Mateu 25
25
Mufananiso wa khume ga vanhwana.
1Hi xikhati lexo a mufumo wa tilo wu ta fanana ni khume ga vanhwana, lava va nga teka tikandiya tabye, va huma ku ya khinga muyeni. Efe. 5:29, 30; Kuv. 21:2, 9
2A ntlhanu wa vona va wa hi zipumbu, ni ntlhanu va wa tlharihile. Xip. 13:47; 22:10
3Hakuva lava va zipumbu, laha va nga teka tikandiya tabye, a va tekangi ni mafura;
4kanilezi lava va tlharihileko va lo teka mafura lomu ka mabotori yabye zinwe ni tikandiya tabye.
5Kota lezi muyeni a nga hlwela, vontlhe va lo khudzehela va etlela. 1 Tes. 5:6
6Kanilezi xikari ka wusiku ku lo zwala a gezu giku; Langutani, wata muyeni! Humani muya mu khinga. Xip. 24:31; 1 Tes. 4:16
7A vanhwana vontlhe va lo vuka, va longisa tikandiya tabye. Lu. 12:35
8Lava va zipumbu vaku ka lava va tlharihileko: Hi hungululeni a mafura ya nwina, hakuva a tikandiya ta hina ta timeka.
9Kanilezi a va tlharihileko va lo hlamula, vaku: Ahihi, ma nga kala ku enela hina na nwina. I chuko muya ka lava va xavisako, mu ya ti xavela.
10Na va ha famba va ya xava, i lo chikela muyeni; lava va nga longile va lo enghena zinwe naye mubuzweni wa muchado; li valiwa livati. Lu. 13:25
11Anzhako ku lota lava vanwani vanhwana, va taku: Hosi, Hosi, hi vululele! Xip. 7:21-23
12Kanilezi i lo hlamula, aku: Hizinene nziku ka nwina: a nzi mu tivi. Tis. 5:5; Hab. 1:13; Joh. 9:31
13Hikwalaho rinzelani, hakuva a mu gi tivi siku ni xikhati. Lu. 21:36; 1 Tes. 5:6; Kuv. 16:15
Mufananiso wa titalenta.
14Hakuva ku ta ku khwatsi hi loku munhu na a lava ku enza; i lo vitana a malanza yakwe, a ma nyika xuma xakwe. Lu. 19:12; Xip. 21:33
15I lo nyika ginwe a ntlhanu wa titalenta, a ka ginwani timbiri, ni ka ginwani yinwe; a ginwe ni ginwani kota ntamu wa gona wu tsalangeneko; zonake i lo famba lwenzweni lakwe. Rom. 12:6; Efe. 4:11
16Loyi a amukeleko a ntlhanu wa titalenta, i lo famba a ya ti bhinzulisa, a bhinzula a tinwani ta ntlhanu.
17Hizalezo ni loyi a amukeleko timbiri i lo bhinzula tinwani ta timbiri.
18Kanilezi loyi a nga amukele talenta yinwe i lo famba a ya kela misaveni, a fihla mali ya hosi yakwe.
19Loku ku hunzile masiku yo tala, yi lo wuya a hosi ya malanza lawo, yi ta hlayelana nawo.
20Ku lota loyi a nga amukele a ntlhanu wa titalenta, a neha a tinwani ta ntlhanu, aku: Hosi, u nzi nyikile a ntlhanu wa titalenta; languta, nzi bhinzule tinwani a ntlhanu wa titalenta.
21A hosi yakwe yi te ngalo ka yena: U mahile khwatsi, nanza go saseka gi tsumbekileko; u wa tsumbekile ka zilo zi tsongwani, nzi ta ku yimisa hehla ka zinyingi; enghena kutsakeni ka hosi ya wena. Lu. 12:44; 2 Tim. 2:12
22Loyi a nga amukele a titalenta timbiri i lota a ta ku ngalo: Hosi, u nzi nyikile titalenta timbiri; languta, nzi bhinzule tinwani titalenta timbiri.
23A hosi yakwe yi te ngalo ka yena: U mahile khwatsi, nanza go saseka gi tsumbekileko; u wa tsumbekile ka zilo zi tsongwani, nzi ta ku yimisa hehla ka zinyingi; enghena kutsakeni ka hosi ya wena.
24I lota ni loyi a amukeleko a talenta yinwe, aku ngalo: Hosi, nzi wa ku tiva lezaku u munhu wa mona, u tshovelako laha u nga byalangiko kona, u wungeletela laha u nga heherangiko kona;
25nzi lo chava, nzi su famba nzi ya fihla a talenta ya wena misaveni; wangabye, teka za wena.
26Kanilezi a hosi yakwe yi lo hlamula yiku ka yena: Wena nanza go biha ni ga kuloloha; u wa zi tivile lezaku nzi tshovela laha nzi nga byalangiko kona, nzi wungeletela laha nzi nga heherangiko kona;
27hikwalaho u wa fanelwe hi ku veka a mali ya mina bhankeni, kasi a kuwuyeni ka mina ngha nzi amukele a za mina zinwe ni bhinzu.
28Mu tekeleni a talenta, mu yi nyika ka loyi a nga ni khume ga titalenta;
29hakuva kani hi mani a nga nazo i ta nyikiwa, ava ni za kutala; kanilezi ka loyi a nga hiko nazo, hambu ni lexi a nga naxo xi ta tekiwa. Mar. 4:25; Lu. 8:18; 19:26
30Gi hoxeni munyameni wa lahandle a nanza gi nga vuniko nchumu, laha mikosi yi ta ngava kona ni kuge-tsela ka meno.
A kulamulwa, ka matiko.
31Kanilezi laha a Nʼwana wa munhu a ta ngata hi kungangamela kakwe, ni tingelosi tontlhe ti hi zinwe naye; zonake i ta tshama xitshanwini xakwe xa kungangamela. Zak. 14:5; Miti. 1:11; Kuv. 1:7
32Ku ta tsomhanyiswa a matiko wontihe mahlweni ka yena; i ta va hambanyisa a vanwe ka vanwani, kota a murisi a phakako tiyivu ka timbuti. 2 Kor. 5:10; Kuv. 20:12
33I ta veka tiyivu reveni gakwe ga xinene, kanilezi a timbuti hi le reveni ga xibhabha.
34Zonake a Hosi yi taku ka vona lava va nga reveni gakwe ga xinene: Ngonani nwina mu katekisilweko hi Dadani, mu taga a tshomba yi nga wona mufumo lowu wu longiselelweko nwina kusukela kusanguleni ka misava. Rom. 8:17; Kuv. 21:7; 1 Kor. 2:9
35Hakuva nzi wazwa a ndlala, mu lo nziha kuga; nzi wazwa tora, mu lo nziha a kunwa; nzi wa hi mupfhumba, mu lo nzi rurela; Jak. 1:27; 3 Joh. 5
36nzi wa hi ni wuna, mu lo nzi ambexa; nzi wa babya, mu lo ta nzi kamba; nzi wa hi le paxweni, mu lota ka mina.
37Zonake a valulamileko va ta mu hlamula, vaku: Hosi, hi ku wonile rini na uzwa ndlala, hi ku phamela ke? kutani na uzwa tora, hi kuha kunwa ke?
38Hi ku wonile rini na u hi mupfhumba, hi ku rurela ke? kutani u hi ni wuna, hi ku ambexa ke?
39Hi rini hi nga ku wona na u kari u babya, kutani u hi le paxweni, hita ka wena ke?
40A Hosi yi ta hlamula yiku ka vona: Hizinene nzi ngalo ka nwina: Kota lezi mu zi mahileko ka munwe wa lava vamakabye va mina va tsongwani, mu zi mahile ka mina. Mav. 14:31; Mar. 9:41; Maheb. 6:10
41Zonake i taku ngalo ka lava va nga reveni gakwe ga xibhabha: Sukani ka mina, nwina mu rukatelweko, mu ya nzilweni wa pinzukelwa lowu wu longiselweko Satani ni tingelosi takwe; Tis. 6:8; 2 Ped. 2:4
42hakuva nzi wazwa ndlala, a mu nzi nyikangi zakuga; nzi wazwa tora, a mu nzi nyikangi a kunwa;
43nzi wa hi mupfhumba, a mu nzi rurelangi; na nzi hi ni wuna, a mu nzi ambexangi; nzi wa babya, nzi hi paxweni, a mu tangi mu ta nzi kamba.
44Zonake vonawu va ta hlamula, vaku: Hosi, hi ku wonile rini na uzwa ndlala, kutani uzwa tora, kutani u hi mupfhumba, kutani u hi ni wuna, kutani na u babya, kutani na u hi paxweni, hi nga ku tireli ke?
45Zonake i ta va hlamula, aku: Hizinene nzi ngalo ka nwina: Kota lezi mu nga kala ku zi maha ka munwe wa lava va tsongwanyani, a mu zi mahangi ka mina. Zak. 2:8; Miti. 9:5
46Ni lava va taya kutsayisweni ka pinzukelwa; kanilezi a valulamileko va taya wutomini ga pinzukelwa, Dan. 12:2; Joh. 5:29
Currently Selected:
Mateu 25: TSC72
Highlight
Share
Copy
Want to have your highlights saved across all your devices? Sign up or sign in
Tshwa Bible © Bible Society in Mozambique, 1972, 2007.