1 KORINDUT 8
8
Kugi aanggo warak nonggop eeko logorak yoragagerak wone
1”Wam kugi aanggo warak nawi ilik, mage a?” yinuk, wone ambi yokkira o.
Wam kugi aanggo warak nunggwi wone, ”Nit abok nineenu o,” yogwe kiigirak ti, abet aret yogwe kwe, ”Abok nineenu,” mbako logonet, nggaruk togon, ”Noorak lek o,” yinuk, koonggwi ti, wogoppako logonet, yogwe kinombariyak me, inabuwa mbako logonet, mbabok kooniyak perak op o. 2Aap ambit-ambi nen, ”An abok neenu,” mbake kenok, at abe liirogon eenu ariyak mendek awo eenggo'lek kagak ari me, abu mondok eenggo'lek logonet, aret ari mbariyak kwe, 3aap ambi Ala imbirak iniki kunik kenok, Ala nen aap ti, eenu aret kogo o.
4Ti kenok, ”Wam kugi aanggo warak nawi ilik, mage a?” yinuk, yogwe ti, at Ala alik ambit aret menggerak me, nggween paga yime kuguwak abe mendek ambi wonage lek ti, nineenu aret o. 5Mbogut paga nggween paga, ”Ninagugi ambik wonogwe o,” yinuk, yogwe nogo ti, nit kunduk, ”Nagugi nombo o, nowogelo o,” yinuk, ambik inowak mbanit nogwe iigo monggoorak kwe, 6nit perak, ninogoba ambit Ala aret wonage o. At nen mban yi mendek ndi mendek abok aret wakkagagerak me, nit at ake aret nineenik ogoorik. Ndi, ninowe Yetut Keritut kunduk ambit aret o. Yi mendek ndi mendek inom, nit aakumi inom, at eereegerak paga nineenik wonogwe nineenu ogoorik o.
7Wone ti, nit nineenu aret kwe, kit ando perak awo liippega'lek aret ogotik kiigi o. Kit nen maan kugi aanggo warak nonggo nogogutak me, yogondak kiniki mari eeppunuk, wam ti ugun noorak op aret kwe, kit ando perak, kiniki kole aga'lek me, ”Inagugi aanggo wakaarak o,” yinuk, abeko logonet, nonggo nogootik, ”Maluk eekkologoorak kogo,” yinuk, mbako monggotak kiigi o. 8At Ala nen nit nengga'lek puk wonogwe niinok, ”Obeelom eekotak,” yo'nirage, ndi, nunggwi niinok, ”Maluk eekotak,” yo'nirage, eerigin lek me, nit yi mendek ndi mendek nunggwi paga Ala nen eebi ninombake, inikilom ninombake, eerigin lek kwe, 9kugi aanggo warak nogo kit nen ugun nenet noorak op aret kwe, kinoreewi ambi iniki abet mbakwi awo kole aga'lek nogo nggelenogo piyookwak, liippinip o.
10It kinoreewi ando iniki awo kole aga'lek mendek nogo nen, kugi aanggo warak kit ugun noorak kineenu me, ugun nunggwi kiinok, ”It kugi aanggo warak kagak nunggwi me, nit togon nawi aret o,” yinuk, iniki maan mendek abeko logonet, nagun lek mbakop? Nunggwi aret iyoorak me, 11it kinoreewi nogo abok inake Yetut kambeegerak kwe, kit alom abu kineenu logonet, kugi aanggo warak ugun namonggotak nogo paga nen kinoreewi iniki awo kole aga'lek nogo maluk eeppiigwi kiyoorak me, liippunuk eeko logonip o. 12Kugi aanggo warak ugun noorak alom kineenu me, ugun nunggwi paga it kinoreewi ando iniki awo kole aga'lek nogo maluk eeppiigwi paga iniki warogo piigo logonet, Keritut kunduk inom aret maluk eeppumunggup mbaki o. 13Ti kenok, an nengge paga noreewi ambi nggelenogo piyookwak, an wam mondok nengga'lek aret logogin o.
Currently Selected:
1 KORINDUT 8: WNO
Highlight
Copy
Compare
Share
Want to have your highlights saved across all your devices? Sign up or sign in
