1 Yohanes 2
2
“Kristus ebe nis nenebaget ’burl heirakma welago yo,” oluk mo’gulentesi wene
1Ye, neiyagai o. His wiak togu lorogupno oluk, wene yu pelal wokho hene’bek perakpou wegi o. Asogo a’geat de, sa en wiak tiso holuk, nenaik Allah oruakma nis letnentasu a’ge ap mesik ’burl heirakma oruak o. At ai ebe Yesus Kristus ebabut hegitsogo tiso a’ge anoat o. 2At ebe asogo welat, nis di wiak yu wiak togu lege a’ge erlagapsogo ukpoluk, honenebiso yo. Asogo tiso ai re, nis wiak togu lege a’ge paget nak puk. At e, di aphwami yu aphwami ’gwiangma a’ge ’berlegat wiak togwi a’ge paget eneminat honenebiso yo. 3Wene Allah en nenesa’go weriso wene ai, hwelakpoluk hegitsogo togu lege holuk e, at ebe nenaluk o, oluk ai pam en nenede we’gerlogo pobi togu lege o. 4A’ge re, sa en, “An e, Allah ebe naluk,” oluk eselarat de, at en wene nenesa’go weriso wene ai hwelakpoluk hegitsogo tago erlak holuk e, at iak eseiyat oso ai o. Holuk e, dem wene ai ogola modok erlak o. 5Asogo a’geat de, sa en Allah iak hwelakpoluk hegitsogo tiso holuk e, di a’ge yu a’ge ’garoksogo togwi ai ’gela’ge, at ai Allah modok edesogo welago yo. Ye, nis asogoat welege holuk, nis Allah emin hwedik welege o, oluk ai pamat nenede we’gerlogo pobi togu lege o. 6Ye, sa en, “An Allah emin hwedik welegi o,” oluk oso holuk e, ebabut at Kristus taga laga ai ’gela’geat tagalom o.
Wene ’get a’ge mo’gulentesi wene
7 #
Yoh. 13:34
Narilak norokhwi. Henebe nede o. Wene ’get a’ge henesa’go wusogo pelal wokho hene’bek perakpou wegi puk. We, pageat Allah en henesa’go wusogo mo’gulhentesimu edip pam enat tenak welegep a’ge o. Wene ai re, at Allah en pageat henesa’go weregeimu hweligep a’ge anoat o. 8Asogo a’geat de, o hiktak oruakma dakha etil lasu ai ’gela’ge, o dakharak demat a’ge dakharak nonobou wagama mo yeriso ai en e, wene ’get a’ge henesa’go wusogo hene’bek perakpou wegi ai o. At Yesus en wene ai hegitsogo tisoam demat aga ai ’gela’geat, his en ogo re, asogoat, wene ai hegitsogo togwiam, demat ago ai o. 9Ye, ap sa en, “An nebe o dakharakma welegi,” oluk eselarat de, arilak orokhwi modok ebit holuk e, o page en ’bekhit yogodak ya, at ebe o hiktakma oruak o. 10Asogo a’geat de, ap sa enarilak orokhwi edesogo welago holuk e, at ebe modok o dakharakma welat, aphwami en is logon wathorlouwagoluk enepenen en ebela’gwe ’balogwi ai ’gela’ge, is logon wiak tuagoluk lalenebiso erlak o. 11Asogo a’geat de, ap sa enarilak orokhwi modok ebit welago holuk e, at ebe o hiktakma oruak o. Asogo oruakma, o hiktak a’ge en il hopnik pesimu ebe o hiktak o’gwe neselat, “’Geba lasu legi ’gela’geat,” eperlagat ebagase ’belak oruak o. 12Neiyagai o. Wiak togu legep a’ge Allah en omlogo Kristus tegei ano pam erlagapsogo ukpesi ai en, an en pelal wokho hene’bek perakpou wegi o. 13Naiklak o. At naduk edipmu en welago a’ge ano ebe henaluk egeptik welegep ai en e, pelal wokho hene’bek perakpou wegi o. Ye, ap souwe a’ge nosi o. His en at ebabut wiak a’ge ano arat mabenap pegeptik welegep ai en, pelal wokho hene’bek perakpou wegi o. 14Malik wei a’ge neiyagai o. Nenaik Allah henaluk egeptik welegep ai en, pelal wokho hene’bek perakpou wagalat, his naiklak, at naduk edip pam en welago a’ge ano ebe henaluk egeptik welegep ai en pelal wokho hene’bek perakpou wagalat, his ap souwe a’ge nosi, his henanni oruakma Allah iak honogola oruakma re, at ebabut wiak a’ge arat mabenap pegep ai en, pelal wokho hene’bek perakpou wagalat, tegis ai o. 15A’ge re, aphwami ’gwiangma a’ge enebabut togwi a’ge ai emin, di a’ge yu a’ge ’gwiangma welago a’ge ai emin, henede hwedik wolom modok erlak o. Ap sa en is aphwami ’gwiangma a’ge enebabut togwi a’ge ai, ede hwedik welago holuk e, nenaik Allah ede hwedik welago modok erlak o. 16Ye, aphwami ’gwiangma a’ge enebabut togwi re, enebam aganhan agalat, di a’ge yu a’ge enil en holuk nenagai opogulat, ’gwiangma a’ge paget erliktogulat, togwi ai ’berlek e, edip nenaik Allah puk. Edip e, ’gwiangmayat o. 17Aphwami ’gwiangma a’ge enebabut togwi ai emin, di a’ge yu a’ge nenagai oluk togwi ai emin, erlak etil wago a’geat de, aphwami Allah ogola agai epasu a’ge togwi a’ge ai nak e, enelaluk modok welema o.
“Is logon Kristus emin il ’belak a’ge hebarligen egesarik oruak o,” oluk mo’gulentesi wene
18Neiyagai o. O yogodak e, ologun hwerli pam welege o. Aphwami logon en e, “Pobuk ap logon Kristus emin modok il ’belak a’ge wema o,” oluk mo’gulhentigisema, henesa’go hweligep ai ’gela’ge, o yogodak e, Kristus emin il ’belak a’ge enebe a’bik arat hebarligen egesarik oruak ai en e, nis en, “O yogodak demat ologun hwerli pam welege,” oluk nenede we’gerlogulat pobi togu lege o. 19Is aphwami ai enebe re, nis ’belak a’geat de, is enebe demat nis oruak o’gwe a’ge erlak o. Is enebe demat nis oruak o’gwe wellepma re, enebe nis nenemin modogat wollo yo. A’ge re, Allah ede en e, “Is ai, enebe ’berlegat his a’ge erlak, mu a’ge oruak, oluk, enagat emak,” oluk epesi ano pam is asogo libegesa ai o. 20Asogo a’geat de, his nak e, Yesus Kristus Allah en u’gwarek pagathwerlesi a’ge ano en, Allah Arogun wokhentesimu dem wene henebe ’berlegat henaluk egeptik welegep o. 21An en wene pelal wokho hene’bek perakpou wegi ai re, dem wene heneperlak en puk. Henaluk welegep ai enat perakpou wegi o. Ye, eniak esei ogwi ai edip e, Allah demat a’ge en puk. Edipmu at, oluk henalugat o. 22At iak esei oso a’ge ai ebe sa epegep. At ai en, “Yesus ebe re, Kristus erlak o,” oluk he’berlogo ukpasu a’ge ai erlak no? Aiat o. At Kristus emin modok il ’belak a’ge ebe re, nenaik Allah omlogo Yesus e’birek enebe he’berlogo ugenebasu a’ge aiat o. 23Ap sa en, “Allah omlogo ai, ebe nebit,” oluk he’berlogo ukpasu holuk e, aik Allah ebe wo erlagat o. Ye, sa en, “Allah omlogo ebe aiat o,” oluk iak ’baksogo oso holuk, aik Allah ebe wesiat o. 24Ye, his e, wene nadugat henesa’go hweligep a’ge ai, honogola waguptik e, eberak modogat wolomup o. Asogo wolorogup holuk e, henebe nenaik Allah omlogo Yesus e’birek emin hwedik wolorogup o. 25Ye, at u’gwarek en, “Wokhentaik,” oluk obok mo’gulnentesi ano re, nenebe noburlal-hoburlal taknenebaigoluk egei o. 26Wene yu ’berlek e, is aphwami his lalhonobuogoluk walhogwi a’ge paget pelal wokho hene’bek perakpou wegi ai o. 27At Kristus en Allah Arogun wokhentesimu honogola welat, di a’ge yu a’ge paget, iak esei mo’gulhonto erlak, demat nak mo’gulhentasu ai en e, aphwami logon en wene his mo’gulhonto mia o. Wene at Allah en mo’gulhentasu a’ge ai hegitsogoat togulat, Kristus emin hwedik modogat wolomup o. 28Neiyagai o. Kristus wema ai erlige ebe wagoam e, nis nene’gerli om erlakma en, nonogorlok erlaksogoat, at orogolema eragam ’guogoluk, his at emin hwedik modok wolomup o. 29At Kristus Allah omlogo ebabut op hegitsogo nak tago a’ge ano henaluk holuk e, his honogola en e, “Is aphwami logon enebabut op hegitsogo togwi a’ge enebe lo’bok Allah eiyagai pobuk dagenebegeimu oruak,” oluk henaluk emagat o.
Currently Selected:
1 Yohanes 2: Wul
Highlight
Copy
Compare
Share
Want to have your highlights saved across all your devices? Sign up or sign in
