1 Timotius 5
5
Timotius en Allah eiyagai a’ge logon, ue ari ’gela’ge mo’gulentasu lemagoluk mo’gulesi wene
1Hat en, ap enarlue a’ge holuk e, hiak uareksogo mo’gulonto erlakma en, we, haiklak ’gela’ge hiak sakhosogoat enesa’go werise lomup. Ye, ap souwe a’ge ai re, harilak ’gela’ge enemin welat, 2hwami enarlue a’ge ai re, hialak ’gela’ge enemin welat, hwelani dogum a’ge ai re, hogulani ’gela’geat, hede wiak a’ge eberu erlakma en hil ha’buksogo enemin welat, tagalat e, enesa’go opsogo werise lomup o.
Hwami sugwe a’ge lerontogu lemagoluk
mo’gulesi wene
3Ye, hwami sugwe aphwami is a’ge en leronto a’ge erlakma enematek oruak a’ge holugat, hau do’goksogo waronobogu lomup o. 4Asogo a’geat de, is hwami sugwe a’ge ai enemalik, ene’bialak en dogo’gwe a’ge logon oruak holuk e, is ai enat,
“Nis nenebe edip mesigat en dogo a’ge,” oluk, is en tu a’ge mo’guluak o. Ai re, at Allah ogola en e,
“An neragam welat, enaiklak en yo’gulonobogu legesa ’gela’ge, o’go is naduk opsogo lerontogulom o,” oluk ogola agai epasu ai en e, asogoat lerontogu lemak o. 5A’ge re, hwami sugwe demat aphwami is edip a’ge erlakma enemategat welat re,
“Allah enat letnontouwa,” oluk, enede at ebam he’berik poluk, hup erlige yo’go pogulat, ’gonu ogulat, ogwi modok welagai o. 6A’ge re, is hwami sugwe a’ge logon is enagai a’ge, yogunat togwi a’ge ai, enebe enelaluk welagai a’geat de, werak a’ge ’gela’ge oruak o. 7Hwami sugwe ai enebaget, is logon en wene enebam po erlakma en op welemagoluk, wene aiat enesa’go opsogo werise lomup o. 8Is ap logon en Allah iak demat oluk wegesarik welarat de, onu’gwarek eneiyagai aiat logo onoboluk lerontogulat, aphwami is edip a’ge holuk ado pema eneminat lerontogulat, togwi erlak holuk e, Allah iak ukpoluk libegesa a’ge ’gela’geat oruak o. Is aphwami o’borl o’gwe a’ge en wene wo erlak welat, wiak weiyat ’gela’ge togwi a’geat de, is ai wene wegesarik en aphwami is a’ge lerontogwi erlak ai en, wiak loksogoat togwi o.
9Is hwami sugwe a’ge Allah eiyagai a’ge en lerontogu lemagoluk ononuk ’balogup holuk e, enebe dagegesa hwerli en umur 60 tahun owan om erlak a’ge re, ononuk ’balogup no yo. We, umur 60 tahun arat aga a’ge holuk nak, ononuk ’balu o. A’ge re, onogunlak mesigat nak wogo oruakma sugwe enebegesa a’ge holuk nak ononuk ’balu o. 10Is aphwami logon en is hwami sugwe a’ge ai onobok ogulat e,
“Is enebabut op togwi o,” oluk ogwi a’ge holuk, ononuk ’balu o. Op togwi ai re, onu’gwarek enemalik opsogo yo’gulonobogulat, ap ’bok wagaiam enebe opsogo wogonobogulat, Allah eiyagai logon onoyuk petne emeronobogulat, is logon eneseget oruakma lerontogulat, agauwa mesik mo u erlakma en di paget yu paget lerontogwi modok welat, togwi a’ge holuk, ononuk ’balu o. 11Is hwami sugwe owan dogum a’ge ai, Kristus emin hwedik oruak a’geat de, ukpoluk, enebam aganhan en enede sebelu mia ’gela’ge omma, ap mesik wo ai en e, ononuk ’balogun o. 12Is ai sugwe onobogwiam, is en e,
“Nis nenebabut Kristus paget nak nenil ha’buksogo togu lomul o,” oluk ogulat en, pobuk asogo tu erlakma en ukpogwi holuk, onu’gwarek en wene enebam pagathorlouwa ai o. 13Asogo togulat, enebabut e, ene’gik tenho pukmu en, o da’goluk no’gwi o. Asogo no’gulat e, logon modok wiak togwi o. Eniak mo’go-mo’go wiak ogulat is mu a’ge onowene a’geat dalo’bok ogulat, wene logon u puk a’ge mu a’ge ogulat, il no’gwi ai o. 14-15Holuk e, is hwami sugwe a’ge logon ’gwi-’gwani Iblis e’berlik legesa ai en, is logon nis Allah eiyagai enemin il ’belak a’ge ’gela’ge en nonobok wiak ’balugumu no oluk, is hwami sugwe dogum a’ge ai, onogunlak lo’bok wogonoboluk e, enemalik dakho opsogo degelogo tenentarok welemagoluk egi ai o.
16A’ge re, hwe mesik ede Allah pam he’berik welago a’ge ia mesik sugwe a’ge oruak holuk, Allah eiyagai ’berlegat enebam seget ema no oluk, at enat lethasulom o. Asogo lethasukhwe, is Allah eiyagai ’berlek en e, hwami sugwe a’ge logon aphwami is edip a’ge en lerontogwi erlak a’ge holuk, lerontogulom o.
Di a’ge yu a’ge paget esa’go weregei wene
17-18 #
Ula. 25:4; Mat. 10:10; Luk. 10:7 Allah en disogo egeimu pelal wokho pogulat e,
“Aphwami en wam sapi oyuk en gandum agap lul wusogo e’gen wouwagoluk poluk e, e’gen logon nouwano oluk emde herle hettu re, mia o.
Logon nouwagoluk ukpogu lomup o,”
oluk egeimu, pelal wokho pegesa ai. Ye, mesik e,
“Aphwami yabuk di paget yu paget togwiam,
ene’gik o’go wogontogulom o,”
oluk egeimu pelal wokho pegesayat. Ai en e, ap Allah eiyagai opsogo tenentarok welagai a’ge ai, is Allah eiyagai ’berlek en,
“Ene’gik o’go arat lerentige o,” oluk opo erlakma en, logon eminat ebam louksogo lerontogulom o. Asogo togulat, logo ’gela’ge re, is logon Allah iak enannisogo ’belo’gogulat, mo’gulontogulat, togwi a’ge ai, hau do’goksogoat lerontogulom o. 19#Ula. 17:6; 19:15Aphwami logon en e,
“At Allah eiyagai tenentarok oruak a’ge ano wiak tegeimu o,” oluk, wene ebam pouwogoluk togumu, enebe ’biren a, henagan a, enil dokhumsogo hogwi a’ge en,
“Demat o,” oluk ogwi holugat, wene ebam po yo. Ye, asogo ogwi erlak holuk, wene ebam po mia o. 20Is logon onogorlok emagoluk, is demat wiak tigisa a’ge, aphwami enil pamat ene’gerli wusogo enesa’go opsogo worogu lomup o.
21Wene mo’gulhegis a’ge ai, hat en e, aphwami logon holukhwema enebasulat, logon ho’borlma enebasulat, tu erlakma en hegitsogo mo’gulentasu lomup o, oluk Allah emin, Kristus Yesus emin, enilemat, malaikat Allah en poligenebesirik yo’go ’belagonobou wago a’ge emin, enil pamat mo’gulhegis ai o. 22Aphwami logon Allah paget togu lemagoluk, perleneat ena’gul sebelonobogu lorogup o. Ye, is logon wiak togwiam enemin tu erlakma en hil ha’buksogo wolomup o. 23Ou yen nin hwedik nan hwedik hanni erlak ago ano en hogum paget ik nak nasu lorogun o. We, anggur e’gen a’bosu wei logon emin nasu lomubat o.
24Is logon wiak togwi a’ge ai wene enebam pogulat, no’gorlogulat, togumu eba owan lo erlakmayat de, selakma ago ai o. Ye, is logon wiak togwi a’ge sebelak wolomtik en pobuk selakma ema a’ge oruak o. 25Ai ’gela’geat, is logon op togwi a’ge perleneat selakma ago ai o. Is logon asogo op togumu hisogo modok welema erlak o. We, selakma emayat o.
Currently Selected:
1 Timotius 5: Wul
Highlight
Copy
Compare
Share
Want to have your highlights saved across all your devices? Sign up or sign in
