Mitsengo 5
5
A milayo ya xungetano ni xiluse.
1Jehova i lo wulawula ka Mosi, aku:
2Laya a vanana ya ka Israeli lezaku va humesa lava va nga ni hlokonho, ni lava va nga ni ntungu wo huma wubovu, hambu ni lava va nyenyezileko hi kota ya zirumbi. Levi 13:46; 15:2; 21:1
3Mu humesa vavanuna ni vavasati vakunghahi lomu wugovelweni, va nga nyenyezisa wugovelo gabye legi nzi tshamako xikari ka gona.
4Zinghaho a vanana va ka Israeli va lo va humesa lomu wugovelweni, khwatsi hi lezi Jehova a leleteleko Mosi; a vanana va ka Israeli va lo maha lezo.
5Jehova i lo wulawula ka Mosi, aku:
6Byela a vanana va ka Israeli, uku: Loku munhu a gohela muakelane wakwe, kani ngwanuna, hambu wasati, i gohele Jehova; ni loye munhu i tava ni nanzu wa lezo zilo.
7Yena i ta wulela xionho xakwe, a tlhelisela a zilo zontlhe lezi a zi kumileko hi kubiha, a zi engetela hi xipanze xa wuntlhanu, a nyika loyi a mu goheleko.
8Kanilezi loyi a gohelweko, loku a vumala a xaka go amukela a nzhiho wa nanzu, wu ta nyikelwa ka Jehova na wu lumba mupristi, a handle ka hamba ya nzhiho, leyi va ta nga maha a muphahlelo wa nzhiho ha yona.
9Zontlhe zinyikiwo za kubasa, lezi a vanana va ka Israeli va zi nehako ka mupristi, zi tava zakwe. Ekso. 29:28; Levi 10:13
10A zilo lezi zi basileko za munwe ni munwani zi tava za yena; zontlhe lezi zi nehiwako ka mupristi, zi tava zakwe.
11Jehova i lo engeta a wulawula ka Mosi, aku:
12Byela a vanana va ka Israeli, uku kabye: Loku a wasati a hunguka, a gohela nuna wakwe,
13hi ku etlela ni munwani wanuna, a nuna wakwe a nga zi tivi: kutani ku onha le xihundleni laho ku nga hava vakustumunyu ku maha wumboni, ni loku a nga khomiwangi kuonheni kakwe;
14loku ku enghena a moya wa xiluse mbilwini ya nuna wakwe, a sangula ku lusa hi sati wakwe loyi a mahileko zo biha; kutani loku a moya wa xiluse wu enghena kakwe, a lusa hi sati wakwe, hambu loku a nga mahangi za kubiha,
15zonake a munhu loye i ta yisa a sati wakwe ka mupristi, a neha ni munyikelo wa sati, wu nga xipanze xa wukhume xa efa ya mapa ya sevada, kanilezi a nga cheli mafura ka wona, hambu ni muri wo nuhela, hakuva munyikelo wa xiluse, munyikelo wa xialakanyiso xa ku alakanya zionho.
16A mupristi i ta tshineta wasati, a ta yima mahlweni ka Jehova.
17A mupristi i ta teka mati ya kubasa lomu mbiteni ya wumba, a teka ni tsutsungwani lowu wu nga lahasi lomu nzeni ka tabemakeli, a wu chela lomu ka mati.
18Zonake mupristi i ta hendleleta wasati mahlweni ka Jehova, a funungula a hloko ya wasati, a veka mandleni ya wasati a munyikelo wa xialakanyiso, lowu wu nga munyikelo wa xiluse; kanilezi mupristi i ta khoma canjeni gakwe a mati yo bava, lawa ma vangako nzhukano.
19A mupristi i ta hlambanyisa wasati, aku ka yena: Loku u nga enelangi ni wanuna, ni loku u nga hungukangi u maha lezi zi bihileko ka nuna wa wena, u nga dzuki uzwa kubayisa hi laya mati ya kubava ni ya nzhukano.
20Kanilezi loku u hambukile u maha kubiha ni munwani wanuna, u etlela zinwe naye ahandle ka nuna wa wena,
21(zonake mupristi i ta hlambanyisa wasati hi xifungo xa hombe, aku ka yena:) Loku ziva tano, Jehova a ku nyikele nzhukanweni ni kunyenyezeni lomu tikweni ga nwina, a wunisa mahangaswa ya wena, ni ku vimbisa a rumbu ga wena,
22ni mati lawa ma vangako nzhukano ma ta enghena lomu rumbyini ga wena, ma vimbisa a rumbu ga wena, ni ku wunisa a mahangaswa ya wena. A wasati i taku ngalo: A zive nghaho, a zive nghaho!
23A mupristi i ta tsala a tinzhukano leti lomu mapilweni, zonake a hlanguta hi mati yo bava,
24a nwisa wasati a mati yo bava ma vangako nzhukano, a mati lawo ya kubava ma ta enghena lomu nzeni kakwe ma mu vangela mhango.
25Zonake a mupristi i ta teka a munyikelo wa xiluse lowu wu nga mandleni ya wasati, a wu nziwitela mahlweni ka Jehova, a wu yisa laha alatini;
26ni mupristi i ta nusa a canja ga mapa ya munyikelo wa xialakanyiso a hisa laha alatini, zonake a nwisa wasati a mati.
27Makunu loku a mu nwisile mati lawo, loku yena a ti nyenyezisile, ni loku yena a gohele a nuna wakwe, a mati lawo ma vangako nzhukano ma ta enghena lomu, nzeni kakwe ma mu vangela mhango; ni rumbu gakwe gi ta vimba, a mahangaswa yakwe ma ta wuna, ni wasati i tava nzhukano lomu tikweni gabye.
28Kanilezi loku wasati a nga ti nyenyezisangi, loku a hlazekile, cima a nga tazwa kubayisa ka nchumu, i ta engeta a kuma mbeleko.
29Lowu hi nayo wa xiluse, wo laya wasati a hambukileko a maha wubhayi na hi ni nuna;
30hambu loku a moya wa xiluse wu enghenile mbilwini ya wanuna, a maha wukhuxu hi sati wakwe, yena i ta hendleleta sati wakwe mahlweni ka Jehova, zonake mupristi i ta mu hlola hi nayo lowu wontihe.
31Ni wanuna a nga ta kuva ni nanzu, kanilezi a wasati i ta rwala a nanzu wakwe.
Currently Selected:
Mitsengo 5: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
