Mateu 26
26
A khungo go daya Jesu.
1Laha Jesu na a mbhetile ku wulawula tontlhe leti timhaka, i te ngalo ka vapizani vakwe:
2Ma zi tiva lezaku loku ku hunzile masiku mambiri, a pasika yi tava kona, zonake a Nʼwana wa munhu i ta nyikelwa a kuva a belelwa. Mar. 14:1; Lu. 22:1; Joh. 13:1
3A ka xikhati lexo a vapristi va hombe ni masingalakati ya vanhu va lo tsombana lomu hubyeni ya mupristi wa hombe, a tibyako Kayafasi. Tis. 2:2; Joh. 11:47
4Va lo xuxa kungo kasi va fela ku khoma Jesu hi kukunguha, va mu daya;
5kanilezi vaku ngalo: Ngha zi nga mahiwi laha mubuzweni, ku nga vuka vilinganya xikari ka vanhu.
Jesu a totiwa le Betania.
6Makunu laha Jesu a nga hi le Betania, le ndlwini ya Simoni loyi wa hlokonho, Mar. 14:3; Joh. 11:1, 2
7ku lota kakwe a wasati na a hi ni xikhudzana xa alabasteri xi nga hi ni mafura ya tsengo wa hombe, a ta ma chulula hlokweni yakwe laha a nga tshamile kugeni.
8Kanilezi laha vapizani na va zi wonile, va lo tsanwa, vaku: Ma xakelelwa yini ke? Joh. 12:4
9A mafura laya ngha ma xavisilwe hi mali yo tala, yi nyikiwa zisiwana.
10Jesu na a zi tivile i te ngalo ka vona: Mu mu karatela yini a wasati loyi ke? I nzi mahele a ntiro wo saseka.
11A zisiwana zi na nwina xikhati xontlhe, kanilezi a mu na mina xikhati xontlhe. Deut. 15:11; Joh. 12:8; 13:33
12Hakuva hi ku chulula laya mafura mirini wa mina, i zi mahele kulahliwa ka mina.
13Hizinene nzi ngalo ka nwina: Kani hi kwihi laha misaveni laha a ivangeli leyi yi ta nga kanetwa kona, ku ta kanetwa ni lexi a xi mahileko loyi wasati, lezaku a alakanyiwa ha xona.
14Zonake a munwe wa vakhume ni vambiri, a tibyako Judasi Iskarioti, i loya ka vapristi va hombe. Mar. 14:10; Lu. 22:3; Joh. 13:2
15A yaku ngalo: Mu ta nzi nyika yini loku nzi mu nyikela ka nwina ke? Va lo mu pimela 30 wa macheleni.
16Hi kona a nga sangula ku lava xikhati xo mu nyikela ha xona.
A Pasika.
17Hi siku go ranga ga mubuzo wa zibaba zi nga hiko na comelo, a vapizani va lota ka Jesu, va taku: U ranza a kuva hi ku longisela kwihi a kuga pasika ke? Ekso. 12:6; Mar. 14:12; Lu. 22:7
18Aku ngalo: Fambani mutini ka munhu wo kari, mu yaku ka yena; A Mugonzisi i ngalo: A xikhati xa mina xi tshinele, nzi taga pasika ndlwini ya wena, zinwe ni vapizani va mina.
19A vapizani va lo maha lezi Jesu a nga va rumile, va longisa pasika.
20Laha na gi hlwile, Jesu i wa tshamile kugeni zinwe ni 12 wa vapizani. Mar. 14:17-21; Lu. 22:14
21Na va kari vaga i te ngalo: Hizinene nzi ngalo ka nwina: A munwe wa nwina i ta nzi tokometa.
22Va lo karateka nguvu, a munwe ni munwani a sangula ku mu wutisa, aku: Hosi, hi mina ke?
23I lo hlamula, aku: Loyi a nusako zinwe na mina lomu ngelweni, hi yena a ta nga nzi tokometa. Tis. 41:9; Lu. 22:21; Joh. 13:18
24A Nʼwana wa munhu wa suka kota lezi ku tsalilweko ha yena; kanilezi i khombo ka munhu loyi a ta nga nyikelwa hi yena! Ku wa hi chuko ka munhu loyi loku a wa nga belekwangi. Tis. 22; Isa. 53; Dan. 9:26
25Judasi loyi a nga mu nyikela, aku: Rabi hi mina ke? Aku kakwe: U wula zona.
26Na va kari vaga, Jesu i lo teka xibaba, a khesa, a xi khema; i lo nyika vapizani aku: Tekani, muga; lexi hi miri wa mina. Mar. 14:22; 1 Kor. 11:23-25; 10:16
27I lo teka a gombe, a bonga, a gi nyika kabye, aku: Nwanani nwentlhe ha gona;
28hakuva lexi hi nkhata wa mina wa xivumelwano xiswa, lowu wu halatelwako a vanyingi a kutsetselelweni ka zionho. Ekso. 24:8; Jer. 31:31; Rom. 5:15
29Nziku ka nwina; Kusukela lezi nzi nga ha tanwa mihanzu ya xivina, kala siku lego nzi ta nga yinwa yi hi yiswa, zinwe na nwina le mufunweni wa Dadani. Mar. 14:25; Miti. 10:41
30Laha na va yimbelele lisimu, va lo huma vaya xitsungeni xa maOliva.
31Zonake Jesu aku ka vona: Nwina nwentlhe mu ta khubeka ha mina wusiku legi; hakuva kutsalilwe ku ngalo: Nzi taba murisi, ni tiyivu ta ntlhambi ti ta hangalaka. Zak. 13:7; Mar. 14:27
32Kanileziloku nzi vukile hi ka vafileko nzi ta mu rangela a kuya Galilea. Xip. 28:7, 10; Mar. 14:28; 16:7
33Pedro i lo hlamula, aku ngalo ka yena: Hambu loku vontlhe va khubeka ha wena, mina cima nzi nga ta khubeka. Lu. 22:34; Joh. 13:38
34Jesu aku ngalo kakwe: Hizinene nzi ngalo ka wena: Gwalegi wusiku, na wu nga se kuba nkuku, u ta nzi kaneta kunharu.
35Pedro aku kakwe: Hambu loku nzi ngafa na wena, nzi nga ta ku kaneta. A vapizani vontlhe va wulawu zalezo.
Getsemane.
36Zonake Jesu i loya navo wutshanwini gi tibyako Getsemane, aku ka vapizani vakwe: Tshamani laha, nza haya lahaya, nzi ya khongela. Mar. 14:32-35; Lu. 22:29
37Yena i lo teka Pedro ni vana vambiri va Zabedi, a sangula ku xaniseka ni ku karateka nguvu.
38Aku ka vona: A muhefemulo wa mina wa xaniseka nguvu, ku khwatsi hi kufa; salani laha, mu rinzela zinwe na mina. Joh. 12:27
39I lo famba mahlweni kutsongwani, a yawa hi nghohe yakwe, a khongela, aku: Dadani, loku zi koteka, a gombe legi a gi hunze ka mina; ahemba na ku nga mahiwi hi kuranza ka mina, kanilezi kota kuranza ka wena. Mar. 14:36; Joh. 12:27; Fil. 2:8
40I lo wuya ka vapizani, a ta va kuma na va etlele wurongo, aku ka Pedro: Kasi mu wa nga zi koti ku rinzela ni hora yinwe zinwe na mina ke?
41Rinzelani, mu khongela, kasi mu nga engheni kuringweni; hakunene a moya wa vumela, kanilezi a nyama yi na ni gome. Mar. 13:33; Efe. 6:18
42I lo suka hi khati ga wumbiri, a ya khongela, aku: Dada, a gombe legi loku gi nga zi koti ku hunza, a handle ka kuva nzi ginwa, a kuranza ka wena a ku mahiwe.
43I lo tlhela kambe a ta va kuma na va etlele wurongo, hakuva a mahlo yabye ma wa tika.
44I lo va siya; a ya khongela hi khati ga wunharu, a wulawula twaleto timhaka.
45Zonake i lo tlhela ka vapizani, aku kabye: Kasi ma ha etlele, mu humula! Langutani, a xikhati xa kuva a Nʼwana wa munhu a nyikelwa mandleni ya vaonhi xi chikele.
46Vukani, hi famba; langutani, loyi a nzi tokometako i le kusuhi.
Jesu a khonwa.
47Na a ha wulawula, Judasi, a munwe wa vakhume ni vambiri, i lota zinwe ni xidlemo xa hombe, xi nga hi ni tisupado ni zigomba, xita hi le ka vapristi va hombe ni masingalakati ya vanhu. Mar. 14:43; Lu. 22:47; Joh. 18:3
48Loyi a mu tokometako i wa va nyikile a xikombiso, aku: Loyi nzi ta nga mu pswopswa, hi yena; mu khomeni.
49Laha na a chikele ka Jesu, i te ngalo: Xewe Rabi! a mu pswopswa. 2 Sam. 20:9
50Jesu aku ngalo kakwe: Xaka, maha lexi u teleko xona. Zonake va lo tshinela va ta tlhateka mandla ka Jesu, va mu khoma. Tis. 41:9; 55:13
51Kanilezi munwe wa lava va nga hi na Jesu, i lo tshambuluta canja gakwe, a hlomula supado yakwe, aba a nanza ga mupristi wa hombe, a mu tsema ndleve. Joh. 18:10
52Jesu aku kakwe: Tlhelisa a supado ya wena; hakuva vontlhe lava va khomako supado va ta lobyiswa hi yona. Gen. 9:6; Kuv. 13:10
53Wo alakanya lezaku a nzi zi koti ku kombela Dadani, a nzi rumela zalezi a khume ni mambiri mabutho ya tingelosi ti hlamusa ke? 2 Tih. 6:17; Dan. 7:10
54Zonake yi ta tatiseka hikuyini a mitsalo, yi nge ngalo zi fanele ku maheka lezi ke? Isa. 53:7
55Hi lexo xikhati Jesu aku ngalo ka xidlemo: Lezi nwina mu tako na mu hlomile tisupado ni zigomba, mu tela ku ta nzi khoma kota muphangi ke? Nzi lo tshama tempeleni masiku ni masiku nzi gonzisa, a mu nzi khomangi.
56Kanilezi zontlhe lezi zi maheka, kasi ku fela ku tatiseka a mitsalo ya vaprofeti. Zonake a vapizani vontlhe va lo mu siya, va tsutsuma. Jesu a lamuliwa hi mupristi wa hombe.
57Lava va nga wa khomile Jesu va lo mu yisa ndlwini ya Kayafasi, a mupristi wa hombe, laha va nga tsombene kona a vatsali hi masingalakati. Mar. 14:53; Lu. 22:54; Joh. 18:12
58Pedro i lo mu lanzela hi le kule, aya hubyeni ya mupristi wa hombe; i lo enghena a tshama zinwe ni malanza, kasi ku wona kumbhela ka zona.
59Zonake a vapristi va hombe ni hubye yontlhe va lo lava a wukustumunyu ga mawunwa ha Jesu, kasi va fela ku mu daya;
60kanilezi a va gi kumangi, hambu lezi ku ngata a vakustumunyu vanyingi va mawunwa. Hi magumo ku lota vavanuna vambiri Deut. 19:15; Mar. 14:55
61vaku: Loyi munhu i te ngalo: Nza zi kota ku khungumula a tempeli ya Nungungulu, nzi yi aketa hi masiku manharu. Xip. 27:40; Joh. 2:19
62A mupristi wa hombe i lo suka, aku kakwe: Xana a ku hlamuli nchumu ke? I mhaka muni va ku kecarako ha yona lava ke?
63Kanilezi Jesu i lo miyela. Ni mupristi wa hombe i te ngalo kakwe: Nza ku hlambanyisa hi Nungungulu, lezaku u hi byela loku u hi Kristu, a Nʼwana wa Nungungulu. Levi 5:1; Isa. 53:7
64Jesu aku kakwe: U wulile zona. Ahembalokoke, nza wula ka nwina, nziku: Anzhako ka lezi mu ta wona a Nʼwana wa munhu na a tshamile hi le reveni ga xinene ga Ntamu, na ata hi marefu ya tilo. Tis. 110:1; Dan. 7:13; Miti. 7:55
65Zonake a mupristi wa hombe i lo hanzula a tinguwo takwe, aku: I wulile nzhukano! Ka ha laveka hikuyini a vakustumunyu ke? Nwina mu yi zwile a nzhukano ya kona.
66Mu alakanya yini nwina ke? Va lo hlamula vaku: Yena i fanelwe hi kufa. Levi 24:16; Joh. 19:7
67Zonake va lo mu phelela nghoheni, va muba; vanwani va lo mu phakata hi mandla, Isa. 50:6; 53:3; Lu. 22:63
68vaku: Kristu, hi vumbele loyi a ku bileko!
Pedro a kaneta Kristu.
69Laha Pedro a nga tshamile lahandle le hubyeni, ku lota kakwe a nanza ga xisati, a taku: Wenawu u wa hi na Jesu wa le Galilea. Mar. 14:66; Lu. 22:55; Joh. 18:16
70Kanilezi i lo kaneta mahlweni ka vona vontlhe, aku: A nzi zi tivi lezi u zi wulako.
71Laha na a humele nyangweni, a munwani wasati i lo mu wona, aku ngalo ka lava va nga hi laho: Loyi munhu kambe i wa hi na Jesu wa le Nazareta.
72I lo kaneta kambe a hlambanya, aku: A nzi mu tivi loyi munhu.
73Hi xikhanzakanya xa lezo ku lota lava va nga wa yimile laho, va taku ka Pedro: Hakunene wenawu u munwe wa vona; a wulawulela ga wena ga ku kombisa. Lu. 22:59
74Zonake i lo sangula ku rukatela ni ku hlambanya, aku: A nzi mu tivi loyi munhu. Kwalaho a nkuku wu loba. Mar. 14:71
75Pedro i lo alakanya a gezu ga Jesu ga ku ngalo: Na wu nga se kuba nkuku, u ta nzi kaneta kunharu. Yena i lo huma, a ya rila nguvu. Mar. 14:30; Lu. 22:61; Joh. 13:38
Currently Selected:
Mateu 26: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.