IMAMAT 20
20
Huhukuk ba'eneu hataholi manatunga taak-ka
1 Manetualain nadenu Musa 2nafa'da dede'ak ia neu leoina Israel-la nae, “Hataholi see, fo nai emi dalek, do hataholi nusa dea, fo ana leo nahele no emi, metema ana tunu-hotu anan-na soaneu nitu Molokh-ka soona, basa laun-na lala'en-na, muse tapan nenik batu losa maten. 3Hataholi fo, ana tunu-hotu anan-na soaneu nitu Molokh-ka, ana tao nanggenggeo Au Lalaa Temang-nga, ma nakadadaek Au na'de malalao-malalafung-nga. Neukose Au hukun, ma Au ta sipok-ka da'di Au anang so'on. 4Metema, laun-na ta'ko ta nita hataholi ndia tatao-nono'in, fo ta naketu hukunisa fan, 5soona Au nde huku hataholi ndia, ma basa teidale-bobongin lala'en-na, boema basa hataholi fo sama-sama loo hataholi ndia, ala la'oela Au, de leu sene-do'ok neu nitu Molokh-ka. Au ta sipok-kasa da'di Au anang so'on.
6Hataholi fo neu sanga malelak nai hataholi malelak, fo ana kokolak no hataholi manamatek samanen soona, neukose Au hukun, ma Au ta sipok-kana da'di Au anang so'on. 7Manea, fo ela emi malalao-malalafuk mahele, nanahu Au nde emi Amam Manetualaim. 8Tunga Au hoholo-lalaneng-ngala, nanahu Au nde Manetualain, fo manahele hehelik emi soaneu Au.”
9 #
Kel. 21:17; Mat. 15:4; Mrk. 7:10 Manetualain fe nakanenetek-kala nde ia nae, “Hataholi fo ana soo-supa aman do inan soona, muse hukunisan. Ana mate, hu kande salan-na.
10 #
Kel. 20:14; Im. 18:20; Ul. 5:18 Metema, hataholi Israel esa, ana hohonge no hataholi fo bei sila leoina esa saoinan-na soona, muse hukunisan no inak ndia. 11#Im. 18:8; Ul. 22:30, 27:20 Touk esa, ana sungu no aman saon esa soona, ana la'olena aman hak-ka. Muse hukunisan no inak ndia. Sila mate, hu kande sila salan-na. 12#Im. 18:15 Metema touk esa, ana sungu no manafeu inan-na soona, muse hukunisa hataholi ka duak sila-la. Sila hohonge so, de mates, hu kande sila salan-na. 13#Im. 18:22 Metema touk esa, ana sungu no touk fe'ek esa soona, ala tao tatao-nono'i ta kandaak ma nakamumulu-nakamamaek, de muse hukunisa duas. Sila mate, hu kande sila salan-na. 14#Im. 18:17; Ul. 27:23 Metema touk esa, ana sao inak esa no inak ndia inan soona, muse hotunisa 3-s, nanahu ala tao tatao-nono'i ta kandaak fa. Tatao-nono'ik matak leondiak-ka, ta bole hapun nai emi dalek fa. 15#Kel. 22:19; Im. 18:23; Ul. 27:21 Metema touk esa, ana sao bana soona, muse taonisa touk-ka no bana ndia. 16Metema inak esa, ana sao bana soona, muse taonisa inak-ka no bana ndia. Sila mate, hu kande sila salan-na.
17 #
Im. 18:9; Ul. 27:22 Metema touk esa, ana sungu no feton-na, do tolanoo inan fo duas ama esa, tehu esak inan, do ina esa, tehu esak aman soona, sila ta da'di Au anang so'on. Ala tao tatao-nono'i ta kandaak fa, de muse ala lu'a-lepa aon buna-boan. 18#Im. 18:19 Metema touk esa, ana sungu no inak esa, te inak ndia bei hapu bulak soona, ala ta da'di Au anang so'on.
19 #
Im. 18:12-14
Metema touk esa, ana sungu no te'on soona, duas muse lu'a-lepa la'olenak ndia buna-boan. 20Metema touk esa, ana sungu no to'on-na saon-na soona, nakamamaek to'on. Touk-ka no inak ndia, muse lu'a-lepa huhukun-na. Losa mate boeo, ala ta hapu anak fa. 21#Im. 18:16 Metema, touk esa natona-na tolanoon-na saon-na soona, nakamamaek tolanoon-na, ma ana tao tatao-nono'ik ta kandaak fa. Losa mate boeo, ala ta hapu anak fa.”
22 Manetualain nafa'da nae, “Tunga la'iesak Au hoholo-lalaneng ma Au paletang-ngala, fo daenga emi ta nanausihenik neme nusa Kanaan-na mai, fo nai bee, Au o emi leo naa meu. 23Boso nanadulak neme leoina manai naa-la ha'dan-nala. Ala tao-la Au malua nenik sila tatao-nono'i mangalaun sila lala'en-na. Hu ndia de, Au usi henis, fo ela emi hapu masok leo nusak ndia meu. 24Au helu basa, Au fe emi dae fo kamasu'i-makabetek, ma maoe-maisik ndia, fo da'di emi pusakam.
Au nde emi Manetualain, fo manata'da fe'e emi neme leoina fe'ek-kala mai. 25Hu ndia de, emi muse mete kofe'ek malelak, bana beek-ka nde nalulin, ma bana beek-ka nde ta naluli fan. Boso mi'a bana nalulik-ka paan-na. Au afa'da ae, bana ndia bana nalulik, da'di metema emi mi'an soona, emi manggenggeo. 26Au ta'da fe'e emi neme leoina fe'ek-kala mai, fo ela emi da'di Au nuung. Emi muse malalao-malalafuk, nanahu Au nde Manetualain, ma Au malalao-malalafuk.
27Touk do inak see, fo ana kokolak no hataholi manamatek samanen-na soona, muse tapan nenik batu, losa maten. Hataholi ndia mate, hu kande salan-na.”
Currently Selected:
IMAMAT 20: twu
Highlight
Copy
Compare
Share
Want to have your highlights saved across all your devices? Sign up or sign in
