1 Timotius 3
3
“Allah eiyagai tenentarok welemagoluk e, ap logon enebabut ’belakpoluk en edigonobo yo,” oluk mo’gulentesi wene
1Wene yu, demat a’ge ik o. Is logon onogola en opogulat e,
“An Allah eiyagai ’gwelagentarok welle o,” oluk, onogola en epegesa holuk e, ai re, op modok a’geat enagai en epegesa ai o. 2#Tit. 1:6-9Ai en e, ap Allah eiyagai ’gwelagentarok welemagoluk, enebabut e, yu ’gela’ge edigonobo yo. Aphwami logon en,
“At wiak,” oluk wene ebam pogwi erlak a’ge holuk, ugwe mesigat a’ge holuk, wiak tuagoluk ede ’gagalogwiam dok wogo pogwi ’gela’ge wogo pasu a’ge holuk, ede modok oruak a’ge holuk, tu a’ge hegitsogo tago a’ge holuk, ap ’bok eneperlak a’ge wagaiam wogenebiso a’ge holuk, wene se’geksogo mo’gulentasu a’ge holuk, 3anggur a’bosu enede ’balago a’ge loksogo nasu erlak a’ge holuk, ebabut olot het perleneat om erlakma en, enago op lioksogo welago a’ge holuk, ogola en uang a’bigat nagai epasu erlak a’ge holuk, 4u’gwarek eiyagai a’ge nak degelogo tenentarok oruakma re, at eiyagai en enaik eragam welat hau do’goksogo worogulat, iak osoam hologo togulat, togwi a’ge holuk, enebabut ategenik a’ge holugat, Allah eiyagai ’gwelagentarok wolom o. 5At ap mesik en u’gwarek eiyagai opsogo degelogo pegentarok wolom eperlak holuk e, Allah eiyagai no’gosogo ’gwelagentarok wolom epegep. Mia o. 6Ap mesik Allah iak ’gerat wasu a’ge edikpogwiam, Allah eiyagai ’gwelagentarok welat, u’gwarek en erlikhorloma re, Allah en Iblis wene ebam pesi ’gela’ge, asogoat wene ebam po ai en e, Allah eiyagai ’gwelagentarok welemagoluk edikpo mia o. 7Ye, ap Allah eiyagai ’gwelagentarok wolom a’ge ai, is aphwami o’borl o’gwe a’ge en obok wiak ’balogwi a’ge edikpouwa holuk e, at ebe onogola en mi-miarak poluk enebirenile’gen ’gwelagontogulat, ’baik ’gume pogwiam wathasu ’gela’ge, Iblis en ede ’gi-’gagal ebe tenak pasulat tuano oluk, obok op ogwi a’ge holugat edikpo yo.
“Allah eiyagai lerontogu lemagoluk, aphwami logon enebabut ’belakpoluk en edigonobo yo,” oluk mo’gulesi wene
8Ai ’gela’ge re, Allah eiyagai a’ge lerontogu lemagoluk e, enebabut yu ebelerak a’ge edigonobo yo. Enede hweriogo oruak a’ge holuk, enemage ’biren agosogo ogwi erlak a’ge holuk, anggur a’bosu enede ’balago a’ge loksogo nasu erlak a’ge holuk, uang, di a’ge yu a’ge, op a’ge,
“An nak nebam wellep e,” opogwi erlak a’ge holuk, edigonobo yo. 9Mesik e, wene, Allah ogola hisogoat welagarik en selakma pesi wene ano, onogola poluk,
“An wene nebam erlak nogola selak welegi o,” oluk, wene ai ningsogo tenak welagai a’ge holuk edigonobo yo. 10Is ap ai owan edigonobo erlak welat enebabut naduk ’balogulomma re, aphwami logon en,
“At wiak,” oluk, wene enebam pogwi erlakma en degelak welagai a’ge holuk, enak a’ge pobirak onoboluk e, Allah eiyagai a’ge logon lerontogu lemagoluk, edigonobogulom o.
11Ai ’gela’ge re, is ai onugwami enede hweriogo welat onobok wiak ’balil no’gwi erlak a’ge holuk, wiak tuagoluk enede ’gagalogwiam dok wogo pogwi ’gela’ge wogo pogwi a’ge holuk, enebabut ningtak a’ge holuk, enebabut ai ’gela’ge holuk, onogunlak lerontogwi a’ge welemagoluk edigonobo yo.
12Is ap Allah eiyagai a’ge logon lerontogwi a’ge wolom ai re, onugwami mesigat wogo welat, eneiyagai emin, onosi emin, opsogo degelogo tenentarok welagai a’ge holugat edigonobo yo. 13Is en Allah eiyagai logon opsogo lerontogwiam e, Allah eiyagai en onobok op ogulat hau do’goksogo waronobogu lema o. Asogo ogwiam, is en e, wene nenede Kristus Yesus ebam he’berik pogu lege wene ai paget, onogorlok erlaksogoat ’baksogo mo’gulontogu lema o.
Dem wene Allah ogola hisogo a’ge ’baksogo selakma pesi wene
14-15An perlene hentau weigoluk nede epasularat de, owan wom erlak weleik holuk, nis Allah eiyagai enemin welat nenebabut togulom a’ge haluk emagoluk wene yu ’berlegat pelal wokho he’bek perakpou wegi ai o. O re, o wa’gi pam en dum pam ningsogo welago ai ’gela’ge, nis Allah elaluk modok welago a’ge eiyagai odoktugu lege ai pam e, Allah iak dem wene ningsogo tenak welege ai o. 16Wene ai, nis Allah eragam welat demat oluk opogu lege wene hisogo welaga a’ge Allah enat ’baksogo selakma pesimu,
“Wene ai logo yo,” oluk ’baksogo ogu lege. Ai re,
At Kristus ebe abat selakma aga o.
At Allah Arogun en,
“At Kristus ai demat,” oluk selakma pesi o.
Is malaikat Allah en yo’go ’belagonobou wago a’ge enil hegesa o.
Osi en at taga laga wene ano di aphwami yu aphwami o’borl o’gwe a’ge mo’gulentil legesa o.
Aphwami o di owi yu owi a’ge enebe a’bik en,
“At ebe demat o,” oluk, enede at ebam he’berik pegesa o.
Allah en ’bogorl pam erliktogwi modok welagaimu woluk ligagama welago yo.
Ye, wene ai re, at Allah enat selakma pesimu ’baksogo ogu lege o.
Currently Selected:
1 Timotius 3: Wul
Highlight
Copy
Compare
Share
Want to have your highlights saved across all your devices? Sign up or sign in
