2 Korintus 6
6
1-2 #
Yes. 49:8
At Allah en e, disogo egeimu pelal wokho pegesema oruak,
“An en e, his heniak nesa’go holu epegirikmuat holegis o.
Henebe delhonobu hegitsogoat lethentau wegi o,”
oluk egei ai re, Allah en neniak esa’go holu re, o yogodak yayat o. Ye, nenebe delnonobu re, o yogodak yayat o, oluk henede eberit o. Holuk e, nis Allah emin at ebaget togulat e, at ebabut op en edeaphenebesimu, at ebe wegep ano, we ’burl almerak pagup o, oluk henesa’go worogu lege ai o.
3Aphwami logon en e,
“His Allah paget yabuk togu legep ai dagan togu legep o,” oluk nonobok wiak ’baluano oluk e, aphwami logon wiak tuagoluk enede ’gagalogo di bele yu bele togu lege erlak o. 4Aphwami en e,
“Is Allah en yo’go enebesimu, at ebaget togulom a’geat togwi o,” oluk pobirak nonobuagoluk e, e’gin-pe’gin taknonobogulat, wik-wiak taknonobogulat, no’gosogo tul, oluk nenede hwenigap nonobogulat, togukhwe, nenepe mosogo welat di a’ge yu a’ge enagat togu lege. 5#Per. 16:23’Go’bu watnonobogulat, nene’gik herle wusogo o herle wusogo onobogumu ebano nonobogulat, aphwami esan en nenebam orlumamit til-til watnonobu a’ge horok agalat, togukhwe welege o. Yabuk set a’bik togulat, nogou a’ge erlak agalat, so’boru nele agalat, togulat togu lege o. 6Asogo hogularat de, nenebabut wiaksogo tu pukmu en degelak welat, op wene nenaluk welat, nenepe mosogo welat, nenebabut enago welat, togu lege o. At Allah Arogun nonogola welat aphwami enebe demat nenedesogo welege. 7Asogo welat, Allah anni pam dem wene mo’gulentil no’gu lege o. Asogo mo’gulentil no’gulat, aphwami en e,
“Wa’gun segen nene’gik ’biren urat welege o,” oluk ogwi ’gela’ge, nis Allah ogola agai a’ge togu lege ai, nene’gik ’biren urat welege o. 8Is logon en erliknonobogulat, nonobok op ogulat, ogukhwe, is logon en wene yaknontogulat, nonobok wik-wiaksogo ’balogulat, togwi o. Wene demat mo’gulontogukhweat de,
“Eniak eseiyat lalnonobogwi o,” oluk wene yaknontogwi o. 9Aphwami en nenebe eneperlak a’ge ’gela’ge, ’berlek en enalugat welat, nenebe waremagoluk taknonobogwi a’geat de, nenelaluk welat, di obotut yu obotut taknonobogukhweat de, nenebe modok warom erlakma en nenelaluk welat, togu lege ai hemit o! 10Nonogola wiak welarat de, nonogola nenagai modok welege o. Di a’ge yu a’ge nene’gikmu erlak a’geat de, aphwami esanat ebe a’ge enilmu oruak a’ge ’gela’ge emagoluk tagonobogu lege. Nena’ge modok erlak a’geat de, ebe a’ge ’berlegat eiye egerik welege.
11Asogo welat e, his aphwami Korintus a’ge, narilak norokhwi o. An nogola wene mesik sebelu erlakma en modok ’baksogo nak mo’gulhentegis ani o. Ai holuk e, an his henebaget wene nogola hielak oruak o. 12Ye, nis en his henebaget e, nonogola asogo hielak welege a’geat de, his nak e, nis nenebaget his honogola e’gin welegep o. 13Holuk e, his en togolik lagaksogo nis nenebaget honogola hielit o, oluk an nu’gwarek neiyagai mo’gulonto ’gela’ge mo’gulhentegis ai o.
“Aphwami enede Allah ebam he’berik pogwi erlak a’ge enemin hwedik togup no yo,”
oluk enesa’go weregei wene
14His aphwami enede Allah pam he’berik pogwi erlak a’ge ai, enemin hwedik togup no yo. Aphwami hegitsogo togwi a’ge emin, enesa’go werak erlak togwi a’ge emin, enemin hwedik wolom no? O dakharak a’ge ai emin, o hiktak a’ge ai emin, enemin mesikmu wolom no? Modok erlak o. 15At Kristus Iblis emin, enede mesigat wolom no? Ye, aphwami enede Allah pam he’berik pogwi a’ge, is logon enede Allah pam he’berik pogwi erlak a’ge hwedik wolom no? Modok erlak o. 16#Ima. 26:12; Yeh. 37:27; 1Kor. 3:16 At Allah owi werik ai emin, dogwi asua ai emin, emin mesikmu la’bulu no? At Allah elaluk modok welago a’ge ai owi werik e, nis nenebe yuat o. At en e, disogo egei,
“Is onogola eba an nowi wusogo weleik o. Ene’gerlak o’gwe denaga leik o.
Is enaik Allah anat weleik o.
Ye, an neiyagai isat welema o,”
oluk egei ai en e, 17#Yes. 52:11Nenaik ’gain Onuk Logo a’ge ano enat, mesik disogo egei,
“His henebe is aphwami logon ene’gerlak o’gwe welegep ai ugonoboluk e,
his nak enakho liplau manis o.
Liplau wagaiam e, an en wokhenebikmu re,
wiak a’ge ai pobuk hene’gik tenhagup no yo.
18 #
2Sam. 7:14; 1Taw. 17:13; Yes. 43:6; Yer. 31:9 An his henaigat weleik o.
Ye, his an neiyagaiat wolorogup ani o,
oluk Nenaik ’gain Onuk Logo a’ge di a’ge yu a’ge tu nak a’ge ano en egeimu o,”
oluk pelal wokho pegesa.
Currently Selected:
2 Korintus 6: Wul
Highlight
Copy
Compare
Share
Want to have your highlights saved across all your devices? Sign up or sign in
