KELUARAN 25

Tunu-hotuk soaneu Manetualain Lalaa Teman-na

(Kel. 35:4-9)

1 Manetualain nafa'da Musa nae, 2“Madenu hataholi Israel-la leni fe Au tunu-hotuk. See dalen-na nakababale soona, muse neni tunu-hotuk 3nalupa: lilopilas, lilofulak ma liti; 4tema aba lutu, tema kabelik momo'dok, tema kabelik pilabalanggeok ma tema kabelik pilas, temak fo taon neme bi'ihii bulu mai, 5bi'ilopo mane-a loun-na fo lose pilas neun, banalou mangana'uk, ma ai akasia; 6mina soaneu banuk-ka, bumbu-bumbu soaneu da'di mina feta, ma soaneu boomeni kaboomenik, 7batu poemata mata-matak-kala soaneu balias neu efod ma Imam Matuaina babaa fanan-na. 8Madenu leoina ndia, fo ana tao fe Au Lalaa Temak esa, fo ela Au hapu leo nai sila tala'da. 9Ala muse tao Lalaa Temak ndia no oe-isin, tunga Au dale tutu'ung fo neukose Au atu'dun neu emi.”

Peti Hehelu-balataak-ka

(Kel. 37:1-9)

10“Taom-ma peti esa neme ai akasia mai, nalun-na senti 110, loan-na ma deman-na senti neehulu nee. 11Makadiditak dea-dalen nenik lilopilas isik ma tao su'udoon-na neme lilopilas-sa mai. 12Taom-ma suek lilopilas haa, soaneu ai ndondolon-na, fo kakain neu ein haas, ma boboan esa soona, tao suek 2 neu. 13Tao ai ndondolon-na neme ai akasia mai, fo makadiditak-kana nenik lilopilas boe, 14boema lo'do ai ndondolok ndia leo suek manai peti ndia boboan haas dalek neu. 15Ai ndondolok ndia muse nahele neme suek sila-la dalek, ta bole ho'i heni fas. 16Boema nai peti ndia dalek, o muse pe'da batu ka duak fo nai bee, Au sulak Au paletang-nga, fo neukose Au fen leo o neu.

17 # Ibr. 9:5 Tao peti ndia tatanan-na neme lilopilas isik-ka mai, nalun-na senti satun esa sanahulu, ma loan-na senti neehulu nee. 18Taom-ma kerub dua neme lilopilas nanatutuk-ka mai, 19fo peti ndia pe'dan esa soona tao esa neu. Kerub ka duak sila-la, muse fes da'di esa loo mei-a tatatanan-na, 20ma fe duas lasasalematak, fo li'dan-nala betubala nai mei ndia lain. 21Tao batu ka duak-kala leo peti ndia dalek neu, fo tatanan. 22Nai mamanak ndia nde neukose Au atongo o o, ma neme tatanan lain mai fo nai kerub ka duak sila-la tala'da, neukose Au fe Au hoholo-lalaneng neu leoina Israel-la tunga o.”

Mei soaneu loti tunu-hotuk

(Kel. 37:10-16)

23“Taom-ma mei esa neme ai akasia mai, nalun-na senti faluhulu falu, loan-na senti haahulu haa, ma deman-na senti 66. 24Makadiditak-kana nenik lilopilas isik, ma tao lilopilas okofefeok su'udoon-na. 25Taom-ma mei ndia su'udoon-na, loloan-na senti 7,5 ma tao too lilopilas okofefeok su'un ndia. 26Taom-ma suek haa neme lilopilas-sa mai, fo taos leu ein-na bu'un haas su'un-na. 27Suek sila-la soaneu lakataka ai ndondolon-nala, fo ela bisa ndolo mei ndia. 28Ai ndondolok sila-la muse nanataok neme ai akasia mai, ma nananakadiditak nenik lilopilas. 29Tao pingak, mango tee, kete ma mango soaneu tunu-hotu angol. Mei ndia lou-laan lala'en-na, muse nanataok neme lilopilas isik-ka mai. 30#Im. 24:5-8 Muse pe'da mei ndia neu Peti Hehelu-balataak-ka matan-na, ma muse sadia loti tunu-hotuk tataasesa nai mei ndia lain.”

Banu eik-ka

(Kel. 37:17-24)

31Tao banu eik neme lilopilas isik-ka mai. Muse tao buin-na ma hoho'un-na neme lilopilas nanatutuk-ka mai; bunga nanabalias-sala, boema pakon-nala no napan-nala muse da'di esa loo banu eik-ka no hoho'un-na. 32Muse tao ba'ek nee neu hohoun ndia; fo boboak esa soona ba'ek telu. 33Nai ba'en-nala esa-esak, muse balias-sana nenik bunga badam telu loo pakon-na. 34Muse balias hoho'un-na nenik bunga badam haa loo pakon ma napan-nala. 35Nai ndanak sila-la pasan esa dae soona, muse tao pakok esa neun. 36Muse tao banu eik ndia no pakon ma ndanan-nala lala'en-na neme lilopilas isik nanatutuk bia matua esa. 37Taom-ma banuk hitu neu banu eik ndia, soona pe'da matalololen fo daenga pilan-na leo uluk neu. 38Taom-ma buas esa neme lilopilas isik-ka mai boe, soaneu tao balisi nenik banuk-ka tetelun-na ma pinga anan-na. 39Tao banu eik ndia no basa hata-heton lala'en-na nenik lilopilas isik kilo teluhulu lima. 40#Hat. 7:44; Ibr. 8:5 Mafandendelek, fo tao banu eik ndia tunga natutu'duk fo Au atu'dun neu o neme letek ia lain.

Currently Selected:

KELUARAN 25: twu

Highlight

Copy

Compare