1 KORINDUT 7
7
Aap kwe koloorak yoragagerak wone
1Kit liiru mbanogo nappaneegutak nogo yogondak an wone onggo ambi yokkira o.
Aap nen kwe kolaga'lek we logorak ti op aret kwe, 2aap nen kumi inom ugun maluk eekwi iyo, it aap nen inakuwi kologwe, ndi, kumi nen kunduk inogonggelomini kologwe, eeko logowak o. 3Kologo logomenggaarik, imbirak nogo yugu logonet, eeriyak mbakwi nogo eeko logorak op aret o. 4Aap nen akwe eebe unde, ndi, kwe nen aap eebe unde me, akwe nen eeriyak mbake kagak, ogonggelo nen at eebe ili yikkolage, ndi, ogonggelo nen eeriyak mbake kagak, akwe nen at eebe ili yikkolage, eeriyak mage o. 5Wone alik paga lek o. Ata, tamban mban eeko logowak nduk, ogonggelo akwegelo imbirak wone koonggo logonet, ”We luulu ne ndogop paga lambungga'lek puk logowok o,” yinuk, iniki ambit a'nuk, tayoppunuk, puk logorak ti op aret kwe, elaambirik wonogwe iinok, Ibilit nen iniki nggagangge kenok iniki nengge kero, logonuk lek mbet-mbet aret lambunuwak o.
6An wone yokkiragarak ti, noone omaawi paga lengganogo yokkirage lek o. Ata, ”Togop eeriyak op ilik?” yinuk, yokkiragi o. 7An wonage nogo pogom kit abok ndak-ndak togop logorak op mbake kwe, Ala nen eeriyak unde eeppinanege logonet, ”Ambi yogop eeriyak, ambi togop eeriyak,” yinuk, ninalitak unde eeppinaneegerak me, eeko logowok o.
8It kumi tawe aap tawe inoreewi kolaga'lek inom, kumi togwe inom, nogo yorage logonet, ”An wonage minggirak pogom kit ndak-ndak logorak ti op aret o,” yinuk, yorage minggirak kwe, 9”Kinoreewi kolaga'lek logonet, aganggen nen kiniki nanet unggwage ti maluk, ndi, kinoreewi warak logorak ti maluk lek me, eeriyak eekkinake nogo tebenogo puurak meek kenok, kinoreewi kologo logorak op aret o,” yinuk, yorage minggirak.
10-11Ndi, kit kinakuwi warak nogo perak, ambi yokkira o. ”Kit aap nen kinakuwi mbo piyoorak ti mage o. Ndi, kit kumi kunduk, kinogonggelomini mbo piinok, mbaganiyak ti mage mban. Kit kumi nen kinogonggelomini mbo piinok, mbaganggwi kiinok ti, tawe aret logorak ilik, kiniyokan kinogonggelomini iya woroorak a, ti op aret kwe, aap alik koloorak ti perak, mondok lek o,” yinuk, yokkirage ti, an nen lek o. Ata, ninowe endagembogut nen yo'nege kenok lengganogo yokkiragi o.
12Ndi, ando yi yokkirage nogo ti, ninowe endagembogut nen lek o. Ata, an nen aret yokkira. Kit aap Ala apuri ambi nen akwe iniki abet mbaka'lek mendek kolage logominggirik, imbirak wonage logonet, kwe nogo nen, ”Nogonggelo nimbirak logorak obeelom,” mbake kagak, aap nogo nen, ”Nakwe yi neebi o,” yinuk, mbo puurak ti mage. 13Ndi, kit kumi Ala apuri mendek ambi nen ogonggelo iniki abet mbaka'lek mendek kolage logominggirik, imbirak wonage logonet, aap nogo nen, ”Nake nimbirak logorak obeelom,” mbake kagak, akwe nogo nen, ”Aap yi, neebi o,” yinuk, mbo puurak ti kunduk mage mban o. 14Aap nen iniki abet mbaka'lek nogo akwe abet mbake nogo paga Ala nen ore imbirak ale'nggen inoba piige, ndi, kwe nen iniki abet mbaka'lek nogo ogonggelo abet mbake paga Ala nen ore imbirak ale'nggen inoba piige, eeke menggerak. Imbirak ale'nggen inoba piyaanetak lek en, it inaagalogwe-inapuri ndarak nogo ti, we terak ndarak negen logonetak kwe, imbirak ale'nggen inoba piige ti paga Ala nen, ”Yi an napuri aret o,” yinuk, inarum aret menggerak kogo o. 15Ndi, at ambi iniki abet mbaka'lek nogo nen ore iniki abet mbareegerak nogo mbo puurak mbake kenok ti, iniki abet mbaka'lek nen, ”Mbo pikit,” koonggerak me, obaalombok koonuwak nduk mbo pinip o. Ndi, kwe ilik, aap a, mbo pugu nogo ti, Ala nen iniki ambit ale'nggen paga lambunik logorak mbareegerak kwe, lambunik logorak meek kenok, inalitak logorak op aret o. 16Kit kumi Ala apuri yi wae. Kinoreewi kinom logonet, kit eerumonggotak nogo paga Ala nen kinoreewi nagap ndarigin kineenu me nduk, yogo ogotik? Ndi, kit aap Ala apuri yi wae. Kit togop eerumonggotak paga Ala nen kinakuwi inagap ndarigin kineenu logonet, yogo ogotik? Lek me, kinalitak logorak op aret o.
Nit nonggop wonogwe me, eeko logowak nduk, yonggo pinaneegerak wone
17Kit aa'nduk nonggop negen kiigak, Ala nen kinayonggo pinagareegerak nogo togop aret logonet, ambi eeko logobagip nduk, unde eeppinagareegerak nogo aret eeko logonip o. It Ala apuri yi awi ndi awi kuwak eeko menggaarak nogo, wone ambit ti mban aret lengganogo yorage minggirak. 18At Ala nen kinagabolo mbanak kagak wigiragagerak kenok, kinagabolo mbanak aret logonip. Ndi, kinagabolo mbanak lek kagak wigiragagerak kenok, kinagabolo mbanak lek aret logonip. 19Kinagabolo mbanak inom, kinagabolo mbanak lek inom, ti iya lek o. Ata, at Ala nen wone lengganogo yo'niragagerak nogo mugurok noorak kenok perak iya o. 20Kit aa'nduk kinalitak lombok nonggop negen wonogwe kiigak, Ala nen wigiragagerak nogo togop aret logonet, eeko logonip o. 21Aakumi inayeloman wonogwe kiigak wigiragagerak kenok, ti wone aaninggin lek me, togop aret logonet, Ala mugurok nogo logonip o. Ndi, kinogobamini nen wondet agago wumbinagagwi iinok, ”Nanonggwan yo'nirogwe iigo,” yinuk, mbaganumunggup o. 22Aap ambit-ambi aakumi inayeloman a'nuk, eeke kagak ninowe endagembogut nen wiige kenok, at Ala aput wondet aago pereegerak negen aret wonage o. Ndi, wondet aago wonage me, wiige kenok, aap ti Keritut ayeloman aret mbako logowok. 23At Ala nen onggo nggwok nogo paga kinonggo mbaneegerak me, aakumi inayeloman arugup o. 24Noreewi o. Kit aa'nduk kinalitak lombok nonggop negen wonogwe kiigak, Ala nen wigiragagerak nogo togop aret at kinom kunik logonet, eeko logonip o.
Inoreewi wogonaka'lek inom, kumi togwe inom, eeko logorak wone
25Kit komologwe tawe eeko logorak Ala nen wone ambi lengganogo yo'nirulik kwe, it aakumi Ala nen inabuwa mbake menggerak me, ”Ninoone abet mban yogo logowok o,” yinuk, mbakwi nogo ndak-ndak an kunduk togop logonet, niniki mbakirak nogo ambi yokkira o.
26O yogondak aaninggin-paaninggin alik negen ninoba wonage me, an niniki nen kit yogondak nonggop wonogwe nogo ti, togop aret logorak mbakirak o. 27Kit ando kinakuwi warak kenok, mbo piyoorak mbarugup o. Ndi, awo wagangga'lek wonogwe kiinok, koloorak kiniki koonggo logogup o, yinuk, yokkirage kwe, 28kit ando kumi wogonakwi kiinok ti, maluk lek o. Ndi, kit tawe nen kinogonggelomini kologwe kiinok ti kunduk, maluk lek mban kwe, kinoreewi wogonako logomonggotik, kinom logonet, aaninggin-paaninggin kinoba agago pakwi kiyo nduk, yokkiragi o.
29Noreewi o. Yogondak o nggween paga yime kogo monggoorak nogo lek ariyak eyom abu koorok panggok yegerak me, yogondak en, kit aap kinakuwi warak nogo nen kinakuwi lek negen a'nuk, logonip. 30Ndi, kit le yogwe nogo ti, le yogolok negen a'nuk, logonip. Kit kiniki ale'nggen wonogwe nogo ti, kiniki ale'nggen lek negen a'nuk, logorak. Kit yi mendek ndi mendek kunggwi nogo ti, yi mendek ndi mendek unde lek negen a'nuk, logorak. 31Ndi, kit nggween paga yi mendek ndi mendek waganggwi, ti'nuk, onggo nggerenggologwe, eekwi nogo ti, kiniki kundugu lek negen eeppunuk, logorak aret o, yinuk, an mbakirak nogo ti aret yokkiragi o.
32Ti yokkiragarak paga kit kiniki piirik wonogwe kiyo, ambinom yokkira. Aap ambi akwe lek kenok, at iniki mbake logonet, ”Nowe endagembogut iniki ale'nggen nombaruwak nduk, at obaalombok mban eeke logokit,” mba'nuk, eerit nage menggerak kwe, 33it aap inakuwi warak nogo nen perak, ”Nonggop togon nakwe iniki ale'nggen eeppumun?” yinuk, wone nggween paga wone mban mugurok nogo logonet, 34”Ambi yi eeppi ilik, ambi ti eeppi a?” yinuk, iniki koonit nogo menggaarak. Ndi, it komologwe inogonggelomini lek tawe wonogwe kenok perak, ”Niniki inom, nineebe inom, maluk eeka'lek mondok Ala ake leenak logowok nduk, Ala wone kenok mban mugurok nogo logowok o,” mba'nuk, mugurok nogo menggaarak kwe, it kumi inogonggelomini warak nogo nen perak, inogonggelomini iniki ale'nggen mbaruwak nduk, yi mendek ndi mendek nggween paga eeriyak mendek nogo mban iniki koonit nogo menggaarak o.
35An wone yokkirage ti, kit nen eeriyak mage me nduk, yokkirage ti lek o. Ata, obeelom logobagip nduk, yokkiragi o. Kit obeelom mban eerit nogo logonet, ninowe endagembogut alik kinengga lolo agago punuk, mugurok nogo logobagip nduk, yokkiragi o.
36Aap ambi nen kwe yiindi pege nagaatik, ”Mbet-mbet lambumbaniyak neebi o,” yinuk, ari kwe, ti'nuk, kolaga nogo abu tawe age kenok, aap nogo iniki aganggen nen, ”Nakwe nimbirak lambumbinaniyak,” mbake kenok, ti maluk lek me, lambumbiyoorak op aret kwe, 37aap alik ambi nen yiindi pege nagaatik, iniki mondok nu'lek logonet, aganggen eeke nogo tebenogo punuk, at iniki nen, ”Nakwe mbet-mbet lambumbaniyak neebi o,” yinuk, mbake kenok, ti kunduk op mban aret. 38Togop me, it aap inakuwi koloorak mbakwi nogo ti, maluk lek op aret kwe, tawe logorak mbakwi kenok ti perak, abu obeelom aret o.
39It kumi inogonggelomini awo ineenik wonogwe iigak ti, inom lambunik aret wonogwe kwe, inogonggelomini kanggwi iinok perak, nanu piigaatak wondet aago wonogwe me, kumi nogo nen, ”Aap alik kolaawok o,” mbakwi iinok ti, koloorak op aret kwe, kologo logonet, aap Ala apuri kenok mban kologo logowak o. 40Ndi, aap kolaga'lek we logorak mbakwi iinok ti perak, iniki ale'nggen ambik kogo logogun mbake agarik o. An mbake logonet, yokkiragarak ti, Ala Aberiniki nen yo'nege kagak yokkirage mbake agarik o.
Currently Selected:
1 KORINDUT 7: WNO
Highlight
Copy
Compare
Share
Want to have your highlights saved across all your devices? Sign up or sign in
