1 Tesalonika 4
4
Allah ogola opsogo togulom wene
1-2Narilak norokhwi. Wene ologun pam mesik yu mo’gulhentaik. Nis nonue ’gain Onuk Logo a’ge Yesus en,
“Henebabut Allah ogola opsogo, disogo togu lomup o, asogo togu lomup o,” oluk, egeimu mo’gulhentau wege ano henaluk o. Asogo mo’gulhentigema, his en asogo togu legep a’geat de, pobuk mesik emin loksogo togu lorogup en, nonue ’gain Onuk Logo a’ge Yesus emin hwedik welat henesa’go wusogo mo’gulhentegis ai o. 3Allah ogola en e, disogo epasu ai o,
“His henebe an nebaget poluk degelak modok welat, ’babi tenontogwi ai a’ge tenonto erlakma en modogat wolomup o. 4Asogo welat, ap en honugwami lo’bok wogonobogulat e, henemin obat welat, henebe an nebaget poluk degelak welat, henebabut hegitsogo togwi a’ge togu lomup o. 5Is aphwami o’borl o’gwe a’ge en, an nebe eneperlak welat enebam aganhan agoam yogunat tenontogwi ai ’gela’ge togu lorogup no yo. 6Ai a’ge paget hegitsogo togulat e, henarilak honorokhwi enil salogo ap onugwami a’ge tenentagup o,” oluk, Allah ogola en asogo epasulat mo’gulnentasu ai o. Asogo oso ai en, nadugat nis en ogulat e,
“Is aphwami ’babi asogo tenontogwi a’ge ai, nonue ’gain Onuk Logo a’ge en wene enebam pouwa a’ge oruak o,” oluk, ningsogo henesa’go wusogo mo’gulhentige ai o. 7Allah en, nis wiak togu lemagoluk yo’go nenebesi erlak o. We, nenebe at u’gwarek ebaget poluk, degelak welat, hegitsogo togu lemagoluk yo’go nenebesi ai o. 8Wene ai his logon en ukpogu legep holuk e, nis aphwami neniak a’ge de, ukpogu legep puk. Erlak o. We, Allah en Arogun his wokhentasu a’ge ano iagat ukpogu legep o.
9Ye, his-his henarilak honorokhwi enemin henedesogo wolorogup en, Allah en elirat mo’gulhentasu ai en e, pobuk an en nopaget oluk en,
“His henarilak honorokhwi enemin henedesogo togu lomup o,” oluk, pelal wokho hene’bek perakpou wom no. Erlagat o. 10His henarilak honorokhwi o Makedonia do’go a’ge ’berlegat asogo henedeabonobogu legep a’geat de, narilak norokhwi o. Pobuk loksogoat henedeabonobogu lorogup en, henesa’go wusogo mo’gulhentegis ai o. 11Nis en naduk mo’gulhentige ’gela’geat, henepe mosogo welat e, wene honu’gwarek wolom a’ge nak hwalogulat, honu’gwarek heniabukmu a’geat wokho no’gulat, togu legep a’ge aiat, logo pogu lomup o. 12Aiat logo poluk e, is mu on en yabuk wogo’gwe nil no’gwi ai ’gela’ge tu erlakma en welat, aphwami o’borl o’gwe a’ge en,
“Is op o,” oluk uagoluk enil pam henebabut hegitsogo togu lomup o.
Nonue ’gain Onuk Logo a’ge wema wene
13Narilak norokhwi. Is aphwami logon en,
“Op ema o,” oluk onogola pobirak erlak welat e, aphwami waragaiam enede wiak ago ai ’gela’ge, his asogo henede wiak agoma no oluk, wene aphwami waragai a’ge ai paget heneperlak wolom ai nebit o. Henaluk orogup en dokhumsogo mo’gulhentaik o. 14At Yesus ebe waragarik en elaluk aga ai demat oluk pobi togu lege o. Ai en, aphwami at emin hwedik welat waragai a’ge pobuk Allah en enelalugabonoboluk, Yesus emin modok welemagoluk demat wogonobua oluk pobi togu lomogat o.
15 #
1Kor. 15:51,52 Wene nonue ’gain Onuk Logo a’ge en egei a’ge yu mo’gulhentaik. At ebe wagoam e, is waragai a’ge ugonoboluk nis nenelaluk welege a’ge naduk e’bek ligomul erlak o. 16Nonue ’gain Onuk Logo a’ge ’bogorl pam en ’bu agokhwe re, is malaikat a’ge onue ’gain iak loksogo eselat, Allah e’bi’gong iak puhasuam iak ’bageselat, tisokhwe, aphwami Kristus emin hwedik welat waragai a’ge naduk enelalugabonobua o. 17Pobuk nis nenelaluk wolomul a’ge neneminat o hena ogola woknonoboluk ligemarik e, nonue ’gain Onuk Logo a’ge emin ’bogorl likholuk ’burl eba sarlok tultik e, at emin modogat wolomul o. 18Ai en, wene ai pam his-his honogola opsogo, henede ago wat-wat togu lomup o.
Currently Selected:
1 Tesalonika 4: Wul
Highlight
Copy
Compare
Share
Want to have your highlights saved across all your devices? Sign up or sign in
