YURAT 1
1
AT YURAT NEN LIIRU MBANEEGERAK WONE
1Kit ninogoba Ala yonggo pinagareegerak kinom kunik at Yetut Keritut kinarum wonage nogo, an Yurat Yakobut ore Yetut Keritut ayeloman nogo nen keyage wappinagi o.
2At Ala kinabuwa nen obeelom eeppinagage, kiniki ugun obeelom logobagip nduk, eeppinagage, iniki kunik eekkinake, eeke menggerak nogo ti, kulinik-kalinik eeppinagagak mban eeke logogin o.
Pilit wone pugunogo yorogo menggaarak wone
3-4Noreewi o. Kit an niniki kunik wonogwe me, wone ambi yokkira o. Kit ugun kineenggo'lek kiigak, it aap ando kinenggela'me unggwi wogo nagaarik, Ala nen ninabuwa mbake logonet, obeelom eeppinanege menggerak wone nogo, abut laganogo, ”Ala ninabuwa mbake menggerak me, nit maluk eekwi niinok, maluk ninoba pinanigin lek o,” yinuk, iniki liirak lek ugun-ugun eerit nogo logonet, ninowe endagembogut Yetut Keritut nogo ti, ”Nit ninowe lek o,” yinuk, yogo menggaarak me, Ala nen it maluk eekwi onggo muk inoba piyoorak nduk, puunogo piyareegerak wonage kagak, we ugun kobak logonet, agan nugwi me, nit ninagap ndareegerak wone ndak-ndak waganeegurak nogo, amburu mbanogo yokkiraakit mbakirak kwe, it togop agan nugwi iinok, abet mbakwi wone ambit at Ala nen o maan nit at apuri mondok-mondok unde eeppinaneegerak wone nogo, taganogo mbo pugwi kiyo, ”Yi Ala wone aret me, taganiyak lek o,” yinuk, mondok kinogogumbuk logonet, pipporogo logobagip nduk, yokkira o.
5Ninogoba Ala nen maan it aakumi Iterali mendek o Metit nen inagap ndarogo wumbiya wage nagagirik, it ando abet mbaka'lek kenok Ala nen inooke logonet, lek eerogo piyareegerak wone nogo ti, kit muk kinaruk koneneegutak kwe, aberak logobagip nduk, ambinom yokkiragi o. 6At Ala nen it yonggo mbogut paga nugu menggaarak melaikat ando, ”Yogop eeko logonip o,” yinuk, o unde eeppiyareegerak kagak, ”O yi mban unde logorak neebi o,” yinuk, mbo pogo mbareegwa, at Ala nen, ”O age yobok paga inawone amburu mbanogo maluk eekwi onggo inoba piyaakit o,” yinuk, ineebe mondok-mondok mbutigeele paga maarogo o apit me mambiyareegerak wonogwe nogo, kiniki abeko logonip o. 7At Ala nen it yonggo mbogut paga nugu menggaarak melaikat eeppiyareegerak nogo pogom, it aakumi o Torom inom, o Nggomora inom, enaagan-ambokan wonogwe nogo nen nggeewo negen kumi ugun wurinabit nogwe, iniki aganggen eeginake kenok eekulik mendek kagak ugun-ugun eeginabit nogwe, eeko mbareegwa, ”It aakumi maluk eekwi iinok, Ala nen kani omoonu'me mondok-mondok nappiyaagin o,” yinuk, nineenu ogo logowok nduk, kani paga inooreegerak nogo abeko logonip o.
8It aap kinenggela'me ugun unggwi wagaarak nogo ti, aakumi o Torom inom, Nggomora inom, eeko nogogwaarak nogo pogom ndak-ndak eerit nogo logonet, ”Nabinggaanggo paga yogop eeriyak op aret kagarak o,” yinuk, iniki aganggen eeginake kenok eekulik mendek kagak ugun-ugun eeginabit nogwe, Ala wone konenggo logorak, ”Nineebi o,” yinuk, taganogo mbo pugwi, ndi, it inayuk warak mbogut paga menggaarak melaikat nogo kunduk miyuk-meya eerogo piigwi, eerit nogo menggaarak. 9Muta kangge mbareegi, at yonggo mbogut paga nugu menggaarak inowe Mikayen Ibilit imbirak, ”Eebe an koloorak kat koloorak,” nili-kili yogo logonet, at Mikayen nen, ”Kat abu maluk lombok me, kambu o,” yinuk, Ibilit yoriyak op aret kwe, agabiti nen, ”Nogoba nen mban mbekkirigin o,” yinuk, yoreegerak kwe, 10it aap kinenggela'me unggwi wagaarak wonogwe ti perak, wone alom liirogon ineenggo'lek kagak miyuk-meya eerogo pogo logonet, nggeewo iniki lek ugun eerit nogo mengga kwak, it togop aret iniki aganggen eeginake kenok eerit nogwe nogo mban ineenu logonet eerit nogwe me, ineebe aret lek eerogo patit nogo agaarik o. 11It nogo nen at Kayin eereegerak nogo ndak-ndak eerit nogwe, aap Mbileyam maluk eereegerak nogo kokwak, it togon iniki lek negen wu koloorak mban iniki luunik logonet mugurok nogwe, ndi, aap Kora awuri inom Muta wone taganogo mbo pogo mbareegwa, Ala nen lek eerogo piyareegerak nogo pogom, it ndak-ndak ineebe lek eerogo piyaawak nduk, eekkologwe, eerit nogwe me, inabuwa o. 12Kit kiniki kunik paga mbi nawok nduk, kuwak eekwi me, it aap ti, inageerok abe mendek ko'nok wa'nuk, it ando abu iigak, inagabiti mbaka'lek inalik mban nonggo menggaarak me, yum abu laambu kwe, oololuk mili eerak minggi kwak logonet, eekwi o. Mayu ndugwi paga luurik lek teretak me o wiya nen wonok nage, eyoonggen abe yuwak nduk, awi yakaatak kwe, kanenep age kenok, kinogo pegaatak me, mondok mbuk age, 13niyo kilaarak-mogonik eeke logonet, eyak-nggoyak eerogo nippit wage minggi kwak, it aap ti, eekulik mendek kagak togop aret ugun-ugun eerit nugwi, ndi, laaluguragan inobaane'me lombok wonogwe iigak, ambiret ambi nggigik togon, pinda agan lek ari nage minggi kwak, eerit nugwi, eeko menggaarak me, at Ala nen o apit aago me mondok-mondok logowak nduk, inake ogabakkigirogo piyareegerak wonogwe o.
14-15Aram ombowologwe ambo'me-ambo'me nda'narit wundi wogo logonet, 7 Enok nda'nagagerak nogo nen Ala yoge kagak aakumi yorage logonet, ”It aakumi Ala wone woorak, Nineebi o, yinuk, Ala miyuk-meya eerogo pugwi, oone taganogo punuk, iniki liirak lek maluk ugun eerit nugwi, eekwi nogo ninowe endagembogut nen inowak loonogo maluk onggo inoba piyaakit nduk, it yonggo nugu menggaarak melaikat maluk eeka'lek obeelom mban eeko menggaarak ineebe ambik aago at inom wogwe iigirak o,” yinuk, yoragagerak nogo ti, it aap kinenggela'me logonet, ”It eekwi ti aret o,” yinuk, yereegerak.
16It aap ti nen ineebi-ineeba yogwe, inoreewi meek inombakwi, eeriyak iniki nengge kenok eekwi, ”An aap nggwok o,” yinuk, wogoppatit nugwi, inamendek kolaawok nduk, inoone amburu ndik-ndik yogwe, eeko menggaarak o.
Aberak logonet, eeko logowak nduk lengganinabeegerak wone
17-18Noreewi o. Kit niniki kunik wonogwe me, wone ambi yokkira o. At ninowe Yetut Keritut nen it nappiigak mendek agago mippiyareegerak nogo nen wone aa'nduk yokkirogo logonet, ”O age yobok paga it aakumi iniki nengge nogo mban eerit nogo logonet, kit miyuk-meya eerogo pinagi wogo logogun o,” yinuk, yokkirogo nogogwaarak nogo, a'me nggelok yegerak me kiniki abeko logonip o. 19It aap ti, Aberiniki inikime lek me, nggween paga mendek mban iniki nengge kenok mugurok nogo logonet, Ala apuri ogoorogo piinet nogo menggaarak kwe, 20noreewi niniki kunik kit perak, togop eerugup o. Kit kiniki kole aruwak nduk, wone abu obeelom kit abet mbareegutak wone nogo mban eerit nogo logonip o. 21Ninowe Yetut Keritut ninabuwa mba'nuk ninomaluk lek eerogo punuk, mondok-mondok nineenik eeppinaniyak nogo, ”Mbet-mbet eeppinanuwak lak ao,” yinuk, tokkogo logonet, Ala kinabuwa nen liirogon kinarum logowak nduk, Aberiniki yokkirage kagak tamban eeko logonip o.
22It ando iniki yunggup-pegak eeko menggaarak nogo inabuwa mbako logonet, yanggorogon yorogwe, 23ndi, it ando nen kani omoonu'me nogwe iyo, kinagabiti mbaka'lek inagap ndarogo wumbiya wogwe, ndi, it ando perak, iniki nengge mugurok nogo logonet, mbogoyum laambu abe me mili mondok nabek yi unggwage minggi kwak maluk eekwi ti, ogole warak me, ninom lambunggologwe niyo, ”Ninagabiti o,” mbakwi kwe, kagak, inabuwa mbako logonet yorogwe, eeko logonip o.
Irip paga keyage wappiyareegerak wone
24-25Ninowe Yetut Keritut eereegerak paga ninagap ndareegerak at Ala nogo nen nit abet mbareegurak nogo mbo punuk, alik eerit nogwe niyo, ninarum liirogon logominggirik, ”Kit maluk kinikime wonage lek abu obeelom aret me, nowagam mi'nari woraanip o,” yinuk, yo'nirage kenok, niniki ale'nggen mbakak at mondok tiyanak menggerak enggaanom mi'nari nawok nduk, wo'niren pinani noorak meek mbakop? Lek o. Wo'niren pinani nagin aret me, yi aakumi ndi aakumi aa'nduk nda'nogogwaarak inom, yogondak ndarak inom, peebi nda'nariyak inom, ”Nit abok ninogoba ambit kat aret me, kat aap nggwok kendagembogut komaawi ambik yi aakumi ndi aakumi abok kabu'me logonet, kat koone mban konenggwi, ndi, kendage tiyappagagwi, eeko logogun o,” yinuk, yogo logorak op aret o, yinuk, abu aret yokkiragi o. Wa. Amin.
Currently Selected:
YURAT 1: WNO
Highlight
Copy
Compare
Share
Want to have your highlights saved across all your devices? Sign up or sign in
