KELUARAN 33

Manetualain nadenu leoina Israel-la la'oela Letek Sinai

1 # Kej. 12:7, 26:3, 28:13 Boema Manetualain nafa'da Musa nae, “La'oela mamanak ia fo la'o sama-sama moo leoina fo o moos leme Masir leo nusak fo Au helu basan neu Abraham, Isak ma Yakob boema tititi-nonosin-nala. 2Neukose Au adenu ata nusa so'dak esa hela-nole emi. Neukose Au usiheni leoina Kanaan, Amori, Het, Feris, Hewi ma Yebus. 3Emi la'ok masale leo dae kamasu'i-makabetek ma maisi-mamina meu. Tehu Au ta tunga emi fa, fo ela Au boso tao amopo-amate emi nai eno tala'dak, nana emi nde been-na leoina langa batuk.”

4-6Basa boema, Manetualain nadenu Musa nafa'da leoina Israel-la nae “Emi, leoina langa batuk. Leouni'ka Au tunga o emi, leomae ka'da dodoo faa mesak-kana, tao leo bee o, Au tao amopo-amate la'iesak emi. O'duheni emi lilo-henum lala'en-na, soona neukose Au aketu hata fo Au taon soaneu emi.” Lelek lamanene Manetualain halak-kaka'in ndia boema, dalen-nala he'dis nanseli sama leo hataholi manafalu mamates-sa. Boema ala o'duheni lilo-henun-nala. Da'di, ala la'oela Letek Sinai boema, leoina Israel-la ta pake lilo-henu so'on.

Manetualain Lalaa Teman-na

7Metema leoina Israel-la ofu soona, Musa ho'in-na Lalaa Temak fo napadedeik-kana dodoo faa neme hataholi Israel-la mamana ofun-na mai. Loke Lalaa Temak ndia soona lae, Manetualain Lalaa Teman-na, de see hii noke Manetualain nanoli-nafa'dan soona, neu leo ndia neu. 8Metema Musa neu leo Lalaa Temak ndia neu soona, hataholi Israel-la lapadeik lai sila ofun-na lelesun-na matan-na, fo ala taoafik neu Musa, losa ana masok leo dalek neu. 9Metema Musa nala dalek soona, dii ko'as-sa kona mai, fo nate'e nai Lalaa Temak lelesun-na. Manetualain kokolak no Musa neme ko'as ndia dalek mai. 10Nai lelek hataholi Israel-la lita dii ko'as-sa nai Manetualain Lalaa Teman-na lelesun-na soona, ala fo'a lapadeik fo ala sene-do'ok leme esa-esak ofun-na lelesun-na mai. 11Manetualain kokolak no Musa matak no matak, sama leo hataholi-a kokolak no nonon-na. Basa ndia soona, Musa fali leo mamana ofu neu. Tehu Yosua, Nun anan-na, hataholi muli-soluk esa, fo Musa manatulu-falin-na, nahele neme Lalaa Temak ndia dalek.

Manetualain naheluk, nasulu-nahapa leoinan-na

12Faik esa boema, Musa nafa'da Manetualain nae, “Manetualain, O paleta au hela-nole leoina ia leo nusak fo O heluk-ka. Tehu O ta mafa'da, neukose O madenu see kande mai fo ana tulu-fali au fa. Manetualain, O mafa'da mae O malelak au, ma au andaa o o dalem-ma. 13Metema leondiak soona, ela leo been-na mafa'da O dale tutu'um-ma beek, Manetualain, fo ela au hapu alalau-aoono O, ma au andaa o O dalem-ma tataasesa. Boeo mafandendelek mae O hele basa leoina ia da'di O nuum so.”

14 Manetualain nae, “Neukose Au asulu-ahapa o, ma Au fe o tetu-temak.”

15Musa nataa nae, “Metema Manetualain ta tunga no ami fa soona, boso madenu ami la'oela mamanak ia. 16Tao leo beek fo neukose hataholi ia-la bubuluk lae au ma leoina ia mandaa moo O dalem-ma, metema O ta tulu-fali ami fa. Manetualain mamain-na nai ami tala'daheom, neukose ana tao na ami fe'ek neme leoina fe'ek manai daebafak-ka.”

17 Manetualain nafa'da Musa nae, “Neukose Au tao atetu o nonokem-ma, nana Au alelak o, ma Au daleng-nga nandaa no o.”

18Boema Musa dokodoe nae, “Manetualain, matu'du O ndela-sa'an neu au.”

19 # Rm. 9:15 Manetualain nataa nae, “Neukose Au la'ok tunga emi matam nenik basa Au matua-mademang lala'en-na, boema Au seseik Au na'de malalao-malalafung-nga. Au nde Manetualain, de Au atu'du Au dale maloleng-nga, ma Au dale susue-lalaing neu hataholi fo Au helek-kala. 20Au ta atu'du Au mata-panang neu o fa, nana hataholi ta naso'da fa metema nita Au. 21Hapu pupuku batu nai Au boboang ia; o hapu mapadeik muu ndia. 22Nai lelek Au ndela-sa'an tunga ndia, Au tao o leo pupuku batu ndia lelan esa dalek neu, fo Au tatana ketun nenik Au limang-nga, losa Au la'ok seli. 23Boema neukose Au hela falik Au limang-nga, fo ela o hapu mita Au neme dea mai, tehu neukose O ta mita Au mata-panang fa.”

Currently Selected:

KELUARAN 33: twu

Highlight

Copy

Compare