1 Timotius 4
4
“Aphwami logon en wene wiak wene
eniak eseiyat henede ’gagaluma ani o,”
oluk mo’gulesi wene
1Allah Arogun en wene ’baksogoat mo’gulnentasulat e,
“O ologun pam, aphwami logon Allah iak demat oluk opogwi a’ge en, wene ai,
Nenebit o, oluk ukpoluk e, Iblis osi nelak onobogwi a’ge eneragam ’goluk, wene is en mo’gulontogwi wene ai tenak poluk togu lema o. 2Togulat e, aphwami ene’gik senap agoam, no tenak pege hwe, oluk ogwi ai ’gela’ge, is ai enede horl agalat e,
Yu wiak tigema hegi o. Yu op tigema hegi o, oluk opo erlakma en yogunat togu lema o. Asogo togulat, enepenen enat lal-’baltak onobogu lema ani o. 3Is en wene ogulat e,
Hwami modok wogonobogup, ogulat,
Di a’ge yu a’ge no’gwi a’ge eba, mesik yu re, asua o. No’gu lorogup erlak, ogulat, ogu lema o,” oluk, Allah Arogun en mo’gulnentesi a’geat hegitsogo ogwi ai o.
A’geat de, no’gwi a’ge ai, Allah en nis nenede at ebam he’berik welat, dem wene ai pobi tul holuk e, hau wusogo no’gu lemagoluk walhesi a’ge paget ogwi ai o. 4-5Di a’ge yu a’ge Allah en walhesi a’ge ai op nak o. Se’ban ogwiam Allah iak ai pam obap pasu oluk,
“Yu wiak a’ge,” oluk ukpo erlakma enat, Allah hau wusogo no’gulom nak o.
“Hat Kristus Yesus eragam welat hegitsogo
taga lomup o,” oluk mo’gulesi wene
6Wene op wene nenede Allah pam he’berik pogu lege a’ge ano mo’gulhogu legema re, hat en wegentik hegitsogo taga legen ai pam hebe yo’gulagalat e, wene yogodak mo’gulhegis ai nenarilak nonorokhwi Allah eiyagai a’ge logon mo’gulentasu lomup o. Asogo mo’gulentasu lorogun holuk e, hat Kristus Yesus eragam welat, at ebaget opsogo taga lorogun ai o. 7Aphwami en nonung wene ebe wene erlak ebele pagerat de, eniak esei we ’burlat ’belo’gogwi a’ge ai ukpogu lomup o. Ukpoluk, Allah eragam welat togwi a’ge aiat henannisogo mo’gulise lomup o. 8Aphwami enebe paget enemep elaluksogo oluk yabuk enannisogo togwi ai re, yogodak ya lodu paget wei nak op ’gela’ge togwi o. A’geat de, nenede paget e, Allah eragam welat, at iabuk wogu lomulmu, at Allah en e,
“Yogodak henelaluk welegep a’ge paget emin, pobuk henelaluk modok wolorogup a’ge paget emin, op modok ema o,” oluk, obok mo’gulnentesi ai demat o.
9Holuk, wene ai nenedemu en dokhumsogo wo yo. 10Allah ebe re, di aphwami yu aphwami ’berlegat delnenebiso a’ge welago a’geat de, logo ’gela’ge re, nis nenede at ebam he’berik pogu lege a’ge delnenebiso ai en, nenede at elaluk modok welago a’ge pam he’berik poluk, at ebaget nenebit erlaksogoat, nenannisogo togu lege o.
11Wene ai ’berlegat aphwami logon en hegitsogo togu lemagoluk mo’gulontogulat, enesa’go worogulat, togu lomup o. 12Hat hebe owan souwe welegen ai en, is aphwami logon en mi-miarak hobo mia o. Hebe souweat welat, aphwami logon enede Allah ebam he’berik oruak a’ge en hat hebabut wouwagoluk, hiak hegitsogo mo’gulentasulat, hebabut hegitsogo tagalat, aphwami hedeabenebasulat, hede Kristus ebam he’berik welat, wiak tu erlakma en hil ha’buksogo welat, taga lomup o. 13An nebe owan wom erlak oruakhwe re, Allah iak pelal wogo a’ge aiat is logon enesa’go holuagoluk, onuk mo’guliselat, enesa’go weriselat, mo’gulentasulat, taga lomup o. 14Hat hebaget page enat is ap Allah eiyagai tenentarok welagai a’ge en ene’gik ha’gul sebelogukhwe, is ap Allah iak mo’gulontogwi a’ge en disogo egesa ai,
“Hat pobuk disogo taga lorogun,” oluk, mo’gulhegisa hegitsogo, Allah ebabut op en nenebabut lo’bok woknentasu a’ge ano hat wokhesi a’ge ai pam tu erlakma en hebakhenne ukpagun o. 15Is aphwami ’berlek en hat hebabut ’balogulat e,
“At Timotius naduk op taga lagarik yogodak op modogat tago yo,” oluk enak a’ge pobi hobuagoluk, wene mo’gulhegis a’ge ai ’berlegat hedemu poluk tago modogat wolomup o. 16Asogo tagalat, hu’gwarek paget emin, is aphwami logon mo’gulentasu legen a’ge enebaget emin, hebabut heberlogo wolomup o. Heberlogo welat, hede ’bugom erlakma en, ai a’geat tago modok wolomup o. Asogo taga lorogun holuk e, hu’gwarek en hebe deliselat, aphwami logon hiak hologwi a’ge enebe delenebiselat, togun ani o.
Currently Selected:
1 Timotius 4: Wul
Highlight
Copy
Compare
Share
Want to have your highlights saved across all your devices? Sign up or sign in
