IMAMAT 14
14
Feta tao nalalao-nalalafu aoinak-ka, nai lelek lea-hai neme he'di lou mangalauk-ka mai
1 Manetualain fe Musa, 2#Mat. 8:4; Mrk. 1:44; Luk. 5:14, 17:14 nakanenetek-kala nde ia, la'eneu tao nalalao-nalalafu aoinak-ka, nai lelek lea-hai neme he'di lou mangalauk-ka mai. Nai faik fo hataholi ndia lea-hai soona, muse noon leo imam-ma neu, 3fo imam-ma noon leo mamana oofuk-ka deak neu. Metema, tunga imam-ma palisan-na nae, hataholi ndia lea-hai so, soona 4imam-ma nadenun, fo neni manupui kalaok ta nalulik dua, no ai kaiou biak esa, tali pilas esa, ma aiana esa na'de hisop, ndanan esa. 5Muse do'do manupui esa nai uledae lain, tehu uledae ndia oemata nai dalek. 6Muse dope manupui esak-ka no ai kaiou, tali pilas-sa ma aiana hisop-pa ndanan-na leo manupui nanado'do basak-ka, daan dale neu. 7Imam-ma, muse pisi manupui ndia daan-na la'i hitu neu hataholi manalea-haik ndia, ma nafa'da nae, ana lea-hai so. Boema, muse ana po'i falik manupui maso'dak-ka leo mook-ka neu. 8Basa soona, hataholi ndia muse safe bua papaken-na, nggeu polik langadoon-na, ma nadiu oe. Soona ana lea-hai so, de ana bole masok leo mamana oofuk dale neu, tehu nai faik hitu dalen-na seluk, ana beita bisa masok leo ndia uma ofun dale neu fa. 9Neu fai ka hitun-na soona, muse ana nggeuheni la'iesak langadoon-na, nggolomein-na boe, mata bulun-na, ma basa bulu-buluk manai aopaan-na. Boema, muse ana safe bua papaken-na, ma nadiu oe. Basa ndia soona, besak-ka ana lea-hai.
10Neu fai ka falun-na soona, hataholi ndia muse neni bi'ilopo maneanak dua, ma bi'ilopo tenaanak esa, teuk esa, ma basa-basas ta lu'u-la'ak fa. Fe'ek neme ndia mai boe, muse neni ha'desopu nanasese'dok mina setun kilo telu, ma mina setun ba'e teluk liter esa. 11Boema, imam-ma muse noon sama-sama no tutunu-hohotun sila-la leo Manetualain Lalaa Teman-na lelesun-na, bafan-na neu. 12Imam-ma muse ho'in-na bi'ilopo maneanak esa, ma mina setun ba'e teluk liter esa, soaneu tutunu-hohotuk bae hutak, fo tunu-hotun da'di leo tutunu-hohotu natutu'duk ba'eneu Manetualain. 13Muse do'do bi'ilopoana ndia, nai mamana hehelik, fo nde mamanak do'do bana soaneu tutunu-hohotuk fo sala-singok hapu do'o do ampon, ma tutunu-hohotu nanatunuk. Muse do'do bi'ilopo ndia, nai mamanak ndia, hu kande tutunu-hohotuk soaneu bae hutak, tutunu-hohotuk fo sala-singok hapu do'o do ampon-na, nde bee soona, malalao-malalafuk nanseli, fo imam-ma, baba'en-na nde ndia. 14Imam-ma muse ho'in-na bi'ilopoana ndia daan faaanak, fo losen neu hataholi fo sanga nafa'dan nae ana lea-hai ndia, di'idoo konan-na, limaku'uina konan-na, ma eiku'uina konan-na. 15Basa soona, imam-ma ho'in-na mina setun faaanak, fo ana po'an leo limadale kiin-na dalek neu. 16Basa ndia soona, ana dope limaku'u konan-na leo mina dale neu, fo ana pisin la'i hitu nai Manetualain Lalaa Teman dale. 17Boema, ana lose mina manai liman dale ndia, faaanak neu mamana-mamanak fo nanalose basak nenik daak so, fo nde hataholi, fo sanga nafa'dan nae ana lea-hai ndia, di'idoo konan-na, limaku'uina konan-na, ma eiku'uina konan-na. 18Muse ana po'a mina lenak-ka neu hataholi ndia langan lain. No enok ndia, imam-ma tao feta nalalao-nalalafuk ba'eneu hataholi ndia, nai Manetualain matan.
19Basa soona, imam-ma muse tunu-hotu tutunu-hohotuk fo sala-singok nanafe do'o ampon, fo ela hataholi manggenggeok ndia, lea-hai. Basa ndia soona, muse ana do'do bana soaneu tutunu-hohotu nanatunuk, 20fo ana tunu-hotun sama-sama no tutunu-hohotu nana'ak-ka nai mei tunu-hotuk lain. No enok ndia, imam-ma tao feta nalalao-nalalafuk, ba'eneu hataholi ndia, fo ana lea-hai.
21Metema hataholi ndia nuu taa-hata taak, soona tutunu-hohotuk soaneu bae huta-ka, hataholi ndia bole neni bi'ilopo maneanak ka'da esa, soaneu tutunu-hohotu natutu'duk ba'eneu Manetualain. Fe'ek neme ndia mai boe, muse neni ha'desopu nanasese'dok mina setun kilo esa, soaneu tutunu-hohotu nana'ak, ma mina setun ba'e teluk liter esa. 22Boeo, muse neni manupui kaluaana dua, do kateuana dua: fo esa soaneu tutunu-hohotuk fo sala-singok hapu do'o do ampon, ma esa seluk, soaneu tutunu-hohotu nanatunuk. 23Nai feta tao nalalao-nalalafu aoinak-ka, fai ka falun-na soona, ana muse neni basa tunu-hotuk sila-la, leo imam-ma nai Manetualain Lalaa Teman-na, lelesun-na bafan-na. 24Imam-ma ho'in-na bi'ilopoana no mina setun ndia, fo ana tunu-hotun, da'di leo tutunu-hohotu natutu'duk ba'eneu Manetualain, fo tutunu-hohotuk ndia, imam-ma baba'en-na nde ndia. 25Boema, imam-ma muse do'do bi'ilopoana ndia, fo ana lose daan faaanak neu hataholi fo sanga nafa'dan nae ana lea-hai ndia di'idoo konan-na, limaku'uina konan-na ma eiku'uina konan-na. 26Imam-ma, muse po'a mina faaanak neu lima kiin dale, 27fo ana pisi mina ndia nenik lima konan-na, la'i hitu, nai Manetualain Lalaa Teman dale. 28Boema, muse ana lose bei ela mina faaanak manai liman dale ndia, neu mamanak fo nanalose basak nenik daak-ka, fo nde hataholi fo sanga nafa'dan, nae ana lea-hai ndia, di'idoo konan-na, limaku'uina konan-na, ma eiku'uina konan-na. 29Muse po'a mina lenak-ka neu hataholi ndia langan lain, soaneu feta tao nalalao-nalalafu aoinan-na, nai Manetualain matan.
30Basa soona, imam-ma muse tunu-hotu manupui kaluaana esa do kateuana esa, 31soaneu tutunu-hohotuk fo sala-singok hapu do'o do ampon, ma esa seluk, soaneu tutunu-hohotu nanatunuk-ka, sama-sama no tutunu-hohotu nana'an-na. No enok ndia, imam-ma tao hataholi ndia feta nalalao-nalalafu aoinan-na, nai Manetualain matan.
32Nakanenetek ndia, ana da'di nakanenetek la'eneu feta tao nalalao-nalalafu aoinak-ka, ba'eneu hataholi nuu taa-hata taak fo ana lea-hai neme he'di lou mangalauk-ka mai.
Pulu po'ok-ka la'e uma
33 Manetualain fe Musa no Harun 34nakanenetek la'eneu pulu po'ok manasii dapa-dapak-ka la'e uma. Pake nakanenetek sila-la, nai lelek leoina Israel-la masok leo Kanaan, nusak fo Manetualain fen neu sila. 35Ba'eneu see, fo ana hapu pulu po'ok nai uman dale soona, muse nafa'da dede'ak ndia neu imam-ma. 36Imam-ma beita mai palisak pulu po'ok ndia fa te, muse ana fe paleta, fo daenga kalua heni basa uma ndia oe-isin lala'en-na. Metema ta soona, su'di beek fo nai uma ndia dalek, ala da'di manggenggeok. Boema imam-ma muse mai, 37fo ana palisak ta'du-tana ndia. Metema, hapu kokoto momo'dok do pilabalanggeok, fo meten soona, nono'kabai, ana susi leo papala nanadamak dale neu, 38Imam-ma, muse la'o, fo po'ilotak uma ndia nananggoek faik hitu dalen-na. 39Neu fai ka hitun-na soona, muse ana mai palisak seluk-kana. Metema pulu po'ok ndia, ana sii dapa-dapa soona, 40-41muse ana fe paleta, fo daenga ala ofe heni basa pulu po'ok-ka la'e papala nanadamak-ka batun sila-la, ma pulu po'ok-ka na'a faa-faa no batu manai papala nanadamak-ka dalek ndia. Muse tapa heni pelestel ma batu fo pulu po'ok-ka na'a faa-faa non sila-la, leo mamana manggenggeok esa nai kota deak. 42Boema, muse nggati batu nanakalua henik sila-la, nenik batu beuk. Muse nggati heni, uma ndia papala nanadaman-na lala'en-na, nenik pelestel beuk.
43Metema, nggati basa uma ndia batun-nala, ma lose basa papala nanadaman-na, boema pelestel seluk-kana so, tehu ta'du-tana ndia da'di seluk, 44soona imam-ma muse mai, fo ana palisak seluk uma ndia. Metema, pulu po'ok ndia memak ana sii dapa-dapa, soona uma ndia manggenggeok, 45de muse ofe henin. Muse neni ai-batu-nala, ma palesten-nala, leo mamana manggenggeok-ka nai kota deak. 46Nai lelek, uma ndia bei nananggoek, boema su'di see, ana masok leo dalek neu soona, nangenggeo losa le'do tenak. 47Ba'eneu see, fo ana sungu do na'a-ninu nai uma ndia dalek soona, muse ana safe bua papaken-na.
48Tehu, metema imam-ma mai, de tunga palisan-na nae, ta'du-tana ndia, ta da'di seluk nai lelek uma ndia nanapalestel seluk-ka soona, muse nafa'da nae, uma ndia balisi, nana mopo la'iesak, pulu po'ok ndia so. 49Soaneu tao nalalao-nalalafu uma ndia, de imam-ma muse ho'in-na manupui dua, ai kaiou, tali pilas ma aiana esa na'de hisop ndanak esa. 50Muse do'do manupui esa, nai uledae lain, tehu uledae ndia oemata beuk nai dalek. 51Boema, muse dope ai kaiou, tali pilas-sa ma aiana hisop-pa ma manupui kalaok-ka leo manupui nanado'dok-ka daan dale, ma leo oemata beuk dale neu. Basa ndia soona, muse pisi uma ndia la'i hitu. 52-53Muse po'i manupui kalaok-ka leo mook manai kota deak neu. Feta tao nalalao-nalalafu uma, leondiak, de uma ndia balisi.
54Nakanenetek-kala nde ndia, la'eneu he'di lou mangalauk-ka, 55-56la'eneu lou manakasipopotok-ka, bisu do kokoto fulak, do petaaok ma la'eneu pulu po'ok nai bua papakek do uma. 57Nakanenetek sila-la sosoan-na, soaneu naketu, ade buas ndia, balisi do manggenggeok.
Currently Selected:
IMAMAT 14: twu
Highlight
Copy
Compare
Share
Want to have your highlights saved across all your devices? Sign up or sign in
