KELUARAN 34
34
Batu lei beuk dua
(Ul. 10:1-5)
1Basa boema, Manetualain nafa'da Musa nae, “Pa'a ma batu bebelak dua sama leo batu makahuluk-ka. Nai batu ka duak sila-la, neukose Au sulak dede'a-kokolak fo sama no manai batu fo o tao maba'ek sila-la. 2Balahaa fafaik soona, maheheleaom soaneu kae Letek Sinai fo muu mataa Au nai letek ndia poin-na. 3Ta bole hataholi esa boen tunga o, do nai letek ndia boboan bee boe. Boso po'ilotak sapi, bi'ilopo la'a na'u lai letek ndia huun-na.” 4Boema Musa pa'a-na batu bebelak dua seluk, de balahaa fafaianak nanseli boema, ana ho'i nenis de ana kae leo Letek Sinai lain neu, sama leo Manetualain paleta neun.
5Boema Manetualain kona mai nai ko'as esa dalek; napadeik no Musa nai mamanak ndia, de nafa'da na'de malalao-malalafun, fo nde Manetualain. 6#Kel. 20:5-6; Bil. 14:18; Ul. 5:9-10, 7:9-10 Basa boema Manetualain la'ok leo Musa uluk neu, de nafa'da nae, “Au Manetualain, nde been-na Manetualain fo dalen-na henuk no dale malole ma susue-lalaik. Au susue-lalaing sasi kao-kao, Au manalilinekak ma ta haelai namanasa fa. 7Au sue-lai lahele tititi-nonosi lifu-lifuk kala, ma manafe do'o do ampon neu salak ma sala-singok; tehu hataholi masalak-ka, Au ta soi-po'in makandondook neme huhukun-na mai fa, ma Au huku upu-anan losa bobongi ka telu ma ka haa boe, nanahu sila ina-aman, bei-ba'in sala-singon-nala.”
8Hatematak ndia boe, Musa sene-do'ok. 9Nafa'da nae, “Manetualain, metema te'e-te'e au andaa o O dalem-ma soona, au dokodoe, ela leo been-na Manetualain tunga moo ami. Memak leoina ndia langa batuk, tehu fe do'o do ampon neu ami tatao-nono'i mangalaum-ma, ma ami sala-singom, ma sipok-ma ami, da'dileo O ana mesam.”
Hehelu-balataak nanatao nabebeuk
(Kel. 23:14-19; Ul. 7:1-5, 16:1-17)
10 Manetualain nafa'da Musa nae, “Besak ia, Au tao hehelu-balataak o leoina Israel-la. Nai sila matan, neukose Au tao manada'di beuk, fo leoina manai daebafak-ka beita la'iesa fo ala tao hain. Basa leoinak-kala, neukose lita manada'di beuk fo Au taok-kala, nana Au, Manetualain neukose tao hata esa neni bibii-namata'uk nanseli ba'eneu emi. 11Emi muse tunga hoholo-lalanek fo faik ia Au fen neu emi. Neukose Au usiheni leoina Amori, Kanaan, Het, Feris, Hewi ma Yebus nai lelek emi tutulumatak. 12Boso tao hehelu-balataak moo hataholi manai nusak fo emi meu, nana dede'ak ndia ana bisa da'di hihi'ik esa, fo nenenin-na mamates ba'eneu emi. 13#Ul. 16:21 Da'di, boso tao leondiak, tehu tao makalulutuk sila mei tunu-hotun-nala, ma lo'oheni sila sosongo-tatangon Asyera, diin-nala.
14Boso sene-do'ok neu lamatua fe'ek, nana Au Manetualain, nde been-na Manetualain fo ta nau nakasasamak-kana no su'di beek-ka fa. 15Boso tao hehelu-balataak moo nusak ndia leoinan-nala, nana nai lelek ala sene-do'ok fo fe tutunu-hohotuk neu sila-lamatuan-nala soona, neukose ala leleko emi, fo emi tunga. 16Metema emi anam-mala sao ina nusa dea soona, neukose inak sila-la fufu'di-oo'dok-kasa soaneu ala la'oela Au fo ala sene-do'ok neu sila lamatuan-nala.
17 #
Kel. 20:4; Im. 19:4; Ul. 5:8, 27:15 Boso tao lamatua fe'ek neme liti mai, fo sene-do'ok neun.
18 #
Kel. 12:14-20; Im. 23:6-8; Bil. 28:16-25 Tao feta Loti Fo Ta Pake Laluteik fa. Sama leo Au paleta basan neu emi so, de emi muse mi'a loti fo ta pake laluteik, faik hitu dalen-na nai bulak Abib dale, nanahu nai bulak ndia dalen-na, emi la'oela Masir.
19 #
Kel. 13:2
Basa anatouk uluk-kala ma bana maneanak fo nanabongi makasososak-kala nde been-na, Au nuung, 20#Kel. 13:13 tehu emi muse soi-ma keledei ana fo nanabongi makasososak-ka nenik tunu-hotu bi'ilopoana esa da'dileo ngganggatin-na. Metema emi ta nau nggati fan soona, emi muse po'de mala'di keledei ana ndia lesuha'in-na. Emi muse soi-ma emi anatou ulum-mala.
Hataholi esa boen ta bole mai leo Au mai fa, metema ta neni tutunu-hohotuk fa.
21 #
Kel. 20:9-10, 23:12, 31:14-15, 35:2; Im. 23:3; Ul. 5:13-14 Hapu faik nee soaneu naue-nale'di; boso maue-male'di nai faik-ka hitun-na, leomae nai fai sele-nggalik do fai ketu-koluk.
22 #
Im. 23:15-21, 39-43; Bil. 28:26-31 Tao Feta Keketu-kokoluk nai lelek emi mulai ketu-kolu gandum-ma buna-boan makasososan-na. Boeo tao Feta Lalaa Akidook-ka nai basa teuk-ka, nai lelek emi ketu-seu ai boak-kala.
23Basa touk-kala muse mai sene-do'ok neu Au, Manetualain Israel Manetualain-na, la'i telu nai teuk esa dalen-na. 24Metema Au usiheni leoinak-kala leme emi matam, ma Au tao amaloa emi nusam-ma soona, ta hapu hataholi esa boen napalani natona na emi nusam-ma, nai lelek emi meu tao Feta Loti Fo Ta Pake Laluteik, Feta Keketu-kokoluk ma Feta Lalaa Akidook-ka.
25 #
Kel. 12:10
Nai lelek emi tunu-hotu banan-nanado'dok soona, boso tunu-hotu hata-hata fo taon pake laluteik. Bana-manu fo do'don soaneu feta Paskah, emi muse mi'aheni paan-na le'odaek ndia boe; ta bole ela losa balahaa fafaik fa.
26 #
Ul. 14:21, 26:2 Tunga teuk, emi muse meni emi daem-ma buna-boa makasososan-na leo emi Manetualain fo emi Manetualain-na Uman neu.
Ta bole nasu bi'ilopoana do bi'ihiiana paan-na, nenik inan su'u oen-na fa.”
27 Manetualain nafa'da Musa nae, “Sulak-ma dede'a-kokolak sila-la, nanahu no dede'a-kokolak sila-la de Au tao hehelu-balataak no o ma no leoina Israel-la.” 28Musa leo no Manetualain nai ndia, lele'dok 40, le'odaek 40, ma nai lelek ndia, ta na'a-ninu fa. Hehelu-balataak ndia isin-na nde, Manetualain Paletak-ka 10n-na, fo nanasulak nai batu bebelak ndia lain.
Musa kona neme Letek Sinai lain mai
29 #
2Kor. 3:7-16
Lelek Musa kona neme Letek Sinai lain mai, te neni Paleta ka Sanahuluk sila-la, mata-panan nandela-nasa'a nanahu ana kokolak no Manetualain so, tehu Musa ta bubuluk nae mata-panan nandela-nasa'a fa. 30Harun no basa laun-na lala'en-na lita Musa mata-panan nandela-nasa'a, de ta lapalani deka fan. 31Tehu Musa naloos, boema Harun ma basa sila mauli-malangan-nala mai deka loon, de Musa kokolak nos. 32Basa ndia boema, basa laun Israel-la lala'en-na lakabubua de okofefeo-lan, boema Musa nanduku-nalosak neu sila basa-basan, basa hoholo-lalanek fo Manetualain fen neme Letek Sinai lain. 33Musa kokolak basa nos boema, ana potiketu mata-panan nenik temak. 34Metema Musa masok leo Manetualain Lalaa Teman dale neu fo ana kokolak no Manetualain soona, ana bukaheni temak ndia losa ana kalua. Nanduku-nalosak basa neu leoina Israel-la, basa Manetualain hala hehelun-na, 35ma lita Musa mata-panan nandela-nasa'a. Boema ana potiketu mata-panan seluk losa fai manamaik-ka, metema ana kokolak seluk no Manetualain.
Currently Selected:
KELUARAN 34: twu
Highlight
Copy
Compare
Share
Want to have your highlights saved across all your devices? Sign up or sign in
