1 Yohanes 3
3
“Allah eiyagai emin, Iblis eiyagai emin, enagat agai,” oluk mo’gulentesi wene
1 #
Yoh. 1:12
At Allah en e, “Is yu an neiyagai,” oluk daknenebegeimu demat nis nenebe at eiyagai welege. Asogo welege ai en, nenebe at ede modok welago ai hemit! Asogo a’geat de, is aphwami ’gwiangma a’ge enebabut onotok a’ge ebano en Allah ebe eneperlak ai en e, nis nenebe eneperlagat o. 2Narilak norokhwi, nede o. Yogodak nis nenebe Allah eiyagai welege a’geat de, pobuk nenebe wolomul a’ge selakma po erlakma en owan hisogo oruak o. Asogo a’geat de, nis nenaluk e, Yesus ebe yogodak oruak a’ge nenil dokhumsogo hul ai en, at wema ai erlige ebe wagoam, nis nenebe at ebe oruak ai ’gela’geat omul o. 3Nis nonogola en, “Asogo omul o,” oluk, ebam eberak welege a’ge nenebe lo’bok en, at Kristus u’gwarek degelak welago ai ’gela’ge, nis asogoat degelhorlogulom o. 4Ye, aphwami en wiak togwi ai Allah iagat sagalogwi ai en e, ap sa en wiak tiso holuk, Allah iagat sagalogo tiso yo. 5#Yoh. 1:29At Kristus u’gwarek wiak tu erlak welat, nis wiak togu lege a’ge erlagapsogo ukpaigoluk, ebe selakmasogo waga ai henaluk o. 6Ai enat, nis at emin hwedik modok welege a’ge, nenebe lo’bok wiak togwi modok welege erlak o. A’ge re, is aphwami logon wiak nak togwi modok welagai a’ge enebe lo’gok e, at ebe enil ho erlak eneperlagat oruak o. 7Neiyagai o. Is aphwami logon en lalhonobuano oluk henebabut heberlogo wolomup o. Sa en ebabut hegitsogo tago holuk e, at Kristus ebabut hegitsogo tago ai ’gela’geat, tago oruak o. 8Ye, at ap mesik en ebabut wiak tago modok welago holuk e, at Iblis ebabut edip pam enat wiak tagoma no oluk e, at ai ebe re, Iblis en a’ge oruak o. A’ge re, at Allah omlogo selakmasogo waga ai re, at Iblis ebabut tiso a’ge ai, modok erlagap paigoluk waga o. 9Ye, aphwami Allah en dagenebiso a’ge enebe lo’bok, at ebabut wik-wok togwi ai en, wiak togwi modok welema erlak o. Enebe Allah eiyagai welat wiak togwi modok welagai erlak o. 10Allah eiyagai emin, Iblis eiyagai emin, nenede we’gerlogo enebabut enagat agai ai, yuat. Sa en ebabut hegitsogo tu erlakma en, arilak orokhwi edeabenebasu erlakma en, tago holuk e, at ai ebe Allah omlogo erlak o.
“His-his nede-hedesogo wolomup,” oluk mo’gulentesi wene
11 #
Yoh. 13:34
Wene Allah en e, “His-his nede-hedesogo wolomup o,” oluk mo’gulnentesi a’ge, aphwami logon en mo’gulhentigisema edipmu en henesa’go hweligep aiat o. 12#Kej. 4:8Nis en e, at ap Kain ebe Iblis ebabut wiak a’ge ai omlogo agarik u’gwarek ot a’ge weregei ai ’gela’ge togup no yo. At en ot weregei ai re, nopaget weregei no. At taga laga a’ge ai modok wiak, ye, ot taga laga a’ge nak e, hegit modok, ai en weregei o. 13Holuk e, narilak norokhwi o. Aphwami ’gwiangma a’ge en, his enebit modok takhonobogwi holuk e, “Nogorlok e,” oluk henede porogup o. 14#Yoh. 5:24Allah en nenebe waragaimu eba en woknonoboluk, enelaluk welagaimu nenebesimu welege oluk, nis-nis nenarilak nonorokhwi enemin nede-hedesogo welege ai en pobi togu lege o. Holuk e, sa en aphwami ado edesogo tu erlakma en, ebit welago a’ge ai ebe waragaimu ebayat oruak o. 15Enarilak onorokhwi de’gelak onobogwi a’ge ai, is enebe lo’bok e, ap ware a’geat o. Ye, is aphwami ap ware a’ge ai, enebe lo’bok noburlal-hoburlal eiye om erlak modok oruak, oluk nenaluk o. 16At Kristus en naduk nis edeapnenebegeitik, ebe nis nenebaget waraga ai en, nis en is aphwami logon enedeabonobogwi wene ai, pobi togu lege. Pobi togulat, at tegei ai ’gela’ge, nis nenarilak nonorokhwi enebe nenede en, nenebe is enebaget warom obat o. 17A’ge re, sa en at a’ge di a’ge yu a’ge ’gwiangma a’ge poluk welat, are erei mesik di a’ge yu a’ge erlagaik oruakma il hasularat de, mesik wogoum erlakma en, ede ’bete hasu holuk e, at ai ebabut e, Allah en edeapnenebiso a’ge ai ’gela’ge oruak epegep? Modok erlak o. 18Holuk e, neiyagai o. Nis en aphwami logon nenedeabonobogwi erlak welarat de, neniak pam en nak, “Nenedeabonobogu lomok o,” oluk ogulom mia o. At e, enebe nenedeabonoboluk, nene’gik pam en demat lerontogu lomul o.
“Nis Allah il pam nonogorlok erlaksogo wolom,” oluk mo’gulentesi wene
19-20Nis en nenebabut asogo togulat, nonogola en e, “Nis nenebe Allah demat a’ge eiyagai welege o,” oluk pobitu o. Asogo pobi togulat, nis wiak tige, oluk nenede e’gin wolomul holuk, nis nenebe mia a’ge re, at Allah nak e, ebe lok welat, di wene yu wene ’berlegat aluk nak welago, oluk, at ilem nenede se welat nonogorlok erlaksogoat wolom o. 21Holuk e, narilak norokhwi. Henebe nede o. Nis nonogola en, “An wiak mesik tegis,” oluk wenemennei eberak erlak, nenede se welege holuk e, at orogolema nonogorlok erlaksogoat welat, 22at en wene nenesa’go weregei wene ano hegitsogo togulat, at ilem ede opsogo nak togulat, togu lege ai en, nis di a’ge yu a’ge ’gonu ogwiam, at en woknentasu ai o. 23#Yoh. 13:34; 15:12,17At en wene nenesa’go weregei ai, ebe re, “His henede an nomlogo Yesus Kristus ebam he’berik poluk, at en mo’gulhentesi ai ’gela’geat, his-his nede-hedesogo wolomup o,” oluk nenesa’go weregei aiat o. 24Nis Allah en wene nenesa’go weregei wene ai hwelakpoluk hegitsogo togu lege holuk e, at Arogun woknentesimu nonogola oruak, ai pam, nis at emin hwedik, ye, at nis nenemin hwedik welege, oluk pobi togu lege.
Currently Selected:
1 Yohanes 3: Wul
Highlight
Copy
Compare
Share
Want to have your highlights saved across all your devices? Sign up or sign in
