IMAMAT 13
13
Nakanenetek la'eneu he'di lou mangalauk-ka.
1 Manetualain fe Musa no Harun nakanenetek-kala nde ia nae: 2Metema, hataholi esa loun-na kasipopoto, do bisu, do loun-na kokoto fulak, fo ana bisa da'di he'di lou mangalauk soona, muse noo hataholi ndia leo imam fo Harun tititi-nonosin neu. 3Imam-ma, muse palisak he'dis manai hataholi ndia loun-na. Metema, buluk manai mamanak ndia da'di fulak, ma he'dis-sa mamanan-na kiki'da leo dalek neu soona, hataholi ndia, hapu he'di lou mangalauk. Imam-ma muse naketu, nae hataholi ndia, manggenggeok. 4Tehu, metema he'dis-sa mamanan-na fulak, tehu ana ta kiki'da leo dalek neu fa, ma buluk manai he'dis-sa mamanan ndia boeo, ta fulak fa soona, muse fe hataholi ndia, ana leo pasi fe'e, faik hitu dalen-na. 5Neu fai ka hitun-na soona, imam-ma muse palisak seluk-kana. Ma metema, tunga imam-ma hahapun-na nae, he'dis ndia bei mana-manan, ma ana ta sii dapa-dapa fa soona, muse fe hataholi ndia, ana leo pasi fe'e seluk, faik hitu dalen-na. 6Neu fai ka hitun-na soona, imam-ma muse palisak seluk-kana, fo metema, he'dis-sa mamanan-na namatuu, ma ana ta sii dapa-dapa fa soona, imam-ma muse nafa'da nae, hataholi ndia, lea-hai so. He'di lou mangalauk ndia, ta hata-hata fa. 7Tehu, metema imam-ma nafa'da basa nae, hataholi ndia lea-hai so, tehu he'din-na bei sii dapa-dapa seluk soona, hataholi ndia, muse neu seluk leo imam-ma neu. 8Imam-ma muse palisak seluk-kana, de metema, memak he'din-na sii dapa-dapa soona, muse nafa'da nae, hataholi ndia, manggenggeok; nana ana hapu he'di lou mangalauk.
9Muse noo hataholi manahapu he'di lou mangalauk ndia, leo imam-ma neu. 10Metema, tunga imam-ma palisan-na nae, nai hataholi ndia loun-na, hapu peta-pae fulak fo ana bisu, boema buluk manai he'dis-sa mamanan ndia, fulak soona, 11hataholi ndia hapu he'di lou mangalauk. Imam-ma muse nafa'da nae, hataholi ndia, manggenggeok. Ta paluu fen leo pasi fe'e fa, nanahu nananitak no mangale'dok so, nae hataholi ndia, manggenggeok. 12Metema, imam-ma nita, nae kokoto fulak sila-la sii dapa-dapa neme langan-na losa ein-na, 13ma tunga imam-ma palisan-na, he'dis ndia, ana sii dapa-dapa leo basa aoinan-na lala'en-na neu, ma loun-na basa-basan fulak soona, imam-ma nafa'da nae, hataholi ndia, lea-hai so. 14Tehu, metema ana da'di bisu soona, imam-ma muse palisak seluk-kana. 15Metema, manada'dik ndia memak bisu soona, imam-ma muse nafa'da nae, hataholi ndia manggenggeok, nanahu ana hapu he'di lou mangalauk. 16Tehu, metema bisu ndia lea-hai, ma ana da'di fulak seluk soona, hataholi ndia, muse neu leo imam-ma neu, 17fo ana palisak seluk-kana. Metema, memak bisu ndia da'di fulak so, soona imam-ma muse nafa'da nae, hataholi ndia, lea-hai so.
18Metema, hataholi esa bisungguman-na lea-hai so, 19tehu peta-pae fulak do kokoto fula pilabalanggeok-ka da'di nai bisu mamanan-na soona, hataholi ndia muse neu leo imam-ma neu, 20fo ana palisak-kana. Metema, kokoto fulak ndia, nono'kabai, ana kiki'da leo dalek neu, ma buluk manai mamanak ndia boeo, ana da'di fulak soona, imam-ma muse nafa'da nae, hataholi ndia, manggenggeok. Bisunggumak ndia, sanga da'di he'di lou mangalauk. 21Tehu, metema tunga imam-ma palisan-na nae, buluk manai mamanak ndia ta da'di fulak fa, ma ana ta kiki'da leo dalek neu fa, te ka'da dulan-na mafok-ka soona, muse fe hataholi ndia leo pasi fe'e faik hitu dalen-na. 22Metema, kokoto fulak ndia, ana sii dapa-dapa soona, imam-ma muse nafa'da nae, hataholi ndia manggenggeok, nanahu ana hapu he'di lou mangalauk. 23Tehu, metema kokoto fulak ndia mana-manan nahele, ma ana ta sii dapa-dapa boen, te ka'da bisu nggumak-ka piin-na nde ndia, da'di imam-ma muse nafa'da nae, hataholi ndia lea-hai so.
24Metema, hataholi esa hapu bisu, hu kande ha'i-a na'an, boema loun manai bisu ndia da'di fulak, do fula pilabalanggeok soona, 25imam-ma muse palisak-kana. Metema, buluk manai mamanak ndia da'di fulak, ma bisu-a kiki'da leo dalek neu, soona he'di lou mangalauk-ka da'di nai bisu ha'i na'ak ndia so, de imam-ma muse nafa'da nae, hataholi ndia, manggenggeok. 26Tehu, metema buluk manai mamanak ndia, ana ta da'di fulak, ma ana ta kiki'da leo dalek neu fa, te ka'da dulan-na mafok-ka, soona muse fe hataholi ndia leo pasi fe'e faik hitu dalen-na. 27Neu fai ka hitun-na soona, imam-ma muse palisak seluk-kana. Metema, kokoto fulak ndia, ana sii dapa-dapa, soona hataholi ndia hapu he'di lou mangalauk, de imam-ma muse nafa'da nae, hataholi ndia, manggenggeok. 28Tehu, metema kokoto fulak ndia mana-manan, ma ana ta sii dapa-dapa fa, te ka'da fulan-na nasalaa soona, he'di lou mangalauk ta ndia fa. Imam-ma muse nafa'da nae, hataholi ndia, lea-hai so, nana fulak ndia, ka'da bisu ha'i na'ak-ka piin-na nde ndia.
29Metema touk esa, do inak esa hapu he'di lou mangalauk nai langan do takudaen-na soona, 30imam-ma muse palisak-kana. Metema, mete he'dis ndia mamanan-na, te ana kiki'da leo dalek neu, ma langadoon do nggolomein manai mamanak ndia, ana da'di kunik, boema ana kono, soona hataholi ndia hapu he'di lou mangalauk, de imam-ma muse nafa'da nae, hataholi ndia, manggenggeok. 31Metema, tunga imam-ma palisan-na, he'dis ndia mamanan-na ta kiki'da leo dalek neu fa, tehu ta hapu langadook do nggolomei nggeo mangadilak nai mamanak ndia fa soona, muse fe hataholi ndia leo pasi fe'ek faik hitu dalen-na. 32Neu fai ka hitun-na soona, imam-ma muse palisak seluk he'dis-sa mamanan-na, ma metema he'dis ndia, ana ta sii dapa-dapa fa, boema ta hapu langadook do nggolomei kunik nai mamanak ndia fa, boema meten soona, ana ta kiki'da leo dalek neu fa, 33soona hataholi ndia, muse nggeuheni langadoon-na, ma nggolomein manai he'dis-sa boboa-kaisun. Boema, muse ana leo pasi fe'e seluk, faik hitu dalen-na. 34Neu fai ka hitun-na soona, imam-ma muse palisak seluk-kana. Metema, he'din-na ta sii dapa-dapa, ma nai he'dis-sa mamanan ndia, meten soona, ana ta kiki'da leo dalek neu fa, soona imam-ma muse nafa'da nae, hataholi ndia, lea-hai so, de muse ana safe bua papaken-na. 35Tehu, metema imam-ma nafa'da basa, nae ana lea-hai so, te se'kona he'dis-sa bei sii dapa-dapa soona, 36imam-ma muse palisak seluk-kana. Metema, he'dis ndia memak ana sii lapa-lapa, de ta paluu imam-ma palisak seluk, ade hataholi ndia langadoon, do nggolomein-na kunik do ta, nana nananita basak no mangale'dok, nae hataholi ndia, manggenggeok. 37Tehu, metema tunga imam-ma hahapun-na, he'dis ndia ta sii dapa-dapa fa, ma langadoon ma nggolomein-na, ana moli no malole nai mamanak ndia, soona he'dis ndia lea-hai so, de imam-ma muse nafa'da nae, hataholi ndia, lea-hai so.
38Metema touk esa, do inak esa hapu kokoto fulak nai loun-na soona, 39imam-ma muse palisak hataholi ndia. Metema, mete kokotok sila-la, te fula keluhabuk soona, ana hapu ka'da he'di kosulouk, de imam-ma muse nafa'da nae, hataholi ndia, lea-hai so.
40-41Metema touk esa, langan-na polik nai dea, do nai uluk soona, polik ndia ta taon-na hataholi ndia, ana da'di manggenggeok fa. 42Tehu, metema peta fula pilabalanggeok-ka, ana da'di nai polik lain soona, hataholi ndia hapu he'di lou mangalauk. 43Imam-ma, muse palisak hataholi ndia, de metema memak hapu peta fula pilabalanggeok soona, 44imam-ma muse nafa'da nae, hataholi ndia, manggenggeok, nanahu ana hapu he'di lou mangalauk nai langan-na.
45Hataholi esa hapu he'di lou mangalauk soona, muse ana pake bua-lo'a saik, ma ana po'ilotak langadoon-na nanggangganu. Muse ana ko'oketu mata-panan, ma ana nggasi-nggasi mesan nae, “Manggenggeok! Manggenggeok!” 46Nai lelek ana bei hapu he'dis ndia, ana da'di hataholi manggenggeok, de muse ana leo nai mamana oofuk-ka deak, fo dook-ka neme hataholi fe'ek-kala mai.
Nakanenetek la'eneu pulu po'ok
47Metema, hapu pulu po'ok nai bua papakek do temak bi'i bulu, do tema abalutu, 48do nai ailouk, do su'di beek, fo taon neme ailouk-ka mai, 49ma pulu po'ok ndia, dulan-na momo'dok, do pilabalanggeok, soona pulu po'ok ndia nde been-na pulu po'ok, fo ana sii dapa-dapa, de muse natu'dun neu imam-ma. 50Imam-ma muse palisak buas ndia, boema ana pe'da fe'en, faik hitu dalen-na. 51Neu fai ka hitun-na soona, muse ana palisak seluk-kana, fo metema pulu po'ok ndia memak ana sii dapa-dapa soona, buas ndia manggenggeok. 52Imam-ma muse hotu heni buas ndia, nanahu pulu po'ok ndia nde been-na pulu po'ok, fo ana sii dapa-dapa, da'di muse hotu henin.
53Tehu, metema tunga imam-ma palisan-na, pulu po'ok ndia ta sii dapa-dapa nai buas ndia fa soona, 54nadenu hataholi, fo daenga ana safe buas ndia, fo pe'da fe'en faik hitu dalen-na seluk. 55Boema, imam-ma muse palisak seluk-kana. Metema, pulu po'ok ndia ta sii dapa-dapa fa, tehu dulan-na bei mana-manan soona, buas ndia bei manggenggeok, de muse hotu henin, leomae pulu po'ok ndia ka'da nai buas ndia uluk, do nai dean-na. 56Tehu, metema tunga imam-ma palisan-na, pulu po'ok ndia namatuu soona, muse sii heni ta'du-tana mamanan manai temak, do ailouk ndia. 57Metema, makabuin-na ana da'di seluk, boema pulu po'ok ndia sii dapa-dapa soona; ma bua lamatuak, muse hotu heni buas ndia. 58Metema, safe basa buas ndia, boema mopo pulu po'ok manai buas ndia dulan-na soona, muse safe seluk buas ndia, besak-ka buas ndia balisi.
59Pulu po'ok fo nai bua-lo'as do nai temak fo tenun neme abalutu mai, do nai temak bi'ibulu, do nai su'di buas bee boe, fo taon neme ailouk do bana louk-ka mai, nakaneneten-na leondiak.
Currently Selected:
IMAMAT 13: twu
Highlight
Copy
Compare
Share
Want to have your highlights saved across all your devices? Sign up or sign in
