ebe ap wene pobuk om a’ge mo’gulontogwi a’ge emin, asuagun di a’ge yu a’ge elalin togwi a’ge emin, di wene yu wene owene enaluk a’ge emin, hwesagal owene enaluk a’ge emin, onue ’gain welemagoluk edikpesi a’ge ebe oruak ai en e, hede yamuksogo wolomup o. 12At ap ai a’guluak hwerik. Aphwami logon mia ’gela’ge a’ge re, at ede modok ’gagalak di wene yu wene aluk welat, enabi hogwi a’ge,
Ebe disogo ema a’ge paget hegenma, oluk mo’gulentasulat, ebe hisogo a’ge ’baksogo mo’gulentasulat, di wene yu wene o’go u modok mia a’ge elit nak mo’gulentasulat, tiso a’ge onuk Daniel ai a’ge re, at ’gain a’ge en Beltsazar onuk tualegei a’ge ebe aiyat oruak o. Holuk e, at en pelal ’belak a’ge ai,
Ebe disogo lai louwa a’ge paget pelal ’belak oruak o, oluk mo’gulhemagoluk e, worlhemen o,” oluk mo’gulesi.
At Daniel en pelal ’belak a’ge ai, “Ebe disogo ema a’ge paget ’belak oruak o,” oluk mo’gulesi wene
13Asogo mo’gulesimu, at Daniel ebe woluk ’gain e’bek wegesema re, at ’gain en disogo mo’gulesi,
“An naik ’gain en ap Yehuda a’ge herle wusogo wogonoboluk waga a’ge mesik onuk Daniel egesa ai harat a? 14Hat ha’guluak modok hwerik. Aphwami logon mia ’gela’ge a’geat de, hat di wene yu wene pobitu hede modok ’gagalak oruakma, aphwami en e,
Nenaik ebe yuat o, oluk ogwi a’ge arogun hogola modok welago yo, oluk mo’gulnegisema hwelegis ai o. 15Ap enede ’gagalak di wene yu wene enaluk a’ge emin, asuagun di a’ge yu a’ge elalin togwi a’ge emin, enemin en pelal wogo a’ge ai paget,
Ebe disogo ema a’ge paget pelal wogo oruak o, oluk onuk tualuagoluk ne’bek wogonoboluk wegesa a’ge re, is en e,
Ebe disogo om a’ge paget pelal wogo oruak, oluk u modok mia aga o. 16Asogo mia agama oruakma, aphwami en hat hobok ogulat e,
At en e, wene hisogo a’ge,
Ebe disogo ema a’ge, oluk elit mo’gulentasulat, di wene yu wene o’go u mia a’ge elit mo’gulentasulat, tago, oluk egesema nesa’go hwelegis o. Holuk e, hat en pelal wogo a’ge ai onuk tuelak poluk e,
Ebe disogo ema a’ge paget pelal ’belak oruak o, oluk elit mo’gulnorogun holuk, an en hat hau wusogo sum orogole wip e’gen ’belak a’ge ’gela’ge ap ’gain a’ge en ’buktogwi a’ge ’buktak hebasulat, ’besieme’gen emas a’ge ho’gorlop pam wantak hebasulat, tik o. Asogo wantak hoboluk, aphwami an tenentarok welegimu yema, nononuk logo oruak nomor 1 an, ye, nomor 2, an ne’gik ’bekhit akhit a’ge ne’birek oruakma re, pobuk nomor 3 hat edikhebaik o,” oluk mo’gulesi. 17Asogo mo’gulesimu, at Daniel en e,
“Nue, o’go wokheik e’gen ai re, hat hu’gwarek pagathwerlagun holuk obat o, ap mesik wogorogun holuk obat o, nue. Asogo a’geat de, an en e, hat hebaget pelal wogo a’ge ai onuk tuelak poluk e,
Ebe disogo om a’ge paget pelal ’belak oruak, oluk mo’gulheik o.
18At Allah lok logo welat anni a’bik a’ge en hat haik Nebukadnezar ebe ’gain welemagoluk edikpoluk aphwami at e’gik pam welemagoluk wogeselat, ’gain oruakhwe erliktogu lemagoluk takpasulat, tegei ai o. 19Asogo wogesi ai en e, at ebe ’gain oruakhwe, aphwami ’berlegat ena’gul onuk lo’bok, enagap lo’bok, eniak lo’bok, at ebe onogorlok en onuak erlik ’bo pogu legesa ai o. At en e, aphwami logon warenebik epasulat holuk, enebe modok warenebise laga. Ye, delenebik epasulat holuk, delenebise lagayat. Ye, at en, aphwami logon sebelak enebaik, epasulat holuk, sebelak enebasulat, logo enebaik epasulat holuk, logo enebasulat, taga lagayat. 20Asogo a’geat de, at u’gwarek en,
An elit, oluk erlikhwerlasulat, a’gul erik modok agalat, aphwami mep legeik-lagaiksogo tagenebasulat, tagoam, Allah en e,
Hat ’gain wolorogun erlak, oluk pobi tegeirik, aphwami enalli a’ge ’goroksogo wokhogwi ai ’gela’ge, at onuk lasu laga a’ge ai pam en, at ebam en delogoat wokhesi. 21At ebe aphwami enebam en mukho lebikpegesema, ebabut wam ebabut ’gela’ge agarik, ebe wam keledai maro a’ge emin e’gelema welat, e’gela sapi en nasu ’gela’ge nasulat, parema nogo oso oruakma hena’gil’gil ’bogorl pam en ’bu agalat e, ebam yaro’gwik welaga ai o. Asogo welagarik en, at en eselat e,
Ap ’gain welat, aphwami tenentarok welagai ai, at Allah lok logo welat e’gik anni pam welagai hegi. Asogo e’gik pam welat, at en,
At ai ’gela’ge ’gain welemak, oluk epasu hegitsogoat ’gain welemagoluk edigenebasumu hegi o, oluk emde pam en ’baksogo egei.
22Asogo a’geat de, at omlogo hat Belsyazar en e, wene ai ’berlegat haluk a’geat de, hede sebelho re, hebirat o, nue. 23Hat en e, at Allah ’bogorl pam anni a’bik a’ge welat il pam e, hede logo pagathwerlasu legen ai. Asogo logo pagathwerlasulat, hogorlok erlagat ige’be Allah owi werikmu en ene’gik abusak wegesa a’ge ai wai louwagoluk mo’gulentigenma woluk wegesema re, hat hebe emin, hosi ’gaindek emin, hugwami edip hwami emin, hugwami heragam a’ge wogenebigen a’ge emin, henemin ige’be eba pam ik lu’gweasogo ne’gep ai. Asogo no’gulat, hat hebe helaluk wolom emin, di a’ge yu a’ge togulom emin, Allah e’gik pam oruakhweat de, at hau wusogo erliktu erlak, dogwi asua perak a’ge emin, emas a’ge emin, tembaga a’ge emin, ’besieme’gen a’ge emin, e a’ge emin, helep a’ge emin, hele’gogwi a’ge enil onto modok miayat, enesa’go holu miayat, wene pobitu miayat a’ge ai erliktigen ai o, nue. 24Asogo tigen ai enat, at Allah en e, e’gik ai yo’go pesirik, pelal ai ’baluagoluk perakpou wagama ’balegeimu hegen ani o, nue.
25Pelal wogo ai disogo wogo oruak,
Mene, mene, tekel, ufarsin, oluk pelal ’belak oruak. 26Wene ebe re, disogo om a’ge paget pelal ’belak oruak:
E’gik wenaregei oluk u ’gela’ge, mene oluk ’balegei ai, ebe re, hat en tenentarok welegen ai Allah en e’gik arat wenaregeitik, ologun arat wusogo pesimu oruak o. 27E’gin walhesi oluk u ’gela’ge, tekel oluk ’balegei ai ebe re,
Hat hebabut taga legen ai, Allah en walhesi a’ge re, modok mia hesi o. 28Ye, me’gilegei oluk u ’gela’ge re, ufarsin oluk ’balegei ai, ebe re, aphwami hat en tenentarok welegen ai me’gilema o. Me’gilogo re, aphwami Media a’ge wogentasulat, Persia a’ge wogentasulat, tua o, nue,” oluk mo’gulesi.
29Asogo mo’gulesimu, at Belsyazar en perlenesogoat, at osi mo’gulentasulat e,
“Daniel osum orogole wip e’gen ’belak a’ge ’gela’ge ap ’gain a’ge en ’buktogwi a’ge ’gela’ge ’buktak obogulat, ’besieme’gen emas a’ge o’gorlopma wantak obogulat, tit o,” oluk mo’gulentesimu, asogo tigisema disogo egei,
“An tenentarok welegimu yema, nononuk oruak a’ge lok logo nomor satu an, ye nomor 2, an ne’gik ’bekhit akhit a’ge, oruakma re, pobuk nomor 3, at Daniel edikpegi o,” oluk mo’gulentesi. 30Asogo mo’gulentesirik oruakma, o huba’go eriano pamat, is aphwami Babel a’ge onue ’gain Belsyazar ano ebe werigisa.
Currently Selected:
Daniel 5: Wul
Highlight
Copy
Compare
Share
Want to have your highlights saved across all your devices? Sign up or sign in
Daniel 5
5
’Gain Nebukadnezar omlogo Belsyazar en seni seregei wene
1Asogo egeitik welegesarikmu en, at Belsyazar ’gain agarik pobuk agauwa mesik erlige seni loksogo soruogoluk, ap ’gaindek a’ge enebe 1.000 en yo’go enebesimu wegesema enemin welat, ik anggur a’bosu a’ge no’gu legesa. 2Asogo no’gulat, at Belsyazar en ige’be emas a’ge emin, perak a’ge emin, at aik Nebukadnezar en nenaik Allah owi werikmu Yerusalem oruakma en wesi a’ge ebano wouwagoluk is logon mo’gulentesi. Asogo mo’gulentesi ai re, at ’gain Belsyazar osilak ’gaindek emin, ugwami edip hwami emin, ugwami eragam a’ge emin, enemin en ige’be ebano pam na’gogo nouwogoluk egei. 3Asogo mo’gulentesimu, ige’be ebano at e’bek woluk wegesema, at ’gain Allah ebe emin, osi ’gaindek emin, ugwami edip hwami ebano emin, ugwami eragam a’ge emin, enebe ’berlegat ik anggur a’bosu ige’be ebano pam na’gogo ne’gesa. 4Asogo no’gulat, dogwi asua emas a’ge emin, perak a’ge emin, tembaga a’ge emin, e a’ge emin, helep a’ge emin, hele’gegisa a’ge ebano erliktigisayat.
5Asogo erliktogwi oruakma erianoat, at mesik e’gik nak, at ’gain owi hebat pam esaga ’bak-’bage yogo pesimu telakma eriano pelal logon ’balisokhwe, at ’gain ano il hesirik e’gik o’borl pam nak yetharok modok welaga. 6Asogo hesirik e, ogorlok en orogole erlak agarik uak lup ’bo pasulat, uak anni erlak agalat, tegei. 7Asogo lagarik, iak loksogo disogo egei,
“Ap asuagun di a’ge yu a’ge elalin togwi a’ge emin, di wene yu wene owene enaluk a’ge emin, hwesagal owene enaluk a’ge emin, worlentemit o,” oluk egeimu wegesema re, is ap o Babel enede ’gagalak di wene yu wene enaluk a’ge ai, disogo mo’gulentesi,
“Sa en pelal onuk ’belak a’ge ai onuk tualiselat, ebe disogo ema a’ge paget pelal ’belak oruak, oluk elit mo’gulneselat, mo’gulnema holuk, an en at hau wusogo sum orogole wip e’gen ’belak ’gela’ge ap ’gain a’ge en ’buktogwi a’ge ’buktak ebasulat, ’besieme’gen emas a’ge o’gorlopma wantak pasulat, tik o. Asogo wantak pasulat, aphwami an en tenentarok welegimu yema, nononuk oruak a’ge welat logo a’ge re, nomor 1 an, ye, nomor 2, an ne’gik ’bekhit akhit a’ge ne’birek oruakma re, pobuk nomor 3 at ai edikpaik o,” oluk mo’gulentesi. 8Asogo mo’gulentesimu, ap enede modok ’gagalak a’ge at ’gain e’bek wegesa a’ge ebano logon en pelal ’belak a’ge ai onuk tualugulat, ebe disogo ema a’ge paget pelal ’belak oruak, oluk mo’guloum modok miayat aga. 9Asogo mo’guloum mia agama, at ’gain Belsyazar modok ebenagaikmu ogorlok agalat, orogole erlak agalat, tegei. Asogo tegeimu, is ap at osi ’gaindek ebano enarogun modok erlak aga.
10Asogo enarogun modok erlak agarik, at ’gain ebe emin, osilak ’gaindek emin, eniak loksogo asogo ogwiam e, at hwe ap ’gain ia iak holholuk seni sorogumu ’gwegeitik e, disogo egei,
“’Gain nomlogo yo. Hebe helaluk modok wolomup o. Hogorlok otluk horogole erlak om erlakma en hede yamuksogo wolomup o. 11Hat en heragam a’ge tenentarok welegenma yema, ap mesik aphwami logon en e,
Nenaik ebe yuat o, oluk erligobogwi a’ge arogun ogola modok ’beterak a’ge mesik oruak o. Ap ai, hat haik en tenentarok welaga eriano pam a’guluak modok hwerik a’ge, di wene yu wene pobitu ede modok ’gagalak welat, aphwami en e,
Nenaik ebe yuat o, oluk erligobogwi a’ge en enede ’gagalogo mo’gulontogwi ’gela’ge oso a’ge oruak o. Asogo oso ai pam, hat haik en at ai ebe ap wene pobuk om a’ge mo’gulontogwi a’ge emin, asuagun di a’ge yu a’ge elalin togwi a’ge emin, di wene yu wene owene enaluk a’ge emin, hwesagal owene enaluk a’ge emin, onue ’gain welemagoluk edikpesi a’ge ebe oruak ai en e, hede yamuksogo wolomup o. 12At ap ai a’guluak hwerik. Aphwami logon mia ’gela’ge a’ge re, at ede modok ’gagalak di wene yu wene aluk welat, enabi hogwi a’ge,
Ebe disogo ema a’ge paget hegenma, oluk mo’gulentasulat, ebe hisogo a’ge ’baksogo mo’gulentasulat, di wene yu wene o’go u modok mia a’ge elit nak mo’gulentasulat, tiso a’ge onuk Daniel ai a’ge re, at ’gain a’ge en Beltsazar onuk tualegei a’ge ebe aiyat oruak o. Holuk e, at en pelal ’belak a’ge ai,
Ebe disogo lai louwa a’ge paget pelal ’belak oruak o, oluk mo’gulhemagoluk e, worlhemen o,” oluk mo’gulesi.
At Daniel en pelal ’belak a’ge ai, “Ebe disogo ema a’ge paget ’belak oruak o,” oluk mo’gulesi wene
13Asogo mo’gulesimu, at Daniel ebe woluk ’gain e’bek wegesema re, at ’gain en disogo mo’gulesi,
“An naik ’gain en ap Yehuda a’ge herle wusogo wogonoboluk waga a’ge mesik onuk Daniel egesa ai harat a? 14Hat ha’guluak modok hwerik. Aphwami logon mia ’gela’ge a’geat de, hat di wene yu wene pobitu hede modok ’gagalak oruakma, aphwami en e,
Nenaik ebe yuat o, oluk ogwi a’ge arogun hogola modok welago yo, oluk mo’gulnegisema hwelegis ai o. 15Ap enede ’gagalak di wene yu wene enaluk a’ge emin, asuagun di a’ge yu a’ge elalin togwi a’ge emin, enemin en pelal wogo a’ge ai paget,
Ebe disogo ema a’ge paget pelal wogo oruak o, oluk onuk tualuagoluk ne’bek wogonoboluk wegesa a’ge re, is en e,
Ebe disogo om a’ge paget pelal wogo oruak, oluk u modok mia aga o. 16Asogo mia agama oruakma, aphwami en hat hobok ogulat e,
At en e, wene hisogo a’ge,
Ebe disogo ema a’ge, oluk elit mo’gulentasulat, di wene yu wene o’go u mia a’ge elit mo’gulentasulat, tago, oluk egesema nesa’go hwelegis o. Holuk e, hat en pelal wogo a’ge ai onuk tuelak poluk e,
Ebe disogo ema a’ge paget pelal ’belak oruak o, oluk elit mo’gulnorogun holuk, an en hat hau wusogo sum orogole wip e’gen ’belak a’ge ’gela’ge ap ’gain a’ge en ’buktogwi a’ge ’buktak hebasulat, ’besieme’gen emas a’ge ho’gorlop pam wantak hebasulat, tik o. Asogo wantak hoboluk, aphwami an tenentarok welegimu yema, nononuk logo oruak nomor 1 an, ye, nomor 2, an ne’gik ’bekhit akhit a’ge ne’birek oruakma re, pobuk nomor 3 hat edikhebaik o,” oluk mo’gulesi. 17Asogo mo’gulesimu, at Daniel en e,
“Nue, o’go wokheik e’gen ai re, hat hu’gwarek pagathwerlagun holuk obat o, ap mesik wogorogun holuk obat o, nue. Asogo a’geat de, an en e, hat hebaget pelal wogo a’ge ai onuk tuelak poluk e,
Ebe disogo om a’ge paget pelal ’belak oruak, oluk mo’gulheik o.
18At Allah lok logo welat anni a’bik a’ge en hat haik Nebukadnezar ebe ’gain welemagoluk edikpoluk aphwami at e’gik pam welemagoluk wogeselat, ’gain oruakhwe erliktogu lemagoluk takpasulat, tegei ai o. 19Asogo wogesi ai en e, at ebe ’gain oruakhwe, aphwami ’berlegat ena’gul onuk lo’bok, enagap lo’bok, eniak lo’bok, at ebe onogorlok en onuak erlik ’bo pogu legesa ai o. At en e, aphwami logon warenebik epasulat holuk, enebe modok warenebise laga. Ye, delenebik epasulat holuk, delenebise lagayat. Ye, at en, aphwami logon sebelak enebaik, epasulat holuk, sebelak enebasulat, logo enebaik epasulat holuk, logo enebasulat, taga lagayat. 20Asogo a’geat de, at u’gwarek en,
An elit, oluk erlikhwerlasulat, a’gul erik modok agalat, aphwami mep legeik-lagaiksogo tagenebasulat, tagoam, Allah en e,
Hat ’gain wolorogun erlak, oluk pobi tegeirik, aphwami enalli a’ge ’goroksogo wokhogwi ai ’gela’ge, at onuk lasu laga a’ge ai pam en, at ebam en delogoat wokhesi. 21At ebe aphwami enebam en mukho lebikpegesema, ebabut wam ebabut ’gela’ge agarik, ebe wam keledai maro a’ge emin e’gelema welat, e’gela sapi en nasu ’gela’ge nasulat, parema nogo oso oruakma hena’gil’gil ’bogorl pam en ’bu agalat e, ebam yaro’gwik welaga ai o. Asogo welagarik en, at en eselat e,
Ap ’gain welat, aphwami tenentarok welagai ai, at Allah lok logo welat e’gik anni pam welagai hegi. Asogo e’gik pam welat, at en,
At ai ’gela’ge ’gain welemak, oluk epasu hegitsogoat ’gain welemagoluk edigenebasumu hegi o, oluk emde pam en ’baksogo egei.
22Asogo a’geat de, at omlogo hat Belsyazar en e, wene ai ’berlegat haluk a’geat de, hede sebelho re, hebirat o, nue. 23Hat en e, at Allah ’bogorl pam anni a’bik a’ge welat il pam e, hede logo pagathwerlasu legen ai. Asogo logo pagathwerlasulat, hogorlok erlagat ige’be Allah owi werikmu en ene’gik abusak wegesa a’ge ai wai louwagoluk mo’gulentigenma woluk wegesema re, hat hebe emin, hosi ’gaindek emin, hugwami edip hwami emin, hugwami heragam a’ge wogenebigen a’ge emin, henemin ige’be eba pam ik lu’gweasogo ne’gep ai. Asogo no’gulat, hat hebe helaluk wolom emin, di a’ge yu a’ge togulom emin, Allah e’gik pam oruakhweat de, at hau wusogo erliktu erlak, dogwi asua perak a’ge emin, emas a’ge emin, tembaga a’ge emin, ’besieme’gen a’ge emin, e a’ge emin, helep a’ge emin, hele’gogwi a’ge enil onto modok miayat, enesa’go holu miayat, wene pobitu miayat a’ge ai erliktigen ai o, nue. 24Asogo tigen ai enat, at Allah en e, e’gik ai yo’go pesirik, pelal ai ’baluagoluk perakpou wagama ’balegeimu hegen ani o, nue.
25Pelal wogo ai disogo wogo oruak,
Mene, mene, tekel, ufarsin, oluk pelal ’belak oruak. 26Wene ebe re, disogo om a’ge paget pelal ’belak oruak:
E’gik wenaregei oluk u ’gela’ge, mene oluk ’balegei ai, ebe re, hat en tenentarok welegen ai Allah en e’gik arat wenaregeitik, ologun arat wusogo pesimu oruak o. 27E’gin walhesi oluk u ’gela’ge, tekel oluk ’balegei ai ebe re,
Hat hebabut taga legen ai, Allah en walhesi a’ge re, modok mia hesi o. 28Ye, me’gilegei oluk u ’gela’ge re, ufarsin oluk ’balegei ai, ebe re, aphwami hat en tenentarok welegen ai me’gilema o. Me’gilogo re, aphwami Media a’ge wogentasulat, Persia a’ge wogentasulat, tua o, nue,” oluk mo’gulesi.
29Asogo mo’gulesimu, at Belsyazar en perlenesogoat, at osi mo’gulentasulat e,
“Daniel osum orogole wip e’gen ’belak a’ge ’gela’ge ap ’gain a’ge en ’buktogwi a’ge ’gela’ge ’buktak obogulat, ’besieme’gen emas a’ge o’gorlopma wantak obogulat, tit o,” oluk mo’gulentesimu, asogo tigisema disogo egei,
“An tenentarok welegimu yema, nononuk oruak a’ge lok logo nomor satu an, ye nomor 2, an ne’gik ’bekhit akhit a’ge, oruakma re, pobuk nomor 3, at Daniel edikpegi o,” oluk mo’gulentesi. 30Asogo mo’gulentesirik oruakma, o huba’go eriano pamat, is aphwami Babel a’ge onue ’gain Belsyazar ano ebe werigisa.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in