2 Korintus 5
5
1Aphwami onowi werik a’ge moluk osoam pobuk ’get worogwi ’gela’ge, nis ’gwiangma nenagap lodu paget welege a’ge yu, waromul holuk e, ’bogorl pam nenebe nonotok modok wolomul a’ge aphwami ene’gik en helo’gogwi erlak a’ge Allah en nak heli’gogo nonobouwa a’ge oruak o, oluk pobi togu lege o. 2-3Sum no’gorlhogwiam enage’golom agai ’gela’ge, nenebe pobuk wolomul a’ge ano owan oruakhwe, nenagap yu erlak agoam e, weat welema no oluk, sum ogola’gwe ’buktak oruakhwe, o’borl o’gwe ’buktogwi ’gela’ge, nenagap yu oruakhwe re, nenebe ’bogorl pam wolomul a’ge ai ’buktaknonobo a’ge oluk, ebam eberak modok welege ai en e, wiak welat,
“Eige,” oluk opogu lege o. 4Nenebe lodu paget yu welat e,
“Eige,” oluk nenebam e’gin-pe’gin wiagat welege. Ai re, nenagap yu a’ge no’gorlogo ukpoluk, weat wolom nenagai en ogu lege puk. We, yu oruakhwe re, pobuk nenebe nenelaluk modok wolomul a’ge ai ’buktaknonobouema re, nenagap waraga lege a’ge yu noburlal-hoburlal taknonobouwagoluk ogu lege o. 5At Allah enat pobuk asogo taknenebaigoluk degelogo nenebesirik,
“Demat taknonobouwa,” oluk, di a’ge yu a’ge naduk-naduk ’gomuk no’gwi ’gela’ge, Arogun woknentesimu nonogola oruak o.
6Asogo welat, pobuk op ema, oluk nenede se nak welege o. Aphwami o pobuk werikmu wolomogoluk o naduk werikmu welagai ’gela’ge, nenagap yu a’ge pam welat e, nonue ’gain Onuk Logo a’ge owi pam nenemin wolomulmu ai walegat welege o, oluk nenaluk o. 7Nis e, nenil hogu lege a’ge yema pam nenede eberak poluk welege puk. We, nenede at Yesus ebam he’berik poluk welege o. 8Ai enat nenede se welege. Nenagap yu ’goboksogo ukpoluk, nonue ’gain Onuk Logo a’ge oruakma ’goluk emin wolom nenagai o, oluk opogu lege. 9-10#Rom. 14:10At Kristus en nis ’berlegat nenagap yu pam welat togu lomul a’ge lo’bok nenemdema wokho wene nenebam pasulat, no’gorliselat, tagalat, op togwi a’ge holuk,
“Op o,” eselat, ye, wiak togwi a’ge holuk,
“Wiak o,” eselat, hegitsogoat mo’gulnontouwa. Asogo mo’gulnontouwa ai en e, nis o yema ap ’bok ’gela’ge welat emin, pobuk at owi pam ’goluk emin, nenede hwedik, at ogola opsogo nak togulom nenagai en togu lege ai o.
“At Kristus en Allah emin togolik la’bulogo nenebesimu welege o,” oluk mo’gulentesi wene
11Ai en e, nonue ’gain Onuk Logo a’geat nonogorloksogo wolom oluk pobirak pogulat e, aphwami en wene ai pobi tuagoluk enede ’gagalogo mo’gulentil no’gu lege. Nis nenebabut togu lege ai re, at Allah ilem selak ai ’gela’ge, his henede en nis pobi nonobogulom oluk epasu legi o. 12Ai re, his en nis erliknonobuagoluk nonu’gwarek en nonomot wogu lege erlak o. We, is aphwami muon enede paget e, erlikhorlo erlakma en, enagap o’borl o’gwe a’ge paget erlikhorlogukhweat de, his en o’go nis nonobok op o, ogulat nonomot wagup en oluk mo’gulhentegis ai o. 13Is aphwami enil en yetnontogwiam, nis nenede ’belak a’ge ’gela’ge welege holuk e, ai Allah pagerat o. A’ge re, nenebabut heberlak a’ge ’gela’ge welege holuk e, his henebagerat o. 14At Kristus nis nenebe edeapnenebiso ai en tennentarok welago yo. At emategat nis ’berlek nenebaget waraga ai o. Holuk e, nis ’berlegat waregeat o, oluk pobi togu lege. 15Nis ’berlek nenebaget waraga ai re, nis nenebe nonu’gwarek paget nenelaluk welemagoluk waraga puk. We, nis nenebe at ebaget welemagoluk, at ebe nis nenebaget waragarik en togolik elaluk aga ai o.
16Ai en e, nis en hwerli yogodak ya hwerli en e, aphwami en enebabut ’balogwi ’gela’ge, is aphwami logon enebabut asogo ’balogu lege erlak o. Ye, naduk e, Kristus ebabut asogo ’balige ’gela’ge, pobuk asogo ’balogu lege erlak o. 17Aphwami enebe Kristus emin hwedik oruak holuk e, enebabut ’get a’ge tagenebesimu oruak o. Naduk a’ge erlak aga. Pobuk ’get a’ge aga o. 18A’ge re, di a’ge yu a’ge ai ’berlegat at Allah enat tago yo. At enat Kristus tegei ai pam, Allah u’gwarek emin la’bulik nenebesi o. Asogo nenebesirik e, aphwami logon at emin togolik la’bulik enebaigoluk wene ai nis en mo’gulontouwagoluk nis nenebam pesi. 19Wene nenebam pesi ai ebe re, disogo. At Kristus ebe ’burl heisogo welat tegei ai pam, Allah en di aphwami yu aphwami ’berlegat at u’gwarek emin la’bulogo nenebesi. At en asogo nenebasulat, nis aphwami en wiak togwi a’ge wene nenebam po erlakma en erlagapsogo ukpesi ai o. At en asogo tegei a’ge wene ai nis en mo’gulentil no’gu lemagoluk nenebam pesi.
20Nis e, Kristus enat, yo’go nonoboluk peraknonobou wagama wegerik e, Allah en wene mo’gulhonto ’gela’ge, henesa’go worogu lege ai o. Asogo worogulat,
“At Allah en pobuk togolik la’bulik honobouwak en e, at emin la’bulit o,” oluk Kristus onuk ’balogo neniak sakhosogo mo’gulhontogu lege o. 21Nis Kristus emin hwedik tige holuk e, at Allah en u’gwarek emin togolik la’bulogo nenebaigoluk, nis nenebagerat nis nenebabut wiak togu lege a’ge ai, at Kristus wiak tu erlak a’ge, ebam pesi ai o.
Currently Selected:
2 Korintus 5: Wul
Highlight
Copy
Compare
Share
Want to have your highlights saved across all your devices? Sign up or sign in
