1 Tesalonika 5
5
“Nonue ’gain Onuk Logo a’ge wagokhwe ologotma nenebe degelak poluk wolom o,”
oluk mo’gulentesi wene
1-2 #
Mat. 24:43; Luk. 12:39; 2Pet. 3:10 Narilak norokhwi. Aphwami logon yogorlia wouwogoluk huba’go wongat oruakma wagai ’gela’ge, nonue ’gain Onuk Logo a’ge wema ai erlige asogoat oruakma wema oluk, his se’geksogo henalugat welegep ai o. Holuk, an en e,
“Di erlige ema, yu erlige ema,” oluk, pelal wokho hene’bek perakpou wom mia o. 3Aphwami en e,
“Nis op lioksogo welege o,” oluk, ogukhwe re, hwami enemalik onogola a’ge wongat oruakma enebe dagonobuogoluk hegit agoam ono’borl nonouk wiaksogo togwi ’gela’ge, asogoat is aphwami wongat oruakma wiagabenebisoam hweiye libom a’ge erlagat ema o.
4A’ge re, narilak norokhwi. His o hiktakma wellep holuk e, aphwami wongat oruakma yogorlia wouwogoluk wagaimu enarogun lebikpogwi ’gela’ge, ai erlige his wongat oruakma henarogun lebikpelep ai o. A’ge re, his o hiktakma welegep erlak ai en, henarogun lebikpouwa erlak o. 5Aphwami o erlige dakharakma welagai ’gela’ge, his ’berlegat o dakharak ai eiye a’geat welegep o. Nis e, huba’go o hiktakma welagai ’gela’ge, ai a’ge eiye welege puk. Erlak o. 6Holuk e, is ado nogo ’gela’ge nogogwi ai, nis asogo nogogulom mia o. We, nenebabut heberlogo welat, nenede we’gerlogoat wolomok o. 7Aphwami nogogwi ai re, hubat nogogwi o. Ye, anggur e’gen a’bosu noluk enede ’balagai ai re, huba’goat noluk ’balogwi o. 8#Yes. 59:17; Efe. 6:13-17A’ge re, nis o dakharakma welege a’ge yu, nenebabut heberlogo welat e, aphwami muon en waronobuano oluk sing enebagase’gwe ’buktogwi ’gela’ge, nenede Allah pam he’berik welat, aphwami enebe nenedesogo welege ai a’geat ’buktogulat, ena’gul pam waronobuano oluk ena’gul sum erik a’ge ’buktogwi ’gela’ge, Allah en delogo obapnonobua oluk, nenede op welege ai a’geat ’buktak poluk, togu lomok o. 9Allah olot het nis nenebam poluk wiagapnenebiogoluk poliknenebesi erlak o. We, nonue ’gain Onuk Logo a’ge Yesus Kristus en delogo obapnonobuagoluk poliknenebesi o. 10At Yesus ebe nis nenebaget emin nenelaluk modok wolomogoluk waragarik e, pobuk wema ai, nenebe waromulmu wema de a? Nenelaluk oruakma wema ya. Op nak o. At ebe wemarik, emin nenelaluk modok wolomul ai o. 11Ai en, his yogodak ya togu legep ’gela’geat, his-his henesa’go wat-wat togulat, henede ago wat-wat togulat, togu lomup o.
Wene ologun ’balogo, enesa’go weriselat,
hau warenebiselat, tegei wene
12Narilak norokhwi. Honuelak tenhentarok oruak ai, nonue ’gain Onuk Logo a’ge en edikhenebesimu welat, his henebaget enannisogo togulat, henesa’go worogulat, togwi ai en e, isat eneragam welat, hau do’goksogo waronobogu lomup o. 13Is asogo togwi ai en, honogola en e,
“Nonuelak ’gain isat welemak o,” oluk opogulat, enebe henedesogo wolomup. Asogo welat e, his-his henebabut lioksogo togu lomup o.
14Narilak norokhwi. His en e, is logon yabuk sorli welat ono’borl ’boktak a’ge ai enesa’go worogulat, onogorlok wiak a’ge ai onogorlok erlagap pogulat, enanni erlak a’ge ai lerontogulat, asogo togulat aphwami ’berlek enebaget e, heniak yamuksogo mo’gulontogu lomup o. 15Aphwami en his logon wiagaphonobogwiam e, o’go-o’go wiagabonobo erlakma en welat, his-his henebaget emin, aphwami ’berlek enebaget emin, enebabut opsogo togwi ai a’geat logo pogu lomup o.
16Honogola henagai hogwi modok wolomup. 17Se’ban hwedik modok ogwi wolomup o. 18Allah en e,
“His Kristus Yesus emin hwedik welat, di a’ge yu a’ge ’berlegat paget an hau watnobogulom o,” oluk epasu ai en e, asogoat togu lomup o. 19Allah Arogun iak sebelogo pogulat, 20Allah iak at Arogun en enede ’gagalogo mo’gulentasu a’ge ai, honogola en mi-miarak pogulat, togu lorogup no yo. 21Di a’ge yu a’ge wouwogoluk e,
“Yu op, ai wiak,” oluk henede en walholuk, op a’ge holuk e, hene’gik ’betesogo tenak welat, 22wiak a’ge di wiak yu wiak a’ge holuk, ’berlek tu erlakma enat wolomup o.
23Asogo oruakma, at Allah nenede ha’bugapnenebiso a’ge ano en, henebe ebesik u’gwarek ebaget poluk welemak o. Oruakma, nonue ’gain Onuk Logo a’ge ebe wagoam, henede emin, henebe emin, henebabut emin, wene henebam po modok erlakma en, degelak oruakma wemagoluk, at enat ’gwelakhentarok welemak o. 24At Nenaik ’gain Onuk Logo a’ge Allah yo’go nenebesi a’ge ano en,
“Disogo takhenebaik o,” oluk obok mo’gulnentasu a’ge hegitsogo nak tiso ano en tenhentarok welemarik, demat takhonobouwayat o.
25Narilak norokhwi. Nis nenebaget se’ban ogu lomup o.
26His en e,
“Paulus lak en hau asogo wathenebigisa o,” oluk, Allah eiyagai welat enebabut togwi ’gela’geat, henarilak honorokhwi Allah eiyagai a’ge logon ’berlegat hau henemde motok opsogo warenebil lu o. 27Wene pelal wokho perakpou wege a’ge ai, henarilak honorokhwi Allah eiyagai a’ge logon ’berlegat enilem onuk mo’gulogup en nonue ’gain Onuk Logo a’ge onuk ’balogo mo’gulhentegis ai o. 28Nonue ’gain Onuk Logo a’ge Yesus Kristus ebabut op ano en opsogo tenhentarok welemak o.
Currently Selected:
1 Tesalonika 5: Wul
Highlight
Copy
Compare
Share
Want to have your highlights saved across all your devices? Sign up or sign in
