1 Yohanes 1
1
Dem wene ai en nenelalugapnenebiso wene
1 #
Yoh. 1:1
Wene pelal wokho hene’bek perakpou wege ai ebe re, dem wene nenelalugapnenebiso a’ge naduk edipmu en welago ano a’ge. Wene ai, nis arat nenesa’go hologulat, nenil domok hogulat, yetharok welat, nene’gik tenhogulat, tige a’ge anoat o. 2#Yoh. 1:14Ye, at elaluk modok welago a’ge ai, ebe aik emin elaluk modok welagarik en, aik en nis nenil houwagoluk selakma pesimu nenil hegerik enat obok mo’gulhontogu lege o. 3Ebe nis nenil hogulat, nenesa’go hologulat, tige a’ge ai, nenaik Allah omlogo Yesus Kristus e’birek emin hwedik welege ai ’gela’ge, his nis nenemin opsogo hwedik wolomogoluk mo’gulhontogu lege o. 4Ye, wene yu paget nonogola nenagai hogu lege a’ge ai, pobuk nonogola loksogo demat nenagai houwogoluk pelal wokho hene’bek perakpou wege ai o. Allah omlogo en e,
“Allah omlogo en e, Allah ebe, o dakharak aiat o,” oluk mo’gelentesi wene
5Allah omlogo en mo’gulnentasulat e, “Allah ebe re, o dakharak aiatma re, at ebam o hiktak modok welago erlak o,” oluk mo’gulnentesi a’ge, nis nenesa’go arat hwelige a’ge mo’gulhontogu lege ai o. 6Ye, nis e, neniak pam en, “At emin hwedik welege,” oluk ogularat de, o hiktakma welat enebabut togwi a’ge ai ’gela’ge togu lege holuk e, demat a’ge togu lege erlak, we, neniak eseiyat ogu lege o. 7Asogo a’geat de, Allah ebe o dakharakma welago ai ’gela’ge, nis ogo re, o dakharakma welat, op togu lege holuk nis-nis nare-hare nenemin hwedik oruakma, nis wiak togwiam at omlogo Yesus emep pam honenebiso modok welago yo. 8Asogo a’geat de, nis en ogulat e, “Nis wiak logon tu erlak,” oluk ogu lege holuk e, neniak eseiyat nonu’gwarek lalogu lege ai en, dem wene nonogola modok erlak o. 9A’ge re, nis wiak togwi a’ge ’baksogo ukpul holuk, at Allah ebabut hegit modok welat, wene werak nenebasu ’gela’geat tisoma re, nis wiak togu lege a’ge erlagapsogo ukpoluk, wiak tuogoluk nenede ’gagalogwi a’ge emetnenebiso yo. 10Asogo a’geat de, nis en e, “Wiak mesik tu erlak welege,” oluk ogu lege holuk e, nis en e, “Allah iak esei oso,” oluk u ’gela’geat ogu lege ai en, Allah iak nis nonogola modok erlak o.
Currently Selected:
1 Yohanes 1: Wul
Highlight
Copy
Compare
Share
Want to have your highlights saved across all your devices? Sign up or sign in
