Va le Roma 5
5
A mihanzu ya ku hlayelwa kululama.
1Hikwalaho na hi hlayelwe kululama hi kukholwa, hi na ni kurula ni Nungungulu hi Hosi ya hina Jesu Kristu; Isa. 32:17; Joh. 16:33; Efe. 2:14
2Loyi hi kumileko ha yena a kuenghena ka hina tipswalweni leti hi nga ka tona; hi maha migiyo ya kutsaka na hi kari hi langutela a kungangamela ka Nungungulu. Joh. 10:9; 14:8; 1 Kor. 15:1; Efe. 3:12
3Na ku nga hi lezi ntsena, kanilezi kambe hi na ni zigingi kukaratekeni ka hina, na hi tiva lezaku a kukarateka ku vanga kuhonisela; Mat. 5:11; Fil. 2:17
4ni kuhonisela ku vanga kutiya minzhingweni, ni kutiya minzhingweni ku vanga kutsumba.
5A kutsumba a ku wisi tingana, hakuva a liranzo la Nungungulu li chelilwe timbilwini ta hina hi Moya wa ku Basa lowu hi nyikilweko wona. Fil. 1:20; 2 Kor. 1:22; Gal. 4:6; Efe. 1:13
6Hakuva na ha hi ni gome, Kristu i lo fela hi xikhati xi faneleko lava va nga chaviko Nungungulu.
7Hakuva za tsanza ka munhu ku fela loyi a lulamileko, kutani ku ngava kona munhu loyi a tiyako ku fela munhu nene.
8Kanilezi Nungungulu wa kombisa a kuhiranza kakwe hi lexi, lezaku na ha hi vaonhi Kristu i lo hi fela. Joh. 15:13; 1 Ped. 3:18
9Nguvunguvu lezi makunu hi hlayelweko kululama hi kota ya nkhata wakwe, hi ta poniswa zangeni hi yena. 1 Tes. 1:10; 1 Joh. 1:7
10Hakuva loku hi tlhanganyisilwe na Nungungulu hi kota ya kufa ka Nʼwana wakwe, na hi wa ha hi valala, nguvunguvu lezi makunu hi tlhanganyisilweko hi ta hanyiswa hi wutomi gakwe. Joh. 14:19; 2 Kor. 5:13
11Na ku nga hi lezo ntsena, kanilezi kambe ha tsaka ka Nungungulu hi kota ya Hosi ya hina Jesu Kristu, loyi hi kumileko makunu a kutlhanganyiswa ha yena.
A kutlhatlheka kuonheni.
12Hikwalaho khwatsi hi lezi a kuonha ku nga enghena misaveni hi kota ya munhu munwe, ni kufa ku tile hi kota ya kuonha; hizalezo a kufa ku lo thapela vanhu vontlhe, hakuva vontlhe va onhile. Gen. 3:6; 1 Kor. 15:21
13Hakuva kuonha ku wa hi kona misaveni na wu nga seva kona nayo, kanilezi vanhu a va hlayelwi kuonha loku nayo wu hi hava. 1 Joh. 3:4
14Ahembalokoke, kusukela ka Adamu ku kala ku chikela ka Mosi, a kufa ku lo fuma ni le hehla ka vona lava va nga onhangiko khwatsi hi kuhambuka ka Adamu, loyi a nga wa hi mufananiso wa loyi a nga wa hata.
15Kanilezi a xinyikiwo xa wuxinji a xi fanani ni xihambuko. Hakuva loku a vanyingi vafile hi kota ya xihambuko xa munhu munwe, hikwalaho ti anzisilwe nguvunguvu ka vanyingi a tipswalo ta Nungungulu, ni xinyikiwo xa tipswalo xi tileko hi munhu munwe, yena Jesu Kristu. Isa. 53:11; Mat. 20:28
16Kambe a xinyikiwo a xi fanani ni lexi xi nga huma kuonheni ka loye wa munwe. Hakuva a kulamula ku tile hi kota ya xionho xinwe ku yisa kukonekeni, kanilezi a xinyikiwo xa wuxinji xi tile hi kota ya zihambuko zinyingi, xi yisa kululameni.
17Hakuva loku hi xihambuko xa munhu munwe a kufa ku fumile ha yena loye wa munwe; nguvunguvu vona lava va amukelako a wunyingi ga tipswalo ni xinyikiwo xa kululama va ta fuma wutomini hi kota ya munwe, yena Jesu Kristu.
18Hikwalaho khwatsi hi lezi a xihambuko xinwe xi nga humesa kulamula hehla ka vanhu vontlhe, hizalezo ku kona ka vanhu vontlhe a kuhlayelwa kululama loku ku yisako wutomini hi kota ya ntiro munwe wa kululama. Joh. 12:32; Maheb. 2:9
19Hakuva khwatsi hi lezi hi kungaingisi ka munhu munwe a vanyingi va lo mahiwa vaonhi, hizalezo kambe hi kuingisa ka munwe a vanyingi va ta mahiwa volulama.
20Kambe a nayo wu lota lezaku kasi a xihambuko xi anza; kanilezi laha kuonha ku nga anza, a tipswalo ti lo anza nguvunguvu; Lu. 7:47; Joh. 15:22; Xip. 3:20; 1 Tim. 1:14
21lezaku kota lezi a kuonha ku nga fuma kufeni, lezo kambe a tipswalo ti fela ku fuma hi kululama ku yisako wutomini ga pinzukelwa ha Jesu Kristu a Hosi ya hina.
Currently Selected:
Va le Roma 5: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
