NGGALATIYA 1
1
PAWULUT NEN ALA APURI O NGGALATIYA MENDEK
INAKE LIIRU MBANOGO NAPPEREEGERAK WONE
1-2An Pawulut it aakumi nggween paga mendek nen nappiigak mendek logowak nduk, iniki koombunuk, leenogo mippaneegwaarak lek o. Ata, at Yetut kambunuk nogo menggam nen eenik agago mippereegerak ninogoba Ala Yetut Keritut imbirak nogo nen, leenogo mippanugo mbareegwa, Ala ayonggo yi awi ndi awi yoranet nege minggirak nogo nen, kit Ala apuri o Nggalatiya monggotak nogo, wone ambi yokkira o. Noreewi apit ninom wonogwe nogo nen keyage wakkinako o.
3Ndi, ninogoba Ala ninowe Yetut Keritut imbirak iniki kunik en wokkirogwe, kiniki ugun obeelom logobagip nduk, eeppinagagwi, eeko logogun o.
4O yogondak yi paga, it aakumi nggween paga mendek nen maluk mban eerit nogo menggaarak nogo, ninom eekwi niyo, ndinogo wo'ninabikit nduk, at ninogoba Ala mbareegerak nogo ndak-ndak, nit maluk eekwi niinok, ninowe Yetut Keritut nen, ”Inake kambikit o,” yinuk, ninake kambeegerak. 5At Ala nen eeppinaniyak kooneegerak paga Keritut ninake kambeegerak me, ”Ala endage mondok-mondok tiyappogo logowok o,” yinuk, abet aret yokkiragi o. Amin!
”Wone obeelom wone ti ambit aret o,” yinuk, yoragagerak wone
6At Keritut kinabuwa mba'nuk kambeegerak nogo paga, at Ala nen obeelom eerogo pinagakit nduk miikkinabeegerak nogo kagak mbo punuk, wone alik mendek ambi woorak eekwi kiige nagarik, nagabiti mbake logonet, yokkirage agarik o. 7Wone obeelom wone alik ambi inom wonage lek aret kwe, it aap ando nen Keritut eeke nagagerak obeelom wone nogo, ”Abut laganuwok o,” yinuk, wone alik ambi inom nabenogo agan nugwi ti paga, kit kiniki naalop-kaalop eerogo pinagagwi iigirak me nduk, yokkiragi o, noreewi. 8Togop me, nit obeelom wone yaga ambi nen ilik, it yonggo mbogut paga nugu menggaarak melaikat nogo mendek ambi nen a, wone aa'nduk yokkirogogurak waganeegutak nogo kagak, alik ambi yokkira wogwe iinok ti, Ala nen pulunogo piyamenggerak aret kambugun o. 9Kit aa'nduk obeelom wone waganeegutak nogo kagak, aap ambit-ambi nen wone alik mendek ambi wonok yokkira wage kenok, ”At kugi pulu aago pogom logonet, kambuwak o,” yinuk, yokkirogo nogogurak nogo ndak-ndak yi aret yokkiragi o.
10An yokkirage ti, aakumi inikilom nombaruwak nduk ari ilik, Ala inikilom nombaruwak nduk ari a? Ndi, an aakumi nen tiyappanuwak nduk ari ilik, Ala nen tiyappanuwak nduk ari a? Lek o. An aa'nduk aakumi inikilom mbaruwak nduk ari nagagirak nogo ndak-ndak ari logonetak en, yogondak an Keritut ayeloman logonetak lek o. An ari minggirak nogo ti, Ala inikilom nombaruwak nduk mban aret ari minggirak o.
Pawulut nonggop togon nappiigak mendek agagerak wone
11An obeelom wone yoranet nege minggirak nogo ti, it aakumi nen iniki koombunuk agan nugu menggaarak nogo mendek wagangge nagagirik, yoranet nege lek o, noreewi. 12An yorage minggirak nogo ti, aakumi inoone yugu waganeegirak lek o. Ndi, it aap ambi nen mamunnireegwaarak paga agan nege minggirak kunduk lek mban. Ata, Yetut Keritut nen lalin negen eeppaneegerak paga yoranet nage minggirak o.
13An it Yakuri inoone mugurok nage logonet, eerit nege nagagirak nogo, kit muk konenggo nogogutak o. Ala apuri yi awi ndi awi wonogwe nogo, ando ambi teppiyoorak abu mbarulik abok lek eerogo piyaakit nduk, mondok tigiren-muguren nege nagagirak nogo kineenu o. 14Nit Yakuri inoone mugurok nogo logonet, noreewi ando we mbuuluk negen eekwi iigak, an perak nombomini eeko nogogwaarak nogo, mondok unde eekkolage nagagirik, niniki kundugu logonet, ndak-ndak aret eerit nage nagagirak nogo ti, kineenu mban.
15Togop tit eerit nage neegak kwe, nagalo inikime awo nda'naga'lek neegak, at nabuwa mba'nuk, mii'nake nagagirik, yonggo paneegerak Ala nogo nen 16an aakumi endekem konenggulik mendek yoranet nage logokit nduk, at aput Yetut ni'neyoorak inikilom mba'nuk, ni'neege mbareegi, ”Yi nonggop ee'naki?” yinuk, it aakumi ambi nen yo'niruwak nduk, inowagam yora nage, 17ndi, it aap inaa'nduk nappiigak mendek o Yerutalem wonogogwaarak nogo, inowagam yora nage, ti eerulik. Ata, an o Arap nagagirak time wonage nagagirik, peebi niyok paga o Ndamatik aret wagagirak. 18Ti'nuk, 3 tahun eeppunuk, aap Kepat pekkaagin o Yerutalem nage nagagirik, nimbirak abet aret nogo 15 yereegirak kwe, 19it nappiigak ando ti, an nenegen abu iyoolik. Ninowe Yetut awoluk Yakobut nogo, alik mban nenegen kagagirak o.
20An liiru mbanggirage yi nogo ti, pulit lek o. Ala enggaanom paga mondok abet aret yokkiragi o.
21An aap Kepat nimbirak wonagagirik, ti'nuk, o Tiriya inom, Kilikiya inom, wage nagagirik, nogome enaagan-ambokan nege neegak, 22it Ala apuri Yetut wone waganeegwaarak o Yureya menggaarak nogo nen, neebe inigen neyoolik kwe, 23it nen yogo logonet, ”Nit abet mbakwi wone nogo, aa'nduk at nen lek eerogo puurak nduk, ti'niren-mu'niren nege nagagerak nogo kwe, yogondak wone nogo aret wappunuk, mamuninabit nage agaarik o,” yinuk, konenggo nogogwaarik, ”Wi,” yinuk, 24an eeke nogo paga Ala endage tiyappogo nogogwaarak.
Currently Selected:
NGGALATIYA 1: WNO
Highlight
Copy
Compare
Share
Want to have your highlights saved across all your devices? Sign up or sign in
