1 Timotius 6
6
1Aphwami logon en Allah onuk wiak ogulat, at iak nis en mo’gulontogu lege a’ge paget,
“Wene ai wiak,” ogulat, uano oluk, Allah eiyagai a’ge is logon eneragam a’ge egesarik togwi a’ge ai, onu’gwarek onuelak a’ge ai eneragam welat, onogola en e,
“Nue ai hau do’goksogo waronobogulom o,” oluk, hau do’goksogoat waronobuak o. 2Asogo waronobogulat e, is eneragam a’ge ai onogola en e,
“An nue ai ede Allah ebam he’berik poluk welago ai en emin Allah eiyagai mesigat a’ge, nare emin,” oluk onuelak enebe onogola en mi-miarak onobo erlakma enat,
“An nue lethasu legi yu, ede Allah pam he’berik oruak a’geatma re, nede o,” oluk, pobuk mesik emin loksogoat lerontogulom o.
“Wene mu a’geat de, dem wene ’gela’ge, mo’gulontogukhwe demat oluk, wa’gun no yo,” oluk mo’gulesi wene
Wene ik a’ge yu hat en ’berlegat mo’gulentasulat, enesa’go weriselat, taga lomup o. 3Is aphwami logon en op wene nonue ’gain Onuk Logo a’ge Yesus Kristus en tegei wene ano emin,
“Allah eragam ’gogulat, disogo togulom o,” oluk, wene mo’gulontogu lege a’ge ai emin, ukpoluk, wene mu a’ge mo’gulontogwi a’ge logon oruak o. 4-5Is ai en e, wene ebe eneperlak a’geat de, onu’gwarek erlikhorlogulat aphwami logon enemin eniak a’ge paget wene ’balogulat, sorok ogulat, togu lomogoluk, enebit wolom a’ge logo pogwi ai en e, ologun pam e, aphwami logon enede erlak agalat, dem wene eneperlak agalat, is-is enemin ’bou togulat, wene ’balogulat, eniak eseiyat onobok wiak ’balogulat, onogola en ’burlat wene wiak a’ge is logon enebam pogulat, yeik emin wene emin ’balu erlakma en togwi modok welagai ai o. Asogo togulat onogola en e,
“Nis Allah eragam ’gogulat togu lege ai pam, nenilmu a’bik ema,” oluk, demat ’gela’ge opogwi ai o. 6-7A’geat de, nenialak onogola en dagagalat e, di a’ge yu a’ge logon nene’gikmu woluk dagaga lege erlak ai ’gela’ge, nenebe waragalat e, di a’ge yu a’ge logon woluk lul erlak ai en, nenilmu ’bullak wolom ’gela’ge, nis Allah eragam ’gwilultik welat nonogola en e,
“Elirat welege,” oluk, nenepe mosogo wolomma re, ebe a’ge sabuthorlul ai o. 8Holuk e, no’gulom a’ge emin, nenagap pam ’buktogulom a’ge emin, oruak holuk e,
“Ai elirat oruak,” oluk opo yo. 9-10Asogo a’geat de, aphwami en e,
“Logo re, uang aiat o,” oluk enede hwedigap poluk e, ologun pam di wiak yu wiak togwi edip aiat o. Is logon en uang ai a’ge heratuogoluk, enede Allah pam he’berik welegesarik enat de, ukpoluk pobuk e e’biangmasogo wathorlogwi ’gela’ge, is onu’gwarek onogola wik-wiaktak pagathorlogwi ai o. Ai en e, aphwami logon en,
“Di a’ge yu a’ge loksogo horlolorik nenebe ’gain wollo e,” oluk opogwi ai re, ’baik ’gume pogwiam ’gotnok eselat warago ’gela’ge, Iblis en enede ’gagalisoam, di a’ge yu a’ge enagai opo puk a’geat de, wiagabonobua a’ge nenagai oluk opogwi ai en e, enebe wiagaphorlogulat, nal agalat, togwi ai o.
At Timotius u’gwarek paget
degelhwerlasu lemagoluk mo’gulesi wene
11Is asogo togwi a’geat de, hat e, hebe Allah en a’ge welegen ai en e, ai a’ge tu erlakma en ukpoluk wolomup o. Asogo welat, at Allah ogola epasu a’ge hegitsogo tagalat, at eragam ’goluk, at ebaget tagalat, hede at ebam he’berik welat, aphwami hedeabenebiselat, hepe mosogo welat, hebabut enago welat, taga leigoluk e, ai a’geat logo pasu lomup o. 12Aphwami onomut walhouwogoluk sa omut oruak sa omut erlak walhogwi ano ’gela’ge, nenelaluk modok wolomul ai a’ge hwerlai laigoluk, hede Allah ebam he’berik welat, at ebaget hannisogoat taga lomup o. Asogo taga loroguntik, ai a’ge hwerlai lanogoluk, Allah en yo’go hebesimu, hat en e,
“Nede Kristus ebam he’berik poluk disogo taga leik o,” oluk aphwami esan enil pam ’baksogo e’gen ai hegitsogoat hannisogo taga lomup o. 13#Yoh. 18:37Allah en aphwami nenebe emin, di a’ge yu a’ge emin, ’berlegat nenelalugapnenebiso a’ge ano ilemat, Kristus Yesus aphwami en ap Pontius Pilatus e’bek woluk legesema, iak demat ’baksogo mo’gulesi ano ilemat, wene yu hesa’go wusogo mo’gulheik o. 14Hat wene at en mo’gulnentesi a’ge wene ai ’berlegat hegitsogo tagalat, wiak a’ge tu erlakma en degelak oruakma, aphwami logon en wene hebam po erlakma enat woloroguntik, hwerli nonue ’gain Onuk Logo a’ge Yesus Kristus ebe selakma wema ai hwerli en emagoluk mo’gulhegis ai o. 15At Allah en,
“Ai hwerli selakma paik o,” oluk epesi pamat selakma pasuam wema o. At Allah erliktogwi modok welagai a’ge, emategat anni oruak o. Ai en, ononuk logo welagai ai ’berlegat enebaget e, onue ’gain Onuk Logo a’ge at emategat o. Ye, di aphwami yu aphwami onuelak ’gain welagai a’ge ai, ’berlegat onue ’gain e, emategat o. 16Ye, at ebe warago erlak otok modok welago re, at emategat o. At ebe o atia pam modok oruakma, enil ’bin-’ban oluk, e’bek horoksogo lo mia o. At ebe aphwami logon en enil ho erlagat. Asogo ho mia. Anni modok welema a’ge ai, erliktogwi modok wolomok o, oluk,
“Amin,” egi ai o.
17Di a’ge yu a’ge ’berlegat erlak ema a’geat de, is ap ’gain ononuk oruak a’ge ai onogola en erlikhorlogulat e,
“Na’ge ’gwiangma a’ge yema modok a’bik yu en nebe op weleik,” oluk, opogu lemano yo. At e, at Allah di a’ge yu a’ge ’berlegat nonogola nenagaisogo horlogu lemagoluk loksogo woknentasu ano enat obapnonobua oluk pobi togu lemak en enesa’go werise lomup o. 18Is ai opsogo togulat e, ena’ge a’bik wolom ’gela’ge re, aphwami logon opsogo lerontogulat, ena’ge erlak a’ge wogontogulat, so’burontogulat, togu lemagoluk enesa’go werise lomup o. 19Asogo togu lema holuk e, di a’ge yu a’ge pobuk a’ge paget odoksogo horlogwi ’gela’ge, op togulat, pobuk modok-modok welema a’ge pagerat pagathorlogu lemarik e, nenebe demat nenelalugapnonoboma wolomul ai a’geat horlouwagoluk enesa’go werise lomup o.
20-21Timotius nomlogo yo. Allah en yo’go hebasulat e,
“Yu a’geat taga lomup o,” oluk, hebam pesi a’ge aiat opsogo tenak welat, hannisogoat taga lomup o. Is logon en Allah iak u a’ge ai ogwi erlak welat, we ’burlat, erlak ema a’ge pagerat wene sorok ogulat,
“Wene nenaluk o,” oluk, ogwi ai eneperlak welat ogwi o. Is ai en e,
“Wene dem wene arat pobi tige o,” oluk ogulat e, Allah iak demat a’ge ano ukpoluk nal lai legesa ai en, wene ai a’ge wo erlakma en ukpoluk wolomup o.
Allah ebabut op ano enat tenhiarok welemak o.
Currently Selected:
1 Timotius 6: Wul
Highlight
Copy
Compare
Share
Want to have your highlights saved across all your devices? Sign up or sign in
