2 KORINDUT 13
13
Abu yorage nagagirik, irip paga inaruk wareegerak wone
1Ne mbere paga pekkiya wagagirak kwe, yogondak ne ambinom pekkiya woraakit nduk, eeke agarik o. ”Wone ambi agaatak kenok, aap mbere ilik, kenagan a, Abet aret kogoorak o, yogwe iinok, abet aret mbako menggaarak o,” yinuk, liiru mbanak nogo abeko logonip o. 2Aa'nduk pekkiya wagagirak me, peebi pekkiya wage logonet, ”Kit maluk eekotak ambi wonage kenok, tepp nagagin lek o. Kinawone amburu mbanogo mondok kinowak loonigin o,” yinuk, yokkiragagirak nogo kokwak, yogondak ndak-ndak waga'lek logonet, it aa'nduk maluk eereegwaarak kinom abok aret wone ti yokkiragi o. 3”Keritut nen yoge kagak yo'nirage menggerak nit abet mbaruwok nduk, ambi eeke kaawok o,” yinuk, nombako monggotak nogo, kiya wage logominggirik, ambi eeke neyaamunggup o. An kiya wage logominggirik, ninom wonogwe niigak, Keritut nen meek negen eeppinagagin lek o. Mondok iya lombok eeppinagage kaamunggup o. 4At aap nit kokwak eebe lebenak me nduk, abet aret warogo pereegwaarak kwe, Ala omaawi paga mippege mbareegi, eerit nege menggerak nogo kwak, nit togon, nineebe lebenak aret kwe, Keritut ninom abet aret kunik me, kinenggela'me logonet, Ala omaawi paga eerit nugwi niyaamunggup o.
5Kit abet mba'nuk, waganeegutak nogo abet aret mugurok nogwe ilik, lek a, nogo kinalitak lombok liippatinuk, kinabut mbanggologo logonip o. Kinabut mbanggologo logomonggotik, ”Op aret mugurok nage kagi,” mbakwi kenok, ”Yi Keritut Yetut ninikime wonage me eeke kagi,” mbarumunggup o. Ndi, mugurok nogwe lek eekkinake kenok perak, ”Yi Keritut ninikime lek aret kagi,” mbarumunggup. 6Kit nen, ”Op mugurok nogwe a, lek a?” nit nineenggo'lek kwe, nit perak op aret mugurok nogwe ninabut mbanggologogurak me, kineenu arubagip nduk, yokkirogo. 7Kit maluk eeko logokwak nduk, kinake Ala yogo monggoorak. Kit maluk eeka'lek kiinok, ”Pawulut awuri wone waganeegwaarak abet aret mugurok nogwe me iya,” yinuk, ninabut mbambunuk, ninabok obeelom mban yuwak nduk, kinake tamban eekwi lek o. Ata, nit ninabok maluk yogwe tit iigak kwe, kagak kit obeelom mban eerit nogo logobagip nduk, kinake tamban eeko monggoorak. 8Nit Ala ari menggerak wone kagak alik eeriyak meek me, wone ti wappunuk, mondok mugurok nogo logowok nduk mban eeko monggoorak. 9Kit kiniki abu kole eekkinabuwak nduk, tamban eeko monggoorak me, nit ninoone omaawi yokkiraga'lek niigak, kit-kit mban koombunuk, eerit nugwi kiinok, nit niniki aaninggin logogun lek o. Ale'nggen mban aret mbarugun o. 10At Ala nen aakumi maluk eeppiyaakit nduk, oone unde eeppanulik. Ata, obeelom eeppiyaakit nduk, oone kili'nireegerak me, an kiya wage logominggirik, noone omaawi lok togon yokkirookwak, awo waga'lek logonet, wone yi liiru paga mbanogo nappinagi wagi o.
11Ndi noreewi o. Wone ti abu aret yokkiragi o. Kiniki kole arubagip nduk, eeko logonet an wone yokkirage yi inom liippogo logonip. Kiniki ambit a'nuk ale'nggen paga lambunik wonogwe kiinok, at ninabuwa mba'nuk obeelom eeppinanege menggerak Ala nogo nen kinarum aret logogin o.
12Linggik-kambuk yogo logonet, keyage wat-wat yogo logonip.
Ndi, it abet mbakwi Ala apuri yime abok aret nen keyage wappinagaga o.
13Ninowe Yetut Keritut iniki kunik nen obeelom eekkinake, Ala nen kinabuwa mbake, ndi, Aberiniki kinom kunik logonet, kit abok aret kinarum wonage, eeko logogun o. Abu aret yokkiragi o, noreewi wa.
Currently Selected:
2 KORINDUT 13: WNO
Highlight
Copy
Compare
Share
Want to have your highlights saved across all your devices? Sign up or sign in
