1 Yohanes 4
4
“Allah Arogun emin, mu’gat lalenebiso a’ge emin, enagat pobirak onobo yo,” oluk mo’gulentesi wene
1Narilak norokhwi. Nede o. Aphwami enebe a’bik en e, “Nis en Allah iak mo’gulhontogu lege,” oluk eniak esei ogwi a’ge enebe arat selakma egesarik, o di owi yu owi no’gwi ai en e, logon hene’bek wemarik, wene mo’gulhontogwiam, his en e, “Allah Arogun ogola welat mo’gulnentasu,” oluk henede enebam he’berik pagup o. At e, “Demat Allah Arogun ogola welat oso a? Mu a’ge ogola welat mo’gulnentasu a,” oluk enebabut naduk ’belakpoluk en, enebe pobirak onobogu lomup o. 2His en e, “At ai Allah Arogun a’ge ogola oruak a? Mu a’ge a,” oluk enebabut naduk ’balogulom ai re, disogo. Is logon wemarik e, “At Yesus Kristus ai, Allah en perakpou wagama demat abat daklau waga,” oluk ’baksogo ogwi a’ge en ogwi holuk e, his en e, “Is ai Allah Arogun onogola welat ogwi,” oluk, pobirak onobogulomat o. 3Asogo a’geat de, is logon en Yesus paget wene asogo ’baksogo ogwi erlak a’ge en ogwi holuk e, his en e, “Is ai onogola Allah Arogun oruak puk. Mu a’geat oruak o,” oluk pobirak onobogulomat o. Is ai enebaget wene Allah en pageat mo’gulnentasulat, “At mesik Kristus emin modok il ’belak a’ge wema ani o,” oluk mo’gulnentesi a’ge, henesa’go hweligep ano, yogodak ’gwiangma yema enebe arat hebarligen egesarik oruak aiat o. 4A’ge re, neiyagai o. Is aphwami ’gwiangma a’ge onogola welago a’ge ai anni erlak a’geat de, his nak e, henebe Allah eiyagai a’geatma re, at Arogun anni modok a’bik a’ge honogola oruak ai en e, is ap ai mabenabonoboluk welegep ai o. 5Is ai enebe aphwami ’gwiangma a’ge eneiyagaiatma no oluk e, is en wene ’gwiangma wene ogwiam, eniak is aphwami ’gwiangma a’ge logon en enesa’go hologwi ai o. 6A’ge re, nis e, nenebe Allah eiyagai a’ge welat neniak ogwiam, is logon Allah ebe enaluk a’ge holuk, enesa’go hologulat, ye, is logon enebe Allah eiyagai a’ge puk, we mu a’ge holuk e, enesa’go holu erlakma en ukpogulat, togwi ai o. Asogo togwiam nis en e, “Allah demat a’ge Arogun is ai onogola oruak, ye, is logon eba mu’gat lalenebiso a’ge onogola oruak,” oluk enagat pobirak onobogu lege ai o.
“Allah en edeapnenebiso ai ’gela’ge, nis-nis nede-hedesogo wolom,” oluk mo’gulentesi wene
7Narilak norokhwi henebe nede o. Aphwami logon enedeabonobogwi ai edip, at Allah at ai en e, nis-nis nede-hedesogo wolomok o. Aphwami nede-hedesogo wolomul a’ge, enebe lo’bok Allah en dagenebegeimu, at eiyagai welat, at ebe enalugat oruak o. 8Ye, at Allah ebabut e, nis edeapnenebiso modok welago ai en, sa en nede-hedesogo welema erlak holuk e, at ai en Allah ebe eperlak oruak o. 9A’ge re, Allah en, “His henebe nede welegi o,” oluk ’baksogo selakmayat paigoluk, omlogo mesigat dogo ano en, nenelalugapnonobuagoluk ’gwiangma ’belakpou waga ai o. 10Is logon enedeabonobogwi ai ebe re, nis en Allah nenedeap pege puk. Erlak o. We, at Allah en nis edeapnenebegeitik, at en nis wiak togu lege a’ge erlagapsogo ukpoluk hononobuagoluk, omlogo nene’bek ’belakpou waga ai. 11Narilak norokhwi henebe nede o. At Allah en nis asogo edeapnenebegei ai en, nis ogo re, nis-nis nede-hedesogo wolomok o. 12#Yoh. 1:18Ye, Allah ebe ai re, aphwami logon en enil modok ho erlak. A’geat de, nis-nis nede-hedesogo wolomul holuk e, Allah emin hwedik modok wolomul o. Asogo oruakma, naduk Allah en edeapnenebiselat, ede epesi ai hegitsogoat, di a’ge yu a’ge opsogo ologun ’balogo togwi ai ’gela’ge, nis-nis nede-hedesogo welemagoluk ologun ’belaknenebasu ai o. 13Allah en Arogun woknentesi ai pam, nis en opogulat e, “At nis nenemin hwedik oruak. Ye, nis at emin hwedik welege,” oluk pobi togu lege o. 14Nis en e, “Allah en omlogo nenil hogu lege a’ge ai en, nis aphwami ’gwiangma a’ge delnonobuagoluk perakpou wagama,” oluk obok ’baksogo mo’gulhontogu lege o. 15Ye, ap sa en, “Yesus ai Allah omlogo,” oluk ’baksogo mo’gulentasu holuk, at Allah en at emin hwedik modok, ye, at en Allah emin hwedik modok, welagai o. 16Nis en e, “Allah en edeapnenebiso ai pobirak pegerik e, demat,” oluk opogu lege o. At ebabut e, edeapnenebiso modok welago ai en, sa en ebabut e, aphwami edeabenebiso modogat welago holuk e, Allah en at emin hwedik modok, ye, at en Allah emin hwedik modok, welagai o. 17At Kristus welago ai ’gela’ge, nis ’gwiangma asogoat welege ai en, pobuk Allah en nis nenemdema wokho wene nenebam pasulat, no’gorliselat, tua ai erlige nene’gerli erlaksogo wolomul ani o. Nene’gerli erlaksogo welemagoluk e, naduk Allah en edeapnenebiselat, ede epesi ai ’gela’geat, di a’ge yu a’ge opsogo ologun ’balogo tiso ai ’gela’ge, nis-nis nede-hedesogo welemagoluk ologun ’balogo taknenebasu ai o. 18Aphwami logon en is logon enemin nede-hedesogo welat, onogorlok erlaksogo welagai ai en, di a’ge yu a’ge ologun ’balogo togwi ai ’gela’ge, nis-his nede-hedesogo togu lege a’ge ai modok ologun ’balagalat e, nenebabut nonogorlok a’ge ai erlak ago yo. A’ge re, is aphwami logon enebabut onogorlok a’ge ai, enede en e, “Eige! Pobuk Allah en wene nenebam pouwa hwi a,” oluk enebabut yuktak welagai ai. Asogo welagai ai en, nede-hedesogo togwi a’ge ai enede opsogo ologun ’balogo togwi modok erlak o. 19Page enat Allah en naduk edeapnenebegeimu re, nis ogo re, nis-nis nede-hedesogo wolomok o. 20Asogo a’geat de, aphwami en enarilak onorokhwi enil ontogwi a’ge enede erlak welarat de, Allah enil hogwi erlak a’ge enede wolom epegep? Mia o. Holuk e, at mesik arilak orokhwi de’gelak ebasu a’ge en, “An Allah nede o,” oluk oso holuk e, iak eseiyat oso yo. 21Ai en, at Kristus en nenesa’go weriselat, “Allah henedesogo welat, henarilak honorokhwi henedesogoat wolomup o,” oluk mo’gulnentesi ai o.
Currently Selected:
1 Yohanes 4: Wul
Highlight
Copy
Compare
Share
Want to have your highlights saved across all your devices? Sign up or sign in
