Mitsengo 4
4
1Jehova i lo wulawula ka Mosi na Aroni, aku:
2Hlayani a vana va Kohati a xikari ka vanana va vaLevi, hi tinyangwa tabye hi tiyindlu ta vararu vabye,
3lava va nga ni 30 wa malembe ni kuya mahlweni, kala ka lava va nga 50 wa malembe, vontlhe va faneleko ku enghena ntirweni wa tenda ga mutlhangano. Mitse. 8:24
4A ntiro wa vanana va ka Kohati, hi lomu tendeni ga mutlhangano, va hlayisa a zibya zi basileko.
5Loku a wugovelo gi andlamuka, Aroni ni vana vakwe va ta chisa a xisirelo, va fenengeta ha xona a arke ga wumboni,
6ni ku fenengeta hehla ka gona hi nkumba wa mabhebhe ya macalu ni ku andlala hehla ka wona hi nguwo ya wukuxe, va enghenisa ni mipingo.
7Ni ku fenengeta a meza ya zibaba za xikombiso hi nguwo ya wukuxe, va veka hehla ka yona a mingelo, ni minzheko, ni magombe, ni maguwana yo nwatsekela ha wona, ni zibaba za masiku ni masiku zi ta vekiwa hehla ka yona. Ekso. 25:29
8Zonake va ta fenengeta lezo zilo hi nguwo yo pswhuka; ni nguwo leyo va ta yi fenengeta hi nkumba wa mabhebhe ya macalu, zonake va ta enghenisa a mipingo ya kona.
9Va ta teka a nguwo ya wukuxe, va fenengeta ha yona a meza ya tikandiya, ni tikandiya ta kona, ni zitimo za tona, ni zibya za khuma, ni zibya zontlhe za mafura lezi va tirako ha zona a ntirweni wa kona.
10Va ta yi veka zinwe ni zontlhe zibya za yona lomu ka nkumba wa mabhebhe ya macalu, zonake va yi veka laha ka mpingo.
11Va ta fenengeta a ganzelo ga nzalama hi nguwo ya wukuxe; va fenengeta kambe hi nkumba wa mabhebhe ya macalu, zonake va enghenisa mipingo ka gona.
12Va ta teka a zibya zontlhe za ntiro, lezi va tirako ha zona a mitiro ya wutshamu ga kubasa va zi veka lomu ka nguwo ya wukuxe, va engeta va fenengeta hi nkumba wa mabhebhe ya macalu, zonake va zi veka laha ka mpingo.
13Va ta susa a khuma lomu ganzelweni, zonake va gi fenengeta hi nguwo yo zirila;
14le hehla ka gona va ta veka zontlhe zibya lezi va tirako ha zona a ntiro wa ganzelo; a zimbitana za libani, ni mafoloko, ni mafoxola, ni, minzheko, zontlhe zibya za ntiro wa alati, va ta zi fenengeta hi nkumba wa mabhebhe ya macalu, zonake va ta enghenisa mipingo ka gona.
15Loku Aroni ni vana vakwe va mbhetile ku fenengeta a wutshamu ga kubasa ni zontlhe zibya za kona, a wugovelo gi ta andlamuka; zonake a vanana va ka Kohati va ta ta rwala. Kanilezi va nga ta zi khumba, hakuva zilo zi basileko, va ngafa. Lowu wu tava ntiro wa vanana va ka Kohati, a ku rwala a zibya za tenda ga mutlhangano.
16A ntiro wa Eleazari a nʼwana wa mupristi Aroni hi ku hlayisa mafura ya tikandiya, ni libani lo nuhela, ni muphahlo wa mapa siku ni siku, ni mafura yo tola; i ta hlayisa ni tabemakeli gontlhe, ni zontlhe zi nga ka gona, a wutshamu go basa ni zibya za gona.
17Jehova i lo wulawula ka Mosi na Aroni, aku:
18Chelani kota lezaku a nyangwa ya tiyindlu ta ka Kohati yi nga dzuki yi tsemiwa xikari ka vaLevi.
19Kanilezi lezi mu ta nga va mahela hi lezaku va hanya, va ngafi, a xikhati lexo va tshinelako ka wutshamu ga kubasa, mu ta maha lezi: Aroni ni vana vakwe va ta yimisa munwe ni munwani ka ntiro wakwe ni ka nzhwalo wakwe.
20Kanilezi va nga engheni va cuwuka a zilo lezi zi basileko, hambu ni kutsongwani, va ngafa. 1 Sam. 6:19
21Jehova i lo wulawula kambe ka Mosi, aku;
22Hlaya a vanana va ka Gerxoni, hi tiyindlu ta vararu vabye, ni tinyangwa tabye.
23U ta va hlaya kusukela ka lava va nga ni 30 wa malembe ni kuya mahlweni, kala ka lava va nga 50 wa malembe a wukale; vontlhe va faneleko ku enghena ntirweni wa tenda ga mutlhangano.
24A nitro wa tinyangwa ta ka Gerxoni hi ku tira ni ku rwala, hi lowu:
25va ta rwala a tinguwo ta tabemakeli, ni tenda ga mutlhangano ni zifulelo za kona, ni zifulelo za mabhebhe ya macalu, lezi zi tlhatekwako hi le hehla, ni xisirelo xa laha nyangweni ka tenda ga mutlhangano;
26ni tinguwo ta hubye, ni xisirelo xa nyangwa ya hubye yi nga kusuhani ka tabemakeli ni alati ka matlhelo wontihe; ni tingoti ta kona ni zibya zontlhe za mitiro ya kona; va ta tira yontlhe mitiro ya kona.
27A mitiro yontlhe ya vanana va ka Gerxoni yi ta rumiwa hi Aroni ni vana vakwe, hambu lezi va ta nga rwala, hambu ni lezi va ta nga tira: mu ta va yimisa a ku hlayisa zontlhe lezi va ta nga rwala.
28Lowu wu tava ntiro wa tinyangwa ta va ka Gerxoni, a tendeni ga mutlhangano ni lezi zi yimiselweko vona; va ta tira na va hi lahasi ka Itamari a nʼwana wa mupristi Aroni.
29U ta hlaya a vanana va Merari hi tinyangwa tabye, ni tiyindlu ta vararu vabye.
30U ta va hlaya kusukela ka lava va nga ni 30 wa malembe ni kuya mahlweni, kala ka lava va nga ni 50 wa malembe a wukale; vontlhe va faneleko ku enghena ntirweni wa tenda ga mutlhangano.
31Hi lezi va ta nga zi rwala ntirweni wabye lomu tendeni ga mutlhangano: hi mapulango ya tabemakeli, ni tivalelo ta kona, ni timhanze ta kona, ni zikhato za kona;
32ni timhanze ta hubye ya matlhelo wontihe, ni zikhato za tona, ni zikhongwani, ni tingoti, ni zilo zontlhe zi longiselweko a ntiro wa kona; mu ta zi veka mandleni yabye, mu hlaya mavito ya zilo lezi va faneleko ku zi hlayisa ni ku zi rwala.
33Lowu wu tava ntiro wa tinyangwa ta vanana va ka Merari; a ntiro wabye wontihe tendeni ga mutlhangano, wu ta rangelwa hi Itamari a nʼwana wa mupristi Aroni.
34Zonake Mosi na Aroni ni tihosana ta ntlhangano, va lo hlaya a vanana va ka Kohati hi tinyangwa tabye, ni tiyindlu ta vararu vabye.
35Va lo sangula hi lava va nga ni 30 wa malembe ni kuya mahlweni, kala ka lava va nga ni 50 wa malembe a wukale; vontlhe lava va faneleko a ntiro wa tenda ga mutlhangano.
36A tsengo wabye hi tinyangwa tabye va wa hi 2,750.
37Hi valavo va hlayilweko va tinyangwa ta ka Kohati; vontlhe lava va nga tira a ntiro wa tenda ga mutlhangano, na va hi lava va hlayilweko hi Mosi na Aroni, hi kuleletela ka Jehova hi canja ga Mosi.
38A tsengo wa vanana va ka Gerxoni hi tinyangwa tabye, ni tiyindlu ta vararu vabye,
39kusukela ka lava va nga ni 30 wa malembe ni kuya mahlweni, kala ka lava va nga ni 50 wa malembe a wukale; vontlhe lava va faneleko a ntiro wa tenda ga mutlhangano,
40a tsengo wabye hi tinyangwa tabye, ni tiyindlu ta vararu vabye, va wa hi 2,630.
41Hi valavo va hlayilweko va tinyangwa ta vanana va ka Gerxoni, vontlhe lava va zi kotako ku tira ntiro wa tenda ga mutlhangano, na va hi lava va hlayilweko hi Mosi na Aroni, hi kuleletela ka Jehova.
42A tsengo wa vanana va ka Merari hi tinyangwa tabye, ni tiyindlu ta vararu vabye,
43kusukela ka lava va nga ni 30 wa malembe ni kuya mahlweni, kala ka lava va nga ni 50 wa malembe a wukale; vontlhe lava va faneleko a ntiro wa tenda ga mutlhangano.
44A tsengo wabye hi tinyangwa tabye, va wa hi 3,200.
45Hi valava va hlayilweko va tiyindlu ta ka Merari, lava Mosi na Aroni va va hlayileko hi kuleletela ka Jehova ha Mosi.
46A tsengo wa vontlhe vaLevi, lava Mosi na Aroni ni tihosana ta ka Israeli va va hlayileko hi tinyangwa tabye, ni tiyindlu ta vararu vabye,
47kusukela ka lava va nga ni 30 wa malembe ni kuya mahlweni, kala ka lava va nga ni 50 wa malembe a wukale, na va hi lava vontlhe va zi kotako ku tira a ntiro, ni lava va rwalako a tenda ga mutlhangano.
48Lava va hlayilweko xikari kabye va wa hi 8,580.
49Vona va hlayilwe hi Mosi, khwatsi hi kuleletela ka Jehova, loyi ni loyi i lo nyikwa a ntiro wakwe, kutani a nzhwalo wakwe; va lo hlayiwa kota kuleletela ka Jehova ka Mosi.
Currently Selected:
Mitsengo 4: TSC72
Highlight
Copy
Compare
Share
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.
