3 YAYA 1
1
YAYA NEN LIIRU NE MBERE MBANGGE NAGAGIRIK,
TI'NUK AMBI MBANEEGERAK WONE
1Noreeluk Nggayut wae. Kat abet aret niniki kunik me, an Ala apuri inarum logowak nduk, mippaneegerak nogo nen wone ambi yokkiri o.
2Noreeluk o. Kat Ala wone liirogon mugurok nage logonet, obeelom eeke menggendak nogo kwak, keebe andi lek obeelom aret logonet, yi mendek ndi mendek eeke menggendak nogo obeelom mban age kage logonok nduk, an Ala yoge minggirak o. 3Kat Ala ari menggerak wone eerit nage menggendak nogo, noreewi ando neya wogo nagaarik, ”Nogo ndak-ndak aret eerit nage o,” yinuk, mbininogo yo'niri wogo mbaka, an niniki ale'nggen ambik aret mbakirak o. 4Yi mendek ndi mendek eeriyak nogo ti, ale'nggen mbuuluk mbake minggirak kwe, an napuri nogo nen Ala ari menggerak wone mondok ndak-ndak eerit nogwe naruk konengge kenok perak, niniki ale'nggen nggwok lombok mbake minggirak o.
Ala apuri yeenggwa-yeenggwa eeko logorak yoragagerak wone
5Noreeluk o. Kat an niniki kunik me, wone ambi yokkiri o. Kat kulinik-kalinik ninoreewi Ala apuri nogo obeelom eeppiige logonet, ninoreewi ando nggiru wogwe iinok, abu iya tit obeelom eeppiige nogo paga wa lombok yokkigi o. 6It nogo nen Ala apuri yime kuwak eeko menggaarak inenggaanom mbininggo logonet, ”Aap Nggayut iniki kunik ee'ninake logonet, ndogop eeppinanege menggerak o,” yinuk, yo'niragaarak me, aap togoti mendek ambi keya wogwe iinok, Ala inikilom kombaruwak nduk, inamendek ambi lek kenok, wogorage logominggindik, nappiyoorak ti op aret o. 7It aap ti, Keritut wone yoranet noorak nduk, nogo logonet, ”It aap abet mbaka'lek inamendek woorak nineebi o,” yinuk, yagaarak me, kat yenggwaaragak yuurak ti, op aret nduk, yokkigi o, noreeluk. 8It aap Ala ari menggerak wone nggwok aruwak nduk, eerit nogwe nogo nen, ”Ninom ndak-ndak eekwi o,” yinuk, ninombaruwak nduk, yeenggwaarogo logorak ti op aret o.
Ndiyoterepet, Ndemeteriyut imbirak eereegwaarak wone
9An wone ambi mbuuluk Ala apuri time kuwak eeko menggaarak nogo inake liiru mbanogo nappiigirak kwe, aap Ndiyoterepet nogo nen, ”Inenggela'me an mban tiyanak logokit,” inikilom mbake menggerak me, noone woolik o. 10Togop me, nit eerulik kagak oone abu maluk ninoba pinaneegerak me, an wage logominggirik, at yereegerak nogo nggwok paga aret enggali wake neyaamunggun o. Oone maluk ti mban ninoba punuk, puk age ti lek o. Ata, ninoreewi wogwe iinok, ineebe waganaka'lek logonet, it waganaburak mbakwi nogo, ”Waganaburak lek o,” yinuk, nappiige menggerak me, an mondok enggali wappi woraagin o.
11Noreeluk niniki kunik me wa! It maluk eeko menggaarak nogo kat ndak-ndak togop eeriyak lek o. Ata, it aap obeelom eeko menggaarak nogo ndak-ndak mban eeke logot o. Aap ambi obeelom eeke menggerak kenok ti, Ala aput aret kwe, at maluk mban eeke menggerak nogo perak, Ala mondok liippega'lek aret wonage o.
12Aap Ndemeteriyut nogo Ala ari menggerak wone liippunuk, abet aret eerit nage kenok, it aakumi abok aret, ”Aap ti abu obeelom aret o,” yinuk, yogo menggaarak. Ndi, nit pilit lek, abet aret yogo monggoorak kat keenu me, nit kunduk, ”Aap ti iya tit eeke menggerak o,” yinuk, yokkogo o.
Irip paga keyage wappereegerak wone
13An wone ambik yokkiriyak mbakirak kwe, mbuku paga liiru mbanggiriyak anggon ee'nake me, 14an mbet-mbet keya wage logominggirik, nimbirak lambunik logonet, wone li'lak mbaniyak uugwe mbake agarik o.
15Ala mondok karum wonage me, kiniki ugun obeelom aret logomunggun o.
Koreewi ninom wonogwe nogo nen keyage wappagaga o. Ndi, an noreewi kinom wonogwe nogo ti, ”Kinendage kunogombo mban keyage wappinagagi o,” yinuk, yoret o. An Ala apuri inarum minggirak Yaya nen aret yokkigi o. Abu aret o. Noreeluk wa!
Currently Selected:
3 YAYA 1: WNO
Highlight
Copy
Compare
Share
Want to have your highlights saved across all your devices? Sign up or sign in