2 Korintus 4
4
“Dem wene a’geat de, ik e’be ’gwiang a’ge ogola na’gogo oruak o,” oluk mo’gulentesi wene
1At Allah nenebe ede en e, at ebaget disogo togu lemagoluk yo’go nenebesi ai en e, nenede ’buk agalat ukpo pukmu en togwi modok welege o. 2Nis e, aphwami en di a’ge yu a’ge hisakho wiak togu lotluk ene’gerli agai ano a’ge ukpege. Asogo ukpegerik, aphwami lalonobogulat, Allah iak wene mu a’ge pam lo’boksogo mo’gulontogulat, togu lege erlak o. Aphwami yema enede lo’bok en pobirak nonobuagoluk e, wene dem wene Allah il pamat selakmayat mo’gulentil denaga lege. 3Op wene mo’gulentil denaga lege ai, aphwami logon en pobi togwi a’geat de, is aphwami nal agai a’ge nak e, wene ai paget enede hiktak a’ge orlomurak oruak o. 4Asogo oruak ai re, is aphwami ’gwiangma a’ge enaik ’gain Iblis ano en enede Allah ebam he’berik po erlak a’ge ai, enede hiktak enebesimu oruak o. At Kristus Allah ’gela’geatma re, ebe erliktogwi wene, op wene ai en dakharak onobo a’geat de, dakharak enebasumu no oluk, enede hiktak enebesimu oruak ai o. 5Wene mo’gulentil denaga lege ai re, nonu’gwarek en togwi ebele puk. Erlak o. We, at Yesus Kristus tegei weneat o. At Yesus ebe nonue ’gain Onuk Logo a’ge oluk e, nis at ebaget his heneragam a’ge welege o, oluk mo’gulontogu lege ai o. 6#Kej. 1:3At Allah en eselat e,
“O hiktak a’ge ai ogola dakha uak o,”
oluk egei ai ’gela’ge, at enat nis nonogola hiktak a’ge ano dakharak nenebesimu welege o. Asogo welat, at Kristus orogole ’bak’bage yerisoam nenil yetholuk e, at Allah erliktogwi a’ge ano ebe asogo oluk pobi togu lemagoluk asogo dakharak nenebesi ai o.
7Nis wene disogo mo’gulentil no’gumu, aphwami enil nontogulat, onogola en e,
“Is enanni erlak. We, at Allah anni a’bik hegi o,” oluk enak a’ge pobi togu lemagoluk, ik e’be ’gwiang a’ge heli’gogo ik na’gogwi ’gela’ge, op a’ge ai nis maben a’ge nonogola pesimu oruak o. 8Aphwami en nis di e’gin yu e’gin taknonobogwi a’ge, nenebe modok wiagapnonobogwi erlakhwe welege o. Asogo taknonobogukhwe, no’gosogo tu ’gela’ge, nenede nal ago a’geat de, nenede hwenik ago erlak o. 9Is aphwami pema en, wiagapnonobuogoluk togwi a’geat de, at Allah en nenematek nak uknenebasu erlak o. ’Go’bu watnonobogwiam erle’gaksogo laga lege a’geat de, nenebe modok waraga lege erlak o. 10Asogo waraga lege erlak welege ai pam, at Yesus ebe warotluk elaluk agarik e, nis nonogola elaluk welago a’ge ai, enagat emagoluk, at werigisa ’gela’ge, nin hwedik nan hwedik nis watnonobuogoluk togukhwe delnenebiso ai o. 11At Yesus warotluk elaluk agarik nis nenebe waraga lege a’ge yu nonogola elaluk welago ai enagat emagoluk, nis yogodak nenelaluk oruakhwe, at Yesus paget nin hwedik nan hwedik watnonobuogoluk togukhwe delnenebiso ai o. 12Aphwami en nis nenagap nak waremagoluk taknonobogwi ai pam, Allah en his henebe henelalugaphenebiso ai o.
13 #
Mzm. 116:10
At Allah iak pam pelal wokho pogulat e, disogo egesa,
“Nede at ebam he’berik welat niak egi o,”
oluk egeimu pelal wokho pegesa hegitsogoat, nis ogo re, nenede at ebam he’berik poluk wene mo’gulontogu lege ai o. 14Ye, asogo mo’gulontogulat e, nenede disogo opogu lege o. At Allah en e, nonue ’gain Onuk Logo a’ge Yesus togolik elalugaptegei ai ’gela’ge, nis at emin hegitsogoat nenelalugapnonoboluk e, his heneminat Yesus e’bek nenebei louwa oluk nenalugat o. 15Nis di e’gin yu e’gin ’berlegat hogu lege ai re, his henebagerat o. Asogo hogu lege ai pam, at Allah ebabut op modok en aphwami logon edeabenebiselat, nin logon edeabenebiselat, enebe esanat edeabonoboluk delenebisoam e, enebe ’berlek en, Allah hau worogwi ai pam, is nin logon en Allah erliktogwi o.
“Nenede Allah ebam he’berik poluk togulom o,” oluk mo’gulentesi wene
16Ai enat, nenede ’buk otluk ukpo erlakma enat, ningsogoat togu lege o. Nenagap o’borl o’gwe yu re, wiak agokhweat de, nonogola’gwe re, nin hwedik nan hwedik ’gerapnenebasu modok oruak o. 17Nis yogodak, e’gin-pe’gin taknonobogwi ai re, we lodu paget weiyat ’gela’ge o. A’geat de, asogo taknonobogwi ai pam, pobuk erliktogwi a’ge otok modok welema a’ge modok loksogoat eiye omul o. 18Nis e, di a’ge yu a’ge nenil hogwi a’ge ai erlak ema a’geat de, nenil hogu lege erlak a’ge ai otok modok welema ai en e, nenil hogu lege a’ge ai paget nenede eberak erlakma en, we, nenil hogu lege erlak a’ge ai paget nenede eberak modok til laga lege o.
Currently Selected:
2 Korintus 4: Wul
Highlight
Copy
Compare
Share
Want to have your highlights saved across all your devices? Sign up or sign in
